בריוון פונעם ראש ישיבה שליט"א

בעזרת ה' יתברך - יום ה' פרשת כי תצא, י"א אלול, שנת תשפ"ה לפרט קטן

צו מיין טייערער ... נרו יאיר, קרית ברסלב

א גרויסן דאנק פאר אלעס וואס דו העלפסט אין די מוסדות, דו פירסט די קאך, שוין איבער א יאר וואס דו קאכסט יעדן טאג פרישטאג און מיטאג, און זומער אויך נאכטמאל פאר אפאר הונדערט קינדער כן ירבו; וואויל איז דיר אז דו העלפסט מיט אזא געטריישאפט.

אבער איך וויל דיר זאגן, איך וויל דו זאלסט זיין די איבריגע חלק טאג אין ישיבה ביי די שיעורים פון ישיבה. עס איז מיר נישט ווערד דאס וואס בחורים העלפן די ישיבה נאר אויב א חלק טאג איז מען אין ישיבה. ווייל דו ביסט נאך יונג און דו דארפסט נאך לערנען ווי צו פירן א לעבן, ובכן בעט איך דיר, דו קענסט ווייטער העלפן די מוסדות נאר בתנאי אז דו קומסט צו די שיעורים אין ישיבה.

אז דו וועסט פאלגן דעם ראש ישיבה – וועסטו נישט דערלייגן, קיינער האט נאכנישט דערלייגט פון פאלגן דעם ראש ישיבה.

ווייז דעם בריוו פארן מנהל שליט"א, און פאר די מגידי שיעורים, ווייל איך וויל זיי זאלן לערנען מיט דיר, און נישט טראכטן אז דו ביסט אנדערש, דו קענסט טון וואס דו ווילסט ווייל דו העלפסט, איך וויל דו זאלסט זיין א בחור אין ישיבה ווי אלע בחורים.

בעזרת ה' יתברך - יום ד' פרשת ראה, כ"ו מנחם-אב, שנת תשפ"ה לפרט קטן

לכבוד ... נרו יאיר

איך האב ערהאלטן דיין הודעה.

דארפסט פארשטיין, אזויפיל מענטשן ווארטן אריינצוקומען זיך דורכרעדן, און די וואך האב איך נאכנישט אויפגענומען א גאנצע וואך, ווערט א גרויסע ליסטע פון מענטשן וואס ווילן קומען; דארף מען מאכן ערשט צייט פאר די וואס האבן נישט קיין וועג צו פרעגן און זיך דורכשמועסן, אנדערע האבן נישט קיין שום וועג נאר די איין מאל א יאר וואס זיי ברעכן זייער בושה צו קומען; ווי נישט ווי דו זעסט מיך יעדן טאג אין שול, דו האסט וואו צו פרעגן דיינע שאלות.

איך וועל פרובירן צו מאכן צייט פאר ענק מארגן, נאר זיי מיר דן לכף זכות, ווייל די וואך האב איך נישט אויפגענומען מענטשן, מיין קאפ האט מיר אסאך געשווינדלט, אויך בין איך געווען ביים דאקטער, דער אייבערשטער זאל העלפן יעדן איינעם.

איך וועל פרובירן מאכן אפשר צייט מארגן פאר ענק.

בעזרת ה' יתברך - יום ה' פרשת עקב, כ' מנחם-אב, שנת תשפ"ה לפרט קטן

מיין ליבער טייערער חבר ...

איך וויל זיך אויסשמועסן מיין הארץ מיט דיר,

עס קומט שוין אלול, מען דארף זיך מאכן א חשבון הנפש, איך בין זייער צעבראכן, וואס טו איך דא, וואס פעלט מיר אויס די גאנצע ארבעט פון זיין ראש ישיבה, עס קומט ארויס ווייטאג, ווייל מען זאגט דעם וואס צו טון, מען זאגט יענעם וואס צו טון, מען זאגט מוסר, מענטשן ווערן באליידיגט פון מיר, איז וואס פעלט מיר אויס די גאנצע זאך? אפשר קען איך זיך טוישן מיט דיר? דו ביסט אזא פארגינער, אזא ווארעמער; ווער זאגט איך מעג ווייטער זיין דער ראש ישיבה? פון די אנדערע זייט, אז מוהרא"ש האט מיר יא געזאגט זיין ראש ישיבה, מוהרא"ש האט מיר געזאגט צו זאגן וכו' – דארף איך יא זאגן; אבער וואס טוט מען מיט ווייטאג, מיטן פוסע זיין על ראשי עם ישראל?

וואס טוט מען מיט אלע שיחות, ווי למשל 'דארט וואו מען זעט א חסרון איז דאס א סימן אז איך האב נישט געהאט גענוג התבודדות'? וואס טוט מען מיט די אלע שמועסן וואס מוהרא"ש האט אונז געלערנט נישט צו זיין פארנומען מיט יענעמ'ס רוחניות, נאר העלפן א צווייטן, וואס פעלט מיר אויס צו זיצן אויבן אן און זאגן פאר מענטשן וואס צו טון, ווען איך אליין ווייס נישט פאר מיר אליין ווי זיך אן עצה צו געבן?

זאת נחמתי, איין עצה איז געבליבן, רעדן צום אייבערשטן, אים בעטן מען זאל זיך נישט אפנארן, למען לא נבוש ולא נכלם ולא נכשל לעולם ועד.

בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן

טייערער ... נרו יאיר, קרית ברסלב

איך וויל דיר בעטן אויב דו קענסט מיר העלפן מאכן א סדר אויפצונעמען אנשי שלומינו, אלע וואס ווילן קומען זיך שואל עצה זיין. זיי מודיע פאר אנשי שלומינו אז במשך די צען וואך וואס איך בין אין שטעטל קענען זיי קומען פרעגן און זיך דורכרעדן.

איך וויל דיר בעטן זאלסט רעדן שיין און מיט הארץ צו אלעמען, ווייל עס גייט אריבער אויף מענטשן וואס גייט אריבער, מען דארף זייער אכטונג געבן נישט צו זיין א פוסע על ראשי עם ישראל, געב יעדן איינעם די געפיל מען זאל קענען פרעגן אלע פראגעס און זיך שפירן באקוועם צו אלעס דורכשמועסן.

איך קום יעצט פון א לוי', מיין שוואגער נרו יאיר האט פארלוירן א טייער קינד פון צוועלף יאר. ביי די לוי' האב איך זייער געוויינט צום אייבערשטן ער זאל רחמנות האבן אויף זיין טייער פאלק, די אידישע קינדער, אלע זאלן וויסן פון הייליגן רבינ'ס עצות, פון די עצה פון תפילה והתבודדות, פון קענען זיך דורכשמועסן מיטן אייבערשטן, אידישע קינדער זענען אזוי טייער און אזוי הייליג, מען דארף נאר דעם צדיק זאל אריין בלאזן רוח חיים, אלע זאלן שפירן דעם אייבערשטן, אלע זאלן גלייבן אין זיך.

דו זארג נישט פאר מיין צייט, איך בין גרייט צו זיצן ביזן עלות השחר צו העלפן אנשי שלומינו.

לאז מיר וויסן אויב דו ווילסט העלפן אנשי שלומינו.

בעזרת ה' יתברך - ד' פרשת תרומה, כ"ט שבט, שנת תשפ"ה לפרט קטן

מיין טייערער ... נרו יאיר, קרית ברסלב

איך וויל האבן מיט דיר א נאנטע שייכות, איך טראכט פון דיר אסאך. איך האף דו זעסט מיינע בריוו, איך הער נישט צוריק פון מיינע בריוו, איך ווארט צו הערן פון דיר און אויך וויל דיך זען מער.

אויך וויל איך דיר בעטן זאלסט גיין יעדע נאכט לערנען דעם בלאט גמרא ביי די שיעור פונעם דיין שליט"א אין שטעטל, ווייל נאר אז מען לערנט תורה ווערט מען פרייליך, נישטא נאך א זאך וואס מאכט פרייליך דעם מענטש - ווי לערנען די הייליגע תורה.

קום אריין קיין וויליאמסבורג יעדע שטיק צייט, איך וויל רעדן מיט דיר פנים בפנים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת ויקרא, ה' ניסן, שנת תשפ"ה לפרט קטן

לכבוד ... נרו יאיר

זע עס זאל זיין געשמאק אין שטוב ביים פסח מאכן, דאס איז די וויכטיגסטע פון אלצדינג; נאר אזוי וועלן די קינדער און דיינע דורות ליב האבן דעם אייבערשטן און ליב האבן די מצוות.

ווען דו טראכסט פון פסח וואס ווערט ביי דיר - גוט אדער ביטער? עס זענען דא בחורים און אינגעלייט וואס זאגן מיר, ווען זיי הערן דאס ווארט 'פסח' ווערט זיי נישט גוט, דאס קומט פון די חינוך וואס זיי האבן באקומען - דירעקט און נישט דירעקט; אז אין שטוב איז אנגעצויגן, מען שרייט, מען שלאגט, מען פארשעמט - וועלן די קינדער זייער גאנץ לעבן נישט וועלן הערן פון פסח און פון זיין א איד.

אויך זאלסטו וויסן, אויב דו ווילסט דיינע קינדער זאלן האבן ווייטער דא א געפיל ביי אונזער חבורה - זאלסטו מיך נישט ניצן פאר די שטעקן צו זיי; א זאך וואס דו ווילסט נישט געבן פאר דיינע קינדער - זאלסטו מיך נישט מאכן פאר דער שלעכטער. אז דיינע קינדער בעטן דיר זיי ווילן א טעלעפאן, א קאמפיוטער, א בייק, א קאמערע, אן עראפלאן, א העליקאפטער, א מאטער-סייקל - זאג נישט: "דער ראש ישיבה לאזט נישט"; ווייל דאן וועלן זיי אויפוואקסן מיט א פיינטשאפט אויף אונזער פלאץ, זיי וועלן ווארטן ווען קענען מיר שוין אוועק לויפן פון דא.

נעם דיינע קינדער צום דיין ווען דו גייסט פארקויפן די חמץ, קינדער דארפן אויפוואקסן מיטן זען זייער טאטע גיין צום דיין פרעגן א שאלה, און גייט פארקויפן די חמץ.

