בעזרת ה' יתברך
יום ד' פרשת במדבר, ראש חודש סיון, שנת תשפ"א לפרט קטן
לכבוד מיין טייערער ... נרו יאיר
האסט געהערט די שרעק וואס טוט זיך יעצט אין ארץ ישראל, עס פליען ראקעטן אין גאנץ ארץ ישראל; די אראבער זענען צעווילדעוועט, עס איז סכנות נפשות. עס צינדן זיך אן די פייפערס, אלע לויפן אין די בונקערס, מען ווארט ביז מען זעט אז מען קען שוין ארויסקומען.
דער רבי האט אונז געלערנט אז פון יעדע זאך זאלן מיר ארויסנעמען רמזים ווי אזוי צו דינען דעם אייבערשטן.
דאס דארף אונז דערמאנען, ווען עס פליען באמבעס, עס קומען שווערע נסיונות, עס גייט איבער וכו' וכו', - דארף מען מקיים זיין (ישעיה כו, כ): "לֵךְ עַמִּי בֹּא בַחֲדָרֶיךָ [...], חֲבִי כִמְעַט רֶגַע עַד יַעֲבָר זָעַם", דער מענטש דארף זוכן א באהאלטענע פלאץ, זיך דארט באהאלטן און דארטן זיך אויסוויינען צום אייבערשטן, בעטן דעם אייבערשטן ער זאל רחמנות האבן אויף אים. דאס לערן איך פונעם בונקער, די עצה צו ווערן געראטעוועט פון שלעכטס - איז התבודדות, זיך אויסשמועסן מיט'ן אייבערשטן.
זיי נישט קיין בטלן, פאלג דעם רבי'ן; דו זעסט דאך אז עולם הזה איז נישטא, וויפיל דו פרובירסט צו כאפן די עולם הזה - לויפט עס אוועק פון דיר, פרוביר צו כאפן יענע וועלט - תכלית.