בריוון פונעם ראש ישיבה שליט"א

בעזרת ה' יתברך - יום ד' פרשת לך לך, י' מרחשון, שנת תשפ"ז לפרט קטן

לכבוד ... נרו יאיר

מאך זיך א שיעור צו לערנען דעם רבינ'ס ספרים, מען איז א מקורב נאר אז מען לערנט דעם רבינ'ס ספרים, און אז מען איז מקורב צו בערל אדער שמערל, חצקל אדער זרח - דאס האט נישט מיט ברסלב, נישט דאס מיינט א ברסלב'ער חסיד, נאר דער וואס לערנט דעם רבינ'ס ספרים און פרובירט צו טון די עצות פון הייליגן רבי'ן, און לאזט זיך נישט פארדרייען פון קיינעם.

זיי זיך נישט מבלבל פון קיינעם, גיי התבודדות און בעט דעם אייבערשטן דו זאלסט זיך נישט אפנארן דיין לעבן. ווייל דער הייליגער רבי זאגט (שיחות הר"ן, סימן נא): "אֶת זֶה תְּקַבְּלוּ מִמֶּנִּי שֶׁלֹּא יַטְעֶה אֶתְכֶם הָעוֹלָם, כִּי הָעוֹלָם מַטְעֶה מְאֹד", דאס זאלט איר מקבל זיין פון מיר: די וועלט נארט אייך, לאזט אייך נישט נאר; דו זאלסט נישט אויסקוקן ווי די וואס לויפן נאך דעם מענטש מיטן פארמאכטן האנט און ביים סוף עפנט מען די האנט און מען האט גארנישט, אזוי ווי דער רבי זאגט (שם, סימן ו), דער יצר הרע איז צוגעגליכן צו איינער וואס לויפט ארום מיט א פארמאכטע האנט, ער לויפט צווישן מענטשן, קיינער ווייסט נישט וואס ער האט אין דער האנט, און אלע מיינען אז ער האט עפעס וואס עס איז אינטערעסאנט פאר אים, און אלע לויפן אים נאך, און ביים סוף עפנט ער אויף די האנט, ער האט גארנישט אין האנט, און אזוי פאפט ער אויס יעדן איינעם, מען לויפט אים נאך א גאנץ לעבן ביז ווען מען גייט אוועק פון די וועלט קוקט מען זיך אן, און מען זעט אז מען האט ליידיגע הענט, און מוהרא"ש זאגט אז דאס מיינט מען אז מענטשן לויפן נאך זייער גאנץ לעבן איינעם וכו', און ביים סוף עפנט מען אויף די האנט און מען האט גארנישט, מען איז נאקעט, מען דערזעט זיך מיט ליידיגע הענט.

נעכטן בין איך געווען ביי די לויה פון ר' שלמה ברוך בלוי עליו השלום, איך בין נאכאמאל אזוי נתעורר געווארן צו זען וואס בלייבט פונעם מענטש, וואס מען נעמט מיט; א תלמיד היכל הקודש גייט אוועק פון די וועלט אנגעפילט מיט תורה און מיט תפילה. איך בין געווען ביי אים אפאר מאל באזוכן אין שפיטאל, איך האב געזען וואס איז א תלמיד היכל הקודש, ער איז געליגן מיט יסורים נוראים וואס מען קען זיך נישט פארשטעלן, און געלערנט בלעטער גמרא מיט אזא התמדה, ווי א יונגער בחור וואס האט זיך יעצט דערוויסט פונעם דרך הלימוד (המבואר בשיחות הר"ן, סימן עו), איך האב געזען די גרויסקייט פון תלמידי היכל הקודש.

דערפאר בעט איך דיר, לאז זיך נישט נארן, כאפ ארויס יעדן טאג אביסל חומש רש"י מיטן תרגום - זונטאג ביז שני, מאנטאג ביז שלישי, און אזוי ווייטער, אזוי אז ווען עס קומט סוף וואך האט מען געענדיגט די סדרה, און מען איז זוכה צו מקיים זיין וואס די הייליגע חכמים זאגן (ברכות ח.), דאס איז א סגולה פאר אריכות ימים, און דאס ראטעוועט א מענטש פון אלעם שלעכטס; ווייל אט איז מען דא, אט איז מען דארט, און אט פירט מען שוין צום אייביגן ארט. די הייליגע חכמים זאגן (בבא קמא צז:), אויף די מטבע פון אברהם אבינו איז געווען פון איין זייט אויסגעמאלן א בילד פון א בחור און א מיידל, און פון די אנדערע זייט - א בילד פון אן אלטן מאן און אן אלטע פרוי, און מוהרא"ש זאגט מורא'דיג, מוהרא"ש זאגט: אברהם אבינו האט געלעבט מיט די מחשבה: 'אט איז מען א בחור, און אט איז מען שוין אן אלטער איד', 'אט איז מען א מיידל, און אט איז מען אן אלטע אידענע', דאס איז פשט אין דעם מאמר חז"ל, אז ער האט געלעבט זיין גאנצע לעבן אז אט אט גייט מען שוין צוריק צום אייבערשטן און מען דארף זיך אנגרייטן תורה ומצוות ומעשים טובים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת נח, ב' דראש חודש מרחשון, שנת תשפ"ז לפרט קטן

... נרו יאיר

איך האב ערהאלטן דיין מעסעדזש.

געב זיך אכטונג פון שלעכטע חברים וואס שלעפן דיך צו טון עבירות, איך ווייס נישט אויב ביי ענק אין ישיבה רעדט מען פון זיך אכטונג געבן פון די עבירה; וויסן זאלסטו, פגם הברית איז זייער געפערליך, און די הייליגע חכמים זאגן (נדה יג:), דער וואס איז מוציא זרע לבטלה רחמנא לצלן איז חייב מיתה, און דאס ווערט גערעכנט ווי מען איז עובר אויף רציחה און שפיכות דמים, און ווי מען דינט עבודה זרה רחמנא לצלן.

געב זיך אכטונג פון שלעכטע חברים, הער וואס די חברים רעדן; אז דו הערסט רעדן שמוציגע ווערטער - זאלסטו זיך היטן פון זיי, און אפילו זיי זענען בחורים מציונים וואס פארהערן זיך וכו'. זוך אויף פשוט'ע בחורים וואס זענען ערליך און רעדן איידל, ווייל אז מען פאלט אין די עבירה פון פגם הברית ווערט מען פארשטויסן פון די קדושה, און דער זוהר הקדוש זאגט (וישב קפח.; ויחי ריט.), ווער עס זינדיגט אין די עבירה פון פגם הברית - העלפט אים נישט קיין תשובה; אזוי געפערליך איז די עבירה.

נעם גוטע חברים וואס רעדן נישט ניבול פה און בעט דעם אייבערשטן ער זאל דיך מוחל זיין אויף אלעס וואס איז געווען וכו', און נעם די עצה פון הייליגן רבי'ן; ווייל וויסן זאלסטו ליבער ברודער, דער אייבערשטער האט רחמנות געהאט אויף אונזער דור און אראפגעשיקט דעם הייליגן רבינ'ס נשמה אויף די וועלט, וואס ער הייבט אויף אלע נשמות וואס זענען אראפגעפאלן אין די ביטערע עבירה, און דורך זיינע עצות ברענגט ער זיי אלע צוריק צום אייבערשטן, און דער רבי האט קלאר געזאגט (שיחות הר"ן, סימן עא), קיינער פארשטייט נישט פשט אין דעם זוהר, נאר איך, און איך זאג אז עס העלפט יא תשובה, און אפילו איינער וואס האט אסאך געזינדיגט אין די עבירה קען אויך תשובה טון, און דער הייליגער רבי האט געגעבן עצות ווי אזוי מען קען זיך צוריקקערן צום אייבערשטן פון די נידריגסטע פלעצער, אפילו מען איז ווייט פארקראכן - זאל מען קענען צוריקקומען צום אייבערשטן, דורך התבודדות; מען זאל זיך אויסשמועסן מיטן אייבערשטן, זיך אויס'טענה'ן מיט אים, אים דערציילן ווי שווער עס זענען די נסיונות און ווי שטארק מען וויל זיין גוט; דאס ברענגט צוריק דעם מענטש צום אייבערשטן.