בנוגע ניצן חמץ'דיגע כלים פאר פסח; על פי הלכה מעג מען, מען דארף וויסן יעדע זאך ווי אזוי מען כשר'ט עס. אבער היינט איז ביליגער א נייע טאפ ווי צאלן פאר כשר'ן, איז זיכער כדאי זאלסט זיך איינקויפן פסח כלים (מען קען איינקויפן צוביסליך, יעדע יאר נאך אביסל). אויך באזונדערע טישטוכער, באזונדערע האנטוכער, באזונדערע אפווישטיכער, קינדער באטיס, קינדער צאמיס; מען לייגט דאס אוועק פון יאר צו יאר.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך - ליל שישי פרשת בשלח, ט' שבט, שנת תשפ"ה לפרט קטן

מיין טייערער ... נרו יאיר

הלואי אז מיר קענען צוריק באנייען אונזער קשר, עס איז אזוי גוט ווען מען איז צוגעבינדן צו היכל הקודש, מען פארדינט אזויפיל שיינע זאכן, מען האט חיזוק אויף דאווענען די דריי תפילות מיט מנין, מען האט חיזוק צו לערנען יעדן טאג די הייליגע תורה, חומש, משניות, גמרא וכו'.

איך וויל אזוי שטארק זאלסט זיך צוריק איינבינדן אין זאק ביים הייליגן רבי'ן, און אויך דיין גאנצע משפחה. ביים רבי'ן פארדינט מען נאר גוטס, ביים רבי'ן איז נאר דא רווחים, מען פארדינט אויף די וועלט און מען פארדינט לנצח נצחים.

קען זיין אז דו ביסט געקומען אפאר מאל און צוליב מיינע טרדות וואס ליגט אויף מיר האב איך דיך נישט באמערקט און נישט באגריסט, און דאס האט דיר געמאכט זאלסט ווערן באליידיגט און אזוי איז צוביסליך אפגעקילט געווארן אונזער קשר; וואלסטו געוויסט וואס גייט אריבער אויף מיר א טאג  - וואלסטו זיכער נישט באליידיגט געווארן, ווייל די אלע מאל וואס איך גיי אריבער מענטשן און איך גרוס נישט - איז דאס צוליב דעם וואס איך זע פשוט נישט פאר מיינע אויגן קיין מענטשן; וואלט איך געזען - וואלט איך געגריסט, איך האב ליב צו באגריסן יעדן איינעם, נאר פון רוב טרדות זע איך נישט, די קאפ איז מיר איבערגעשטרענגט.

איך וויל באנייען אונזער קשר, איך וויל דיך זען, איך ווארט אויף דיר. אמאל פלעגסטו קומען ליל שישי צום שיעור, אמאל פלעגסטו מיר שרייבן א בריוו אדער א מעסעדזש פון א סיום מסכתא, א סיום משניות, דאס האט מיך אזוי מחי' געווען.

באניי זיך, הויב אן צוריק לערנען יעדן טאג אפאר פרקים משניות און א בלאט גמרא, און זיכער זאלסטו אנטון תפילין יעדן טאג, און אנטון די הייליגע ציצית, ווייל דער אייבערשטער האט דיך ליב.

איך בין שוין זייער מיד, עס איז שוין שפעט ביינאכט, איך וועל נאך א צווייטע מאל דיר שרייבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת תולדות, כ"ו מר-חשון, שנת תשפ"ה לפרט קטן

לכבוד ... נרו יאיר

איך האב ערהאלטן די בריוו און אלע בריוו.

איך ליין דיינע בריוו, און איך בעט דיר, טראכט נישט אז דאס וואס דו באקומסט נישט צוריק בריוו איז ווייל עפעס נישט גוט טוסטו; זיי מיר דן לכף זכות, איך בין אזוי פארנומען איבערן קאפ אז איך קום נישט אן צוריק צו שרייבן, איי וועסטו פרעגן פארוואס פאר אנדערע שרייבט מען יא צוריק; בעט איך דיר, זיי נישט ברוגז.

יעצט שרייב איך דיר צוריק ווייל דו האסט מיר אזוי פרייליך געמאכט מיט די בריוו אז דו האסט זיך מתגבר געווען, און דו ביסט יא צוגעגאנגען צו דיין טאטע ביי די חתונה און אים געגעבן מזל טוב און אויך צו דיין מאמע; דאס איז וואס מאכט מיך צוריק צו שרייבן, ווייל דאס איז דער רצון השם, מען זאל מכבד זיין טאטע און מאמע, און אז מען איז ביי א שמחה און טאטע מאמע זענען דארט - זאל מען זיי מכבד זיין אפילו ווען מען האט טענות וכו' וכו'.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת וירא, י"ב מר-חשון, שנת תשפ"ה לפרט קטן

לכבוד מיין טייערער ... נרו יאיר

איך דאנק דיר פארן זיך אזוי אוועק געבן פאר די קהילה, פארן פרובירן צו העלפן אלעמען, אלע זאלן קענען האבן אן אפוינטמענט צו קענען קומען רעדן. עס איז זייער וויכטיג אז אלע אברכים זאלן קענען קומען מפעם לפעם זיך דורכשמועסן, סיי זאכן וואס איז בין איש לאשתו, סיי וואס איז נוגע פאר פרנסה, און סיי פאר חינוך הבנים והבנות.

