בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן
מיין טייערער ... נרו יאיר, ירושלים
איך האב ערהאלטן דיין בריוו.
עס איז מיר א וואונדער אז דו טראכסט אז איך בין נישט צופרידן פון דיר, און נאך אסאך מחשבות וואס צעברעכן דיר; וואס עפעס זאלסטו טראכטן אזעלכע מחשבות? פארוואס זאל איך דיך נישט דארפן?!
עצה טובה, יעדעס מאל עס קומט דיר אריין א מחשבה אז מען דארף דיך נישט; דער רבי דארף דיך נישט, מוהרנ"ת דארף דיך נישט וכו' - זאלסטו זיך שטארקן און העלפן מיט נאך עפעס דעם רבי'ן, און אז יעצט איז דיין זאך צו העלפן אין חדר מיט די קינדער - זאלסטו צוריק שלאגן די משוגע'נע מחשבות מיט נאך מער טון מיט די קינדער, זיי געבן ליבשאפט און זיי לערנען די ריינע אמונה, יראת שמים און מידות טובות.
מוהרא"ש זאגט, ווען דער יצר הרע געבט א קלאפ דעם מענטש - געבט מען נישט צוריק אַ קלאפ, מען דארף אים געבן צוויי דריי קלעפ; אז ער קומט מיט זיינע מעשיות, מיט חלישות הדעת, מיט קטנות המוחין, גייט מען נישט סתם ווייטער אן, נאר מען טוט מער ווי וואס מען האט געטון ביז אהער.
איך האב דיך ליב און איך בין דיר זייער מכיר טובה פאר אלעס וואס דו העלפסט מיר, און זאג פאר דיינע מחשבות: "יעצט האב איך נישט קיין צייט פאר ענק, איך בין פארנומען מיט די חדר"; לויף מיט שמחה צו די קינדער, מאך זיי פרייליך, פרעדיג אין זיי אמונה ויראת שמים און מידות טובות, אזוי זאלסטו טון דיין גאנץ לעבן.
דער אייבערשטער זאל העלפן זאלסט האבן הצלחה אין אלע ענינים.