בריוון פונעם ראש ישיבה שליט"א

בעזרת ה' יתברך - יום ה' פרשת בראשית, כ"ז תשרי, שנת תשפ"ז לפרט קטן

... נרו יאיר

דאס וואס דו האסט געוויינט צו מיר, דו האסט געמיינט אז דו וועסט אהיים קומען פון אומאן און גיין מעלה מעלה, און יעצט זעסטו זיך אזוי ליידיג, אן קיין שיעורים, אן קיין עבודת השם, דו ביסט אזוי צעבראכן.

ליבער ברודער, ערשטנס דארפסטו וויסן אז די טעג נאך אומאן וואס מען איז פארנומען מיט אנגרייטן דעם יום טוב - איז ביי יעדן איינעם אזוי, מען איז פארנומען מיט סוכות, קויפן, מאכן, גיין און קומען, די טעג גייען אריבער מיט עוסק זיין פאר די מצוות, עס איז נישטא די צייט צו לערנען אסאך, און צווייטנס, דאס וואס דו וויינסט, דאס וואס עס קרענקט דיך ווי אזוי דו זעסט אויס – דאס אליינס האסטו באקומען אין אומאן; דאס ווילן, דאס בענקען, און דאס נישט ווערן באקוועם מיט זיך – דאס באקומט מען פון הייליגן רבי'ן; דער רבי וועקט אונז אויף מיר זאלן נישט ווערן באקוועם מיט זיך, מען זאל אלץ וועלן מער און מער לערנען און דאווענען און דינען דעם אייבערשטן.

ליבער ברודער, ניץ אויס דיינע יונגע יארן אין ישיבה, און הלוואי זאלסטו אראפנעמען פון דיין טעלעפאן פיקטשערס, ווידיאוס; די אלע זאכן נעמען אוועק די ריינקייט און תמימות. נעם זיך גוטע חברים וואס האבן תמימות און פארברענג דיינע טעג און יארן מיט תורה און תפילה, און ווען דו ביסט אפגעמאטערט זאלסטו גיין הפצה, דאס וועט דיך אויסלופטערן און געבן כח. ביי הפצה זאלסטו נאר שמייכלען, טענה נישט מיט קיינעם, און רעד נישט און הער נישט, געב א קונטרס, א גליון, א ספר - מיט א שמייכל, און בעט צדקה, און גיי ווייטער.

איך וועל נאך רעדן מיט דיר אסאך פנים בפנים אויב דו וועסט וועלן...

בעזרת ה' יתברך - יום א' פרשת נח, א' דראש חודש מרחשון, שנת תשפ"ז לפרט קטן

... תחי'

זייער גוט האט איר געטון אז איר זענט אראפ פון די טעקסט גרופ פון ענקער משפחה, הלוואי זאלט איר בכלל נישט האבן קיין טעקסט גרופ; ווייל אפילו מען האט א כשר'ע טעלעפאן – דארף מען נאכאלץ רחמי שמים, ווייל די טעקסט גרופס איז פיל מיט ווערטלעך, און יעדע ווערטל זאגט עפעס; מענטשן כאפן זיך נישט אז א ווערטל טראגט אין זיך א מעסעדזש – אדער לטוב אדער לרע, און עס גייט אריין אינעם מענטש שטילערהייט, און עס קילט אפ די יראת שמים, די תמימות.

די וואך איז די פרשה פון די מבול, נאר נח מיט זיין משפחה זענען געבליבן פון די גאנצע וועלט; היינט איז אויך דא א מבול פון מינות ואפיקורסות מיט ליצנות, און מען דארף זיך באשיצן פון נישט ווערן פארשוועמט מיט די מבול, מען דארף האבן א פארמאכטע שטוב, נישט ארייננעמען אין שטוב קיין מאגעזינען, קיין שום ליין מאטריאל, און זיך אכטונג געבן פון טעקסט מעסעדזשעס גרופס, אפילו פון א משפחה גרופ; ווייל קיין גוטס קומט נישט ארויס פון די גרופס, עס איז פיל מיט ליצנות און קאפ וויי וכו'.

אויך איז דאס א גוטע חינוך פאר די קינדער, ווען זיי וואקסן אויף מיט א מאמע וואס איז נישט איינגעטינקען ראשו ורובו אינעם טעלעפאן.

בעזרת ה' יתברך - יום ה' פרשת וזאת הברכה, דריטע אות פון שם הוי"ה, י"ג תשרי, שנת תשפ"ז לפרט קטן

החתן ... נרו יאיר

שטארק זיך מיט לערנען די הייליגע תורה, זיי ממשיך מיטן לערנען יעדן טאג ח"י פרקים משניות; מוהרנ"ת זאגט (שיחות הר"ן סימן קפה): "לכמה אנשים צוה לומר ח"י פרקים משניות בכל יום", דער רבי האט געהייסן אסאך פון אנשי שלומינו זאלן זאגן יעדן טאג אכצן פרקים משניות; זאגט מוהרא"ש, איז דאך גוט זיך אריין צו שטעקן דעם קאפ און זיין פון רבינ'ס לייט וואס טוען וואס דער רבי האט געזאגט.

איך וויל דיר בעטן עפעס, יעצט אז דו גייסט חתונה האבן זאלסטו זיך אפלאזן פון די נארישע זאכן פון כאפן בילדער און לייגן אויף גרופס, טו אויס די קינדערישע נארישע שיך, עס איז נישט גוט צו זיין אויף גרופס, אויך הער איך פון דיינע חברים אז דו ביסט אזוי אריינגעטון אין דעם אז דו ביסט ממש נישט ביי זיך, דיין קאפ איז מער אינעם טעלעפאן, און אז דו גייסט יעצט חתונה האבן - איז גוט דו זאלסט אפלאזן די גרופס; גיי אראפ פון יעדע גרופ, אנגעהויבן פון ישיבה גרופ, חברים גרופ, נאנטע חברים גרופ, און אזוי ווייטער.

דער אייבערשטער זאל העלפן זאלסט האבן הצלחה אין אלע ענינים.

א פרייליכן יום טוב.

