בעזרת ה' יתברך - יום ד' פרשת וארא, כ"ה טבת, שנת תשפ"ו לפרט קטן
... נרו יאיר
איך האב ערהאלטן דיין בריוו.
אז בחורים רעדן צו דיר ניבול פה זאלסטו אנטלויפן פון זיי, נישט קיין חילוק אויב זיי רעדן אפענע ניבול פה אדער כמו ניבל פה; געב זיך אכטונג פאר דיין לעבן.
גיי צום מגיד שיעור און זאג אים אז עס איז דיר ביטער, עס זענען דא בחורים וואס רעדן ניבול פה, ווארט נישט עס זאל זיין צו שפעט, גיי שוין בעטן הילף, און אז מען מאכט זיך נישט וויסנדיג זאלסטו נישט גיין מער אין ישיבה, ווייל ניבול פה איז אזוי געפערליך; חכמינו זכרונם לברכה זאגן (שבת לג.) און דער הייליגער רבי ברענגט דאס (ספר המדות אות ניבול פה, סימן ג): "בַּעֲווֹן נִבּוּל פֶּה", דורך די עבירה פון רעדן ניבול פה, "צָרוֹת וּגְזֵרוֹת מִתְחַדְּשׁוֹת", קומען ביטערע צרות און נייע שלעכטע גזירות אויף די וועלט; "וּבַחוּרֵי יִשְׂרָאֵל מֵתִים חַס וְשָׁלוֹם", יונגע קינדער שטארבן חס ושלום, "וִיתוֹמִים וְאַלְמָנוֹת צוֹעֲקִים וְאֵינָם נַעֲנִין", אלע שרייען און קיינער הערט נישט זייער געשריי.
טייערער ליבער ..., איך בעט דיר זייער אנטלויף פון חברים וואס רעדן ניבול פה, מען פארלירט אלעס דורך ניבול פה, דער רבי זאגט (שם, סימן ד): "הַמְנַבֵּל פִּיו, אֲפִילּוּ חוֹתְמִין עָלָיו גְּזַר דִּין שֶׁל שִׁבְעִים שָׁנָה לְטוֹבָה, הוֹפְכִין עָלָיו לְרָעָה", ווער עס רעדט ניבול פה, אפילו מען האט אים פארזיגלט א גוטע גזירה פאר זיבעציג יאר, צערייסט מען די גוטע גזירה און ער ברענגט אויף זיך שלעכטס, "גַּם מַעֲמִיקִין לוֹ גֵּיהִנּוֹם", אויך אז מען רעדט ניבול פה מאכט מען זיך טיפער דעם גיהנום.
דער אייבערשטער זאל העלפן זאלסט האבן הצלחה אין אלע ענינים.