געדענק וואס מוהרא"ש זאגט, גבאי איז די ראשי תיבות א'נא ב'כח ג'דולת י'מינך, א גבאי דארף האבן רחמנות, רעדן שיין צו אלעמען, און חס ושלום נישט זיין קיין פוסע על ראשי עם, נישט טרעטן אויף מענטשן, און חס ושלום נישט מאכן קיין ביזנעס פון צרות ישראל, נאר מאכן זיכער אז יעדער האט א מעגליכקייט צו קומען זיך דורך רעדן און יעדן אויפנעמען שיין.

אויך זאלסטו אויפזוכן די וואס האבן דמיונות (קאמפלעקסן), די אלע תלמידים, אברכים - וואס זענען באהאלטן אין די לעכער, זיי טראכטן 'מען דארף מיך יא, מען דארף מיך נישט', און זיי מחזק זיין צו קומען, "לְהוֹצִיא אֶת עַצְמוֹ מֵהַמְדַמֶּה וְלַעֲלוֹת אֶל הַשֵּׂכֶל", ארויס צו גיין פון דמיון און קומען צום שכל (לקוטי מוהר"ן חלק א, סימן כה).

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת נח, כ"ה תשרי, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

עס איז נישט אמת וואס דו שרייבסט אז היינט קען מען מער נישט צוקומען וכו', נאר דער וואס האט פראטעקציע דער קען קומען; דאס איז ליגנט, איך נעם אויף יעדן טאג, (מער ווי אמאל ווען מען האט נאר געקענט קומען זונטאג), יעדן טאג קען מען קומען זיך שואל עצה זיין.

זאג יעדן טאג תהילים; ווער עס זאגט יעדן טאג תהילים איז זוכה אז דוד המלך אליין איז מליץ יושר ביים כסא הכבוד פאר אים, און מען איז זוכה צו זען ניסים ונפלאות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת כי תצא, י' אלול, שנת תשפ"ד לפרט קטן

... תחי'

קויפט זיך אויער שטאפערס, און ווען איר הערט פון פרויען: "דער ראש ישיבה זאגט אזוי", "דער ראש ישיבה זאגט אזוי" - זאלט איר אריינלייגן די שטאפערס - וועט איר נישט ווערן צעדרייט פון זיי, און אז איר ווילט וויסן באמת וואס איך זאג - קוקט אין די קונטרס עצתו אמונה, און הערט אויס די שיעורים.

אין צענדליגער און הונדערטער בריוו אין אשר בנחל שטייט די ווערטער: "קיינער זאל דיר נישט קומען זאגן 'מוהרא"ש האט אזוי געזאגט', 'מוהרא"ש האט אזי געזאגט', וואס עס שטייט אין אשר בנחל, און וואס מען הערט ביי די שיעורים - דאס איז וואס איך זאג, און דאס איז וואס איך וויל".

קריגט זיך נישט מיט קיינעם, זייט דן לכף זכות יעדן איינעם; בעטס דעם אייבערשטן איר זאלט ליב האבן יעדן איינעם.

בעזרת ה' יתברך - יום ב' פרשת כי תבוא לאומאן, י"ג אלול, שנת תשפ"ד לפרט קטן

לכבוד ... נרו יאיר

די וואך אין די פרשה האבן מיר די פרשה פון ביכורים, דאס איז די מצוה פון הכרת הטוב, דאס איז די שענסטע מידה, און אז מוהרא"ש האט אונז אזויפיל געגעבן - דארפן מיר האבן הכרת הטוב און צוריק טון פאר מוהרא"ש וואס ער בעט.

מוהרא"ש בעט אין די צוואה איין זאך; מיר זאלן זיך נישט קריגן, מיר זאלן נישט האבן צו טון מיט מחלוקת, מיר זאלן זיך נאר ליב האבן, ווייל דאס איז די שליסל צו אלעס, אונזער הצלחה איז אנגעהאנגען נאר אין די איין זאך; אויב עס וועט בלייבן די ליבשאפט צווישן אונז, כל זמן מיר וועלן זיך פארגינען און ליב האבן - וועלן מיר האבן א ריזיגע הצלחה, אויך וועלן מיר ווייטער שפירן א טעם אין די התקרבות לרבינו, מען קען שפירן אז דער רבי איז מיט אונז, אבער נאר אז די ליבשאפט וועט אנהאלטן; חס וחלילה אויב עס וועט געלונגען פארן סמ"ך מ"ם צו מאכן קנאה און שנאה צווישן אונז - וועט די קהילה, די מוסד און די שיינע חבורה צעפאלן, היה לא תהיה, און מען וועט שוין נישט שפירן די זיסע טעם פון התקרבות לצדיק, ווייל (בראשית מט, ו): "בִּקְהָלָם אַל תֵּחַד כְּבֹדִי", דער צדיק גייט אוועק ווען מען קריגט זיך און מען האט זיך פיינט.

מען גרייט זיך שוין צום גרויסן יום הדין ראש השנה, דער רבי נעמט נישט אן קיין בעלי מחלוקת, און אז מען האט איינעם וויי געטון, מען האט איינעם פארשעמט - העלפט גארנישט; עס העלפט נישט קיין תיקון הכללי אויף דעם ביז מען בעט יענעם איבער, וואויל איז דעם וואס איז מרבה שלום.