בעזרת ה' יתברך - ערב שבת קודש פרשת האזינו - שבת תשובה, ז' תשרי, שנת תשפ"ז לפרט קטן

... נרו יאיר

איך וויל דיר בעטן, די קומענדיגע יאר זאלסטו אפלאזן אלע גבאות און אלע עסקנות וכו' און זיך אריינלייגן נאר אין די ישיבה, איך וועל אם ירצה ה' טרעפן א נייער גבאי זאל העלפן מיט אפוינטמענס, מיט מאכן סדר אויפצונעמען מענטשן יעדע זונטאג וכדומה, איך וויל פון דיר איין זאך - נאר די ישיבה; יעדער בחור זאל באקומען דאס מערסטע אויפמערקזאמקייט, ווארעמקייט און ליבשאפט, ספעציעל די קינדער פון אנשי שלומינו זאלן נישט אוועק פאלן, אלע זאלן דינען דעם אייבערשטן מיט די עצות און חיזוק פון הייליגן רבי'ן.

עס איז דא א גרויסע יצר הרע צו וועלן טון זאכן וואס מען דארף נישט טון, און די זאכן וואס מען דארף טון - נישט צו טון, די הייליגע חכמים זאגן (קדושין לא.): "גדול מצווה ועושה", עס איז גרעסער און הייליגער צו טון וואס מען האט זיך אונטערגענומען צו טון; און אז דו האסט גענומען די זאך צו העלפן אין ישיבה - זאלסטו נישט ווערן אומדירעקט אריינגעדרייט אין עסקניות, גבאיות אין די קהלה.

איך וויל דיר בעטן דו זאלסט זען אז די בחורים זאלן יעדן טאג גורס זיין ח"י פרקים משניות און זאגן דעם יום תהלים, יעדער בחור זאל לערנען יעדן טאג חומש רש"י, שנים מקרא ואחד תרגום, און יעדער בחור זאל האבן א כשר'ע טעלעפאן אן קיין טעקסט מעסעדזש, אן קיין ווידיאו, אן קיין בילדער. איך זע וואס גייט פאר צווישן די בחורים, מען טשעפעט זיך, מען טוט זיך וויי, מען כאפט אפ איינער פון אנדערע ווי מען דרימלט, ווי מען עסט, און מען שיקט דאס פאר חברים, מען איז מלבין פני חברו ברבים, וואס איז אזוי געפערליך, אין לו חלק לעולם הבא (בבא מציעא נט.); איך וויל נישט אין ישיבה די זאכן.

אויך וויל איך אז אלע בחורים זאלן קומען אין ישיבה מיט א הוט און רעקל, אין ישיבה דארף מען נישט גיין א גאנצן טאג אזוי, נאר ביים דאווענען מוז מען גיין אנגעטון, און ביים קומען און גיין.

איך דארף מקצר זיין, איך וועל נאך רעדן מיט דיר מער באריכות, ווייל יעצט בין איך נאך אפגעמאטערט פון די נסיעה אהיים פון רבינ'ס ראש השנה. נעכטן האט געהייסן אז עס וועט זיין א שיעור, אבער איך האב נישט געהאט די כוחות, איך דארף קומען צו די כוחות.

דער אייבערשטער זאל העלפן זאלסט האבן הצלחה אין אלע ענינים.

א גמר חתימה טובה.

בעזרת ה' יתברך - יום א', ערב יום הכיפורים, ט' תשרי, שנת תשפ"ז לפרט קטן

... נרו יאיר

א זיס יאר פאר דיר און פאר דיין משפחה, איך האב זייער הנאה געהאט דיך צו זען אין אומאן ביים הייליגן רבי'ן ראש השנה, איך וויל דיר זאגן אז איך בענק זיך זייער צו דיר, איך וויל באנייען אונזער קשר אזוי ווי אמאל, איך האב דיך ליב, איך וויל מער האבן שייכות מיט דיר.

יעצט ווען מיר שטייען אין די הייליגע טעג פון ראש השנה, עשרת ימי תשובה, יום הקדוש, יום טוב סוכות, הושענא רבה, הקפות - איז דא א הייליגקייט און א העכערע כח פאר יעדן איד זיך צו קענען ארויסרייסן פון זיין פריוואטע גלות וואו ער איז פארכאפט, און אפילו מען איז פארכאפט אין קוקן עבירות, מען איז צוגעקלעבט צום טעלעפאן, טעבלעט, קאמפיוטער וכדומה, וואס בדרך הטבע איז נישט שייך זיך אפצושיידן פון דעם, דורך וויינען און שרייען צום אייבערשטן: "הייליגער באשעפער וואס וועט זיין מיט מיין נשמה? וואס וועט זיין מיט מיינע דורות? איך בין אזוי אפגעקילט, איך בין אזוי פארזינקען אין די טומאה, איך קוק אין טעלעפאן, איך קוק אין קאמפיוטער, און דאס האט מיך אזוי אפגעקילט, רבונו של עולם, איך האב אבער נישט די שטארקקייט דאס אוועק צו ווארפן, עס ציט מיר אזוי געפערליך, איך בין צוגעקלעבט צו דעם ווי מיט א שטארקע גלו; איך קוק עבירות, איך קוק ליצנות, איך בין נישט ווי אמאל, וואו איז מיין תמימות? וואו איז מיין יראת שמים? איך בעט דיר הייליגער באשעפער, העלף מיר, מאך מיר נס עס זאל אריינגיין אין מיר א רוח טהרה, איך זאל תשובה טון און זיין אן ערליכער איד מיט ריינע אויגן"; וואויל איז דעם וואס ניצט אויס די הייליגע טעג.

א גוט יום טוב, א גמר חתימה טובה.

בעזרת ה' יתברך - יום ד' פרשת נצבים-וילך, כ' אלול, שנת תשפ"ו לפרט קטן

מיין ליבער הארציגער ... נרו יאיר

זע צו האבן גוטע חברים וואס האבן אין זיך תמימות, אנטלויף פון די וואס מאכן ליצנות און פון די וואס שפעטן פון אנדערע בחורים.

