בריוון פונעם ראש ישיבה שליט"א

בעזרת ה' יתברך - יום א' פרשת נח, כ"ה תשרי, שנת תשפ"ה לפרט קטן

לכבוד ... נרו יאיר, קרית ברסלב

האסט מיר דערציילט אז דו האסט געטראפן אן ארבעט, און דער בעל הבית האט זיך אויסגענומען מיט דיר אז דו קענסט נאר ארבעטן ביי אים אויב דו ווארפסט אוועק דיין סמ'טעלעפאון, דו קענסט קומען נאר מיט א כשר'ע טעלעפאן; האסט מיר אזוי פרייליך געמאכט, סיי אז דו האסט געפונען א פרנסה, און סיי אז דו וועסט אנהויבן לעבן ווי א איד דארף לעבן.

יעצט וועט זיך אנהויבן ביי דיר ישועות און רפואות, ווייל ווי נאר מען לייגט אוועק די געטשקע - געבט זיך אלעס א דריי אויף לטובה.

לכבוד די נייע יאר זיי זיך מקבל נישט צו רעדן ביים דאווענען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת נח, כ"ח תשרי, שנת תשפ"ה לפרט קטן

לכבוד ... נרו יאיר

טו וואס נח האט געטון, ווען די גאנצע וועלט איז געווען אזוי געפאלן, "כי השחית כל בשר את דרכו" וגו', ער האט געמאכט א תיבה; דאס מיינט מען תיבות התפילה, ער האט געניצט די זאך פון התבודדות ותפילה, "את האלקים התהלך נח", נח איז געגאנגען מיטן אייבערשטן, ער האט גערעדט צום אייבערשטן, זיך מתבודד געווען צום אייבערשטן; נאר אזוי איז ער געראטעוועט געווארן פון פגם הברית רחמנא לצלן.

איך בעט דיך זייער, מיר זענען יעצט ארויס פון די הייליגע טעג, בלייב ריין און הייליג, קוק נישט קיין מאוויס; וואלסטו געזען וואס איין ראי' אסורה טוט מיט די נפש, רוח ונשמה, ווי עס ווערט שווארץ און פארברענט - וואלסטו זיכער נישט געקוקט. איך בעט דיך, ראטעווע זיך, ראטעווע דיין נשמה, קוק נישט קיין קליפס, מאוויס, אויך נישט אידישע זאכן, ווייל אזוי ארבעט דער יצר הרע, ער ארבעט מיט א פלאן; קוק נאר דאס, און טו נאר דאס, "היום אומר לו עשה כך", היינט זאגט ער אים טו דאס "ומחר אומר לו עשה כך", און מארגן זאגט ער אים טו נאר דאס, "עד שאומר לו", ביז ער זאגט אים, "לך עבוד עבודה זרה", גיי דין עבודה זרה, רחמנא לצלן.

נעם נישט אריין אין שטוב דיין ארבעטס טעלעפאן, טייל אפ די ארבעט מיט די פרנסה, בוי דיין לעבן געזונט; ארבעט אין די שעות פון ארבעט און נאכן ארבעטן לייג אוועק דיינע כלים אין אפיס, און גיי אהיים און אין שול, זיי א איד, זיי א טאטע, זיי א מאן, זיי א מענטש מיט א קלארן פארשטאנד.

טו וואס נח האט געטון, ער האט געזען ווי דער וועלט ווערט חרוב, "כי השחת כל בשר את דרכו על הארץ", די דור המבול איז געווען איין שטיק ניאוף, אזוי ווי די היינטיגע דור, האט ער זיך געמאכט א תיבה, ער האט האט גערעדט ווערטער צום אייבערשטן, טו דו אויך אזוי, גיי התבודדות, גיי שריי צום אייבערשטן: "טאטע איך וויל זיין א איד, טאטע איך וויל נישט טון קיין עבירות, טאטע איך וויל נישט פוגם זיין בברית, איך וויל ריינע אויגן, ריינע מחשבות".

מארגן וועט זיין א שיעור, הלואי וועסטו קומען זיך אויפפרישן מיט דעם רבינ'ס עצות און התחזקות.

ווען דו גייסט איינקויפן פאר שבת, זאלסטו מער נישט קויפן קיין שום 'ליין מאטריאל', נעם נישט אריין אין שטוב 'ליין מאטריאל', האלט דיין שטוב ריין פון פרעמדע השקפות, זע דיין שטוב זאל זיין געבויט אויפן רבינ'ס ווערטער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת נצבים וילך, כ"ב אלול, שנת תשפ"ד לפרט קטן

מרת ... תחי'

איך האב ערהאלטן אייער בריוו.

עס שטערט מיר און עס שטערט אויך אנדערע ווען מען קומט זיך צוזאמען צו די פרויען צאמקום, מען הערט שיינע חיזוק ווי אזוי מוהרא"ש און אלע צדיקים לערנען ווי א אידישע שטוב זאל זיך פירן, אז א אידישע מאמע זאל נישט האבן קיין סמארט-טעלעפאון; וואלט ווען געווען דרך ארץ'דיג אז מען זאל כאטשיג נישט ארויסנעמען גלייך נאכן שיעור און ביים שיעור די סמ'טעלעפאון, און זיכער נישט זיך צאמזעצן מיט אפאר פרויען מיט סמ'טעלעפאונס, עס קען זיך אנזען פאר אנדערע פרויען ווי מען גרינגשעצט אין די דיבורים.

וואס מען טוט אין שטוב איז איין זאך, און אודאי ווען מען האט די שווערע נסיון פון זיך אפגעוואוינען פון די סמ'טעלעפאון וואס קלעבט מער ווי די שטערקסטע קלעב, און אפילו נאכן הערן דרשות ווארפט זיך עס נישט אזוי גרינג אוועק, מען דארף אסאך בעטן דעם אייבערשטן מען זאל האבן א ריינע שטוב געבויט אויף יראת שמים, אבער ביי א צאמקום, און אודאי ווען מען האט יעצט גערעדט חיזוק מיט אזויפיל יראת שמים, אז די סמ'טעלעפאון שטערט פון האבן אמת'ע ליבשאפט, די סמ'טעלעפאון שטערט פון זיין א וואוילע פרוי, אן איבערגעגעבענע מאמע, און אז נאכן שיעור נעמט מען ארויס די טעלעפאונס - טוט מיר דאס וויי, עס קען זיך אויסזען ווי מען גרינגשעצט אין די צאמקום.

