בריוון פונעם ראש ישיבה שליט"א

בעזרת ה' יתברך - יום ד' פרשת שופטים, ג' אלול, שנת תשפ"ה לפרט קטן

מרת ... תחי'

איך פריי זיך זייער אז איר גייט זיין א לערערין אין בית פיגא, דער אייבערשטער זאל העלפן איר זאלט האבן גרויס הצלחה.

לייגט אריין אין די בית פיגא תלמידות אמונה, יראת שמים מיט מידות טובות, אויך זאלט איר האבן איין ציל פאר אייך – אויפצובויען די קינדער, זיי זאלן נישט זיין צעקלאפטע.

זיין א טיטשער איז א חכמה, נישט קיין מלאכה, מען דארף קענען זיין שטארק מיט וואס מען איז מחנך און אין די זעלבע צייט זיין גוט און הארציג.

אויך זאלט איר בעטן יעדן אינדערפרי פאר אלע תלמידות זיי זאלן מצליח זיין.

בעזרת ה' יתברך - יום ג' פרשת דברים, ד' מנחם-אב, שנת תשפ"ה לפרט קטן

מרת ... תחי'

די קומענדיגע יאר זאלט איר נישט צוריק קומען אין בית פיגא, איר דארפט זיך אפרוען, איר דארפט קומען צו זיך פון אייער געבוירענער בכור; רוט זיך אפ פאר א יאר און נאכדעם וועט איר צוריק קומען זיין א טיטשער.

דא און דארט ווען מען זוכט א 'במקום' צו איבערנעמען א טיטשער פאר א טאג צוויי וכו', דאס קענט איר טון, דאס איז נישט אזוי שווער פארן מח.

צעברעכט זיך נישט, זייט פרייליך, יעדע זאך האט איר צייט, יעצט איז א צייט פון זיך אפרוען און זיין א מאמע פאר אייער קינד.

בעזרת ה' יתברך - יום ה' פרשת בלק, י"ד תמוז, שנת תשפ"ה לפרט קטן

מרת ... תחי'

איך וויל בעט איר זאלט אנהאלטן מיט אייער הייליגע ארבעט, פירן די בית פיגא סקול אין וויליאמסבורג.

רעדט זיך דורך מיט די מנהלת מרת ... תחי', וועם צו נעמען פאר לערערינס, ווייל איך וויל זייער אוועק שטעלן אונזער בית פיגא אין שטאט, עס זאל זיין אוועק געשטעלט שטארק און גוט; מיט לערערינס וואס האבן א געפיל פאר די קינדער, און א געפיל פארן רבי'ן.

אויך זאלט איר ארויסשיקן צעטלעך און רופן אלע עלטערן פרעגן ווער עס קומט צוריק, און אויך די פרישע תלמידות וואס קומען אריין, און אויסשמועסן ווער וועט זיין די טיטשערס וכדומה.

שטארקט זיך מיט פירן די בית פיגא סקול אין וויליאמסבורג, און אלע אייערע ספיקות זאלט איר דורכשמועסן מיט די מנהלת מרת ...

בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן

טייערער ...  נרו יאיר

איך וויל דיר בעטן זאלסט מחזק זיין דיין ווייב זי זאל ממשיך זיין העלפן בית פיגא, די מנהלת דארף איר האבן, זי זאגט אז זי טוט די ארבעט זייער געטריי און זייער צום זאך.

אפשר קענסטו זיך מאכן אין דיין סדר היום איר אהיים נעמען פון בית פיגא, גלייך ווען זי ענדיגט איר ארבעט; ווייל דאס אהיים פארן איז אביסל שווער, און עס נעמט צייט, און אז דו וועסט איר אהיים נעמען פון די ארבעט וועט זי אנקומען פריער אין שטוב, זי וועט האבן צייט פאר זיך און פאר די שטוב, איידער די קינדער קומען אהיים.

איך פארשטיי אז עס איז שווער צו זיין א מאמע ווען מען איז נישט אין שטוב, די שטוב ארבעט ווערט נישט געטון צייטליך, אבער פארגעס נישט, דאס איז נישט סתם אן ארבעט, דאס איז באדינען דעם הייליגן רבי'ן, און אלע וואס העלפן אונזער "בית פיגא סקול" – זעען הצלחה, און די שכר איז לנצח נצחים.

בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן

מרת ... תחי'

ווען מיר האבן געעפנט בית פיגא סקול האט מען געלערנט מיט די קינדער פון רבי'ן, מען האט געלערנט ספורי מעשיות, שיחות פון מוהרא"ש, ספר המדות וכו' וכו', מען האט זיך פארלייגט גאר אסאך אויף לערנען פון רבי'ן, מיט די צייט איז די סקול געווארן גרעסער, און מיט די צייט וועט עס ווערן נאך גרעסער, דארף מען געדענקען צו אנהאלטן די לימודים מיט די תלמידות, ווייל דאס איז דער עיקר; איינפלאנצן די שכל און חכמה פון הייליגן רבי'ן.

