בעזרת ה' יתברך - יום ב' פרשת שלח, כ"ג סיון, שנת תשפ"ג לפרט קטן
לכבוד מיין טייערער ... נרו יאיר
איך וויל דיך מחזק זיין זאלסט צוריק אנהויבן לערנען משניות.
חכמינו זכרונם לברכה זאגן (משניות קנים ג, ו) דער וואס לערנט, "כָּל זְמַן שֶׁמַּזְקִינִין", ווי עלטער ער ווערט, "דַּעְתָּן מִתְיַשֶּׁבֶת עֲלֵיהֶן", ווערט ער קלוגער, "זִקְנֵי עַם הָאָרֶץ", און די וואס לערנען נישט, "כָּל זְמַן שֶׁמַּזְקִינִין", ווי עלטער ער ווערט, "דַּעְתָּן מִטָּרֶפֶת עֲלֵיהֶן", ווערט ער נארישער און נארישער; ווייל נאר די תורה מאכט צופרידן, נאר די תורה געבט סיפוק.
טייערער ברודער, נעם צוריק דעם משניות, באניי זיך, אנשטאט האלטן דעם טעלעפאן און זוכן און קוקן נארישקייטן - נעם די הייליגע משניות און זאג נאך א משנה, נאך א פרק, דאס וועט דיר געבן חן; ווער עס לערנט תורה - באקומט חן, אזוי ווי עס שטייט (משלי ה, יט): "'אַיֶּלֶת אֲהָבִים וְיַעֲלַת חֵן', שֶׁמַּעֲלַת חֵן עַל לוֹמְדֶיהָ" (עירובין נד:).
אויך זאלסטו יעדן טאג גיין אין מקוה, זיי שטארק מיט די צוויי זאכן, ח"י פרקים משניות און זיך טובל'ען יעדן טאג אין מקוה. אז דו וועסט זיין שטארק אין דעם - וועסטו זייער מצליח זיין.