אז מיר וועלן זיך ליב האבן - וועלן מיר זען ישועות אין אלעס וואס מיר ווארטן. מוהרא"ש ברענגט זייער אסאך מאל דעם סיפור, אז דער הייליגער רבי ר' זושא זכותו יגן עלינו האט אמאל געפרעגט זיין ברודער דער הייליגער רבי ר' אלימלך זכותו יגן עלינו: "מיט וואס האסטו זוכה געווען אז מען זעט ביי דיר אזעלכע גרויסע מופתים?" האט דער הייליגער רבי אלימלך געזאגט: "ברודער, איך האב אריינגעברענגט א שטארקע ליבשאפט צווישן מיינע תלמידים, מען האט זיך זייער ליב איינער דעם צווייטן און מען רעדט שיין איינער צום צווייטן".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת פקודי, א' דראש חודש אדר ב', שנת תשפ"ד לפרט קטן

לכבוד מיין טייערער ... נרו יאיר, ירושלים

איך האב ערהאלטן דיין בריוו.

איך ווייס נישט וואס דו ביסט אזוי מבולבל, וואס איז א נפקא מינה די גאנצע זאך? וואס פייניגסטו זיך מיט די נארישקייט? קוק אויף די איין זאך: 'וואס האב איך אין האנט? וואס באקום איך דא אין מיין האנט?' איך באקום חיזוק אויף רעדן צום אייבערשטן, איך באקום חיזוק אויף זיך נישט אראפקלאפן, חיזוק אויף שלום בית, חיזוק אויף טון וואס שטייט אין די תורה, חיזוק אויף טון די מצוות מיט שמחה; דאס איז דער עיקר.

די אלע מחשבות וכו' – איז נישט נוגע אויף גארנישט; מאך מיך נישט גרויס און מאך מיך נישט קליין, מאך מיך נישט פאר א צדיק און מאך מיך נישט פאר אויס צדיק, דו קוק אויף איין זאך, אויף 'וואס האב איך אין האנט?'

לערן דעם הייליגן רבינ'ס ספרים און פאלג די עצות וואס דארט שטייט, בפרט די עצה פון משיח – משיח אלמים, משיח איז די זעלבע ווארט פון שיחה; משיח וועט אריינברענגען אין די וועלט די זאך פון שמועסן מיטן אייבערשטן, אפילו להבדיל ביי די אומות העולם וועט ער אריינברענגען די שכל פון רעדן און שמועסן מיטן אייבערשטן.

גיי צו קברי צדיקים, דארט זאלסטו זיך מתבודד זיין, וויין צום אייבערשטן: "רבונו של עולם, איך זוך דעם צדיק, וואו איז דא היינט א צדיק וואס קען מיך ברענגען אזוי נאנט צו דיר, איך זאל דיך שפירן א גאנצן טאג, איך זאל צו דיר רעדן", דער רבי זאגט (לקוטי מוהר"ן חלק ב', סימן לט), מען דארף וויינען און קייכן צום אייבערשטן מיר זאלן טרעפן דעם צדיק וואס קען אונז ברענגען צו טראכטן נאר פונעם אייבערשטן.

נאכאמאל, איך בעט דיר זייער, לאז מיך ארויס פון בילד, מאך נישט קיין עסק פון מיר, הייב מיך נישט אויף און ווארף מיך נישט אראפ. אנשטאט שטיין און חקר'נען וואס איז דער ראש ישיבה, יא א צדיק אדער נישט – זאלסטו אריינכאפן נאך משניות און נאך גמרא, און נאך אביסל גיין הפצה.

אז די שיעורים און די בריוו פון עצתו אמונה זענען דיך מחזק פאר עבודת השם – זאלסטו דאס ווייטער אויסהערן, און לערנען און פאלגן וואס שטייט אין די בריוו און וואס מען רעדט ביי די שיעורים, און אז מיר וועלן טון וואס דער רבי זאגט – וועלן מיר אלע ווערן צדיקים, אויך איך, אזוי ווי דער רבי האט בפירוש געזאגט (חיי מוהר"ן, סימן שכ), דורך לערנען זיינע ספרים ווערט מען א גרויסער צדיק.

בעזרת ה' יתברך - יום ד' פרשת תולדות, ב' כסליו, שנת תשפ"ד לפרט קטן

לכבוד מיין טייערער ... נרו יאיר, גבאי בית המדרש עצתו אמונה, קרית ברסלב

יעצט הער איך אז דו לאזט נוצן די מקוה פרייטאג צו נאכטס, און ווען מען וויל עס נוצן פאר מקוה טהרה – דעמאלט לאזטו נישט.

איך וואונדער זיך אויף דיר, פארוואס טוסטו דאס? עס איז דאך א חסרון אין צניעות; וואס דארף מען וויסן אויב מען נוצט יא אדער נישט? איך בין נישט צופרידן פון דעם, איך וויל נישט דו זאלסט עפענען פרייטאג צו נאכטס די מקוה פאר קיינעם; דאס האבן מיר געבויט אויסדרוקליך פאר א מקוה טהרה און דאס דארף זיין מיט די העכסטע מאס צניעות, אלע מתפללים ווייסן, נישטא קיין מקוה, נאר אינדערפרי קען מען נוצן די מקוה.

איך האף דו וועסט טון מיין ווילן און נישט זיין קלוגער. איך בין נישט ברוגז אז מען איז קלוגער און מען טוט אנדערש, אבער מיין נאמען נעם אראפ; כל זמן עס פאררופט זיך בנשיאת ראש ישיבה – דארף זיין דאס גרעסטע מאס איידלקייט וואס איז פארהאן.

