בעזרת ה' יתברך - יום ד' פרשת ראה, כ"ד מנחם-אב, שנת תשפ"ד לפרט קטן
לכבוד ... נרו יאיר
איך בעט דיר זייער, אפילו עס איז דיר ביטער שווער, דו ווארסט אויף דיין שידוך, דו ביסט אזוי שטארק צעבראכן, דו פרעגסט 'מאין יבוא עזרי? פון וואו וועט קומען מיין הילף?' זאלסטו זיך נישט מייאש זיין, דו וועסט טרעפן דיין שידוך און אויפשטעלן א שיינע ערליכע שטוב.
שטארק זיך מיט לימוד משניות, פארפעל נישט צו זאגן יעדן טאג ח"י פרקים משניות. אפילו דו פארשטייסט נישט וואס דו לערנסט - זאלסטו זאגן די ווערטער, דער רבי זאגט (שיחות הר"ן, סימן עו): "שֶׁאֵין צְרִיכִין בְּלִמּוּד רַק הָאֲמִירָה לְבַד", מען דארף נישט ביים לערנען נאר זאגן די ווערטער.
משניות איז מזכך ומטהר די נפש רוח ונשמה, אפילו דער וואס איז אראפגעפאלן אין בלאטע, אויב וועט ער פאלגן דעם רבי'ן, ער וועט לערנען יעדן טאג די הייליגע תורה אפילו בלי הבנה כלל, וועט ער במשך הזמן ווערן א גרויסער ערליכער איד. דער רבי זאגט (שם, סימן יט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה - ער טוט עבירות רחמנא לצלן, און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד", אויב וועט ער זיך מאכן א קביעות צו לערנען יעדן טאג 'כך וכך' - וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס.
מיר פארן יעצט קיין אומאן צום רבי'ן, ביים רבינ'ס ציון קען מען זיך עקשנ'ען און פועל'ן ישועות און רפואות למעלה מדרך הטבע.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה, א גוט געבענטשט יאר.