נעם די עצה פון רבי'ן, די עצה פון התבודדות; גיי אין א ווינקל וואו קיינער איז נישט דארט, און רעד צום אייבערשטן אויף דיין שפראך, דערצייל אים ווי שטארק דו ווילסט זיין גוט, אז דו ווילסט תשובה טון. דערצייל אים אלעס, זאלסט גארנישט באהאלטן צוליב בושה. זאג אים וואס דער יצר הרע טוט מיט דיר, ווי ער ווארפט דיך אראפ, וויין צו אים; זאג די ווערטער:

"רבונו של עולם איך האב אזויפיל געזינדיגט אין די עבירה פון פגם הברית הוצאת זרע לבטלה רחמנא לצלן, איך בין אזוי אראפגעפאלן; יעצט האב איך חרטה, איך וויל תשובה טון, איך וויל זיך אומקערן צו דיר טאטע זיסער. רבונו של עולם, איך שעם זיך זייער פון דיר, איך ווייס נישט וואס צו טון, איך האב באמת חרטה אויף די שלעכטע מעשים מיינע, זיי מיר מוחל.

אויך בעט איך דיר הייליגער באשעפער, איך בין זייער דערשראקן, איך האב מורא אז איך וועל שוין בלייבן פארווארפן אויף די וועלט און אויף יענע וועלט. איך האב אזא פחד, איך שפיר אז איך ווער גערירט ביים זינען; איך ווייס אז דאס געשעט ווען מען זינדיגט אין די עבירה, אבער יעצט וויל איך זיין גוט, יעצט וויל איך תשובה טון; בעט איך דיר, העלף מיר, זיי מיך מקרב צו דיר, איך גיי שוין זיין גוט".

אזוי זאלסטו זיך אויסרעדן דיין הארץ צום אייבערשטן כסדר, ביז דו וועסט זוכה זיין צו תשובה שלימה.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ה' פרשת נח, ד' מרחשון, שנת תשפ"ז לפרט קטן

... נרו יאיר

איך האב הנאה יעדע מאל איך זע אדער הער אז דו העלפסט די מוסדות, ווייל דאס איז מיין סימן אז אין הארץ האט מען נאך א שטארקע געפיל פארן רבי'ן, ווען מען זעט ווי מען קומט מיט א געפיל און פרישקייט העלפן די מוסדות אדער ביי קהל'ישע זאכן.

יעצט ווען מען איז אין די חדשים וכו' – קען זיין אביסל שווער פאר די ווייב וכו'; דארף מען וויסן ווי איין און ווי אויס, מען דארף דערטאפן און דערשמעקן וכו', נישט איבערגיין די מאס וכו'; ווייל אין די חדשים איז ביי אסאך שווער די גאנצע זאך, און אמאל אז מען גייט איבער די מאס – קען דאס האבן א שלעכטע השפעה אפילו אויף שפעטער.

העיקר זאג יעדן טאג משניות, מי יתן אז דו קענסט אנקומען צו גורס זיין ח"י פרקים משניות, מיט א יום תהלים; דאס וועט דיר זעטיגן דיין נפש און דיך מאכן פרייליך און צופרידן, די תורה זעטיגט די נפש און מאכט דעם מענטש צופרידן.

גיי א שפאציר יעדן טאג מיטן אייבערשטן, גיי איבער דיין טאג, דיין וואך, דיין לעבן, הייב אן מיט דאנקען און לויבן אויף אלע חסדים וואס ער טוט מיט דיר, און נאכדעם גיי אריין אין בעטן; בעט דעם אייבערשטן ער זאל דיך מקרב זיין צום אים, דו זאלסט אויסניצן דיין לעבן אויף תורה ותפילה און אויף טון מצוות, נישט אויף נארישקייטן.

בעזרת ה' יתברך - יום ה' פרשת נח, ד' מרחשון, שנת תשפ"ז לפרט קטן

אברהם יצחק נרו יאיר, קרית ברסלב

איך האב זייער הנאה געהאט צו זיין נעכטן אין שטעטל ביי די מעמד קביעות מזוזות אויף די אויבערשטע שטאק: "קומת אייזנער", די שטאק וואס דו האסט מנדב געווען פאר די טייערע קינדער, זיי זאלן קענען לערנען און דאווענען.

איך האף דו האסט אויך הנאה געהאט צו זען פון די נאנט די ליכטיגע פנימ'ער פון די קינדער, ווי זיי פירן זיך מיט דרך ארץ און יראת שמים, זען פון די נאנט וואו די געלט גייט, די שיינע ליכטיגע שטאק, וואו די קינדער פארברענגען א גאנצן טאג מיט תורה און תפילה.

מיר האבן גערעדט ביי די מעמד קביעות מזוזות פון די אינגעלייט וואס זוכן צו כאפן מציאות, מען קויפט נאך א דירה און נאך א דירה, און מען מוטשעט זיך אפ מיט גוי'אישע טענענטס וואס צאלן נישט די רענט, און מיט די היינטיגע ניו יארק'ע ליבעראלע געזעצן, מען נעמט זיך אן פאר די טענענטס, און ביז מען קען זיי ארויס זען פון די דירות, און ביז מען טרעפט א צווייטע טענענט, איז עס נאך א ספק ספיקא; ווער זאגט דער טענענט וועט יא צאלן... מען איז פארנומען מיט יגיעות וטירחות און מען האט ביים סוף גארנישט; און דא איז דא אינגעלייט מיט שכל וואס דארפן נישט נאך אן אינוועסטמענט און נאך אן אינוועסטמענט, אנשטאט דעם אינוועסטן זיי אין בויען אידישקייט, זיי קויפן זיך זכותים לנצח נצחים, זיי קויפן זיך א כתה, אדער א קומה, אדער גאר א בנין וואס וועט בלייבן פאר אייביג; ווייל ווען מען העלפט אויפבויען חדרים, מוסדות התורה, ישיבות און כוללים, און בתי מדרשים – בלייבט דאס אויף אייביג און מען באקומט שכר אויף אייביג.

מאך זיך א סדר פארן ווינטער זמן, גיי שלאפן פרי, שטיי אויף פארטאגס, לערן דיינע שיעורים כסדרן, מקרא, משנה, גמרא, הלכה ועוד, גיי התבודדות, דאווען שחרית, און אזוי זאלסטו גיין אין אפיס, וועט די גאנצע טאג גיין גוט מיט הצלחה.

בעזרת ה' יתברך - יום ג' פרשת נח, ב' מרחשון, שנת תשפ"ז לפרט קטן

טייערער ... נרו יאיר

שטארק זיך מיט אלע דיינע כוחות צו זיין פרייליך, שטארק זיך מיט אמונה, גלייב באמונה שלימה אז דער אייבערשטער מאכט אלעס נאר פאר דיין גוטס, און אויך דו האסט א שידוך, און דאס וואס עס האלט זיך אויף – איז נאר לטובתך, אויך זאלסטו זיך פרייען אז דו ביסט מקורב צום הייליגן רבי'ן וואס געבט אונז אזעלכע ליכטיגע און זיסע עצות ווי זיך צו קענען דערהאלטן.

בנוגע די שידוך וואס די מיידל האט געזאגט 'ניין' נאכן שמועסן מיט דיר; דאנק דעם אייבערשטן פאר דעם, ווייל דער הייליגער רבי האט אונז מגלה געווען (חיי מוהר"ן, סימן תקצה), אז אמאל איז דא א שידוך וואס מען דארף זיך טרעפן און שמועסן און דאס איז די גאנצע שידוך, איינער זאגט ניין און עד כאן איז די שייכות, עיין שם; טארסטו נישט ווערן צעפאלן, גלייב באמונה שלימה אז דאס איז געווען א קליינע שידוך, און יעצט וועט קומען די שידוך פאר די לעבן.

