בעזרת ה' יתברך
יום ב' פרשת חקת, ד' תמוז, שנת תשפ"א לפרט קטן
לכבוד מיין טייערער ... נרו יאיר
איך בין זייער איבערראשט פון דיר, פון דיין התמדה; דו לערנסט אזוי פלייסיג משניות, דו האלסט שוין יעצט ביים מסיים זיין די זעכציגסטע מאל גאנץ "ששה סדרי משנה".
וואו אין די וועלט זעט מען אזא זאך ביי א בחור וואס איז נישט אין ישיבה? דו ארבעסט, רוב טאג ביסטו פארנומען ביי די ארבעט און דו נעמסט אראפ יעדן טאג אביסל צייט גורס צו זיין אכצן פרקים משניות; וואו אין די וועלט זעט מען אזוינס? אפילו ביי ישיבה בחורים קען מען נישט טרעפן בחורים זאלן האבן אזא השגה, צו לערנען אזוי סאך משניות.
שטארק זיך, גיי אן מיט ח"י פרקים משניות; דאס וועט עפענען פאר דיר אלע טויערן פון גן עדן. דער הייליגער חיד"א זכותו יגן עלינו זאגט (מדבר קדמות מערכת א, אות נא) בשם דער מדרש תלפיות, אז אשר בן יעקב זיצט ביים טיר פון גיהנום, און ווער עס האט געלערנט משניות שלעפט ער ארויס פון די מלאכי חבלה און טראגט אים אריין אין גן עדן.
איך בעט פאר דיין שידוך, איך האב נישט פארגעסן פון דיר.
זומער וועל איך זיין בעזרת השם אין שטעטל, איך האף דיר צו זען.