אגב, וואס איז דאס עפענען די מקוה שבת נאכמיטאג אז מען זאל קאָלעצן אין מקוה בשעת מען מאכט שלש סעודות? נישטא קיין מקוה שבת נאכמיטאג; מילא איינער איז מקפיד אויף טבילת עזרא און ער בעט דיר צו עפענען – איז איין זאך, אבער אויסשטעלן א מנהג אז די קהילה גייט זיך באדן שבת נאכמיטאג – וויל איך נישט.

פרעג דעם דיין ווי הייס דו זאלסט אנשטעלן די מקוה אויף שבת, מען זאל זיך נישט ווייקן, צוליב חילול שבת.

בעזרת ה' יתברך - יום ג' פרשת חיי שרה, כ"ג מר-חשון, שנת תשפ"ד לפרט קטן

לכבוד מיין טייערער ליבער ... נרו יאיר

זייער גוט טוסטו אז דו האסט נישט גענומען אן אנדערע ארבעט, ביסט געבליבן ארבעטן נעבן די ישיבה, אז דו זאלסט קענען ארויפקומען יעדן טאג אין ישיבה לערנען אביסל און בעיקר הערן די שיינע זיסע שיעורים פון רבי'ן.

איך געדענק יארן צוריק האט מיר מוהרא"ש געזאגט, בחורים מעגן ארבעטן אבער זע נאר זיי זאלן בלייבן צוגעבינדן צו די ישיבה.

רבי נתן האט געבעטן דעם רבי'ן: "רבי, בינד מיך צו אין דיין זאק, איך זאל נישט קענען אנטלויפן"; דאס דארף מען בעטן און אויך טון במעשה, אלע סארט שפיצלעך און דריידלעך צו בלייבן פארקנופט ביים רבי'ן.

שרייב מיר אויך אמאל א בריוו. שרייבן בריוו איז א זאך וואס קנופט צו דעם מענטש.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיין טייערער ליבער ... נרו יאיר

איך בענק זיך זייער נאך דיר, א שאד דו קומסט נישט אין שטעטל כאטשיג איין מאל א וואך באזוכן דעם ראש ישיבה מיט אנשי שלומינו.

עס איז וויכטיג צו בלייבן צוגעבינדן צום ראש ישיבה און אנשי שלומינו. אויף די וועלט דארף מען אסאך חיזוק, און ביים רבי'ן קען מען זיך גוט אויפפרישן, זיך מחזק זיין, זיך אנגרייטן אויף שפעטער.

זיי שטארק מיט א פרק משניות א טאג, א בלאט גמרא א טאג און חומש מיטן תרגום; אויף דעם זיי נישט מוותר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

מרת ... תחי'

איך האב ערהאלטן אייער בריוו.

אז אייער מאן קומט נישט צו די שיעורים אין ישיבה - איז ער נישט קיין מתנגד און נישט קיין חסיד שנפל. טרייבט נישט איבער; איר האט א טייערע מאן, א גאלדענע הארץ.

דא איז נישט קיין חסידות ווי אלע דארפן קומען צו די שיעורים; די שיעורים זענען פאר בחורים, עס איז בכלל נישט פאר אינגעלייט; וואס דארפט איר זיך אויפעסן אייער געזונט אז אייער מאן גייט נישט צו די ראש ישיבה'ס שיעורים?!

דאנקט דעם אייבערשטן - וועט איר זען ניסים.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - א' פרשת דברים, כ"ח תמוז, שנת תשפ"ג לפרט קטן

לכבוד ... נרו יאיר

ביטע זיי מחזק האברך ... נרו יאיר, ער האט ערגעץ וואו געלערנט חומרות ופרישות; זיין ווייב תחי' בעט זיך זי וויל לעבן מיט אים און ער דרייט זיך אלץ ארויס.

איך האב אים מדריך געווען אזוי ווי מוהרא"ש זכותו יגן עלינו האט אונז געלערנט; זעט אויס זיינע חכמות המדומות טראגן אים אין נישט גוטע פלעצער, אזוי ווי דער רבי האט געזאגט פאר ר' ראובן יוסל זכרונו לברכה (עיין פעולת הצדיק סימן תרע, הערה ו): "דיין טאטנ'ס חומרות פירן אים אין שאול תחתיות", וד"ל.

ביטע זיי אים מחזק, בעיקר זיי אים מחזק ער זאל קומען צו זיין ראש ישיבה; ער זאל פרעגן זיינע פראגעס זיין ראש ישיבה און אז זיין שטוב וויל פרעגן זאל ער איר נישט אוועק מאכן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - א' פרשת קרח, ראש חודש תמוז, שנת תשפ"ג לפרט קטן

לכבוד מיין טייערער ליבער ... נרו יאיר

קום אין ישיבה, א שאד יעדן טאג וואס דו קומסט נישט; איך האף צום אייבערשטן צו זיין דער גוטער שליח צו זיין דיין שדכן, און ווען דו וועסט חתונה האבן - וועסטו זיך אזוי בענקען צו די יארן וואס דו האסט געקענט זיצן אין ישיבה, לערנען און הערן שיעורים פון דער ראש ישיבה.