העיקר זאלסטו לערנען דיינע שיעורים כסדרן, לערן יעדן טאג אכצן פרקים משניות כסדרן, זאג די ווערטער, דארפסט נישט דוקא פארשטיין, זאג די ווערטער בקול ובניגון ובנעימה, מיט א געשמאק, און אויך זאלסטו זאגן יעדן טאג פון דיין לעבן – תהלים, מי יתן אז דו קענסט ענדיגן יעדן טאג ספר תהלים, אדער לכל הפחות יעדע וואך תהלים, און אויך זאלסטו זיך ערגעץ באהאלטן אין א פלאץ וואו קיינער וועט דיך נישט שטערן, (עס קען אפילו זיין אינמיטן בית המדרש צווישן מענטשן, אויף א וועג וואס מען האט נישט מיט קיינעם יעצט, ודי לחכימא), און שמועס אויס דיין הארץ מיטן אייבערשטן, דערצייל אים ווי שטארק דו ווילסט זיין ערליך, ריין, הייליג, און ווי דו האלטסט און איין אראפפאלן, טענה זיך אויס אז דו האסט אזוי שטארק געוואלט חתונה האבן יונג און ריין און יעצט ווערסטו עלטער און עלטער און דו האלטסט אין איין פוגם זיין, וויין צום אייבערשטן, זאג פארן אייבערשטן אז דו ביסט א שוגג און אן אונס, און ווי שווער עס איז צו זיין אליין אן א שידוך, זיין א פלג גוף, א האלבע מענטש, ווייל וויסן זאלסטו אז עס איז דא א הייליגע מלאך מיטן נאמען ..., וואס ער נעמט ארויף די תפילות פון בחורים און מיידלעך וואס פאלן נעבעך אראפ און קומען נאכדעם צום אייבערשטן וויינען אז זיי ווילן זיין ערליך אבער זיי קענען נישט; דער מלאך מאכט פון די תפילות שיינע קרוינען פארן אייבערשטן, מוהרא"ש האט גערעדט פון דעם בבחינת מגלה טפח ומחסה טפחיים וכבוד אלקים הסתר דבר, ודי לחכימא.

דראפע זיך און דערהאלט זיך.

פון דיין ראש ישיבה וואס האט דיך זייער ליב.

בעזרת ה' יתברך - יום א' פרשת נח, א' דראש חודש מרחשון, שנת תשפ"ז לפרט קטן

... נרו יאיר

שטארק זיך מיט אלע כוחות, גיי נישט ארום מיט עצבות, גלייב אז דער אייבערשטער האט פאר דיר אויך אנגעגרייט א שידוך, און ביז דיין שידוך קומט - זאלסטו זיך שטארקן מיט התבודדות, און אז דו פאלסט וכו' - זאלסטו זיך אויס'טענה'ן צום אייבערשטן אז דו שפירסט ווי דו האסט נישט די מעגליכקייט צו זיין אפגעהיטן וכו' וכו', און וויסן זאלסטו אז דער אייבערשטער האט ליב ווען מען טענה'ט זיך אויס כביכול מיט אים, און מען בעט אים ער זאל מוחל זיין; ספעציעל בחורים וואס זיי זענען אזוי צעבראכן ביי זיך, קיינער ווייסט נישט וואס גייט אריבער אויף זיי, זיי ווילן חתונה האבן, זיי ווילן זיין אפגעהיטן און ריין און עס גייט זיי נישט, און וויפיל זיי בעטן זיך: 'טראגט אונז אן א שידוך', 'רעדט א שידוך' - גלייבט זיי קיינער נישט, מען מיינט אז זיי מאכן זיך וכו'; קיינער ווייסט נישט וואס א בחור גייט אריבער, נאר די אמת'ע צדיקים - זיי טענה'ן פאר די בחורים פארן בית דין של מעלה, אזוי ווי מוהרא"ש זכותו יגן עלינו פלעגט שטענדיג זאגן: "איך וועל טענה'ן אויבן אין הימל פארן בית דין של מעלה אז בחורים זענען נישט שולדיג, בחורים זענען וואויל, דאס וואס זיי פאלן אין עבירות, זיי זענען פוגם אין פגם הברית, זיי פאלן אראפ אין עֲשָׂרָה כִּתְרִין דִמְסָאֲבוּתָא - דאס איז ווייל זיי דארפן חתונה האבן, מען קען זיי נישט געבן קיין עונש".

איך וועל דיך נישט לאזן פאלן, איך וועל דיך שטענדיג מחזק זיין.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ה' פרשת בראשית, כ"ז תשרי, שנת תשפ"ז לפרט קטן

... נרו יאיר, מאנסי

איך האב דיך שוין אזא לאנגע צייט נישט געזען און נישט געהערט, איך האב געמיינט אז אין אומאן ביים הייליגן רבינ'ס קיבוץ וועל איך דיך זען, איך האב דיך אבער נישט געזען; איך האף דו ביסט נאך שטארק אין דיין עבודת השם, דו לעבסט מיטן רבינ'ס עצות, בעיקר מיט די עצה פון זיין בקי ברצוא און בקי בשוב, אז אפילו ווען עס גייט נישט די עבודת השם זאל מען וויסן אז דארט וואו מען געפינט זיך – איז מען אויך נעבן דעם אייבערשטן, און דארט זאל מען אויך רעדן צום אייבערשטן, און פון דארט שרייען צום אייבערשטן: "הייליגער באשעפער איך וויל זיך צוריק קערן צו דיר, איך וויל זיין נאנט צו דיר, איך וויל שוין מער נישט טון קיין נארישקייטן".

דאס איז די טיפע לימוד וואס דער הייליגער רבי לערנט מיט אונז, מען זאל וויסן אז סיי 'אם אסק שמים', ווען מען דינט דעם אייבערשטן – 'שם אתה', אז מען דארף נאך גיין מער און מער, און ווען 'ואציעה שאול', מען טראסקעט אראפ – 'הנך', איז דער אייבערשטער אויך מיטן מענטש, עמך אתך ואצלך, מיט דיר, ביי דיר און נעבן דיר, און אויך פון דארט קען מען דינען דעם אייבערשטן און זיך אויפהייבן.

מיר דארפן דאנקען דעם אייבערשטן אז מיר ווייסן פון רבי'ן, פון זיינע עצות, מיר דארפן טאנצן און שפרינגען אשרינו שזכינו להתקרב לרבינו.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

מרת ... תחי'

איך האב ערהאלטן אייער בריוו.

איך האב אייך שוין אפאר מאל געזאגט, ווען אייער מאן גייט אריין אין א כעס, ער הייבט אן שרייען – זאלט איר אוועק גיין, בלייבט נישט זיצן אנטקעגן אים, וואס דארפט איר הערן ווי ער שרייט? וואס דארפט איר ווערן אזוי פארשעמט? ווייל ווען ער ווערט אין כעס ווערט ער נישט זיך, ער איז בכלל נישט דא, עס גייט אריין אין אים א שלעכטע מלאך, ער פארלירט זיך; איז וואס דארפט איר דאס האבן?

פאלגט מיך, מהיום והלאה אז ער הייבט אן שרייען, פארהאלטן וכדומה – גייט ארויס פון צימער, אדער גייט אריין אין א ליידיגע צימער, און גייט אן מיט די שטוב ווירטשאפט, און אז ער פרעגט אייך: "וואו גייסטו? בלייב דא!" זאלט איר אים זאגן: "דו קענסט אויף מיר נישט שרייען, איך בין דיין ווייב, נישט דיין דינסט..." און אז ער לאזט נישט אפ זאלט איר ארויסגיין אין גאס כאפן א שפאציר ביז ער וועט זיך בארואיגן, ער וועט קומען צו זיך און חרטה האבן און אייך איבערבעטן.

חס ושלום זיך קריגן, חס ושלום צוריק שרייען, און אז ער בעט איבער זאלט איר אים זאגן: "מחול לך", איר זאלט נישט מאכן קיין מחלוקת, נאר די איין זאך זאלט איר טון, נישט בלייבן זיצן אדער שטיין ווען ער פארשעמט אייך.

אייער מאן איז א וואוילער, א גוטער, ער האט זייער אסאך גוטע זאכן, נאר די איין זאך דארף ער נאך א תיקון, די כעס, דאס איז א צרה פאר אים, איך האב שוין אזויפיל מאל געזאגט און געשריבן ער זאל יעדן טאג בעטן א תפילה פאר כעס, אז ער זאל ארויסגיין פון כעס, אויך נעבעך צוליב די כעס פארלירט ער זיין שפע, זיין פרנסה, דער הייליגער רבי זאגט (לקוטי מוהר"ן חלק א, סימן סח), יעדע מאל מען וויל געבן דעם מענטש שפע – פרנסה און עשירות – שטעלט מען א נסיון פון כעס, און אז מען פארלירט זיך, מען גייט אריין אין א כעס – פארלירט מען די גאנצע שפע, און נאכדעם האט מען טענות: 'היתכן די ברכות ווערן נישט מקוים, און די סגולות העלפן נישט?' חס ושלום זאגן עס העלפט נישט, עס העלפט נישט ביי דעם מענטש וואס איז א כעסן און מאכט וויינען די ווייב, השם ישמרינו.