איך וויל נישט דו זאלסט האבן אויף דיין טעלעפאן ווידיאו, איך זע וואס גייט פאר צווישן בחורים, מען מאכט א ווידיאו פון א צווייטן, מען כאפט זיך נישט און מען שיקט דאס ארום, און מען קען אמאל כאפן א ווידיאו פון א בחור און דאס שיקן פאר אנדערע און מיט דעם פארלירן די גאנצע עולם הבא, ווייל די הייליגע חכמים זאגן (בבא מציעא נט.): "המלבין פני חברו ברבים אין לו חלק לעולם הבא", דער וואס פארשעמט א חבר פאר א רבים פארלירט די עולם הבא.

נעם דיין טעלעפאן און גיי צו די געשעפט וואס מאכט עס כשר, נעם אראפ אלעס פון דעם, ניץ די טעלעפאן נאר צו רעדן און צו קענען הערן ניגונים, אבער נישט פאר בילדער און ווידיאוס.

פאלג מיך וועט דיר גוט זיין בזה ובבא.

א כתיבה וחתימה טובה.

בעזרת ה' יתברך - יום ד' פרשת ואתחנן, ח' מנחם-אב, שנת תשפ"ו לפרט קטן

... נרו יאיר

איך האב ערהאלטן דיין בריוו.

געב זיך אכטונג נישט צו ענטפערן קיין אימעיל פון פרויען און מיידלעך, השמר והזהר, זאלסט שטיין ווייט פון די סארט מצוות, ווייל דו קענסט אנקומען און אראפפאלן אין שאול תחתית ומתחתיו רחמנא לצלן.

קענסט איבער געבן די אימעיל אדרעסס פאר די קרן הדפסה וואס שיקן ארויס אויטאמאטיש אימעילס פון חיזוק פאר אלעמען, אבער דו פריוואט זאלסט קיינמאל נישט ענטפערן אן אימעיל פון א פרעמדע פרוי, אויך נישט קיין טעקסט מעסעדזש, ווייל מען קען אזוי אראפפאלן און מען קען אלעס פארלירן, אין איין אויגן בלינק קען מען בלייבן אן די ווייב, אן די קינדער און ווערן פארשעמט פאר די גאנצע וועלט.

געב זיך אכטונג פון די יצר הרע וואס פארשטעלט זיך מיט מצוות, דער הייליגער רבי זאגט (לקוטי מוהר"ן חלק א, סימן א), ווי אזוי הייבט דער יצר הער אן פארנארן דעם מענטש? דורכדעם וואס ער איז זיך מתלבש במצוות, צו יעדן איינעם קומט ער מיט א צווייטע לבוש; אז מען קען אויפטון, מען קען צוריק ברענגען מענטשן צום אייבערשטן; דאס איז טאקע אמת, דאס איז טאקע די גרעסטע זאך, אבער די הייליגע חכמים זאגן (בראשית רבה פד, ד): "אַבְרָהָם הָיָה מְגַיֵּר אֶת הָאֲנָשִׁים", "וְשָׂרָה מְגַיֶּרֶת אֶת הַנָּשִׁים", און שרה האט זיך געפארעט מיט די ווייבער; די תורה לערנט אונז ווי אזוי עוסק צו זיין אין הפצה, אין קירוב רחוקים; די מענער זאלן זיך באשעפטיגן מיט מענער און פרויען מיט פרויען.

ראה הזהרתיך.

בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן

מרת ... תחי' קרית ברסלב, ליבערטי

איך האב ערהאלטן אייער בריוו.

לאזט אייך נישט, בלייבט שטארק, בלייבט פעלזן פעסט עס זאל נישט אריינקומען ביי אייך אין שטוב קיין סמ' טעלעפאן, רעדט שיין צו אייער מאן, בעטס אים: "איך וויל אזוי שטארק אינאיינעם מיט דיר אויפבויען א הייליגע שטוב, אן ערליכע שטוב, ערליכע קינדער, איך בעט דיר מיט מיין גאנצע הארץ ברענג נישט אריין א סמארטפאון אין שטוב".

עס שטייט אין פסוק (משלי טו, א): "מַעֲנֶה רַּךְ יָשִׁיב חֵמָה", דער וואס רעדט ווייך, קערט אוועק די צארן; נאך שטייט אין פסוק (שם יד, א): "חַכְמוֹת נָשִׁים בָּנְתָה בֵיתָהּ", א פרוי האט א ספעציעלע חכמה וואס זי קען אויפבויען איר שטוב; פון איין זייט - זיין זייער זייער שטארק אויף די הייליגקייט פון די שטוב, און פון די אנדערע זייט - זיין זייער קלוג צו געבן דעם געפיל פארן מאן אז ער איז חשוב און טייער און באליבט אין די אויגן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן

לכבוד אברהם הערש וועבערמאן נרו יאיר, גבאי קרית ברסלב ליבערטי

איך בין זיך אזוי מחיה צו זיין די זומער וואכן אין שטעטל מיט אנשי שלומינו, איך ווער אזוי פרייליך יעדן טאג, מער און מער, צו מיטהאלטן פון די נאנט דאס שיינקייט און דאס ערליכקייט פון אנשי שלומינו.

א שטיק צייט צוריק זענען געקומען צו מיר משפחות אז זיי ווילן נישט האבן אויף די טעלעפאן קיין טעקסט מעסעדזשעס, זיי האבן געזאגט, וואס זאלן מיר טון אז אלע הודאות פון שטעטל ווערט געשיקט אויפן טעקסט מעסעדזש, און אז זיי האבן נישט קיין טעקסט מעסעדזש, פאלן זיי ארויס, זיי ווייסן נישט די אלע זאכן; ווען עס איז דא צאמקום ביי די פרויען, און ווען געשעפטן קומען פארקויפן, שמחות וכדומה; האבן מיר דעמאלט געמאכט א פרויען טעלעפאן וואס מעלדט אלע הודאות פאר משפחות.