טייערער ... גיי שלאפן צייטליך. עס שטייט (בראשית א, ה): "וַיְהִי עֶרֶב וַיְהִי בֹקֶר", ווי אזוי דער נאכט איז - אזוי איז דער טאג; דריי זיך נישט ביינאכט אין גאס מיט בחורים וואס רייכערן און קוקן קליפס און ווידיאוס וכו', ביינאכט איז די צייט פון די נישט גוטע; גיי שלאפן און שטיי אויף אין צייט, קום אין ישיבה. איך ווארט אויף דיר, איך האב דיך ליב און איך האב ליב דיין טאטע, איך וויל נאר דאס גוטס ביי דיר.

זיי מכבד דיין טאטע שליט"א; דיין טאטע איז אן ערליכער איד, א צדיק, מן הסתם דו מיט דיינע געשוויסטער כאפן נישט וואס איר האט. געב אכט, זיי אים מכבד - וועסטו זוכה זיין צו אריכות ימים ושנים.

בעזרת ה' יתברך - ערב שבת קודש פרשת נשא ב', י"ג סיון, שנת תשפ"ג לפרט קטן

לכבוד ... נרו יאיר

איך הער זאגן אז ווען מענטשן רופן דיך פרעגן אויב זיי קענען קומען צו מיר רעדן - זאגסטו זיי אפ; דו ביסט זיי מסביר אז 'פארדעם קומסטו שטערן? פאר אזעלכע נארישע זאכן?'

וויל איך דיר בעטן, איך דארף נישט קיין גבאי פאר דעם, חס וחלילה אוועק שטופן מענטשן; איך דארף סך הכל איינער זאל מאכן סדר אז מענטשן זאלן נישט דארפן ווארטן לאנג, נאר מיט א סדר ווען צו קומען איינער נאכן צווייטן, אבער חס ושלום זאגן פאר מענטשן זאלן נישט קומען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת נשא ב', י"ג סיון, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

פרעג אלע דיינע פראגעס, שעם זיך נישט; מיך שטערט נישט ווען מען פרעגט פראגעס, דו קענסט פרעגן אלע דיינע פראגעס און מיטן אייבערשטנ'ס הילף וועל איך ענטפערן וואס איך האב מקבל געווען פון מוהרא"ש זכותו יגן עלינו, די זיסע וועג פון הייליגן רבי'ן.

שטארק זיך מיט אמונה, דער רבי האט גערעדט זייער אסאך פון אמונה. דער רבי זאגט (לקוטי מוהר"ן חלק ב', סימן ה) דער עיקר דארף א מענטש ארבעטן צוצוקומען צו אמונה; אן אמונה איז זייער שווער דאס לעבן, ווייל מיט אמונה האט מען שטארקע נערווען, און אויב מען האט נישט קיין שטארקע אמונה, מען שפירט נישט דעם אייבערשטן, מען מיינט זאכן פאסירן פון זיך אליין, מען קוקט אויף די וועלט ווי עס פירט זיך חס ושלום מיט טבע, מקרה, מזל - לעבט מען שטענדיג מיט פחדים און שלעכטע מחשבות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

   יום א' פרשת נשא א', ראש חודש סיון, מ"ה לעומר, שנת תשפ"ג לפרט קטן

מרת ... תחי'

אז מען פרעגט און מען ענטפערט - דארף מען אננעמען.

איר זענט געקומען מיט אייער מאן נרו יאיר, מען האט איבערגערעדט אלע פרטים, און מען האט מיט דעת תורה גע'פסק'נט מען זאל ווארטן לכל הפחות צוויי יאר וכו' - דארף מען דאס אננעמען.

איר האט ליכטיגע קינדער, זאלט איר דאנקען דעם אייבערשטן פאר זיי און שעפן נחת פון זיי, און ווען עס וועט קומען די צייט מיט פרישע כוחות - וועט מען זיין גרייט צו נאך קינדער, יעצט איז א בחינה וואס חכמינו זכרונם לברכה זאגן (פסחים כב:): "כשם שקבלתי שכר על הדרישה, כך אני מקבל שכר על הפרישה".

אז מען פרעגט איבער - זאג איך סיי ווי נאר וואס יענער וויל הערן; אויב אזוי דארף מען נישט קומען, מען קען גלייך טון וואס מען וויל.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

   יום א' פרשת נשא א', ראש חודש סיון, מ"ה לעומר, שנת תשפ"ג לפרט קטן

לכבוד ... נרו יאיר

אנשטאט ווארפן די שולד אויף די ווייב און זאגן אז זי איז דער פראבלעם - זאלסטו ענדערש תשובה טון. ווייל דער הייליגער בעל שם טוב זכותו יגן עלינו זאגט: "ווען א מענטש איז פוגם במחשבה, ער טראכט שלעכטע זאכן - ליידט ער נאכדעם צרות פון זיינע אייגענע קינדער, ווען א מענטש איז פוגם בדיבור, ער רעדט זאכן וואס מען טאר נישט - ליידט ער נאכדעם צרות פון זיין ווייב, און ווען א מענטש איז פוגם במעשה, ער זינדיגט און טוט עבירות - ליידט ער נאכדעם פון מענטשן".

