בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן
לכבוד מיין טייערער ... נרו יאיר
אז דו גייסט פארשפרייטן די הייליגע ספרים און קונטרסים פון רבי'ן און פון מוהרא"ש, זאלסטו אכטונג געבן אויפן רבינ'ס נאמען, מאכן א שיינע נאמען אויפן רבי'ן. דער רבי זאגט (ספר המדות אות צדיק, סימן סט): "מִי שֶׁאוֹהֵב אֶת הַצַּדִּיק", ווער עס האט ליב דעם צדיק, "צָרִיךְ לִשְׁמֹר אֶת הַצַּדִּיק", דארף היטן אויפן צדיק, "שֶׁלֹּא יֵצֵא עָלָיו שֵׁם רָע", עס זאל נישט ארויסגיין א שלעכטע נאמען אויפן צדיק.
רייץ זיך נישט מיט קיינעם, גיי נישט אין שולן וואו מען פארשעמט דעם רבי'ן. זעסט וואס פאסירט, יעצט קומט מען צו מיר מיט טענות היתכן מיינע תלמידים שלאגן, נאכדעם וואס דו און דיין ברודער האבן באקומען מכת רצח און זיך פשוט געוואלט ראטעווען, זעסטו אז מען דרייט אויס די מעשה און מען טענה'ט אויף מיר אז תלמידי הישיבה זענען שלעגער. על כן בעט איך דיר גיי נישט אין שולן וואו מען פארשעמט דעם רבי'ן און מוהרא"ש, גיי אין שולן וואו מען איז מכבד דעם רבי'ן, אויך זאלסטו גיין פריוואט ביי הייזער וכו'.
גיי נישט ליידיג, נעם זיך א חברותא, לערן הלכה. דער רבי האט געוואלט מען זאל לערנען הלכה, זאלסטו פארמיטאג לערנען מיט א חברותא שלחן ערוך, און נאכמיטאג זאלסטו גיין הפצה, בטל נישט דיינע יונגע שיינע יארן.