יעצט זענען געקומען צו מיר חשוב'ע אינגעלייט וואס זיי האבן א גדר, זיי האבן נישט קיין טעקסט אויף זייער טעלעפאן, און זיי פרעגן ווי אזוי קענען זיי מיט האלטן די שמחות אין שטעטל, און די זמנים ווען מען דאוונט אין שטעטל, און אזוי ווייטער; וויל איך דיר בעטן אפשר איז כדאי צו מאכן א טעלעפאן וואס רופט אן און מעלדט אלע זאכן וואס איז נוגע אויך פאר די מענער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת עקב, ט"ז מנחם-אב, שנת תשפ"ו לפרט קטן

לכבוד ... נרו יאיר

עס איז דא א בריוו פון הייליגן רבי'ן געשריבן פאר אנשי שלומינו (מכתבי רבינו ז"ל בתחילת ספר עלים לתרופה, מכתב א), דער רבי שרייבט דעם לשון: "דערמאנט אייך איטליכער ווי אזוי איך האב אייך געפונען"; דער רבי פרעגט אונז אויב מיר געדענקען ווי אזוי מיר האבן אויסגעזען איידער אונזער התקרבות, דער רבי וויל מיר זאלן עס געדענקען, מיר זאלן אלץ מכיר טובה זיין דעם רבי'ן און אלץ דאנקען דעם אייבערשטן, ווי אזוי מיר האבן אויסגעזען אנעם צדיק, ווייל דאס וועט אונז געבן כח צו בלייבן ביים צדיק, מיר זאלן נישט שוואך ווערן פון די מניעות, חלישות הדעת, בלבולים וכו'.

זיי זיך נישט מבלבל פון קיינעם, און ווער נישט אויסער זיך אז מען האט געלאכט און געשפעט פון דיר וכו'; לאכן לאכט דער וואס לאכט ביים סוף, יעצט קען מען לאכן פון ברסלב'ע חסידים, יעצט קען מען לאכן פון סדר דרך הלימוד, מען קען לאכן פון חתונה מאכן די קינדער בקדושה ובטהרה, אבער ווען עס וועט קומען דעם לעצטן טאג - דעמאלט וועט דער ברסלב'ער חסיד וואס האט זיך געשטארקט מיטן רבינ'ס עצות - קענען לאכן, עס וועט זיין (משלי לא, כה): "וַתִּשְׂחַק לְיוֹם אַחֲרוֹן".

נאכאמאל בעט איך דיר מיין ליבער ברודער, ווארף אוועק דיין סמארטפאון, ווארף אוועק דיין טעבלעט; ווי אזוי וועסטו קענען קומען צום רבי'ן ראש השנה ווען דו האסט א כלי טמא ומטמא? דו פארטרייבסט די שכינה הקדושה פון דיין שטוב, די תורה זאגט (דברים כג, טו): "כִּי ה' אֱלֹקֶיךָ מִתְהַלֵּךְ בְּקֶרֶב מַחֲנֶךָ לְהַצִּילְךָ וְלָתֵת אֹיְבֶיךָ לְפָנֶיךָ, וְהָיָה מַחֲנֶיךָ קָדוֹשׁ, וְלֹא יִרְאֶה בְךָ עֶרְוַת דָּבָר, וְשָׁב מֵאַחֲרֶיךָ", דער אייבערשטער זאגט: "איר זאלט זיך פירן הייליג, ווייל אויב איר וועט זיך נישט פירן הייליג וועל איך אוועק גיין פון אייך"; די כלים פארטרייבן די שכינה הקדושה, איך בעט דיר טו עס פאר דיר, פאר דיינע דורות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, קרית ברסלב

דאס וואס דו פרעגסט אז דיין שווער און שוויגער ווילן כסדר קומען, און עס איז שווער פאר דיין ווייב, דו ווילסט וויסן וואס איז ריכטיג.

ריכטיג איז – וואס מער ארייננעמען די עלטערן פאר שבתים און ימים טובים, בפרט ווען די עלטערן ווערן פארעלטערט – איז ריכטיג וואס מער זיי צו מכבד זיין, וואס מער זיי ארייננעמען אין שטוב, און אז זיי פירן זיך אנדערש, און דו טראכסט אז עס וועט גיין אויף די חשבון פון די קינדער, דאס איז נישט אזוי, די קינדער וועלן נאר שענער אויפוואקסן בזכות כיבוד הורים.

(נאר אויב פאר דיין ווייב'ס מח איז דאס נישט גוט, זי פאלט צוריק וכו' – דעמאלט זאלסטו שיינערהייט זאגן אז עס איז אונז יעצט אביסל שווער וכו', חייך קודמין, ערשט קומט די געזונט פיזיש, און נאך מער די נפש גייסטיש).

האלט אן דיין גדר פון נישט האבן טעקסט מעסעדזש.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, קרית ברסלב

מאכסט מיך אזוי פרייליך מיטן גיין יעדע נאכט צום גמרא שיעור, עס איז אזוי הייליג צו לערנען די הייליגע תורה; אז מען לערנט תורה ווערט מען צוגעקלעבט צום אייבערשטן, מען ווערט אויסגעלייטערט און אויסגערייניגט, "אין לך בן חורין אלא מי שעוסק בתורה" (אבות ו, ב), מען ווערט באפרייט פון די שלעכטע תאוות און שלעכטע מידות.

זייער גוט טוסטו אז דו ביסט שטארק מיט דיין גדר נישט צו האבן א טעלעפאן מיט וואטס עפפ, דו ווערסט נישט דערשראקן פון דיין בעל הבית; אזוי זאלסטו ווייטער טון, ווייל די נסיונות פארשוועמען די בעסטע און די חשוב'סטע... נישטא קיין עצה, נאר צו גיין קאפ אין וואנט, בלייבן פעלזן פעסט מיט די גדרים וואס מען נעמט אויף זיך, און נאר מיט תפילה והתבודדות; בעטן דעם אייבערשטן פאר זיך, פאר די משפחה און פאר די דורות.

זיי נישט מוותר אויף לערנען יעדן טאג ח"י פרקים משניות, און אויף זאגן א יום תהלים.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך פריי זיך זייער צו הערן אז דו ביסט שטארק מיט דיין גוטע גדר נישט אריינצונעמען אין שטוב די סמארטפאון און טעבלעט, איך פריי זיך אז מיין ארבעט פון מחזק זיין אזויפיל יארן – גייט נישט לאיבוד, און ביים סוף נעמט מען אן אז א אידישע שטוב גייט נישט מיט א טעלעפאן.