איר זאלט יעדן טאג נעמען א צוויי דריי מינוט צו דאנקען דעם אייבערשטן אויף אלע חסדים וואס ער טוט מיט אייך, און בעטן דעם אייבערשטן פאר אייער מאן ער זאל זיך קענען מתגבר זיין אויף די מדה פון כעס, ווייל ער איז באמת א רחמנות, ער וויל אזוי שטארק זיין גוט, ער ווערט אבער זייער שנעל בכעס, 'נח לכעוס', אבער ער איז אויך 'נח לרצות', ער האט אזוי חרטה יעדע מאל אויף וואס ער טוט; זאלט איר בעטן פאר אים.

לכבוד די נייע יאר זאלט איר זיך מאכן א קבלה צו ליינען יעדע פרייטאג צו נאכטס נאכן ליכט צינדן די הייליגע בריוון פון עצתו אמונה, און אויך שבת בייטאג; א גאנצע וואך איז אויך גוט דאס צו לערנען, אבער ספעציעל שבת ווען עס איז דא רואיגקייט און הייליגקייט אויף די וועלט. די בריוו פון עצתו אמונה איז אזוי שיין, אזויפיל שכל, אזא קלארקייט און א צוגאנג צו יעדע פראבלעם, די שכל איז פון הייליגן רבינ'ס ספרים ווי אזוי מיר האבן דאס מקבל געווען פון מוהרא"ש; לערנט די בריוון ליל שבת אדער נאכן ליכט צינדן אדער נאך די סעודה, און וואו עס איז דא א בריוו וואס איז נוגע פאר אייך אין די מצב אין וואס איר זענט יעצט – זאלט איר איבערליינען די בריוו עטליכע מאל און זאגט מיט אלע תפילות.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

... נרו יאיר וזוגתו שיחיו

איך האב גערעדט צו מרדכי אהרן נרו יאיר, ער וועט ענק שוין איבערגעבן אז ענק קענען מיר העלפן מיט עפעס גאר חשוב בויען די נייע געגנט אין שטעטל, איך וויל עס ענק נישט דירעקט זאגן, איך וויל ענק נישט צודריקן צום וואנט.

העיקר מאכט התבודדות, בעטס דעם אייבערשטן ענק זאלן וויסן וואס איז ריכטיג און ווי אזוי זיך צו פירן.

זעט אין שטוב זאל זיין פרייליך און געשמאק; אמת, מען דארף פירן א געזונטע שטוב, עס דארף זיין דיסציפלין, דרך ארץ, מען דארף פאלגן טאטע מאמע, אבער דאס מוז קומען באגאסן און באזאלצן מיט שמחה, אז די קינדער זאלן נישט ווערן פארמאכט פון פחד און פון אזויפיל זאגן, הייסן, קריטיקירן, עס מוז זיין געפאקט און געקניפט מיט שמחה און מיט ווערטלעך וכו'.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

החתן ... נרו יאיר

איך דאנק דיך זייער פאר אלעס וואס דו העלפסט מיר, סיי מיטן קאכן פאר די מוסד, פאר די בחורים, אינגלעך און מיידלעך פיינע פרישטאג און מיטאג מיט אזא איבערגעגעבנקייט און הארץ, אויך הער איך אז דו העלפסט אין דיינע זייטיגע צייטן די קהילה; האסט אוועקגעלייגט די גאנצע כפרות געצייג וואס מען האט געניצט ערב יום הקדוש, און אויך שניידסטו די גראז ביי די שארט קאטס אין שטעטל; איך דאנק דיך זייער, און הלוואי זאלן זיך אנדערע בחורים זיך אפלערנען פון דיר, צו העלפן משמש זיין דעם רבי'ן.

יעצט הער איך אז אויך קומסטו צו די הלכה שיעור אין ישיבה ביים מגיד שיעור בני הרב אלחנן חיים שליט"א, איך פריי זיך זייער אז דו לערנסט הלכה, הלכות שבת; ווייל נאך אביסל האסטו חתונה, דו וועסט פירן א שטוב, און נאר אז מען לערנט הלכות שבת – קען מען פירן א אידישע שטוב, זיין אפגעהיטן אין שמירת שבת.

שטארק זיך, גיי אן מיט דיין עבודת השם, און זע זיך צו מאכן א קביעות יעדן טאג צו גיין התבודדות, שפאצירן מיטן אייבערשטן, שמועסן מיטן אייבערשטן, אים דאנקען פאר אלעס גוטס וואס ער טוט מיט דיר און אים בעטן אויף ווייטער.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

... נרו יאיר, קרית ברסלב

אפילו איך האב דיר שוין געזאגט און געשריבן, וויל איך דיר נאכאמאל זאגן א גרויסן יישר כח פארן העלפן מסדר זיין די שול. דער שמש ר' ישראל פוקס נרו יאיר, האלט מיר אין איין זאגן אז דו העלפסט די שול עס זאל זיין ריין און מסודר, דו לייגסט אוועק די ספרים בהתנדבות לבך, און אזוי ווייטער, דאס ווייזט אז דו האסט א שטארקע געפיל צום הייליגן רבי'ן, דו ביסט מכיר טוב דעם רבי'ן, און דערפאר העלפסטו.

עס קומט א לאנגע ווינטער, מאך זיך א געזונטע סדר היום, לייג זיך שלאפן פרי; דאווען מעריב פרי, און גיי אהיים פארברענגען מיט דיין ווייב, און גייט שלאפן, אזוי וועסטו אויפשטיין פרי און קענען גיין התבודדות. גיי נישט מיט די קאר אין שול, גיי א שפאציר, אזוי וועט די התבודדות זיין בקביעות, און לערן אין 'כולל בוקר' ח"י פרקים משניות; ווען דו לערנסט ח"י פרקים משניות זאלסטו ארויסזאגן די ווערטער, דו זאלסט זיך קענען הערן, זינג די ווערטער מיט א ניגון; אויך זינג דעם "יום תהלים", און לייג אריין דיינע אייגענע בקשות און לויב ווערטער, און אז עס בלייבט דיר צייט פארן דאווענען – זאלסטו זיך מאכן א שיעור אין זאגן תיקונים, דאס זאלסטו אויך זאגן בקול, מיט א ניגון; דאס וועט אויסציכטן און אויסגלאנצן דיין נשמה.

בעזרת ה' יתברך - יום ג' פרשת בראשית, כ"ה תשרי, שנת תשפ"ז לפרט קטן

... נרו יאיר, קרית ברסלב

איך דאנק דיך פארן העלפן אהערשטעלן די שיינע מוזיק גאנץ יום סוכות ביי אלע אושפיזין און ביי די הכנסת ספר תורה; איך האב אזוי הנאה אז די שפילערס און זינגערס ביי אונז אין די קהילה זענען חשוב'ע אינגעלייט, מלמדים און כולל אינגעלייט, אלע זינגען און שפילן מיט בארד און פיאות, מיט חסידי'שע קליידער. ווייל קינדער און בחורים האבן ליב צו קוקן ביי די קאפעליע און מוזיק, זיי שטייען ביי די מוזיק שעות אויף שעות און קוקן זיך צו, און אנשטאט זען געשוירענע בערד און לצים וואס גייען אנגעטון מיט א שטריימל וכו', זאלן זיי זען ערליכע אינגעלייט מיט בארד און פיאות.

איך האב אויך הנאה געהאט דיך צו זען לערנען שמחת תורה מיט א חברותא חומש רש"י, דאס איז גאר א שיינע זאך, הלוואי זאלסטו דאס אנהאלטן א גאנץ יאר, לערנען יעדע וואך חומש רש"י פון די פרשת השבוע, גוט קענען די חומש מיט רש"י, ווייל חומש רש"י ברענגט יראת שמים אויפן מענטש און א נאנטקייט צום אייבערשטן.

