בעזרת ה' יתברך
יום ב' פרשת מטות מסעי, כ"ו תמוז, שנת תשפ"ב לפרט קטן
לכבוד מיין טייערער ... נרו יאיר
וואויל איז דיר און וואויל איז דיין חלק אז דו פארשפרייטסט די עצות און חיזוק פון רבי'ן פאר די גאנצע וועלט, סיי מיט די הערליכע גליונות און סיי מיט די האט-ליין, שיעורים, חיזוק יומי וכו' וכו'.
געב אכטונג ווען דו ביסט מפרסם די שיעורים - עס זאל נישט ארויסקומען פון דעם קיין מחלוקת, נישט אלעס וואס מען רעדט צווישן די פיר ווענט פון ישיבה דארף מען מפרסם זיין. האלט קאפ וואס די נקודה פונעם גליון און חיזוק יומי איז, די נקודה איז נאר צו מחזק זיין אידישע קינדער; ווי לאנג דו ביסט מפרסם חיזוק און אמונה - איז גוט, אז מען איז מפרסם אנדערע זאכן אדער ביטול צו אנדערע פלעצער - איז דאס נישט "חיזוק יומי", נאר "פליקן יומי", "שטעכן יומי"; איך בעט דיר זייער, געב אכטונג מען זאל נישט נוצן מיינע שיעורים וויי צו טון אנדערע מענטשן.
מוהרא"ש האט מיר געשריבן מיט יארן צוריק איך זאל זיך זייער אכטונג געבן מען זאל נישט פארשפרייטן שיעורים וואס מען רעדט וועגן אנדערע חסידות'ן, פון אנדערע רבי'ס, ווייל דאס מאכט נאר מחלוקת, עס איז נישט מקרב קיינעם, נאר מרחק.
דער אייבערשטער זאל העלפן מיר זאלן שוין זוכה זיין צו אליהו הנביא, וואס די הייליגע חכמים זאגן (עדיות ח, ז): "אֵין אֵלִיָּהוּ בָא לֹא לְרַחֵק וכו', אֶלָּא לַעֲשׂוֹת שָׁלוֹם בָּעוֹלָם".