בעזרת ה' יתברך - יום א' פרשת בהעלותך (שלח בא"י), ט"ו סיון, שנת תשפ"ו לפרט קטן
טייערער ... נרו יאיר
איך האב ערהאלטן דיין בריוו.
קיינמאל זאלסטו נישט שלאגן א צווייטן, און אז מען האט דיך געשלאגן – זאלסטו חס ושלום נישט צוריק שלאגן.
די הייליגע חכמים זאגן (סנהדרין נח:), אז מען שלאגט א איד איז אזוי ווי מען שלאגט כביכול דעם אייבערשטן; און אז קינדער טוען דיך וויי – איז דאס נישט קיין תירוץ צו שלאגן, אויף דעם איז דא נאך א לאו, פון ולא תקום (ויקרא יט, יח).
טייערער ..., דאס ווייסטו אז מען האט זייער שטארק גע'רודפ'ט דעם הייליגן רבי נתן, מען האט אים גע'מסר'ט אז ער דרוקט ספרים ביי זיך אין שטוב, דעמאלט איז געווען פארבאטן צו דרוקן אנעם צענזור. מען האט געלייגט רבי נתן אין תפיסה, מען האט אים זייער שטארק גע'רודפ'ט, אמאל האבן די גרויסע שישקעס וואס האבן געוואוינט אין אומאן, די גרויסע פראפעסארן, דאקטאר לאנדאו, הירש בער וכת דילי' געזאגט פאר מוהרנ"ת אז זיי האבן א כח צו רעדן ביי די רעגירונג צו פארטרייבן אלע מתנגדים קיין סיביר, (די שישקעס פלעגן זיך דרייען ביים הייליגן רבי'ן, זיי האבן געוואלט העלפן מוהרנ"ת), רבי נתן האט נישט מסכים געווען, ער האט געזאגט: "איך האב מקבל געווען פון הייליגן רבי'ן, ענדערש זיין פון די נרדפים ווי איידער זיין פון די רודפים".
זיי זיך מקבל מער קיינמאל נישט צו ניצן הענט אויף שלאגן, שטופן, ציפן און אראפווארפן וכו', בעט דעם אייבערשטן אז דו זאלסט זיין פרייליך, ווייל אלע מחלוקות קומט פון קטנות הדעת וואס קומט פון עצבות, פון נישט זיין צופרידן; בעט דעם אייבערשטן דו זאלסט זיין פרייליך און מאך פרייליך אלע חברים, מאך גוט פאר אלע קינדער.
איך האף צום אייבערשטן אז עס וועט נישט זיין מער אין חדר קיין שום קריגערייען, אלע קינדער וועלן זיך ליב האבן.