בעזרת ה' יתברך
יום ד' פרשת שמיני, כ' אדר ב', שנת תשפ"ב לפרט קטן
לכבוד ... נרו יאיר
פאריאר ביסטו געווען פאר מיר ווי א מלאך פון הימל, האסט מיר געהאלפן באצאלן אלע מלמדים פון אונזער תלמוד תורה היכל הקודש, אלע זאלן זיין אויסגעצאלט ביזן יום טוב פסח.
איך דערצייל דאס א גאנץ יאר פאר ווער עס פרעגט מיר פארוואס היינטיגע טעג הערט מען נישט די מעשיות פון אמאליגע צייטן, געטראפן אן אוצר פון גאלדענע רענדלעך, אדער א מאלפע איז אריינגעפלויגן אין שטוב מיט גאלדענע רענדלעך; דערצייל איך זיי אז איך האב אזא מעשה, איך האב געוויינט צום באשעפער: "הייליגער באשעפער העלף מיר, איך האב א חדר, איך האב מלמדים, איך דארף זיי באצאלן, עס קומט נישט אריין גענוג געלט פון שכר לימוד זיי צו קענען באצאלן", אזוי האב איך געוויינט און געבעטן, פלוצלונג קומט צו מיר א איד און פרעגט מיר: "וויפיל דארפסטו נאך האבן צו באצאלן די מלמדים?" איך מאך א שנעלע חשבון און איך זאג אים: "בערך פופציג טויזנט דאלער", דער איד שיקט מיר א שליח מיט פופציג טויזנט דאלער; אלע וואס הערן דאס בלייבן שטיין מיט אן אפענעם מויל, מען זעט און מען פארשטייט אז אין די היינטיגע טעג איז אויך דא מעשיות פון ניסים.
איך בעט דעם אייבערשטן ער זאל מיר ווייטער העלפן איך זאל קענען גיין צום סדר נאכט האבנדיג באצאלט אלע מלמדים און טיטשערס. די לאסט, די עול - ווערט נאר מערער, עס ליגט אויף מיר היינטיגע טעג צו באצאלן מלמדים פון פיר תלמוד תורה'ס, ליבערטי, וויליאמסבורג, קרית יואל און ירושלים, און דריי מיידל שולעס, ליבערטי, וויליאמסבורג און קרית יואל. איך גלייב אז דער אייבערשטער וועט מיך נישט פארלאזן, ער וועט מיר העלפן און מיר געבן כח אנצוגיין מיט די ארבעט.
שטארק זיך, זיי ממשיך מיט דיין עבודת הקודש פון מחזק זיין אידישע קינדער. נישטא קיין גרעסערע און הייליגערע זאך ביים אייבערשטן ווי צוריקברענגען אידישע קינדער צום אייבערשטן.
איך האב געזען א ווארט פון ריי"ץ פון ליובאוויטש זכותו יגן עלינו, די תורה הויבט זיך אן מיט די מצוה פון פרי' ורבי', זאל זיך די הייליגע תורה אנהויבן מיט עפעס הייליגע זאכן, וואס עפעס הויבט זיך עס אן מיט אזא מצוה פון פרי' ורבי'? נאר דאס געבט אונז צו פארשטיין וואס איז די הייליגסטע זאך ביים אייבערשטן 'ברענג נאך א איד צום אייבערשטן'; ביסט א איד - מאך נאך א איד.
א פרייליכן כשר'ן יום טוב.