א גרוס פון אייער טייערער זון ..., איך בין מיך מחי' צו לערנען מיט אים אינדערפרי דעם בלאט גמרא, איך האף צו לערנען מיט אים נאך שיעורים, איך האב אים זייער ליב, ער האט גאר גוטע כשרונות און גוטע מידות, ער וועט וואקסן א גרויסער צדיק.

איך האף צו קומען מארגן מחזק זיין אלע טיטשערס פאר די זומער הויבט זיך אן.

בעזרת ה' יתברך - יום ג' פרשת שלח, כ"א סיון, שנת תשפ"ה לפרט קטן

... תחי', תלמידה בית פיגא

לכבוד וואס איר טוט גראדואירן די אכט קלאסן פון בית פיגא, געב איך אייך א מתנה די ספר המידות, דער ספר וואס דער רבי האט געזאגט (חיי מוהר"ן, סימן שעט): "דער ספר האט מיך געמאכט פאר א איד". און אזוי ווי מיר האבן געהערט פון מוהרא"ש אז אפילו מען לערנט נישט אין בית פיגא קיין תורה מיט מיידלעך, איז אבער אנדערש די ספרים פון רבי'ן, וואס זענען איין שטיק מוסר, א מאגנעט וואס ציט און שלעפט צום אייבערשטן.

דער אייבערשטער זאל העלפן איר זאלט מיטנעמען מיט זיך די אכט יארן בית פיגא, וואס מען האט געלערנט מיט אייך די ריינע אמונה, צו וויסן און צו געדענקען אז אלעס וואס גייט אריבער אויף די וועלט בכלליות און אויפן מענטש בפרטיות - איז פונעם אייבערשטן, און נאר פאר דאס גוטס פונעם מענטש, און אפילו עס זעט אויס אמאל שווער, עס ווערט אמאל טונקל - דארף מען געדענקען אז דער אייבערשטער מאכט דאס נאר פאר אונזער טובה.

אויך זאלט איר מיט נעמען מיט אייך אייער גאנץ לעבן די זיסע עצה וואס איר האט געלערנט אין בית פיגא; די עצה פון שמועסן מיטן אייבערשטן. געדענק אז אויסער אייער טאטע האט איר נאך א טאטע, דער אייבערשטער, וואס איז די טאטע פון אונז אלע, און ווען איר דארפט עפעס זאלט איר זיך צו אים ווענדן, שמועסט מיט אים און בעטס אים, וועט איר זען וואונדער.

אויך זאלט איר מיט נעמען אין לעבן דאס שיינקייט פון אידישע טעכטער, צו גיין אנגעטון איידל און באשיידן, איר זאלט געדענקען דאס שיינקייט פון אידישע טעכטער. מיר זענען אין אמעריקע אבער מיר זענען נישט אמעריקאנער, מיר זענען אויסגעמישט צווישן די פעלקער אבער מיר זענען אידישע טעכטער; זאלט איר גיין מיט שטרימפ וואס זעט נישט אויס ווי די פיס, און אויך מיט קליידער וואס זענען נישט אויסגעשניטן, נישט קורץ און נישט געפאסט, איר זאלט מאכן א נחת רוח פארן אייבערשטן און פאר די צדיקים.

עס איז נישט מעגליך אראפצושרייבן די מסירות נפש וואס מוהרא"ש האט געהאט פאר אונז מיטן עפענען פאר אונז די סקול "בית פיגא", וויפיל טרערן מוהרא"ש האט פארגאסן פארן אייבערשטן אז מיר זאלן האבן די הייליגע בית פיגא שולע וואו די תלמידות וועלן ליב האבן צו זיין א איד, ליב האבן צו גיין אנגעטון איידל, ווי עס פאסט פאר די אידישע פאלק.

דער אייבערשטער זאל אייך געבן הצלחה.

בעזרת ה' יתברך - יום ב' פרשת שלח, כ' סיון, שנת תשפ"ה לפרט קטן

טייערע ... תחי'

איך דאנק אייך זייער פארן העלפן אונזער בית פיגא שולע, נאר מיט אייער הילף, מיט אייער איבערגעגעבנקייט - האלטן מיר דא. עס ווערט פארשריבן אין הימל פאר אייביג אז איר האט די יאר אוועקגעגעבן פון אייך פאר אידישע קינדער עס זאל זיין א ווארעמע שולע בית פיגא, וואו אונזערע טעכטער לערנען די ריינע אמונה און די הייליגע תורה.

דער אייבערשטער זאל אייך באצאלן מיט נחת, מיט געזונט, מיט אלעס וואס איר באגערט.