איך האף צום אייבערשטן איר וועט אננעמען די בריוו פאזיטיוו, נישט ווי איך וויל מוסר זאגן, אדער צעקלאפן, אדער חס ושלום אוועק שטופן פון היכל הקודש, איך שרייב עס נאר ווייל איך ווייס איר מיינט נישט קיין שלעכטס, איר כאפט נישט וואס איר טוט.

יעצט קומט א נייע יאר, זאלט איר בעטן דעם אייבערשטן: "הייליגער באשעפער איך וויל זיין הייליג, איך וויל פאלגן צדיקים, איך וויל האבן גוטע פרענדס, איך וויל האבן א שיינע שטוב מיט אמת'ע שלום בית", עס איז דא שטיבער וואס האבן אפשר שלום בית, אבער עס איז דא אמת'ע שלום בית, אמת'ע ליבשאפט; דאס איז נאר ווען מען האט יראת שמים, מען האט תמימות, און אמונת חכמים.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת נצבים וילך, כ"ב אלול, שנת תשפ"ד לפרט קטן

מרת ... תחי'

לכבוד די נייע יאר זאלט איר אוועק ווארפן די סמארטפאון, עס איז נישט גוט פאר אייך צו האבן א סמארטפאון; איר האט ליכטיגע קינדער, איר טארט עס נישט טון פאר זיי.

איך ווייס אז עס איז זייער א שווערע נסיון, איינמאל מען האט דאס און מען איז צוגעקלעבט צו דעם וכו', מיט חבר'טעס וכו' - איז זייער שווער דאס אפצולאזן, אבער גלייבט מיר, דאס איז נאר ווילאנג מען האט דאס, די רגע וואס מען ווארפט אוועק די טעלעפאן - ווערט מען א באפרייטער מענטש.

איך געדענק נאך יארן צוריק ווען איר זענט געווען אזוי שטארק, איר האט געהאט שטארקע פרינציפן נישט אריין צו נעמען אין שטוב א לעפטאפ וכו'; לכבוד די נייע יאר זאלט איר אוועק ווארפן די סמ'טעלעפאון.

אויך זאלט איר זיך מתבודד זיין אויב די חבר'טעס וואס איר האט וכו' - זענען גוט פאר אייך, אויב עס ברענגט אייך צו זיין א בעסערע מאמע, א בעסערע ווייב; נאר מיט התבודדות ווייסט מען אויב מען גייט אויף א גוטע וועג.

דער אייבערשטער זאל אייך געבן א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת כי תבוא לאומאן, י"ד אלול, שנת תשפ"ד לפרט קטן

לכבוד ... נרו יאיר, קרית ברסלב

איך האב ערהאלטן דיינע מעסידזשעס.

וואויל איז דיר און וואויל איז דיין חלק אז דו ביסט א מגיד שיעור פאר בחורים, דו לערנסט מיט זיי תורה און יראת שמים, רוב טאג גייט אריבער מיט הייליגע ארבעט, איך בין מתפלל פאר דיר דו זאלסט מצליח זיין מיט יעדן איינציגסטן תלמיד.

איך וויל דיר בעטן, איך וויל נישט די בחורים זאלן האבן טעלעפאונס וואס מען קען זען דערויף ווידיא, א טעלעפאן אהיים צו רופן - קענען זיי האבן, אבער נישט מער פון דעם.

זע אז אונזערע ד' אמות זאלן זיין ריינע, די בחורים קענען נישט האבן קיין טעלעפאן וואס מען קען שיקן בילדער און ווידיא.

פיר די ישיבה מיט הארץ, באנעם זיך צו יעדן תלמיד מיט געפיל.

ווייז דעם בריוו פאר אלע תלמידים.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת כי תבוא לאומאן, י"ד אלול, שנת תשפ"ד לפרט קטן

לכבוד מיין טייערער ... נרו יאיר

איך האב ערהאלטן דיין בריוו.

דו שרייבסט אין די בריוו: "מען פרעגלט מיר אויס פון הימל פון אלע זייטן"; איך מיין דו ווייסט נישט וואס מיינט פרעגלען, וואלסטו געוויסט וואס מענטשן גייען אריבער, וואלסטו געוויסט וואס פאר א צרות עס איז דא אויף די וועלט - וואלסטו געטאנצן קאדאטשקע בייטאג און ביינאכט, וואלסט געזאגט און געשריבן: "דער אייבערשטער איז אזוי גוט צו מיר, דער אייבערשטער געבט מיר נאר גוטס".

דו ווייסט נישט וואס צרות מיינט, ווייל אז די ווייב וויינט א האלבע נאכט - איז דאס נישט דיך פרעגלען פון הימל; וואס איז אז די ווייב וויינט? וואס איז אז די ווייב שרייט? דאס איז נישט קיין פרעגלען, דאס איז נישט קיין צרות; דאס איז די לעבן, און דאס איז די פליכט אויפן מאן, פרייליך מאכן די ווייב, דאס איז נישט קיין פרעגלען. און אז דו גייסט יעצט אריבער א שווערע צייט מיט פרנסה - איז נאך אויך נישט עק וועלט, און אז דו דארפסט באצאלן גרויסע קנסות פאר די קאמפעני וכו' וכו' - איז אויך נישט עק וועלט; דאך ביסטו געזונט, דאך ביסטו חתונה געהאט, און נאך טויזנטער גוטע זאכן וואס דו האסט.