גיי אין שול צופיס, לאז דיין קאר אין שטוב, גיי א שפאציר מיט התבודדות, אזוי וועט דאס זיין באופן קבוע, אזוי ווי דער רבי האט געוואלט, מען זאל האבן א קביעות, א באשטימטע צייט זיך צו מתבודד זיין יעדן טאג, זיך אויסגיסן דאס הארץ צום אייבערשטן, אים דערציילן יעדע זאך און בעטן ער זאל רחמנות האבן און אים מקרב זיין צום אים.

בעזרת ה' יתברך - יום ב' פרשת נח, ב' דראש חודש מרחשון, שנת תשפ"ז לפרט קטן

... נרו יאיר

איך וויל דיך נאכאמאל מחזק זיין, ווען דו העלפסט אין די מוסד און די שול, ישיבה וכדומה – זאלסטו ארייננעמען וואס מער בחורים און אינגעלייט זאלן העלפן, נישט דו אליין זאלסטו טון די ארבעט, ווייל אזוי וועסטו אויף איינמאל העלפן דריי מאל; סיי זאכן וועלן געטון ווערן, סיי בחורים וועלן נישט גיין ליידיג, והעיקר די אלע וועלן בלייבן און באקומען א געפיל צום הייליגן רבי'ן; ווייל אזוי איז די מציאות, ווער עס העלפט און ווער עס טוט פארן רבינ'ס זאך – באקומט א געפיל און בלייבט מיטן געפיל צום רבי'ן.

אויך זאלסטו זיך מאכן א צייט ווען און ווי לאנג דו זיצט אין אפיס, און זיך האלטן צו דעם; ווייל מען קען פארברענגען טעג און נעכט ביים קאמפיוטער, אפילו פאר גוטע זאכן, אבער מען ווערט פארט צוגעקלעבט צום קאמפיוטער פאר גארנישט און פאר נישט. למשל, מען וויל קויפן א זאך, אויב האט מען נישט קיין גדר ווי לאנג מען איז אין אפיס קען אריבער גיין א גאנצע טאג נאר צו זוכן א בענקל וכו'.

העיקר זאלסטו לערנען יעדן טאג מקרא – שנים מקרא ואחד תרגום מיט רש"י איינגעטיילט לויט די טעג פון די וואך; משנה – אכצן פרקים משניות כסדרן; גמרא – יעדן טאג א בלאט בבלי און א בלאט ירושלמי און א פרק תוספתא; הלכה – שלחן ערוך כסדרן; אויך דעם רבינ'ס ספרים און תהלים.

אינדערפרי גיי א שפאציר צו שמועסן מיטן אייבערשטן, ערשטנס הייב אן מיט דאנקען און לויבן אויף אלע חסדים וואס ער טוט מיט דיר, אז דו ביסט באשאפן געווארן א איד, און אז דו ביסט מקורב געווארן צום רבי'ן בחדר היכל הקודש וכו', אז דו ביסט חתונה געהאט, האסט קינדער, און אז אלע זענען געזונט וכו', און אויך זאלסטו בעטן דו זאלסט זיין אן ערליכער איד, און אזוי ווייטער.

בעזרת ה' יתברך - יום א' פרשת נח, א' דראש חודש מרחשון, שנת תשפ"ז לפרט קטן

... נרו יאיר

ווי אזוי איז מען זוכה צו ווערן א צדיק? אויב מען פאלגט די עצות פון הייליגן רבי'ן, מען מאכט יעדן טאג צייט צו רעדן צום אייבערשטן אויף די אייגענע שפראך, מאמע לשון, שמועסן און בעטן אויף אלעס וואס דריקט אויפן הארץ; דאס איז די וועג צו ווערן א צדיק.

מען דארף האבן אסאך סבלנות, עס גייט נישט אין איין מינוט, אויך דארף מען וויסן אז עס נעמט צייט צו ווערן רגיל אין די עבודה פון קענען בכלל אנהייבן רעדן און שמועסן מיטן אייבערשטן; אין אנהייב איז די אמונה נישט אזוי קלאר אז מען זאל שפירן דעם אייבערשטן נעבן זיך, אין אנהייב איז שווער דאס קענען ארויס זאגן אפילו איין ווארט, אבער אז מען איז אן 'עקשן', מען שטייט אויף די זאך, מען בעט אויף דעם אליינס, אז מען זאל קענען רעדן צום אייבערשטן – ווערט עס מיט די צייט גרינגער.

דער הייליגער רבי האט געזאגט אז נאר דורך די זאך פון רעדן צום אייבערשטן בתמימות ובפשיטות טעג און יארן, נאר מיט דעם האט ער זוכה געווען צו קומען צו זיינע מדריגות, און דאס איז חסידות ברסלב; דער רבי טוט אונז אויפוועקן פון שלאף, מיר זאלן נישט זיין פארנומען מיט אונזערע דמיונות, נאר מיר זאלן אנהייבן לעבן מיט אמונה, רעדן צום אייבערשטן, אים דאנקען און אים בעטן אויף יעדע זאך.

וואויל איז דעם מענטש וואס פאלגט דעם רבי'ן, וועט ער זוכה זיין צו קומען צו די הויכע מדריגה פון לעבן מיט א שטארקע דביקות.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

לכבוד ... נרו יאיר, וויליאמסבורג

איך בין שוין צוריק געקומען קיין וויליאמסבורג נאכן נישט זיין פון אנהייב זומער, איך האף צוריק צו באנייען די שיעור הלכה פאר אברכים יעדע נאכט אין ישיבה, איך האף דו וועסט קומען מיטהאלטן די שיעור, עס קומט א לאנגע קאלטע ווינטער, די יאר איז נאך לענגער, עס איז אן עיבור יאר, און נאר דורך לערנען תורה קען מען זיך דערווארעמען און זיך דערהאלטן.

הייב אן דיין טאג מיט התבודדות, גיי א שפאציר און בעיקר זאלסטו דאנקען און לויבן דעם אייבערשטן פאר אלע חסדים וואס ער טוט מיט דיר, דאס וועט דיר עפענען דיין מח און הארץ, דו וועסט שפירן גדלות המוחין; דאס דאנקען און לויבן דעם אייבערשטן מאכט אויף די מח, עס ווערט ברייט, מען גייט ארויס פון די קטנות הדעת, און אזוי איז מען מצליח סיי ברוחניות, אין עבודת השם יתברך, און סיי בגשמיות, מען איז מצליח אין געשעפט, אין ביזנעס.

אויך זאלסטו טראגן מיט דיר א קליינע משניות, און ווען דו האסט צייט – זאלסטו ארויסכאפן נאך א פרק משניות, און נאך א פרק משניות.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

... נרו יאיר

דאס וואס מענטשן מוטשען זיך אויף פרנסה, דאס איז נאר אז מען זאל דארפן צוקומען צום אייבערשטן און אים בעטן יעדן טאג.

די הייליגע חכמים זאגן (יומא עו.), רבי שמעון בן יוחאי זאגט, פארוואס האט אויסגעפעלט עס זאל פאלן יעדן טאג פון הימל די מן, פארוואס האט עס נישט געקענט קומען איין מאל פאר א גאנצע יאר? "כְּדֵי שֶׁיְּכַוְּנוּ אֶת לִבָּם לַאֲבִיהֶן שֶׁבַּשָׁמַיִם", אז אידישע קינדער זאלן בעטן דעם אייבערשטן; א משל צו א קעניג וואס פלעגט געבן פאר זיין קינד איין מאל א יאר געלט פאר די גאנצע יאר, "וְלֹא הָיָה מַקְבִּיל פְּנֵי אָבִיו אֶלָא פַּעַם אַחַת בַּשָּׁנָה", און א גאנץ יאר האט זיך דער קינד נישט באוויזן צום טאטן, האט דער קעניג געזאגט, 'מהיום, פון היינט וועסטו יעדן טאג דארפן קומען נעמען די פרנסה פארן טאג; אזוי אויך איז יעדער איד אין מדבר אויפגעשטאנען יעדן טאג אינדערפרי און געבעטן: "יהי רצון, עס זאל זיין די ווילן פון דיר אייבערשטער אז מיינע קינדער זאלן האבן עסן, זיי זאלן נישט שטארבן פון הונגער", און אזוי איז היינט, דאס וואס מען דארף יעדן טאג זוכן פרנסה, ווייל דער אייבערשטער ווארט צו הערן ווי דער מענטש בעט אים.

