בעזרת ה' יתברך - יום ה' פרשת נשא ב' (בהעלותך בא"י), י"ב סיון, שנת תשפ"ו לפרט קטן
... תחי', תלמידת בית פיגא וויליאמסבורג
איך האב ערהאלטן אייער בריוו.
איך בין זייער פרייליך צו הערן פון אייך אז איר האט ליב סקול, איר האט ליב אייערע טיטשערס; נאך מער פריי זיך זיך אז די תלמידות האבן זיך ליב, עס איז נישטא קיין מחלוקת אין סקול, און אז אלע מיידלעך שפילן אינאיינעם, קיינער גרויסט זיך נישט אויף א צווייטן.
... תחי', געוואוינט זיך צו מיט די גוטע געוואוינהייט פון רעדן צום אייבערשטן, דער הייליגער רבי האט אונז געגעבן אזא גוטע מתנה, די זאך פון התבודדות, רעדן צום אייבערשטן אויף די אייגענע שפראך, רעדן און שמועסן מיטן באשעפער אזוי ווי מען רעדט צו א גוטער פריינד, און אזוי ווי א קינד רעדט צו זיין טאטע; ווען מען גייט אויף די וועג, מען נעמט יעדן טאג אביסל צייט צו רעדן און שמועסן מיטן אייבערשטן – ווערט די לעבן א געשמאק, עס ווערט זיס, מען באקומט א שטארקע אמונה, מען ווערט פרייליך און צופרידן.
אויך זאלט איר העלפן אייער מאמע, עס איז זייער א גרויסע מצוה צו העלפן א מאמע; ווען מען איז יונג וויל מען לויפן צו די פרענדס, מען פארשטייט נישט דאס גרויסקייט פון א מאמע, שפעטער ווען מען ווערט עלטער דעמאלט האט מען חרטה, מען באוויינט די יונגע יארן פארן נישט העלפן די מאמע.