פארליר זיך נישט, באלד קומט גרויס שפע, דו טו נאר דיינס מיט גרויס עקשנות, דו קום אין שול דאווענען די דריי תפילות מיט די גרעסטע עקשנות, זאל זיין וואס זאל זיין. לאז דיין טעלעפאן אין קאר, פלאג זיך אויס פון די גאנצע וועלט, דאווען צום באשעפער, דאנק אים און בעט אים ער זאל דיר העלפן, זאלסט האבן פרנסה בריווח.

בנוגע אומאן וכו'; מוהרא"ש האט אמאל געזאגט פאר א שנה ראשונה אינגערמאן ער זאל בלייבן וכו', מוהרא"ש האט געוויזן וואס די הייליגע חכמים זאגן (עיין יומא פה:): "מוטב שיחלל שבת אחת וכו'".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת כי תצא, ז' אלול, שנת תשפ"ד לפרט קטן

מרת ... תחי', מנהלת בית פיגא, קרית ברסלב

איך האב נישט קיין ווערטער אייך צו דאנקען פארן זיך אזוי אוועק געבן פאר אונזערע קינדער, אזויפיל הארץ און אזויפיל קאפ און מח - אריינצולייגן אין אונזערע תלמידות, דער אייבערשטער זאל אייך געבן כח און סייעתא דשמיא מיט די תלמידות, יעדע תלמידה בית פיגא זאל מצליח זיין, קיין איין תלמידה זאל נישט אוועק פאלן.

איך וויל אייך בעטן, אזוי ווי ביי אונז טאנצן די מיידלעך יעדן טאג, דארף מען אכטונג געבן נישט אנצוצינדן קיין צעווילדעוועטע מוזיק, נישט קיין מוזיק פון נישט היימישע זינגערס. איך וויל נישט מען זאל הערן ביי אונז אין בית פיגא זינגערס וואס זינגען נישט היימיש, ערליך און אפגעהיטן. די סקול דארף האבן א כלי מיט כשר'ע ניגונים וואס נאר דאס קען מען אנצינדן, און בשום אין אופן אנצינדן וואס איז נישט ערליך און הייליג.

אויך קענען נישט קיין מיידלעך אין סקול ברענגען טעלעפאונס, אויך די עלטערע תלמידות קענען נישט ברענגען אין סקול קיין טעלעפאן, מען דארף זייער היטן די קינדער, מיט איין שלעכטע בילד וואס מען שיקט פון איינעם צום צווייטן - קען מען נאכדעם אסאך ליידן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת שופטים, ב' אלול, שנת תשפ"ד לפרט קטן

לכבוד ... נרו יאיר

קום צוריק, דו קענסט נאך זיין א צדיק.

הויב אן גיין אין שול דאווענען מיט די דריי תפילות מיט מנין, וועסטו זען אז דו וועסט האבן פרנסה.

אויך זאלסטו אוועק ווארפן דיין סמארטפאון, וואס דארפסטו זיך אליין אריינלייגן אין קבר, ווארט ווען עס וועט קומען די צייט ווער דער מלאך וועט קומען, דעמאלט וועלן מיר דארפן גיין אין קבר, פארוואס זאלסטו זיך אליין גראבן א קבר מיטן סמ-פאון.

קיינער זוכט נישט דיך אונטער צו ברענגען, קיינער רעדט נישט צו דיין ווייב קעגן דיר; דיין שוויגער האט דיך נישט פיינט, דאס איז אייגענע אויפגעבלאזענע אויפגעטראכטע דמיונות וואס אלע ליידן פון דעם, און מיט די עצות פון רבי'ן, מיט תורה, תפילה והתבודדות - גייט מען ארויס פון דעם.

הער מיך צו, איך בין דיר א גוטער פריינד, איך האב נישט קיין אייגענע נגיעות ביים שרייבן פאר דיר די פאר ווערטער, איך וויל נאר עס זאל דיר גוט זיין, דו ביסט שוין אריבער אזויפיל שוועריקייטן און אזויפיל מניעות, אזויפיל נסיונות און אלעס בייגעקומען - זאלסטו נישט יעצט אלעס פארלירן.

טראסט מיך, גלייב וואס איך שרייב דיר, קיינער אויף דער וועלט רעדט נישט שלעכטס צו דיין ווייב אויף דיר; דו האסט א טייערע ווייב, א געטרייע ווייב, עס איז אייגענע דמיונות.

שרייב מיר די גוטע נייעס אז דו נעמסט אן מיינע ווערטער, דו גייסט צוריק דאווענען אין שול, שרייב מיר נאכן צוריק עפענען די הייליגע משניות, דיין אלטע ליבער חבר וואס האט דיך נישט אפגעלאזט אין דיינע אלע שווערע טעג, און שמייס אריין אין ים המלח די נייע בליטשקעדיגע סמארט טעלעפאון וואס ברענגט אלע דמיונות און חלומות, השם ישמרינו.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת שופטים, כ"ט מנחם-אב, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך האב ערהאלטן דיין בריוו.

בנוגע די נייע ארבעט וכו'; גיי ארבעטן ביי אים, אבער נאר בתנאי אז דו ארבעסט אן א סמ'-פאון און אן א טעבלעט, נאר אזוי זאלסטו נעמען די ארבעט.

איך האף עס וועט נאך זיין ביי אונז פארקערט, אז אנשי שלומינו די בעלי בתים אין שטעטל וועלן זיך אויסנעמען מיט די ארבעטער אז מען קען נאר ארבעטן אויב מען האט א פשוט'ע טעלעפאן, ווייל נאר אזוי קען מען ארבעטן, נאר אזוי האט מען די מח מיט זיך וכו'.

זיי נישט מוותר אויף לערנען יעדן טאג מקרא, משנה, גמרא והלכה, דורכדעם וועסטו זיין ארום גענומען מיט מלאכים וואס וועלן דיך היטן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת ראה, כ"ד מנחם-אב, שנת תשפ"ד לפרט קטן

לכבוד ... נרו יאיר

איך האב זיך אזוי מחי' געווען מיט דיין בריוו אז דו האסט אפגעלאזט די אלקאהאל, און אויך די סמ' טעלעפאן לאזטו אין אפיס; האסט מיר געגעבן א שטיק געזונט.

