בעזרת ה' יתברך - יום ה' פרשת בהעלותך, ט"ז סיון, שנת תשפ"ה לפרט קטן
טייערער ... נרו יאיר
איך האב ערהאלטן דיין בריוו.
אינדערפרי ביי ברכת התורה זאלסטו זיך אויסוויינען, און אזוי אויך ביי אהבת עולם זאלסטו לאזן אפאר טרערן, און אויך זאלסטו גיין פארטאגס זיך מתבודד זיין, וויין צום אייבערשטן אז דו זאלסט זוכה זיין צו פארשטיין דאס לערנען און קענען מברר זיין שמעתתא אליבא דהילכתא. אזוי ווי דער רבי זאגט (לקוטי מוהר"ן חלק א', סימן ח): "אַךְ לִזְכּוֹת לְזֶה הַשֵּׂכֶל שֶׁיּוּכַל לָלוּן לְעָמְקָהּ שֶׁל הֲלָכָה" ווי אזוי איז מען זוכה צו קענען צוטרעפן צום אמת, וויסן וואס איז מותר און וואס איז אסור? "הוּא עַל יְדֵי תְּפִלָּה" דאס איז דורך תפילה, "כִּי מִשָּׁם נִמְשָׁךְ הַשֵּׂכֶל", ווייל דורכדעם וואס מען וויינט זיך אויס צום אייבערשטן מען זאל פארשטיין דאס לערנען - ווערט פון דעם אזוי ווי א קוואל וואסער וואס טרינקט אן די פעלד, אזוי ווי דער רבי זאגט (דארט): "וּמֵהֵיכָן מְקַבְּלִין הַחָכְמָה וְהַשֵּׂכֶל, שֶׁהוּא בְּחִינַת הַמַּעְיָן, הוּא מֵהַתְּפִלָּה" דאס באקומט מען דורך תפילה, אזוי ווי עס שטייט אין פסוק (יואל ד, יח): "'וּמַעְיָן מִבֵּית ה' יֵצֵא' הוּא הַתְּפִלָּה", דורך בעטן און דורך וויינען צום אייבערשטן איז מען זוכה צו אויסארבעטן הלכה למעשה.
דער אייבערשטער זאל העלפן זאלסט האבן הצלחה אין אלע ענינים.