קומענדיגע וואך מאך איך דעם יערליכן דרייוו אז אלע מיינע תלמידים זאלן גיין נאך געלט, איך קוק איבער די חשבונות פון די פריערדיגע קאמפיינס, זע איך אז די פריערדיגע זיבן קאמפיינס האסטו מיר געהאלפן ברענגען פאר די קהילה א חשבון פון צוויי הונדערט זעקס און דרייסיג, פינף הונדערט און דריי טויזנט דאלער, נאר פון גיין נאך געלט ביי די קאמפיין, אויסער וואס דו העלפסט די מוסדות א גאנץ יאר.

איך וויל דיר בעטן דו זאלסט מיך די יאר אויך העלפן גיין נאך געלט, שעם זיך נישט פון קיינעם, בעט פון יעדן איינעם, און זיי מחזק דיינע חברים תלמידי הישיבה זיי זאלן זיך אלע אנשטרענגען די איין מאל אין יאר פאר מיר און פאר זיי.

בלייב שטארק מיטן נישט אריינברענגען אין שטוב די טעלעפאן, טעבלעט וכדומה, אזוי וועסטו האבן א הייליגע שטוב, הייליגע דורות.

בעזרת ה' יתברך - יום ה' פרשת חקת בלק, (בלק בא"י), י' תמוז, שנת תשפ"ו לפרט קטן

אברהם הערש נרו יאיר, גבאי קרית ברסלב

די "שטעטל בלעטל" איז הערליך שיין, אנגעפילט מיט אזויפיל חיזוק און אזויפיל עצות פון רבי'ן, עס קומט דיר א גרויסן יישר כח פאר די כוחות וואס דו לייגסט אריין אין דעם וואך נאך וואך.

בנוגע די בילדער אפטיילונג מיט די קרעדיט פאר די וואס ברענגען די בילדער; מען דארף זען וואס איז ריכטיג, ווייל דאס אפכאפן בילדער ביי אונז אין שול מיט א סמארטפאון און באקומען דערפאר א יישר כח אין אונזער צייטונג – איז נישט וואס מען הערט ביי די שיעורים; ביי די שיעורים און ביי די בריוון רעדט מען אז דאס איז א מזיק, א בור ברשות הרבים, מען לערנט די יוגנט אז ביי די דרשות זאגט מען אסור, אסור, אסור, אבער למעשה אויב ווילסטו זיין פון די קנאקערס, זאלסטו ברענגען א סמארטפאון, אפכאפן די פאסירונגען וכו', און דו באקומסט א קרעדיט; טראכט א געדאנק וואס מען זאל טון אויף להבא, איך וויל נישט אין די קהילה א סמארטפאון.

ווילסט הערן עפעס שרעקעדיג? איך בין געווען אין חדר די וואך, עפעס איז אויסגעקומען צו רעדן פון טעלעפאנס, איך שטיי אין די האלווע"י און ווייז פאר א גרויס קינד מיין טעלעפאן, ווי עס האט א הכשר, און קליינע קינדער פון קינדערגארטן אין כתה א' שרייען מיר: "ראש ישיבה, מיין טאטע האט א סמארטפאון..." עס האט מיר געשטאכן אין הארץ; איך בעט דיר זייער זאלסט טראכטן וואס מען קען טון.

בעזרת ה' יתברך - יום ה' פרשת חקת בלק, (בלק בא"י), י' תמוז, שנת תשפ"ו לפרט קטן

מרדכי אינדיג נרו יאיר, מנהל תלמוד תורה היכל הקודש קרית ברסלב

א גרויסן יישר כח פארן זיצן היינט פאר א מיטינג מיט די קאמפעני "טעג", אוועק צו שטעלן דא אין שטעטל אן אפיס צו קענען פילטערן טעלעפאונס וכדומה; אזוי וועלן מיר קענען זיין אפגעהיטן, און אונזערע קינדער וועלן זיין אפגעהיטן פון די גרויסע סכנה פון טעכנאלאגיע.

איך בעט דיר זייער דו זאלסט מחזק זיין און אויך פארלאנגען פון אלע עלטערן וואס שיקן ביי אונז די קינדער, סיי אנשי שלומינו, און סיי וואס זענען אמאל געווען אנשי שלומינו, אדער משפחות, קינדער פון אנשי שלומינו – וואס וואוינען אין שטעטל און שיקן ביי אונז די קינדער; אלע זאלן האבן נאר אפגעהיטענע טעלעפאונס וכדומה, ווייל ווי קענען מיר האלטן קינדער פון שטיבער וואס עס איז דא דארט אפענע כלים צו אלע שלעכטע זאכן, און די וועלן אראפשלעפן אנדערע קינדער.

דער אייבערשטער זאל שוין רחמנות האבן אויף אונז און אונז אויסלייזן פון דעם ביטערן גלות.

בעזרת ה' יתברך - יום א' פרשת קרח, (חקת בא"י), כ"ז סיון, שנת תשפ"ו לפרט קטן

טייערער ... נרו יאיר

האסט מיר געבעטן איך זאל דיר שרייבן א בריוו דיך אויפצופרישן; ליבער ברודער, וועק זיך אויף, זע אז דיינע שיינע יונגע יארן זאל נישט אריבער גיין מיט נארישקייטן, זע יעדן טאג צו דאווענען און לערנען, גיי אין שול יעדן טאג דאווענען די דריי תפילות שחרית מנחה מעריב, גיי אין שול מיט מסירות נפש, גארנישט זאל אפשטעלן דאס גיין אין שול, און אז דו ביסט שפעט, דו דארפסט לויפן צו די ארבעט – זאלסטו ערשט גיין אין שול, אפילו מען דריקט דיר וכו', טראכט וואס טוט א מענטש וואס שטייט אויף און שפירט נישט גוט און רופט הצלה, מען טראגט אים אין שפיטאל, וואס טראכט ער וועגן די ארבעט? וואס פאר א חשבונות לויפן אין זיין קאפ? ער טראכט נאר פון איין זאך: 'איך וויל זיין געזונט, איך וויל לעבן, איך דארף גארנישט', אזוי דארף א איד טראכטן יעדן אינדערפרי: 'איך וויל דאווענען, איך דארף גארנישט, איך בין א איד'.