דו פרעגסט מיר וואס פאר א קבלה זאלסט זיך פארנעמען לכבוד די נייע יאר הבא עלינו לטובה; דארפסט נישט נאך קבלות, האלט אן די צוויי זאכן, מער נישט טרינקען; האלט נישט אין אפיס ביי דיר, און אויך נישט אין שטוב  - וויין און ברוינפן; וויינען מאכט וויינען. חכמינו זכרונם לברכה זאגן (יומא עו:): "יַיִן מֵבִיא יְלָלָה"; נאך זאגן די הייליגע חכמים (במדבר רבה י, ו): "יַיִן גוֹרֵם לִזְנוּת", וויין ברענגט צו טון עבירות רחמנא לצלן; נאך זאגן חכמינו זכרונם לברכה (תנחומא שמיני, יא): "יַיִן מֵבִיא אֶת הָאָדָם לִידֵי חֵטְא", וויין ברענגט צו עבירות, "לְצָרָה גְדוֹלָה", צו גרויסע צרות, "וּלְחִסָּרוֹן כִּיס" – און עס מאכט אז דער מענטש זאל ווערן ארעם.

די סמ' טעלעפאן ניץ נאר אין די שעות פון ארבעט, אזוי וועט דיין שטוב זיין א פלאץ פאר די שכינה הקדושה, דו וועסט האבן נערווען אויס צו הערן דיין ווייב, דו וועסט האבן צייט פאר תורה און תפילה.

בזכות דעם וועסטו האבן גרויס שפע.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת ראה, כ"ג מנחם-אב, שנת תשפ"ד לפרט קטן

... תחי'

אייער מאן האט מיר נעכטן געשריבן א בריוו אז ענק לעבן נישט אינאיינעם וכו', און ווי שווער עס איז אים וכו' וכו'.

איך האב אזוי רחמנות אויף אייער מאן נרו יאיר, איך האלט נישט אויס זיין צער. ער שרייבט אינעם בריוו אז איר זאגט אים "קענסט זיך גט'ן" וכו', ער איז אזוי צעבראכן.

איך וויל אייך בעטן איר זאלט יא צוריק לעבן מיט אייער מאן, איר האט אזא טייערער מאן, ער איז אזא גוטער מענטש, ער איז פול מיט חן, דער פראבלעם איז אז איר קוקט שמוציגע ווידיאס פון עבודה זרה, גילוי עריות און שפיכות דמים, דאס מאכט אייך בעצבות ומרה שחורה.

טייערע ..., איך ווייס אז איר זענט א גוטע און איר האט א הייליגע נשמה, און אז איר ווילט באמת זיין גוט און וואויל, עס איז נאר אז די קליפות האבן אייך געפאנגען אין זייער טומאה, איר זענט צוגעקלעבט צו אייער סמ' טעלעפאן, דאס מאכט איר זאלט נישט לעבן מיט אייער טייערער מאן. איך בעט אייך טייערע ..., ווארפט אוועק די געטשקע, ווארפט אוועק אייער סמ' טעלעפאן און גייט צוריק צו אייער מאן, איר האט א טייערע מאן; אנדערע פרויען וואלטן אויסגעגאנגען צו האבן אזא מאן, ערליך, איידל, קלוג און וואס נישט.

איך בין מתפלל פאר אייך, איר זאלט צוריק קומען צו די קדושה, אפלאזן די שעדליכע מאוויס און ווערן צוריק א מאמע פאר אייערע קינדער, און א ווייב פאר אייער מאן.

בעזרת ה' יתברך - יום ג' פרשת ראה, כ"ג מנחם-אב, שנת תשפ"ד לפרט קטן

לכבוד ... נרו יאיר

קוק נישט קיין מאוויס; אפילו די וואס איז נישט קיין פראבלעם אין דיינע אויגן - איז אויך אסור צו קוקן. איך בעט דיר זייער היט דיינע אויגן, היט דיין מח מחשבה, קוק נישט קיין עבירות, רייס זיך נישט אפ פונעם אייבערשטן.

אז מען היט נישט די אויגן - איז מען נאכדעם פוגם בברית רחמנא לצלן, און מען פארלירט אלעס. ווייל די עבירה פון הוצאת זרע לבטלה איז אזוי געפערליך, די הייליגע חכמים זאגן (נדה יג:): "כָּל הַמוֹצִיא שִׁכְבַת זֶרַע לְבַטָּלָה חַיָיב מִיתָה", ווער עס זינדיגט אין פגם הברית, ער איז מוציא זרע לבטלה רחמנא לצלן איז חייב מיתה, רבי יצחק און רבי אמי זאגן: "כְּאִילוּ שׁוֹפֵךְ דָמִים", עס איז אזוי ווי איינער איז עובר אויף רציחה און שפיכות דמים, רב אסי זאגט: "כְּאִילוּ עוֹבֵד עֲבוֹדַת כּוֹכָבִים", עס איז אזוי ווי ער דינט עבודה זרה רחמנא לצלן; דאס אלעס קומט פון קוקן מאוויס רחמנא לצלן, פון גיין ליידיג, דאס ברענגט צו שלעכטס; גיין ליידיג ברענגט צו עבירות, חכמינו זכרונם לברכה זאגן (כתובות נט:): "הַבַּטָּלָה מְבִיאָה לִידֵי זִמָּה וְלִידֵי שִׁעֲמוּם", ליידיג גיין ברענגט צו אלעס שלעכטס. אזוי ווי דער רבי זאגט (ספר המדות אות ניאוף, סימן י): "אִישׁ בָּטֵל שֶׁאֵין עוֹסֵק בְּשׁוּם עֵסֶק, עַל יְדֵי זֶה תַּאֲוָתוֹ מְרֻבָּה וכו'", דער ליידיגייער וואס טוט גארנישט - דער האט אסאך נסיונות און פאלט אראפ אין עבירות, עיין שם.

