בעזרת ה' יתברך
יום א' פרשת ויצא, ג' כסליו, שנת תשפ"ג לפרט קטן
לכבוד ... נרו יאיר
צו זיין שבת מיט אנשי שלומינו - איז ממש א מחי', די וואך שבת איז געווען ביי אונז איין שטיק התחזקות. איך וועל דיר שרייבן וואס מיר האבן גערעדט ביי שלש סעודות כדי דו זאלסט זיך אויך קענען מחי' זיין.
עס שטייט אין פסוק (בראשית כז, כב): "הַקֹּל קוֹל יַעֲקֹב וְהַיָּדַיִם יְדֵי עֵשָׂו", יצחק אבינו האט נישט דערקענט יעקב, ער האט געזאגט 'פון די הענט זעט אויס אז דאס איז עשיו און פון דאס רעדן זעט אויס אז דאס איז יעקב'. האבן מיר גערעדט, אפילו ווען דער מענטש זעט זיך ער איז איין שטיק עשיו, זאל ער נוצן זיין מויל צו רעדן צום אייבערשטן, עס זאל זיין הקול קול יעקב.
מיר האבן זיך מחזק געווען מיטן רבינ'ס התחזקות. דער הייליגער רבי האט דערציילט (חיי מוהר"ן, סימן תמא) עס איז געווען א קעניג וואס האט געבעטן זיין זון זאל אים ארויפשלעפן א גרויסע שווערע שטיין צו די אויבערשטע שטאק, דער זון האט זייער שטארק געוואלט טון דעם ווילן פון זיין טאטן אבער ער האט נישט געקענט רירן די שטיין און ער האט זיך זייער מצער געווען. ווען דער קעניג האט געזען ווי זיין קינד איז זיך אזוי מצער האט ער אים געזאגט: "ווען איך האב דיר געזאגט ארויפצושלעפן די שטיין האב איך נישט געמיינט צו זאגן דו זאלסט עס אזוי ארויפשלעפן, איך האב געמיינט צו זאגן דו זאלסט נעמען א האק און צעהאקן דעם שטיין אויף קליינע שטיינדלעך און אזוי דאס ארויפטראגן".
האט דער הייליגער רבי אויסגעפירט: "כְּמוֹ כֵן, הַשֵּׁם יִתְבָּרַךְ צִוָּה עָלֵינוּ שֶׁנִּשָּׂא לְבָבֵנוּ אֶל כַּפַּיִם, אֶל אֵל בַּשָּׁמַיִם", דער אייבערשטער זאגט אונז מיר זאלן ארויפטראגן אונזער הארץ צו אים, מיר זאלן אים דינען מיטן גאנצן הארץ, "וּלְבָבֵנוּ הוּא לֵב הָאֶבֶן", און וואס טוט מען אז אונזער הארץ איז א שטיק שטיין? "וְהוּא אֶבֶן גָּדוֹל וְכָבֵד מְאֹד" עס איז א שווערע גרויסע שטיין, "וְאִי אֶפְשָׁר לְהָרִים אוֹתוֹ לְהַשֵּׁם יִתְבָּרַךְ בְּשׁוּם אֹפֶן", עס איז נישט מעגליך דאס צו רירן פון פלאץ, "רַק עַל יְדֵי שֶׁנִּקַּח פַּטִּישׁ וּנְשַׁבֵּר וּנְפוֹצֵץ אֶת לֵב הָאֶבֶן", נאר איין וועג איז דא ווי אזוי מיר וועלן קענען אויפהייבן אונזער הארץ צום אייבערשטן, אז מיר וועלן נעמען א האק און צעהאקן די הארץ אויף פיצלעך, "וְאָז נוּכַל לְהָרִים אוֹתוֹ". נאר אזוי וועלן מיר דאס קענען אויפהייבן צום אייבערשטן, "וְהַפַּטִּישׁ הוּא הַדִּבּוּר", דאס רעדן צום אייבערשטן און אים בעטן דאס איז די האק וואס צעהאקט דעם שטיינערנעם הארץ, עד כאן המשל והבן.
מיר האבן גערעדט, ווען א מענטש זעט זיך ער איז בבחינת עשיו, ער איז פול מיט עבירות - טאר מען נישט ווערן מיואש, נאר נוצן דעם קול קול יעקב, זאג פאר'ן אייבערשטן: "זיי מיר מוחל", זאג דעם אייבערשטן דיינע רצונות, בעט אים ער זאל דיך מקרב זיין צו אים; אז מען האקט מיטן האק - דעמאלט איז מען זוכה צו ווערן א גרויסער צדיק.
דער אייבערשטער זאל העלפן זאלסט האבן הצלחה אין אלע ענינים.