טייערער ברודער, ווארף אוועק די טעלעפאן, די קליפס, די סטעטוס; דאס קילט דיך אפ פון דיין תמימות, דאס נעמט דיך אוועק פון התקרבות לרבינו, אויך פון די ווייב מיט די קינדער. קויף זיך א פשוט'ע טעלעפאן; וועסט פריש מקורב ווערן, וועסט צוריק הנאה האבן פון די שיינע וועלט וואס דער אייבערשטער האט באשאפן, די סמארטפאון נעמט אוועק דעם מענטש פון קענען טראכטן גראד, פון הנאה האבן פון די וועלט.

איך בין זומער אין שטעטל, איך האב נישט דא קיין אימעיל, אויך נישט קיין טעלעפאן, איך זע נישט קיין טעקסט מעסעדזש, אויב דו ווילסט מיר עפעס דערציילן אדער פרעגן – שרייב מיר א בריוו, אזוי ווי אין די אמאליגע צייטן, אדער קום ארויף רעדן פנים בפנים.

בעזרת ה' יתברך - יום ד' פרשת קרח, (חקת בא"י), ב' תמוז, שנת תשפ"ו לפרט קטן

מיין ליבער הארציגער ... נרו יאיר

איך פריי זיך אזוי שטארק אז דו קומסט ביי אונז אין קאנטרי 'אילן החיים', דו וועסט זיין מיט אנשי שלומינו במשך דעם זומער.

איך וויל דיך מחזק זיין דו זאלסט אויסניצן דעם זומער אזוי ווי עס דארף צו זיין, און אז דו ביסט דורכן וואך אין שטאט פאר פרנסה, זאלסטו זיך קובע זיין יעדע נאכט צו לערנען, גיי אין שול צו שיעורי תורה, פארברען נישט די נעכט מיט נארישקייטן, און זיכער זאלסטו נישט גיין צו שלעכטע פלעצער, האלט זיך מיט אלע כוחות צו בלייבן ערליך, מאך זיך א סדר צו לערנען שיעורים אין משנה, גמרא, הלכה וכדומה, און אז דו האסט נישט קיין מוחין צו פארשטיין קלאר א שטיקל גמרא - זאלסטו זיך מאכן א שיעור אין לערנען מער אויבערפלעכליך, און אפילו דו פארשטייסט נישט אזוי קלאר - זאלסטו ווייטער לערנען. מאך זיך א סדר, הייב אן מסכת ברכות, און ווען דו ביסט עס מסיים - זאלסטו גיין צו מסכת שבת.

די נסיונות זענען גרויס, און זומער זענען די נסיונות געפערליך, און נאר אז מען לערנט תורה, מען מאכט זיך א קביעות צו לערנען טאג נאך טאג כך וכך בלעטער גמרא - קען מען זיך האלטן ריין און הייליג.

אז דו האסט חברים וואס שלעפן דיך צו גיין אויף נישט גוטע פלעצער, און דו ווייסט נישט ווי אזוי זיי אפצוזאגן; פון איין זייט ווילסטו נישט גיין, דו ווילסט זיין ערליך, דו ווייסט אז עס איז נישט ריכטיג צו גיין וואו זיי גייען השם ישמרינו, און פון די אנדערע זייט האסטו נישט די כוחות צו זאגן 'ניין', דו ווילסט נישט מען זאל דיך אראפקוקן, דו ווילסט נישט זיין דער פרומער; זאלסטו מיט חכמה זיך ארויסדרייען, "כִּי בְתַחְבֻּלוֹת תַּעֲשֶׂה לְּךָ מִלְחָמָה" (משלי כד ו), מיט חכמה דארף מען מלחמה האלטן מיטן יצר הרע; לעש אויס די טעלעפאן, גיי שלאפן, אינדערפרי זאלסטו זאגן אז דו ביסט פארשלאפן, דו ביסט געווען מיד וכו'; אזוי וועסטו זיך קענען האלטן ערליך, דו וועסט איבער קומען די נסיון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת קרח, (חקת בא"י), ב' דראש חודש תמוז, שנת תשפ"ו לפרט קטן

... נרו יאיר, מאנסי

איך הער זאגן אז דו ווילסט זיך אוועק ציען פון מאנסי, דו האסט פייגלעך אין קאפ צו פארן קיין פלארידע; וויסן זאלסטו, א איד וואס זוכט וואו צו קויפן א הויז, וואו צו וואוינען - קוקט נישט וואו מען קען האבן א גרויסע פאלאץ פאר ביליג, און וואו מען צאלט ווייניג טעקס (שטייער), א איד קוקט אויף איין זאך: 'וואו וועל איך קענען אויפברענגען מיינע דורות מיט יראת שמים? און מיינע דורות זאלן נישט גיין מטה מטה'; נאר אויף דעם קוקט א איד; וואו איז דא גוטע ערליכע מוסדות, וואו איז דא א גוטע שול מיט אן ערליכע רב וואס וועט מיך מחזק זיין צו דאווענען די דריי תפילות יעדן טאג, ער וועט מיך מחזק זיין נישט אריינצומען אין שטוב די טעלעפאן, טעבלעט, קאמפיוטער, און וואו איז דא אן ערליכער דיין וואס וועט מיר העלפן מיט מיינע שאלות; דאס איז א איד, און נאר אויף דעם דארף מען קוקן.

טייערער ברודער, הארציגער חבר, היינט איז דא נייע געגנטער וואס ווערן געפירט דורך ערליכע קהילות, ערליכע רבנים, דארט לוינט צו גיין וואוינען, דארט זאלסטו קויפן א דירה, אזוי וועסטו האבן סיי די גרויסע דירה; דיין ווייב און קינדער וועלן קענען לעבן במנוחה, אינאיינעם מיט יראת שמים, אבער חס ושלום זיך אוועק ציען פון אן ערליכע געגנט צו א געגנט וואס ווערט געבויט דורך ביזנעסלייט (דעוועלאופערס), א געגנט וואו עס וואוינען משפחות וואס הערן נישט אויס קיין רבנים און דיינים; ביי דעם איז געזאגט געווארן וואס די הייליגע חכמים זאגן (הוריות יב.): "תִיבוּ אַקִּילְקְלֵי דְּמָתָא מְחַסְיָא, וְלֹא תִּיבוּ אַפַּדְנֵי דְּפוּמְפְּדִיתָא", ענדערש זאלט איר זיצן אין די מיסט פון די שטאט מתא מחסיא וואס איז געווען א שטאט מיט ערליכע אידן, ווי צו וואוינען אין די פאלאצן פון פומבדיתא וואס די איינוואוינער זענען נישט געווען ערליך; מען קען פארלירן די קינדער מיט די אייניקלעך השם ישמרינו.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - ערב שבת קודש פרשת בהעלותך (שלח בא"י), כ' סיון, שנת תשפ"ו לפרט קטן

... נרו יאיר

דאס וואס איך דריי זיך ארויס פון דיר ענטפערן, אויפנעמען וכו'; ווייל עפעס שטארק באדערט מיך.