נעם א קליינע משניות אנשטאט די סמ'-טעלעפאון, נעם א משניות אנשטאט מישן נייעס, מען פארט שוין כמעט צום רבי'ן קיין אומאן אויף ראש השנה צו באקומען טהרת המוחין, זאלסטו מער נישט קוקן קיין מאוויס וואס שעדיגט די מח.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת ראה, כ"ב מנחם-אב, שנת תשפ"ד לפרט קטן

לכבוד ... נרו יאיר

חודש אלול איז שוין ביים טיר, מען דארף זיך מאכן א חשבון, וואס איז מיין עיקר אין לעבן? וואס איז דאס מערסטע חשוב ביי מיר? מיין געלט? מיינע חבירים? די תורה? וואס איז חשוב'ער און וואס ווייניגער?

אנשטאט פארברענגען און פארברענען צייט מיט חברים, גיי אהיים צו דיינע קינדער, און נעם נישט מיט דיין אפיס (די סמ'-טעלעפאון) אין שטוב, אזוי וועסטו האבן סבלנות צו זיי, דו וועסט קענען שמועסן מיט זיי, און חס ושלום נישט שלאגן; ווייל שלאגן קינדער איז נישט קיין חינוך, שלאגן קינדער איז אויסבלאזן די נערוון.

שלאג נישט דיינע קינדער, און זיכער נישט ווען דו ביסט איבערגעשטרענגט, ווייל אויב מען שלאגט די קינדער ווען מען איז איבערגעשטרענגט - קען דאס זיין א גרויסע סכנה, מען קען זיי מאכן בעלי מומין פאר זייער גאנץ לעבן. עס איז דא אסאך מעשיות צו דערציילן פון עלטערן און מלמדים וואס האבן געמאכט זייערע קינדער בעלי מומין פאר א גאנץ לעבן, לא עלינו.

חודש אלול דארף מען זיך מאכן א חשבון הנפש 'ווי האלט איך אויף דער וועלט? וואס טו איך אויף דער וועלט? וואס וועל איך ענטפערן אויף יענע וועלט?' וואס וועל איך ענטפערן ווען מען וועט מיך פרעגן די שווערע פראגע (תנא דבי אליהו רבה, א): "עֲמוֹד וַעֲרוֹךְ מִקְרָא שֶׁקָרִיתָ" הויב אן זאגן מקרא וואס דו האסט געלערנט, "עֲמוֹד וַעֲרוֹךְ מִשְׁנָה שֶׁשָׁנִיתָ" הויב אן זאגן משניות וואס דו האסט געלערנט; נעם א משניות און יעדן טאג לערן אביסל תורה אפילו אן פארשטיין, נעם א גמרא און זאג די ווערטער פון די תורה; דאס וועט דיך רייניגן, אזוי וועסטו נישט פארשעמט ווערן בזה ובבא.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ערב שבת קודש פרשת ואתחנן - נחמו, י"ב מנחם-אב, שנת תשפ"ד לפרט קטן

טייערער ... נרו יאיר, קרית ברסלב

נעכטן נאכן שיעור האסט מיך מחי' געווען מיטן זאגן אז זייט אנהויב זומער – ברענגסטו נישט אריין דיין סמארט טעלעפאן אין שלאף שטוב, דו פרובירסט צוביסליך זיך אפגעוואוינען פון די עדיקשן פון האלטן די סמארט טעלעפאן טאג און נאכט; האסט מיך ממש מחי' געווען.

ביי די שיעור נעכטן נאכט האב איך ממש זיך געשטיקט פון צער און געוויין, פון וויפיל שטיבער צעפאלן צוליב דעם סמארט טעלעפאן; וויפיל ווייבלעך שרייבן מיר און רופן מיט געוויין אז זיי קענען נישט געווינען זייער מאן'ס הארץ צוליב דעם טעלעפאן, עס פאר'שיכור'ט, עס מאכט פארטעמפט, וויפיל זיי טוען פארן מאן – קענען זיי נישט באקומען אפאר מינוט פון שמועסן, רעדן און זיך אנקוקן מיט ליבשאפט, דער סמארט טעלעפאן גנב'עט זייער מאן, זיי ליידן וכו'; פאר מיר איז דאס די גרעסטע ווייטאג.

הלוואי זאלסטו אינגאנצן פטור ווערן פון די סמארט טעלעפאן.

ביים רבי'ן אין אומאן זאלסטו נאר אויף דעם בעטן; אויף הייליגקייט, ריינקייט, קדושה וטהרה.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

מיין טייערער ... נרו יאיר

ביסט א חידוש אין דיין חסד וואס דו טוסט מיט אנדערע, דו טוסט און טוסט פאר אידישע קינדער אזויפיל חסדים, ממש צו באוואונדערן.

וויל איך דיך מחזק זיין, זאלסט ווייטער טון חסד און אויך זאלסטו העלפן דיין ווייב מיט דיינע קינדער, ווייל אמאל קען פאסירן ביי די וואס טוען אסאך חסד אז דאס גייט אויפן חשבון פון די משפחה, מען קומט נישט אהיים, מען פארגעסט צו שמועסן מיט די ווייב – פון זיין אזוי אריינגעטון צו טון גוטס.

האסט א טייערע פרוי מיט ליכטיגע קינדער, זאלסט מיט זיי אויך טון חסד.

אויך זאלסטו בעטן דעם אייבערשטן נישט צו האלטן אין שטוב א סמ' טעלעפאן, נאך אביסל האסטו בחורים, און זיי וועלן נאכמאכן וואס זיי זעען אין שטוב, דארף מען באצייטנס זען וואס מען קען ראטעווען.

איך האב דיך ליב, דעריבער שרייב איך דיר.

בעזרת ה' יתברך - יום ג' פרשת ואתחנן, ט' מנחם-אב, שנת תשפ"ד לפרט קטן

מיין טייערער ... נרו יאיר

איך האב ערהאלטן דיין בריוו.

