בעזרת ה' יתברך
יום ה' פרשת תולדות, א' דראש חודש כסליו, שנת תשפ"ג לפרט קטן
לכבוד ... נרו יאיר
עס איז דא אזויפיל וואו צו גיין הפצה; סיי אין טברי', סיי אין צפת און סיי אין מירון; וויפיל מפיצים עס וועט זיין - וועט נישט זיין גענוג, בפרט אין ארץ ישראל קען מען גיין לארכה ולרחבה.
גיי הפצה צו אלעמען, אבער פארלייג זיך אויף פרומע אידן; די פרומע אידן דארפן זייער וויכטיג דעם רבי'ן. די מפיצים פון יבנאל גייען בעיקר צו נישט פרומע אידן, א שאד פאר די ערליכע אידן זאלן נישט וויסן פון די זיסע עצות פון רבי'ן; פון התבודדות, פון סדר דרך הלימוד, עצות פאר שלום בית, עצות ווי צו לעבן.
קענסט טון נאך זאכן פאר פרנסה, אבער דער עיקר זאלסטו עוסק זיין אין הפצה. אזוי ווי דער רבי האט געזאגט (ספורי מעשיות מעשה ג, מחגר): "מען זאל אנטרינקען ביימער, איר מעגט עוסק זיין אין אנדערע פרנסות, אבער דער עיקר זאלט איר עוסק זיין אין אנטרינקען ביימער".
דער אייבערשטער זאל העלפן זאלסט האבן הצלחה אין אלע ענינים.