גיי אין א ווינקל, זוך א פלאץ וואו קיינער זעט נישט וואס דו טוסט, און וויין זיך גוט אויס צום אייבערשטן אויף אלעס וואס דו האסט פוגם געווען במחשבה, דיבור ומעשה; וועסטו זוכה זיין צו וואס שלמה המלך זאגט (משלי טז, ז): "בִּרְצוֹת ה' דַּרְכֵי אִישׁ, גַּם אוֹיְבָיו יַשְׁלִם אִתּוֹ", ווען א מענטש גייט מיטן אייבערשטן - וועלן זיינע פיינט ווערן פריינט; חכמינו זכרונם לברכה זאגן (בראשית רבה נד, א): ווער זענען זיינע פיינט? "רַבִּי יוֹחָנָן אָמַר, זוֹ אִשְׁתּוֹ", דאס מיינט מען די ווייב; ווייל ווען א מענטש פירט זיך אויף ווי עס דארף צו זיין - דעמאלט ווערט זיין ווייב זיין העלפער, זי וועט שלום מאכן מיט אים און זיין פאר אים אן עזר.

איך וועל זיין אם ירצה ה' שבועות אין שטעטל. איך האב איינגעטיילט די ימים טובים; פסח און שבועות בין איך דארט, און חודש תשרי בין איך אין שטאט. איך גיי אהין ווייל איך דארף זיי אויך מחזק זיין, אבער נישט אז אלע דארפן אהין קומען. מאך נישט דא קיין חסידות, דו דארפסט נישט איבערדרייען דיין גאנצע שטוב צו קומען, עס פעלט בכלל נישט אויס צו קומען. דער עיקר איז, וואו מען איז - זאל מען פרובירן דאווענען מיט אנשי שלומינו און מקבל זיין די תורה פונדאסניי.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

                 יום ד' פרשת נשא א', ד' סיון, מ"ח לעומר, שנת תשפ"ג לפרט קטן

לכבוד ... נרו יאיר

איך זאג דיר נאכאמאל, נעם נישט אריין אין דיין שטוב קיין טעלעפאן, לאז דיין שטוב זיין ריין און הייליג, עס זאל זיך ציען ערליכע דורות.

דארפסט א טעלעפאן פאר פרנסה? דארפסט אינטערנעט פאר פרנסה? מען קען האבן א טעלעפאן פאר פרנסה, מען קען האבן אינטערנעט פאר פרנסה - אבער אין א אידישע שטוב טאר נישט אריינקומען קיין טעלעפאן, טעבלעט, קאמפיוטער.

איך וועל ווייטער זאגן און שרייבן דעם אמת, אפילו איך וועל בלייבן אליין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

       יום ג' פרשת במדבר, כ"ה אייר, מ' לעומר, שנת תשפ"ג לפרט קטן

לכבוד ... נרו יאיר

מזל טוב פארן סיום מסכת כלאים ירושלמי, און מזל טוב פארן מארגנדיגע סיום מסכת סוטה, און די גרעסטע מזל טוב פארן אנהייבן מסכת גיטין; יעצט בזמן וואס מען גרייט זיך אויף קבלת התורה - הויבסטו אן לערנען יעדן טאג א בלאט גמרא, דאס וועט דיך אפהיטן פון אלעם שלעכטס.

שבועות וועל איך זיין מיטן אייבערשטנ'ס הילף אין קרית ברסלב, איך וועל דאווענען אלע תפילות אינעם בית המדרש אויף האשקי גאס.

אויך אם ירצה ה' זומער הבא עלינו לטובה וועל איך זיין מיט די בחורים אין שטעטל; די יאר הויבט זיך אן די קעמפס מיט א וואך פריער, מען הויבט אן פרשת חקת בלק. איך האף מיטן אייבערשטנ'ס הילף צו געבן שיעורים במשך די זומער וואכן אין 'היכל ראזענבערג'.

איך האב געמאכט א נייע זאך אין ישיבה, איך וויל דו זאלסט וויסן, מען קען נישט קומען אין ישיבה נאר מיט א ריינעם טעלעפאן. איך בעט זיך שוין ביי די בחורים א לאנגע צייט, יעצט האב איך געדארפט טון למעשה, איך האב געדארפט אוועק שיקן סיי בחורים און סיי אינגעלייט וואס דרייען זיך דא אין ישיבה; מען קען נישט קומען אין ישיבה מיט א טעלעפאן.

איך שרייב דיר דאס פאראויס, זאלסט וויסן אז איך מיין דיך אויך; מען קען נישט קומען אין ישיבה מיט א טעלעפאן.

איך האב נעכטן געשמועסט ביי די שיעור מיט די בחורים, זיי זאלן וויסן, וואס דיין ווייב וועט נאר פרובירן צו טון זי זאל זיין אינטערעסאנט פאר דיר, ווי אזוי זי וועט זיך אנטון, ווי שיין זי וועט זיך מאכן - וועט זי נישט קענען קאמפיטן מיטן טעלעפאן. אז דו וועסט האבן א טעלעפאן וועט דאס זיין מער אינטערעסאנט, און זי וועט ווארטן זאלסט געבן א בליק אויף איר און איר געבן אויפמערקזאמקייט, די שטוב וועט צעפאלן.

וואויל איז דעם וואס איז נישט צוגעבינדן צום טעלעפאן, ער איז צוגעבינדן צום אייבערשטן און צו די תורה.

דער אייבערשטער זאל העלפן זאלסט האבן הצלחה אין אלע ענינים.