איך בין זייער איבערגענומען פון וואס עס שטייט אינעם בריוו, אז דו האסט געהאט א טעבלעט אפן צו גילוי עריות און נאך אסאך תפילה און אסאך חיזוק פון הייליגן רבינ'ס עצות האסטו געהאט די שטארקקייט דאס צו צעברעכן.

יעצט קומט דיר א גוטע שידוך, יעצט אז דו ביסט ארויס פון די קליפות קומט דיר א נס, דער רבי זאגט (ספר המדות אות ישועה, סימן טז): "כְּשֶׁאָדָם בָּא לְאֵיזֶה נִסָּיוֹן" ווען א מענטש האט א נסיון, "יֵדַע כְּשֶׁיַּעֲמוֹד בְּזֶה הַנִּסָּיוֹן" דארף ער וויסן, אז אויב ער וועט בייקומען די נסיון - "שֶׁהַקָּדוֹשׁ בָּרוּךְ הוּא יַעֲשֶׂה לוֹ נֵס" וועט דער אייבערשטער מאכן מיט א נס, און אז דו ביסט בייגעקומען די שווערע נסיון, דו האסט אוועק געווארפן די טעבלעט - וועסטו זען גרויסע ניסים.

שרייב מיר כאטשיג איין מאל א וואך א בריוו, מיר זאלן בלייבן צוגעבינדן איינער מיטן צווייטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת בלק, י' תמוז, שנת תשפ"ד לפרט קטן

לכבוד ... נרו יאיר

איך וויל דיר זייער בעטן דו זאלסט נעמען א חלק אינעם "יערליכן קאמפיין". מאך זיך א שטיקל חשבון, נאר בגשמיות - וואס דו בענעפיטירסט פון די קהילה און פון די מוסד, וויפיל עס העלפט דיר מיט דיין טאג טעגליכן לעבן; איך רעד נישט פון עבודת השם, פון לערנען און דאווענען, זיין נאנט מיטן אייבערשטן, איך רעד פון חיי יום יום; פון די מנוחת הנפש, פון די וועג פון לעבן, נישט לעבן פאר אנדערע וכו וכו'; פאר דעם אליין דארפסטו ארויסקומען מיט א שטארקקייט נעמען א חלק אינעם קאמפיין.

איך האב די יאר צעטיילט די קאמפיין אויף אפאר גרופעס, מען האט איינגעטיילט די קהילה אין עטליכע גרופעס, אזוי וועט זיין גרינגער צו באקומען די הילף און די מאטעוואציע צו קענען דערגרייכן די ציל וואס מען האט זיך אונטערגענומען.

נישטא פון וועם זיך צו שעמען, די גאנצע וועלט לעבט היינט אויפן רבינ'ס התחזקות, איינער איז דאס מודה און א צווייטער - באהאלט עס, אבער אלע אן אויסנאם לעבן מיט די התחזקות פון הייליגן רבי'ן. דארפסט זיך נישט שעמען צו אנרופן אלע דיינע באקאנטע און בעטן פון יעדן איינעם צו העלפן אונזער קהילה און אונזערע מוסדות.

דיין טעלעפאן לאז פאר די ביזנעס. געדענק, ביסט א מענטש, נישט קיין פערד צו ארבעטן ארום די זייגער. בוי דיין ביזנעס געזונט, מאך זיך שעות וואס דו האסט מיט די ביזנעס, און שעות וואס דו ביסט א מענטש, א טאטע פאר די קינדער, א מאן פאר דיין ווייב.

איך האב דיך נישט פארפירט ביז אהער, איך וועל דיך מיט דעם אויך נישט פארפירן; הלואי וועסטו דערהערן די זאך פון צעטיילן די ביזנעס מיט די לעבן.

עס איז נישט ווערד צו מאכן אפילו גרויס געלט (די גרעסטע דמיון וואס דו קענסט דמיונ'ען) - אויב מען קען נישט האבן קיין מנוחת הנפש.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת חקת, ד' תמוז, שנת תשפ"ד לפרט קטן

מיין טייערער ליבער הארציגער ... נרו יאיר

איך האב ערהאלטן דיין פראגע מיט א בילד פונעם טעלעפאן.

בלייב מיט דיין פשוט'ע טעלעפאן, בלייב מיט די צוריקגעשטאנענע טעלעפאן, וועסט נאר מרויח זיין, וועסט גארנישט דערלייגן.

טעכנאלאגיע רוקט זיך זייער פאראויס, מען ווייסט נישט וואס דער מארגן וועט ברענגען, מען דארף מיט אלע כוחות זיך שטארקן צו האבן א ריינע אידישע שטוב.

אויבער-חכמים זענען אלץ געווען, ווען די צדיקים האבן גערעדט פון נישט האבן אין שטוב ראדיא, טעלעוויזשן – האט מען זיך געהאלטן קלוגער און מען האט נישט פארשטאנען פארוואס דארף מען זיין אזוי עקסטרעם... און וואס איז געבליבן פון די דורות? ליידער זייער נישט גוט; נאר די וואס זענען געגאנגען בבחינת 'קאפ אין וואנט', געפאלגט צדיקים – די האבן שיינע ליכטיגע דורות.

יעדן טאג זאלסטו אביסל טאנצן "אשרינו שזכינו להתקרב לרבינו".

בעזרת ה' יתברך - יום ג' פרשת חקת, ג' תמוז, שנת תשפ"ד לפרט קטן

לכבוד ... נרו יאיר

הער אויס דיין ווייב ווען זי רעדט צו דיר, עס איז נישט גערעכט אז די פאר מינוט וואס זי רעדט צו דיר, זי וויל דיר דערציילן פון איר טאג - זאלסטו איר נישט געבן; אפשר זאלסטו נישט אהיים ברענגען דיין טעלעפאן? עפעס דארפסטו טון, קענסט נישט לאזן לויפן, איגנארירן די זאך.