שטארק זיך, ווער נישט צעדרוקט, ווער נישט צעקוועטשט, ווארט מיט געדולד און בעט מיט רחמנות דו זאלסט האבן שפע, און געוואוין זיך צו צו שטענדיג בענטשן ברכת המזון אינעווייניג אין א בענטשער אדער א סידור; דאס איז א סגולה פאר פרנסה בשפע, אזוי ווי עס שטייט (משלי י, כב): "בִּרְכַּת ה' הִיא תַעֲשִׁיר", דאס איז ברכת המזון; אז מען בענטשט ווארט ביי ווארט מיט כוונה און מיט שמחה – ווערט מען רייך.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

לכבוד ... נרו יאיר, קרית ברסלב ליבערטי

עס קומט א לאנגע קאלטע ווינטער, און נאר מיט לערנען תורה קען מען זיך אנווארעמען און זיך דערהאלטן; וויל איך דיר בעטן דו זאלסט זיך קובע זיין צו קומען אין "כולל בוקר" יעדן אינדערפרי. שטיי אויף פארטאגס פינף אזייגער, גיי אין מקוה און זיי זיך אביסל מתבודד, און נעם א חברותא צו לערנען גמרא אדער הלכה פון זעקס ביז זיבן, אדער לערן דיינע שיעורים כסדרן, ח"י פרקים משניות, א דף גמרא, א יום תהלים, לקוטי מוהר"ן, און זיבן אזייגער זאלסטו דאווענען, אכט אזייגער עס פת שחרית, און נאכדעם זאלסטו גיין ברענגען פרנסה.

אחי היקר, די טאג וועט דיר זיין גאר אנדערש, דו וועסט זיין א גאנצן טאג באשיצט מיט א שמירה עליונה, ווייל ווען מען לערנט תורה ווערט מען באשיצט. די הייליגע חכמים זאגן (תנא דבי אליהו רבא, ד), דער וואס לערנט תורה דארף נישט קיין כלי זין זיך צו באשיצן, דער אייבערשטער אליין היט אים.

אויב דו דארפסט א חברותא לאז מיר וויסן, ווייל איך וויל אזוי שטארק אז די שטעטל זאל זיין א פלאץ פון תורה ויראה, איך וויל נישט דא זאל זיין אן עיר מקלט וואו מענטשן וואס זוכן צו אנטלויפן זאלן דא קומען, איך וויל אינגעלייט וואס לערנען און דאווענען.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

לכבוד ... נרו יאיר, פלארידא

איך האב דיר שוין געשריבן פאר יום טוב, דאך וויל איך דיר נאך שרייבן אנצוהאלטן אונזער קשר.

מיר האבן מקבל געווען פון מוהרא"ש אז אפילו מען זאל אויפווייזן דעם מענטש קלאר, שווארץ אויף ווייס, אז ער איז שוין א פארפאלענער וכו' – דארף דער מענטש זיין אייזן שטארק און זאגן: "איך וועל קיינמאל נישט אפלאזן דעם אייבערשטן", און אפילו מען וועט אים ברענגען פון הימל ראיות אז מען דארף אים נישט – זאל ער זיין פעלזן פעסט און זאגן: "איך גיי נישט אוועקגיין פון רבי'ן", אזוי ווי מוהרנ"ת האט געזאגט: "אפילו מען וועט מיך שלאגן מיט א דיקע האלץ (דראנג) וועל איך נישט אפלאזן דעם רבי'ן".

וואויל איז דעם מענטש וואס דערהאלט זיך ביים צדיק, ואשר יש להם כח לעמוד בהיכל הקודש קודש הקדשים, שהם הצדיקים הגנוזים שבדור הזה (ספר ארך אפים, פרק ה), און געדענקט וואס מען האט באקומען, און צו וואס מען קען נאך זוכה זיין צו באקומען, און פירט זיך מיט די זיסע עצות פון לערנען שיעורים כסדרן בכל חלקי התורה, ולהתבודד, ולשמוח מיט יעדע גוטע זאך, און גייט אין שול יעדן טאג דאווענען שחרית מנחה מעריב מיט מנין מיט שמחה, וועט אים גוט זיין בזה ובבא.

בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן

לכבוד יואל מנחם גרשון נרו יאיר

בעט דער מעלער ער זאל מאלן א בילד ווי א איד זיצט ביי א טיש פון אפענע ספרים און ער וויינט, און עס רינט אים טרערן פון זיינע באקן, און ווי ביים פענסטער זעט מען ווי איינער קוקט אריין און ער פארוואונדערט זיך.

ווען דער הייליגער רבי נתן איז מקורב געווארן צום רבי'ן, האט אים דער רבי אמאל געשיקט מיט א שליחות ער זאל אריבערגיין צו דער רב, רבי אהרן, דער רב אין ברסלב.

ווען רבי נתן איז געקומען צום רב איז ער אריבער ביים שטוב און ער האט אריינגעקוקט אין פענסטער, האט ער געזען א וואונדערליכע זאך, דער רב זיצט ביי א טיש פול מיט ספרים, און ער וויינט; עס רינען אויף זיינע באקן טרערעלעך...

רבי נתן האט זיך זייער געוואונדערט: 'וואס וויינט יעצט דער רב? ער האלט אינמיטן לערנען, וואס בעט ער יעצט דעם אייבערשטן?' רבי נתן בייגט צו זיינע אויערן, און ער הערט ווי דער רב בעט דעם אייבערשטן: "הייליגער באשעפער, איך וויל זיין אן ערליכער איד, הייליגער באשעפער, איך וויל לעבן מיט תכלית, איך וויל אלץ געדענקען פון דיר! איך וויל קיינמאל נישט פארגעסן פון דיר!"

ווען רבי נתן איז צוריקגעקומען צום רבי'ן, האט אים דער רבי געפרעגט: "נתן, וואס האסטו געזען ביים רב?" זאגט רבי נתן: "איך האב געזען דעם רב וויינען", זאגט אים דער הייליגער רבי: "יא יא! טאקע דערפאר האב איך דיך געשיקט צום רב, איך האב דיר געוואלט ווייזן א וועג אין עבודת השם, אז דער וועג צו זיין אן ערליכער איד איז דורך שטענדיג רעדן צום אייבערשטן, און וויינען צו אים ער זאל רחמנות האבן און מיך מקרב זיין צו אים.

טייערע קינדערלעך, לאמיר אלע צוזאמען אנהייבן צו זינגען: "הייליגער באשעפער העלף! איך וויל זיין אן ערליכער איד".

טייערער יואל, שטארק זיך מיט דיין הייליגע ארבעט און זיי ממשיך ארויסצוגעבן די שיינע בריוון, סיי פאר יונגע, סיי פאר אלטע, אז אלע זאלן זיך קענען שטארקן מיט די עצות פון הייליגן רבי'ן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך - ערב שבת קודש פרשת שופטים, ב' דראש חודש אלול, שנת תשפ"ו לפרט קטן

.... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

איך פריי זיך זייער אז דו שטארקסט זיך מיטן הייליגן רבינ'ס עצות, דו לערנסט און דו דאווענסט, אבער איין זאך וויל איך נאך ביי דיר פועל'ן, דו זאלסט נישט קוקן קיין מאוויס און נישט קיין פלעיס; איך בעט דיר זייער, ווארף אוועק אלעס וואס דו האסט, אויך כשר'ע זאכן זאלסטו נישט קוקן, ווייל אזוי איז די וועג פונעם סמ"ך מ"ם, צו פארנארן און פארכאפן דעם מענטש אין עבירות, "היום אומר לו עשה כך, ולמחר אומר לו עשה כך, עד שאומר לו עבוד עבודה זרה" (שבת קה:), ערשט זאגט ער טו נאר דאס, שפעטער - טו נאר יענץ, ביז ער זאגט אים אלעס אפצולאזן השם ישמרינו; און דאס איז ביי קוקן, ערשט רעדט ער צו נאר צו קוקן קליפס פון עדווערטייזמענטס, שפעטער רעדט ער צו מען זאל קוקן פלעיס און כשר'ע אינטערטעינמענט, ביז ער ווארפט אראפ דעם מענטש אין קוקן די ערגסטע זאכן רחמנא לצלן.

