בעזרת ה' יתברך - יום ג' פרשת כי תבוא לאומאן, י"ד אלול, שנת תשפ"ד לפרט קטן
לכבוד מיין ליבער טייערער הרב ... נרו יאיר
איך האב ערהאלטן דיין בריוו.
אויב דו ביסט מער באקוועם צו דאווענען אין אומאן ביי ... מנין - זאלסטו דארט גיין דאווענען, דאווען אין אומאן וואו דו ביסט מער באקוועם און וואו דו האסט מער ישוב הדעת, אויך אויב אונזער בנין איז דיר נישט אזוי באקוועם וכו' וכו' - זאלסטו טון וואס קומט דיר אויס גוט.
מוהרא"ש האט אלע יארן געזאגט מען זאל נישט מאכן קיין עסק וואו מען דאווענט אין אומאן, דער עיקר איז - קומען צום רבי'ן קיין אומאן, און וואו מען שפירט זיך מער באקוועם - דארט זאל מען דאווענען. דער רבי האט בפירוש געזאגט (חיי מוהר"ן, סימן תד): "יא עסן - נישט עסן, יא שלאפן - נישט שלאפן, יא דאווענען - נישט דאווענען, דער עיקר מען זאל זיין ביי מיר אויף ראש השנה".
דארפסט נישט דאווענען ביי מיר, איך האב נישט קיין חלישות הדעת פון די זאכן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה, א גוט געבענטשט יאר.