געלויבט דעם אייבערשטן איך האב היינט געמאכט טיקעטס פאר מיר און מיינע קינדער צו פארן צום הייליגן רבי'ן קיין אומאן אויף ראש השנה, מיטן אייבערשטנ'ס הילף פאר איך זונטאג נאכט פרשת האזינו זיין ביים רבי'ן אויף ראש השנה אין אומאן, זוכה זיין צו אלע תיקונים און צו אלעס גוטס. ווי עס זעט אויס פאר איך די זעלבע וועג ווי פאראיאר, פון פוילן קיין אוקריינע.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת חקת, ג' תמוז, שנת תשפ"ד לפרט קטן

לכבוד מיין טייערער ... נרו יאיר

איך קוק דיך זייער ארויף אז דו האסט מוותר געווען וכו', אבי עס זאל זיין שלום, ביי מיר ביסטו היינט אסאך חשוב'ער, ווייל דער וואס איז מוותר למען השלום – דעם האט דער אייבערשטער ליב.

איך זאג דיר צו דו וועסט גארנישט דערלייגן פון דעם, דו וועסט נאר האבן מער הצלחה. דער רבי זאגט (ספר המדות אות שלום, סימן כב): "הַשָּׁלוֹם סִימָן לְשֹבַע", שלום ברענגט שפע ברכה והצלחה.

דארפסט נישט קיין סמארטפאון, עס וועט דיר נישט ברענגען קיין איין פרוטה מער פאר דיין ביזנעס, עס וועט דיר נאר צונעמען דיין חן, דיין ישוב הדעת, דיין שלום בית.

בעזרת ה' יתברך - ערב שבת קודש פרשת שלח, מברכין תמוז, כ"ב סיון, שנת תשפ"ד לפרט קטן

לכבוד ... נרו יאיר

היינט ערב שבת מברכים תמוז דארף שוין געבן א שטיקל קיצל אין די ביינער; דורשי רשומות זאגן, תמוז איז די ראשי תיבות: ז'מני ת'שובה מ'משמשין ו'באין, עס קומט שוין אלול, מען פארט שוין צום רבי'ן נאכאמאל אויף ראש השנה; דארפן מיר זיך פרעגן 'ווי האלט איך מיט מיין שמירת עיניים? שמירת המח והמחשבה? ווי האלט איך מיט ביטול זמן, וויפיל צייט עסט מיר די טעלעפאן און די קאמפיוטער אויף?'

אפשר דאך, אולי יחוס? אולי ירחם? נישט צו האבן די טעלעפאן - נישט אין שטוב, נישט אין קאר, נאר אין אפיס ביי די ארבעט; טייערער הארציגער ברודער, עס איז שוין כמעט אריבער די יאר, וויפיל שעות האסטו פארברענט מיט די טעלעפאן - מיט קוקן די נייעס? מיט קוקן זינגערס אנא בערד זינגען און ווארפן זייער קערפער? וויפיל צייט אוועק געגעבן פאר קוקן ווי מען מאכט חוזק פון מענטשן? לשון הרע, ליצנות, אפגערעדט גילוי עריות שפיכות דמים?

בעט דעם אייבערשטן: "הייליגער באשעפער נעם אוועק פון מיר די כלים, די טעלעפאן, אייפאד, טעבלעט וכו' וכו', העלף מיר איך זאל קענען אויפשטעלן א שיינע ערליכע שטוב מיט ערליכע דורות".

א פרייליכן שבת.

בעזרת ה' יתברך - יום ב' פרשת קרח, כ"ה סיון, שנת תשפ"ד לפרט קטן

לכבוד ... נרו יאיר

איך פרוביר נאכאמאל, אפשר וועט מיר עס דאס מאל געלונגען, פועל'ן ביי דיר זאלסט נישט האבן קיין טעלעפאן וואס איז פארבינדן מיט די וועלט, און אז דו דארפסט עס האבן פאר פרנסה - זאלסטו דאס האלטן אין געשעפט אדער אין אפיס, נישט אין שטוב.

"עֲשֵׂה לְמַעַן תִּינוֹקוֹת שֶׁל בֵּית רַבָּן שֶׁלֹּא חָטְאוּ" טו עס פאר דיינע דורות, פאר דיין עתיד, "עֲשֵׂה לְמַעַן חָרְבַּן בֵּיתָךְ", טו עס פאר דיין שטוב זאל נישט חרוב גיין, בעט דעם אייבערשטן זאלסט האבן די שטארקקייט נישט צו נאכגעשלעפט ווערן נאך די ווינט וואס בלאזט אויף די נישט גוטע זייט.

מיטן אייבערשטנ'ס הילף גיי איך דעם זומער שאפן געלט פאר דיר, פאר דיינע קינדער; איך גיי שאפן געלט פאר זייער חדר און סקול, און אזוי ווייטער, איך וויל דיר בעטן זאלסט אויך צולייגן א האנט; סיי דו, סיי דיין ווייב - זאלן גיין נאך געלט, צאנעמען געלט פאר אונזערע מוסדות. איך טו דאס נישט פאר מיר, איך טו עס פאר דיר, פאר דיינע דורות. שטיי נישט פון דער זייט באקוועמערהייט ווען דיין ראש ישיבה מוטשעט זיך צו קענען אנהאלטן דיין מוסד, דיין קהילה. די יאר וועט זיין אנדערש פון די פריערדיגע יארן, אלע וועלן העלפן, קיינער שטייט נישט פון דער זייט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת שלח, כ' סיון, שנת תשפ"ד לפרט קטן

לכבוד ... נרו יאיר

אז דו שפירסט ווי דו ווערסט פארברענט פון עבירות, דו פאלסט אראפ השם ישמרינו - זאלסטו נעמען די משניות און זאגן יעדן טאג משניות, דאס וועט דיך ראטעווען. אזוי ווי דער רבי זאגט (שיחות הר"ן, סימן יט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה - ער טוט עבירות רחמנא לצלן, און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד"; אויב וועט ער זיך מאכן א קביעות צו לערנען יעדן טאג כך וכך, וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס אז עס נעמט ארויס דעם מענטש פון זיין שלעכטס; מוהרא"ש האט מקובל פון אנשי שלומינו אז ווען דער רבי האט געזאגט די שיחה - האט ער געמיינט מיט דעם דאס לערנען אכצן פרקים משניות.