ליבער ברודער הארציגער חבר, אויב מען היט נישט די אויגן, מען קוקט קליפס און מאוויס פון עבירות - פארלירט מען די אמונה, דער הייליגער רבי זאגט (לקוטי מוהר"ן חלק א, סימן לא), אמונה און שמירת הברית גייען צוזאמען, אזוי ווי עס שטייט (תהילים פט, כט): "וּבְרִיתִי נֶאֱמֶנֶת לוֹ"; ווען א מענטש קוקט עבירות פאלט ער אראפ און ער איז פוגם בברית רחמנא לצלן, און ער פארלירט די אמונה, און אן אמונה איז מען א געשלאגענער, די לעבן ווערט פארטינקלט, און דאס מאכט מען זאל זיך פייניגן מיט שלעכטע מחשבות, דמיונות און פחדים; פרעג איך דיר, וואס ווילסטו אין לעבן, ווילסט זיך מוטשען דיין גאנצע לעבן? אדער דו ווילסט זיין פרייליך און צופרידן?

נעם די עצה פון רבי'ן, די עצה פון התבודדות און תפילה, בעט דעם אייבערשטן ער זאל דיך העלפן זאלסט קענען זיין שטארק נישט צו קוקן קיין עבירות, בעט אים: "רבונו של עולם, העלף מיר, איך וויל זיין אן ערליכער איד; העלף מיר איך זאל נישט קוקן קיין מאוויס, איך זאל נישט קוקן קיין עבירות. איך ווייס נישט וואס צו טון, איך בין אזוי צוגעקלעבט צו קוקן מאוויס, איך קען זיך נישט ארויסזען פון דעם! איך ווייס דאס שעדליכקייט דערפון, איך ווייס אז עס איז נישט גוט, דאך איז מיר אזוי שווער; וויפיל איך מאך אפ אז איך גיי מער נישט קוקן - פאל איך אריין טיפער און טיפער.

הייליגער באשעפער העלף מיר, לייג אריין אין מיר א ריינקייט, לייג אריין אין מיר א הייליגקייט; לֵב טָהוֹר בְּרָא לִי אֱלֹקִים, געב מיר א נייע הארץ, וְרוּחַ נָכוֹן חַדֵּשׁ בְּקִרְבִּי, באניי אין מיר א נייע ווילן, א נייע גייסט - איך זאל זיך עקלען פון קוקן מאוויס. עֲנֵנוּ ה' עֲנֵנוּ, העלף מיר אייבערשטער ענטפער מיר, נעם אן מיין געבעט. העלף מיר בזכות די הייליגע צדיקים וואס האבן זיך מוסר נפש געווען פאר דיינעט וועגן, בזכות דעם הייליגן רבי'ן רבינו נחמן בן פיגא זכותו יגן עלינו ובזכות אלע צדיקים, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ ה' צוּרִי וְגֹאֲלִי".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך - יום ה' פרשת שופטים, א' דראש חודש אלול, שנת תשפ"ו לפרט קטן

... נרו יאיר

די וואך האב איך געהאט א גאר שווערע טאג ווען מען האט מיך גערופן פון חדר אז א קינד פעלט, און מען האט לכתחילה געמיינט אז ער איז פארלוירן אין וואלד; איך האב עס זייער שווער גענומען, איך האב שוין לאנג נישט געהאט אזעלכע שווערע שעות.

בשעת איך האב געוויינט צום אייבערשטן אז די מעשה זאל זיך ענדיגן גוט האב איך געמאכט א חשבון הנפש, וואס דארף איך מתקן זיין, וואס וויל מען פון מיר? איז מיר אריינגעקומען אין מחשבה אז איך דארף מתקן זיין אויפצוזוכן אלע פארלוירענע בחורים און קינדער וואס זענען פארלוירן אין וואלד, זייער קערפער איז נישט אין וואלד, אבער זייער נפש, רוח ונשמה איז פארלוירן, קיינער קוקט זיך נישט אום אויף זיי, קיינער געבט זיי נישט קיין גוטע ווערטער.

איך וויל דיר בעטן דו זאלסט מיר העלפן אויפזוכן די פארלוירענע בחורים און קינדער וואס שטייען זייער נאנט צו דיר, זאלסט שמייכלען צו זיי און זיי געבן א גוט ווארט, נעם זיי ארויס פון וואלד.

נעכטן פארטאגס בין איך געפארן קיין קרית יואל צום ציון פון הייליגן רבי'ן פון סאטמער זכותו יגן עלינו, איך האב אסאך געבעטן פאר אונזער חדר, ישיבה און בית פיגא, צו האבן גוטע מלמדים, גוטע טיטשערס, און ווארעמע מגידי שיעור.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

א גוטן חודש.

בעזרת ה' יתברך - יום ב' פרשת ראה, כ' מנחם-אב, שנת תשפ"ו לפרט קטן

מיין טייערער ליבער הארציגער ברודער ... נרו יאיר

האסט מיר דערציילט וואס דו גייסט אריבער לעצטנס, דיין קאפ שווינדלט דיר אז דו האסט נישט קיין אמונה, דיינע מחשבות פייניגן דיר: 'האב איך אמונה? האב איך נישט אמונה?' דו ווייסט נישט וואס צו טון מיט דיינע מחשבות, דו ביסט שרעקליך צעמישט, דו פרעגסט און בעטסט אן עצה.

ליבער ברודער, איך האב דיך אזוי ליב, איך זע דיין פיין, איך ווייס אז דו האסט יא א שטארקע אמונה, עס איז נאר עצת היצר דיך אראפ צו ווארפן פון דיינע הויכע מדריגות צו די נידריגסטע פלעצער השם ישמרינו, איך בעט דיר זייער, טענה נישט מיט די מחשבות. דער הייליגער רבי האט אונז מגלה געווען אז מיט די שלעכטע מחשבות טאר מען נישט טענה'ן, ווייל ווי מער מען טענה'ט מיט זיי - ווערן זיי נאר מער שטערקער און מער שרעקעדיגער, די עצה איז - זיך נישט וויסנדיג מאכן פון זיי, און ווען די מחשבות קומען - זאל מען אנהייבן דאנקען דעם אייבערשטן, אזוי וועלן זיי אלע אנטלויפן.

אמאל האט א מענטש דינים אויף זיך און די מקטריגים ווילן אים נישט צולאזן צום אייבערשטן, און אפילו ווען דער מענטש קומט און בעט דעם אייבערשטן - פארשטעלן די מקטריגים, זיי לאזן אים נישט צו, איז דא נאר איין עצה, דאנקען דעם אייבערשטן; דאס קען מען נישט אוועק נעמען פונעם מענטש, און ווען דער מענטש הייבט אן זאגן: "שכח אייבערשטער, איך דאנק דיך פאר אלעס" - רוקן זיך אלע מקטריגים אין די זייט און דער מענטש קומט אן צו די העכסטע פלאץ, א משל צו א קעניג, א מלך בשר ודם, ווען איינער וויל אריינקומען אין היכל המלך קומען די משרתים, די עבדים - און לאזן נישט, מען הייבט אן באקוקן דעם מענטש צי ער איז ווערד מען זאל אים אריינלאזן אין פאלאץ פון קעניג, און אז דער מענטש האט שכל און זאגט: "איך וויל גארנישט בעטן פונעם קעניג, איך וויל נאר זאגן שכח" - עפנט מען אים אויף די טויערן און ער גייט אריין צום קעניג, און איינמאל ער איז שוין ביים קעניג קען ער שוין אלעס בעטן.

אזוי זאלסטו טון, מאך זיך א קביעות יעדן טאג אפאר מינוט צו גיין א שפאציר און זאגן: "שכח אייבערשטער, איך דאנק דיך אייבערשטער פאר אלעס וואס דו מאכסט מיט מיר"; דאס וועט דיר צוריק געבן דיינע מוחין, דו וועסט צוביסלעך אנהייבן שפירן דעם אייבערשטן, דו וועסט שפירן ווי די אמונה ווערט דיר שטערקער און שטערקער, און אזוי וועסטו זיך קענען גוט אויסגיסן דיין הארץ צו אים, און אים בעטן אויף א שטארקע אמונה.

