בעזרת ה' יתברך - יום ג' פרשת שמות, י"ז טבת, שנת תשפ"ו לפרט קטן
לכבוד ... נרו יאיר
איך האב געהערט דיין מעסעדזש.
זעט אויס אז איך דארף דיך מער מחזק זיין צו האבן סבלנות צו בני הנעורים, ווייל די אלע וואס זענען עוסק מיט בני הנעורים דארפן אייזערנע סבלנות זיי צו קענען דילדן און אויסווארטן ביז מען זעט די פירות.
איך בעט דיר זייער, קוק אויף די קינדער און די בחורים מיט סבלנות, און אז זיי שפרינגען און טאנצן זאלסטו זיך נישט גיפטן און בייזערן, זאלסט וויסן אז דאס זענען קינדער, דאס זענען בחורים, און עס איז געזונט זיי זאלן שפרינגען און טאנצן, זיי זאלן זיך אויסגעבן, און אז זיי גייען און קומען ביי די שיעורים זאלסטו רעדן מיט זיי פון דאס חשיבות פון מיט האלטן א סדר, און אז דו וועסט רעדן צו זיי ווי מען רעדט צו ערוואקסענע מענטשן - וועלן זיי ווערן ערוואקסן.
געב איבער פאר די בחורים וואס לערנען מסכת תענית און זיצן אויבן אין שטיבל אין פאליש, און קומען נישט צו די שיעורים פונעם מגיד שיעור, אז עס שטערט מיר, און נישט דאס איז געווען מיין כוונה ווען איך האב זיי מעודד געווען צו לערנען מסכת תענית יעדן טאג בימי השובבי"ם; דאס קענען זיי טון אין די צייט ווען מען שמועסט און מען בטל'ט צייט, איך וויל אז יעדער בחור זאל זיצן ביי די שיעור, סיי פארמיטאג און סיי נאכמיטאג, בלי יוצא מן הכלל.
דער אייבערשטער זאל העלפן זאלסט האבן הצלחה אין אלע ענינים.