איך בעט דיר, האלט דיין טעלעפאן נאר אין אפיס, ברענג עס נישט אהיים, אויך נישט אין קאר. און אויב עס איז דיר שווער מיך צו פאלגן - לאך נישט פון מיר, ווייל איין טאג וועסטו נאך וויינען פאר די יארן וואס דו האסט געלאכט. בעט דעם אייבערשטן זאלסט קענען אנקומען צו דעם, לאך נישט פון מיר, מאך נישט חוזק פון די יראת שמים וואס איך שרייב דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בחוקותי, כ"א אייר, ל"ו לעומר, שנת תשפ"ד לפרט קטן

... תחי'

עס איז א שאד פאר אונזער סקול בית פיגא אייך צו פארלירן, מיר זענען זייער צופרידן צו האבן אזא גוטע טיטשער ווי אייך, אבער בלית ברירה, נאכן קלאר מאכן שוין א האלב יאר צוריק אז מיר ווילן אונזערע לערערינס זאלן האבן כשר'ע טעלעפאונס, מיר ווילן אונזערע תלמידות זאלן וויסן פון יונגווייז אן, אז א אידישע מאמע, א אידישע פרוי, א ערליכע פרוי - גייט נישט מיט א נישט כשר'ע טעלעפאן, און איר האט זיך נישט צוגעשטעלט, קענט איר נישט צוריק קומען צו אונז.

די מנהלת וויל אייך אזוי שטארק האבן ווייטער אין סקול, איר זענט א וואונדערליכע טיטשער - אבער ביי מיר איז א ווארט א ווארט.

איך וועל ענדיגן די בריוו מיט די ווערטער וואס די בת מלך האט געזאגט פארן שני למלכות (ספורי מעשיות, מעשה א): "עס איז א גרויס רחמנות אויף מיר און אויף דיר"; אז אזויפיל מי און פלאג וואס איר האט אריינגעלייגט וכו' וכו' און וועגן די איין זאך, די טעלעפאן - זאלט איר אלעס פארלירן.

בעזרת ה' יתברך - יום א' פרשת נשא, ג' סיון, מ"ז לעומר, שנת תשפ"ד לפרט קטן

מרת ... תחי', קרית ברסלב

איך האב ערהאלטן אייער בריוו.

איך פריי זיך זייער צו הערן אז איר שטארקט זיך מיט די וועכנטליכע פרויען צאמקום, איר שעפט זיך אן מיט פרישע כוחות פון די שיעור און פון זיך טרעפן מיט נאך פרויען, און פון די מעשיות פון תפילה וכו' וכו'.

עס קומט אייך א גרויסן דאנק פון מיר און בשם כל הקהילה אז איר לייגט אריין אזויפיל כוחות אין די קליידער געשעפט, וואו אנשי שלומינו קענען קויפן קליידער פאר נישטיגע פאר דאלער, און זיך שפארן פון אויסגעבן אזויפיל געלט, און פון בארגן, גנב'ענען, צעקוועטשען דעם מאן וכו' וכו'. די קליידער געשעפט אין שטעטל איז פון די שענסטע זאכן ביי אונזער קהילה, און וואויל איז אייך און פאר אלע העלפערס וואס לייגן צו א האנט בהתנדבות, אז די געשעפט זאל קענען אנגיין ווייטער מיטן פארקויפן פאר אנשי שלומינו קליידער פאר צוויי דריי דאלער.

בנוגע זאכן וואס מען דארף בעסער מאכן זאלט איר רעדן צו מרת ... תחי' און זי וועט איבערגעבן פאר איר מאן נרו יאיר, און זיי וועלן מאכן דאס בעסטע און דאס שענסטע. די פלאץ איז גאר קליין, איך האף צום אייבערשטן צו מאכן א גרויסע געשעפט, עס זאל זיין באקוועם פאר די פרויען איינצוקויפן, איך דארף די תפילות פון די איינוואוינער פון שטעטל צו קענען אויספירן מיינע פלענער.

בנוגע שרייבן אין די בלעטל; עס איז זייער א וויכטיגע זאך עס זאל זיין פאר אנשי שלומינו וועכנטליכע אויסגאבעס צו ליינען, איז דאס איז זיכער א גרויסע זכות פאר אלע פרויען וואס געבן אוועק צייט צו שרייבן שיינע זאכן צו ליינען.

אויף די פראגע וואס זאל זיין דער עיקר פון די שרייבווערק; ערשטנס דארף עס זיין געשריבן ציענדיג, עס זאל ציען די ליינער דאס צו וועלן ליינען, און די אינהאלט זאל זיין צו געבן כח פאר אידישע מאמעס וואס גייען אריבער יעדן טאג שווערע ארבעט; זיי מוטיגן און ווייזן די הייליגקייט פון ברענגען קינדער, האדעווען קינדער און אלעס וואס מען רעדט ביי די שיעורים.

בנוגע די נייען וכו'; אודאי און אודאי זאלט איר אנהאלטן דאס נייען, אויך זאלט איר אויסלערנען אייערע עלטערע טעכטער די פאך, עס איז א שיינע פאך פאר פרויען.

בנוגע וכו'; האלטס די שטוב ריין, ברענגט נישט אריין אין שטוב א כלי וואס זעט אפילו אויס ווי א סמארטפאון. מיר האט מען אויך געקויפט אזא כלי וואס האט אלע מוזיק, איך האב עס אבער נישט אנגענומען, איך וויל נישט האבן אין שטוב קיין שום שלעכטע זאך, און אפילו וואס זעט אויס שלעכט.

דער אייבערשטער זאל העלפן איר זאלט האבן הצלחה אין אלע ענינים.