אמאל איז א איד געקומען צום רבי'ן און געוויינט אז ער דארף אן עצה פאר א שטארקע אמונה, ער האט קשיות און בלבולים וכו'; האט אים דער רבי געזאגט: "זאג אויס דיינע קשיות און בלבולים ביי התבודדות, דערצייל דעם אייבערשטן ווי שווער עס איז דיר, און ווי דיין קאפ און מח שווינדלען דיר וכו' וכו', אזוי וועלן די קשיות אוועק גיין", דער רבי האט אים געזאגט אז די ראשי תיבות פון קשיא איז (תהלים כז, ז): "שְׁ'מַע ה' ק'וֹלִי אֶ'קְרָא", אז מען האט קשיות, זאל מען בעטן דעם אייבערשטן אויף דעם: "הייליגער באשעפער העלף מיר איך זאל נישט האבן קיין ספיקות און בלבולים וכו', געב מיר א שטארקע אמונה, איך זאל לעבן מיט אמונה".

אויך זאלסטו שלאפן גענוג שעות, און אויך אז דו ווערסט מבולבל אינמיטן טאג - זאלסטו כאפן א דרימל אינמיטן טאג. ווייל דער הייליגער רבי זאגט (שיחות הר"ן, סימן קי): "יש כמה שטותים ובלבולים המתדבקים ומתחברים בהמח", עס קלעבן זיך אן אינעם מח אסאך שטותים און בלבולים, "ובפרט בלבולי האמונה", און עס שאדט ספעציעל פאר אמונה, "ועל ידי השנה נפרדים מהמח", און דורך שלאפן גייט עס אוועק, "וביותר מועיל השנה לאמונה", און אז מען שלאפט העלפט עס זייער פאר א שטארקע אמונה, מען ווערט אויסגערוט, מען קומט צו זיך.

איך דארף מקצר זיין, איך דארף גיין צו די בחורים, די בחורים זענען צעבראכן אויף שברי שברים, זיי ווארטן אויף אביסל חיזוק.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך - יום ג' פרשת שופטים, כ"ח מנחם-אב, שנת תשפ"ו לפרט קטן

לכבוד ... נרו יאיר

איך וויל דיך באדאנקען, און אויך אלע אנשי שלומינו - פארן העלפן קאמפיינען. איך בין זייער איבערגענומען פון אנשי שלומינו, ווי אלע האבן געהאלפן ברענגען צדקה פאר די קהילה און מוסד, מען האט די יאר געשפירט ווי אלע מיינען עס פערזענליך, מען טוט נישט אבי יוצא צו זיין, מען זעט אויף די סכום וואס אנשי שלומינו האבן אריינגעברענגט, קרוב צו א מיליאן מיט א האלב, און דאס מערסטע פון די סכום איז פון קליינע נדבות, און ברוך השם איך האב שוין באצאלט די וועם איך דארף באצאלן, און איך בענטש דיר מיט הצלחה, און איך בין זיכער אז די אלע מענטשן וועם דו האסט גערופן בעטן נדבות פאר די מוסד, און אויך די אלע שולן און קאנטריס וואו דו ביסט געגאנגען נאך געלט - דאס וועט דיר צוניץ קומען ביים יום הדין, און אויך ווען מיר וועלן צוריק גיין צום אייבערשטן און מען וועט אונז משפט'ן וועט דאס דיר העלפן.

מען דארף שוין מאכן די לעצטע הכנות צו קומען צום רבי'ן אויף ראש השנה, איך וויל דיך מחזק זיין דו זאלסט נישט ווערן דערשראקן פון דיינע מניעות, מניעות האט יעדער איינער, שפרינג אריבער אויף די מניעות, און אפילו דער צדיק אליינס וועט דיך פארטרייבן - זאלסטו געדענקען וואס רבי נתן האט געזאגט פארן רב - רבי אהרן, ווען ער איז געקומען פרעגן דעם רבי'ן וואס ער זאל טון וועגן קומען קיין אומאן אויף ראש השנה, ער האט געזאגט פארן רבי'ן אז די ראשי קהילה זאגן אים אז ער קען נישט אוועקפארן, ער טאר זיי נישט איבערלאזן וכו', און אז ער קען פארלירן זיין פרנסה אויב ער וועט אוועק פארן אויף ראש השנה; האט אים דער רבי געזאגט ער זאל נישט קומען, און אזוי האט ער געטון, ער איז נישט געקומען, שפעטער האט אים רבי נתן געפרעגט: "פון אזא רבי גייט מען אוועק? אפילו דער רבי זאל נעמען א דראנג (א דיקע האלץ) און מיך אוועק טרייבן פון אים, וואלט איך אויך נישט אוועק געגאנגען".

גיי אביסל זיך מתבודד זיין, שמועס מיטן אייבערשטן, דערצייל אים דיין הארץ, דערצייל אים דיין ווייטאג; וועסטו זען א גרויסע ישועה.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך - יום ג' פרשת ראה, כ"א מנחם-אב, שנת תשפ"ו לפרט קטן

... נרו יאיר, מאנסי

איך האב ערהאלטן דיין מעסעדזש.

מזל טוב פאר דיין סיום הש"ס צום צווייטן מאל, דער אייבערשטער זאל העלפן דו זאלסט זוכה זיין צו טרעפן דיין שידוך, באקומען א צלם אלקים, דער הייליגער אריז"ל זאגט, ווען מען האט חתונה באקומט מען א צלם אלקים, און דער הייליגער רבי האט געזאגט: "ווער עס ענדיגט ש"ס איז ממשיך אויף זיך א צלם אלקים", און אז דו האסט מסיים געווען די צווייטע מאל ש"ס – דארפסטו שוין טרעפן דיין צלם אלקים.

גיי אריבער – ווען דו קענסט – צום ציון פון הייליגן ריבניצער רבי זכר צדיק לברכה, זיי זיך דארט מתבודד, בעט דעם אייבערשטן דו זאלסט שוין זוכה זיין צו טרעפן דיין שידוך.

אויך זאלסטו שוין מאכן א טיקעט פאר ראש השנה, צו קומען צום הייליגן רבי'ן.

בעזרת ה' יתברך - יום ג' פרשת ראה, כ"א מנחם-אב, שנת תשפ"ו לפרט קטן

לכבוד ... נרו יאיר

איך זע אז מענטשן זענען צעמישט וואס איז התקרבות לצדיק, ווי אזוי איז מען נאנט צום צדיק, ווער איז נאנט און ווער איז נענטער, און וואס דארף מען פרעגן און וואס דארף מען דערציילן.

וויסן זאלסטו, התקרבות לצדיק איז לערנען דעם הייליגן רבינ'ס ספרים (אין דעם איז נכלל הערן שיעורים וואס מען רעדט דעם רבינ'ס עצות), און טון די עצות פון הייליגן רבי'ן; די ערשטע עצה איז - זיך אויסרעדן דאס הארץ יעדן טאג צום אייבערשטן אויף די אייגענע שפראך אזוי ווי מען רעדט זיך אויס דאס הארץ צו א גוטער פריינד, און ווי א קינד רעדט צו זיין טאטע, דערציילן פארן אייבערשטן ווי שטארק מען וויל זיין ערליך, ווי שטארק מען וויל זיין אפגעהיטן, און ווי שווער עס גייט, ווי מען האלט אין איין פאלן; דאס איז התקרבות לצדיק.

אנשטאט רעדן פון דעם און יענעם, אנשטאט זיין פארנומען מיט נארישקייטן - הייב אן טון למעשה די עצות פון רבי'ן, וועסטו זוכה זיין צו ווערן איינגעגעסן אינעם צדיק און נכלל ווערן אינעם אייבערשטן.

איך בעט דיר מאך מיר נישט די קאמפיין אבי יוצא צו זיין, מאך עס מיט דיין הארץ, נעם אראפ פון מיר די שווערע חובות; איך קען עס נישט מער נעמען, עס שוואכט מיך אפ פיזיש, עס נעמט כוחות פון מיר, לייג אריין דאפלטע כוחות פון פאראיאר.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.