איך האב דיר געגעבן א אינגערמאן זאל ארבעטן פאר דיר, איינע פון מיינע חשוב'סטע אינגלייט, א טייערע איידעלע נשמה, און דו האסט אים גענומען און געמאכט פאר אן עבד כנעני, אים געגעבן די כלים, מען שפילט מיט זיין מח; מען זאגט אים אז עמטליך זענען די שעות פון דעמאלט און דעמאלט, און נאכדעם איז דא א טעלעפאן, טעבלעט וכדומה פאר די איבריגע שעות, דאס הייסט, פון 9:00 ביז 7:00 זאל ער זיצן אין אפיס, און פון 7:00 ביז 9:00 אינדערפרי זאל ער זיין משועבד צו ענטפערן וואטסעפפ, אימעיל וכו'; און וואס צאלסטו אים? איז דאס גערעכט?

איך בין דיך דן לכף זכות אז דו ביסט אויך שיכור, דו האסט אויך א טעלעפאן, ביסט אויך אין תפיסה.

איך בעט און איך ווארן, לאז ארויס מיין טייערער תלמיד פון תפיסה, קענסט אים האלטן אין אפיס פון 9:00 ביז 5:00, נאכדעם איז ער מיינער, נישט דיינער; ער האט א ווייב, ער האט קינדער, ער האט א נשמה...

איך דארף מקצר זיין.

בעזרת ה' יתברך - ערב שבת קודש פרשת בהעלותך (שלח בא"י), כ' סיון, שנת תשפ"ו לפרט קטן

... נרו יאיר וזוגתו תחי'

שוין א לאנגע צייט וואס איך טראכט צו מיר אויב איך זאל ענק זאגן אדער נישט, בנוגע געבן פאר א קינד א טעלעפאן מיט טעקסט מעסעדזש; איך בין ענק דן לכף זכות אז ענק זענען זייער אויסגעטון פון די וועלט, ענק זענען נישט א"פ ט"ו דעי"ט מיט די נסיונות פונעם דור.

טעקסט מעסעדזש פאר א קינד קען זיין שעדליך, ווייל ביים שרייבן געטרויען זיך מענטשן צו שרייבן זאכן וואס זיי וואלטן זיך געשעמט צו רעדן; מען קען אמאל שיקן א מעסעדזש וואס קען שעדיגן דאס קינד, מען קען אמאל שיקן א מעסעדזש א געשריבענע ארטיקל פון ניבול פה, מינות וכפירה פון איינעם צום צווייטן.

ענק זענען בעלי דעה, ענק זענען ערליך און איידל, וואלטן ענק געדארפט מער שטיין אויף די וואַך אז אין שטוב זאל נישט זיין אזעלכע נסיונות. איך ווייס אז ענקער קינד איז ליכטיג און טייער, פאר מיר לוינט נישט צו זאגן, ווייל די קינדער וואקסן דא אויף מיט א שלעכטע טעם אין מויל, אז די עלטערן לאזן אלעס, און דער ראש ישיבה איז די באג"י מע"ן (שרעקעדיגע מענטש), מיר לוינט עס נישט, ווייל וואס דארף איך אז די יוגנט זאל נישט וועלן מקבל זיין וכו', די לעצטע שטיק צייט, ווען קינדער פרעגן מיר – ענטפער איך אויף אלעס: "פרעג דיינע עלטערן", איך האף זיי נישט צו פארלירן וכו'. איך בעט איבער פארן אריין רעדן אין ענקער לעבן, איך וויל נאר עפענען די אויגן.

וואס דארף ענקער קינד באקומען לאנגע שרעקעדיגע מעסעדזשעס פון חברים וואס שרייבן אויס אלע צרות זייערע? א קינד איז נישט גענוג רייף צו קענען הערן א צווייטנ'ס צרות וכו' וואס איז פון טעקסט מעסעדזש.

איך האב נאך אסאך צו שרייבן, איך דארף מקצר זיין, איך פאר יעצט צום נייעם געגנט אין שטעטל פאר שבת, זיך מחזק זיין מיט אנשי שלומינו. שטארקט ענק, מאכט התבודדות און בעטס דעם אייבערשטן פאר ערליכע דורות.

בעזרת ה' יתברך - ערב שבת קודש פרשת בהעלותך (שלח בא"י), כ' סיון, שנת תשפ"ו לפרט קטן

... נרו יאיר, קרית ברסלב

אז דו געבסט מיר רשות וועל איך אנרופן דיין בעל הבית און אים פארהאלטן היתכן צו נעמען א אינגערמאן און אים מאכן ארבעטן ווי אן עבד כנעני, איך וועל אים אפיר נעמען, היתכן א איד פירט זיך אזוי; צוויי עוולות, ערשטנס, וואס צאלט ער דיר דען? פרוטות; צווייטנס, וואס איז דאס אויסקוועטשן אזוי אן ארבעטער?

דריטנס, ווי שעמט ער זיך נישט צו געבן פאר די ארבעטערס די כלים וואס מאכט חרוב די נפש, רוח ונשמה? מאכט חרוב אידישע שטיבער? מילא אין אפיס, אין די שעות וואס מען ארבעט – דארף מען זיצן ביים קאמפיוטער, דארט איז נישט אזוי, דארט האלט דער בעל הבית מיט אלעס וואס מען טוט אויפן קאמפיוטער, אבער וואס איז די חוצפה פון פארלאנגען פון די ארבעטערס זיי זאלן האבן די כלים; טעבלעט, טעלעפאן וכו' – פיר און צוואנציג שעה, זעקס טעג א וואך, און וואס צאלט ער שוין? ... א וואך? א בושה וחרפה.

