בעזרת ה' יתברך
ג' פרשת וישב, כ' כסליו, שנת תשפ"ב לפרט קטן, פה סיגעט
לכבוד מיין טייערער ליבער ... נרו יאיר, מלמד קרית ברסלב
איך האב באקומען דיין מעסידזש.
ווער נישט פארלוירן, די ערשטע זאך פרעג אויס די קינדער, יעדן איינעם פריוואט – וואס איז געווען; אויך דעם קינד וואס דער טאטע האט דיר גערופן דערציילן.
אויב איז אמת אז זיי טוען דאס, זיי באהאלטן זיך און ציען זיך אראפ די הויזן, זיי שפילן זיך און טוען עבירות – זאלסטו רעדן צו זיי באזונדער זייער שטרענג, און זאגן אז אויב דו וועסט הערן נאכאמאל אז מען טוט דאס וכדומה – וועסטו באשטראפן, און אויב דו וועסט כאפן א קינד טון דאס מיט אנדערע קינדער – זאלסטו אים געבן א פאטש.
דאס דארף דיר מחזק זיין צו רעדן צו די קינדער פון קדושת הברית, קדושת היסוד. רעד צו זיי קלארע ווערטער, מען קען נישט זאגן: "קיינער טאר דיר נישט אנכאפן"; קינדער פארשטייען נישט מאמר סתום. די הייליגע חכמים זאגן (שבת קד.): "מ"ם פתוחה מ"ם סתומה, מאמר פתוח מאמר סתום", עס זענען דא פעלער וואס מען דארף רעדן קלאר אפן, זאג זיי: "קיינער קען נישט אראפציען דיין הויזן, דיר אנכאפן ביים אות ברית קודש; עס איז א גרויסע עבירה צו לייגן די הענט אויפ'ן ברית און זיכער נישט זיך באהאלטן מיט אנדערע קינדער, זיך אנכאפן, זיך שפילן מיט'ן ברית".
אויב דו ווערסט געוואר אויף א קינד אז ער טוט דאס – זאלסטו דאס אפשטעלן ווי פריער.
איך קום דעם שבת אין שטעטל, איך וועל רעדן מיט דיר פנים בפנים.