אז דו געבסט מיר רשות וועל איך דיך אויסלייזן פון תפיסה, איך האב פון קיינעם נישט מורא, נאר פונעם אייבערשטן.

איך האב דיך ליב אזוי ווי אן אייגן קינד...

בעזרת ה' יתברך - יום א' פרשת שלח (קרח בא"י), כ"ב סיון, שנת תשפ"ו לפרט קטן

... נרו יאיר

דיין טאכטער האט נישט גוטע חברים, הינטער דיין רוקן און דיין ווייב'ס רוקן האט זי חברים גוים השם ישמרינו, און זי דערציילט פאר אירע חבר'טעס אלעס וואס זי רעדט מיט זיי; איך האב זייער מורא וואס דא וועט זיין, סיי מיט איר, סיי מיט דיינע אנדערע קינדער, און מיט מיינע תלמידות.

על כן זאלסטו איר שוין אפהאקן פון די שלעכטע חברים, נעם איר טעלעפאן און טראג עס פילטערן, מען זאל נישט קענען רופן עי איי, ווייל אז זי פרעגט אירע פראגעס פון עי איי און עי איי ענטפערט איר, דאס זענען ענטפערס פון גוים, וואס איז זייער שעדליך.

אטעם נישט אפ ווען דו כאפסט אז איך האב דיך סתם דערשראקן און זי האט נישט קיין שלעכטע חברים, ווייל עי איי איז נאך מער שרעקעדיג פון מציאות'דיגע חברים, און ווען דו און דיין ווייב וועלן זיך אויפוועקן פון שלאף – וועט שוין זיין אביסעלע שפעט, א מיידל דארף בכלל נישט האבן קיין טעלעפאן, די הייליגע חכמים זאגן (מדרש תנחומא נשא, י): "'וְיִשְׁמְרֶךָ' בְּבָנוֹת", טעכטער דארפן אסאך א גרעסערע שמירה ווי זין, און אז ענק ווילן יא געבן א טעלעפאן – מוז דאס זיין מיט א פילטער, און אויך אז מען זאל נישט קענען רופן עי איי השם ישמרינו.

איך וויל נאר דיין טובה, אויך מיין איך פערזענליך מיינע קינדער; די מוסדות זענען מיינע קינדער, איך וויל הייליגע דורות, אונזערע טעכטער זאלן גיין צו די חתונה ריין און הייליג, און וועלן נאכגיין די עלטערן בשמחה ובטוב לב.

ווי אזוי וואלסטו געשפירט ווען דו ווייסט אז ביינאכט, ווען דו און דיין ווייב שלאפן שוין, אז דיין טאכטער רופט מיט איר טעלעפאן גוים און גוי'טעס? וועלכע טאטע מאמע וואלטן דאס געקענט אויסהאלטן? ליבער ברודער, דאס איז עי איי; עלטערן גייען זיך לייגן און די קינדער רופן מיט זייער טעלעפאן די סטרא אחרא און שמועסן מיט זיי, רעדן זיך אויס און פרעגן אלע זייערע ספיקות און שאלות, השם ישמרינו, און ווען די רבנים בעטן זיך: "ראטעוועט... געוואלד..." – מאכט מען פון זיי א געשפעט.

דער אייבערשטער דארף שוין רחמנות האבן אויף אונזער דור, מיר זענען יעצט אין די גרעסטע סכנה וואס קען נאר זיין, אונזערע קינדער זאלן נישט אוועק גליטשן צו די טומאה השם ישמרינו.

בעזרת ה' יתברך - יום א' פרשת שלח (קרח בא"י), כ"ב סיון, שנת תשפ"ו לפרט קטן

... נרו יאיר

איך בין זייער פרייליך צו מאכן מיט דיר דעם געשעפט, אז דו נעמסט נישט מער ארויס פון אפיס די טעבלעט וכדומה, אפילו נישט צו האלטן אין קאר, און איך זאג דיר צו אז דו וועסט קענען [...].

זיי שטארק מיט דיינע שיעורים כסדרן, מאך זיך א קביעות צו לערנען מקרא, משנה, גמרא, הלכה ואגדה; תורה איז מטהר דעם מענטש, תורה מאכט פרייליך, "פִּקּוּדֵי ה' יְשָׁרִים מְשַׂמְּחֵי לֵב" (תהלים יט, ט), עס זעטיגט דעם מענטש, און מען איז אפגעהיטן פון אלעם שלעכטס.

פארגעס נישט פון דאנקען דעם אייבערשטן פאר די גרויסע חסדים וואס ער האט מיט דיר געטון ביז אהער.

בעזרת ה' יתברך - יום ב' פרשת נשא ב' (בהעלותך בא"י), ט' סיון, שנת תשפ"ו לפרט קטן

מרת ...

געלויבט דעם אייבערשטן אז אייערע קינדער שפירן זיך גוט, אלע זענען געזונט; איר האט געשריבן אז א נס האט פאסירט אז דאס קינד שפירט זיך שוין גוט, איך זאג, אז אויסער די נס האט פאסירט א גרעסערע נס, אז איר האט אוועק געווארפן אלע שלעכטע זאכן, די מאוויס, די די ווי די פלעיער, די טעלעפאן; איר האט זיך אזוי דערשראקן פון צו זען די יסורים פונעם קינד אז איר האט אליינס אפגעמאכט ארויס צו ווארפן די טומאה פון שטוב; ביי מיר איז דאס א גרעסערע נס, ווייל ווען מען קוקט מאוויס ווערט מען זייער צוגעקלעבט צו דעם, אז עס איז ממש נישט מעגליך זיך צו אפשיידן פון דעם.

דער אייבערשטער זאל אייך געבן כח איר זאלט נישט צוריק לויפן צו די טומאה, איר זאלט בלייבן א ריינע הייליגע אידישע מאמע, און אויפציען די קינדער בקדושה ובטהרה, האלטס די שטוב ריין, זייט זיך מתבודד, בעטס דעם אייבערשטן פאר אייערע קינדער, אויך זאלט איר זאגן יעדן טאג תהלים.