נ. ב. איך וועל זיך זייער פרייען אויב איר וועט בלייבן קומענדיגע יאר העלפן בית פיגא.

בעזרת ה' יתברך - יום ב' פרשת שלח, כ' סיון, שנת תשפ"ה לפרט קטן

טייערע בית פיגא תלמידות שתחיו

לכבוד די געהויבענע צייט וואס ענק טוען גראדואירן די ערשטע אכט קלאסן, וויל איך אייך שרייבן אפאר ווערטער פאר די יאר-בוך וואס ענק געבן ארויס.

טייערער תלמידות פון בית פיגא, עס איז נישט מעגליך אין איין בריוו אראפצושרייבן די גרויסע מסירות נפש וואס מוהרא"ש זכותו יגן עלינו האט געהאט אין זיין לעבן און מיטן גרינדן אונזער בית פיגא שולע וואו מיר ווערן נתחנך צו זיין נאנט צום אייבערשטן, און צו זיין געטרייע ערליכע אידישע מאמעס.

איך בין זייער איבערגענומען צו זען וואס פאר א שיינע פירות בית פיגא געבט ארויס, ערליכע אידישע מאמעס, ערליכע אידישע פרויען וואס זענען שטארק מיט אמונה, און וואס האבן ליב דעם אייבערשטן און האבן ליב די תורה וועג.

יעצט ווען ענק גראדואירן די אכט קלאסן זאלן ענק דאנקען דעם אייבערשטן אז ענק האבן געהאט אזעלכע הייליגע יארן אין די הייליגע ווענט פון בית פיגא.

ענקער איידעלע אויפפירונג, ענקער באשיידנקייט און געפיל צו צניעות – איז א קידוש השם און א נחת רוח פארן אייבערשטן, פאר דעם הייליגן רבי'ן מיט זיינע הייליגע תלמידים און מוהרא"ש זכותו יגן עלינו.

איך בין מתפלל פאר אלע תלמידות בית פיגא, ענק זאלן אלע האבן הצלחה און ברכה אין ענקער לעבן, אמן.

בעזרת ה' יתברך - יום ג' פרשת במדבר, כ"ט אייר, מ"ד לעומר, שנת תשפ"ה לפרט קטן

מרת ... תחי', מנהלת בית פיגא, קרית ברסלב ליבערטי

זייט מחזק די טיטשערס, דאס מערסטע חיזוק דארפן די וואס טוען מיט אנדערע. מוהרא"ש זאגט די ווערטער פון חכמינו זכרונם לברכה (ספרי נשא, פיסקא א): "אֵין מְחַזְקִין אֶלָא לִמְּחוּזָקִין", דאס מיינט מען מלמדים און טיטשערס וואס זענען עוסק מיט אויפברענגען קינדער, זיי דארפן דאס מערסטע חיזוק.

איך וויל בעטן, אזוי ווי לעצטנס איז געווארן די סטייל מען גייט מיט לאנגע קליידער, וויל איך בעטן די לערערינס פון בית פיגא זאלן קומען אנגעטון - נישט לאנג און נישט קורץ, נישט נאכגיין די סטיילס, נאר זיין א ביישפיל פאר אונזערע קינדער וואס איז שיין פאר א אידישע פרוי. איך פארלאנג פון אלע טיטשערס זאלן קומען אין בית פיגא אנגעטון שיין און איידל, און איך בעט אויך ווען מען קומט נישט אין בית פיגא זאל מען גיין אנגעטון איידל און שיין.

אויך וויל איך נאכאמאל מחזק זיין אז אין די פיר ווענט פון בית פיגא קענען נאר ארבעטן טיטשערס וואס האבן א ריינע שטוב, זיי האבן נישט קיין טעלעפאן, ווידיאוס, מאוויס, סאושעל מידיע; די פיר ווענט פון בית פיגא איז הייליג, און איך וויל די שכינה הקדושה זאל בלייבן ביי אונז, און די תורה זאגט (דברים כג, טו): "כִּי ה' אֱלֹקֶיךָ מִתְהַלֵּךְ בְּקֶרֶב מַחֲנֶךָ לְהַצִּילְךָ וְלָתֵת אֹיְבֶיךָ לְפָנֶיךָ, וְהָיָה מַחֲנֶיךָ קָדוֹשׁ, וְלֹא יִרְאֶה בְךָ עֶרְוַת דָּבָר, וְשָׁב מֵאַחֲרֶיךָ", איר זאלט זיך פירן הייליג, ווייל אויב איר וועט זיך נישט פירן בצניעות וועל איך אוועק גיין פון אייך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - ערב שבת קודש פרשת אמור, י"ח אייר, ל"ג בעומר, שנת תשפ"ה לפרט קטן

מרת ... תחי'

בזכות וואס איר האט זיך אנגעטון ... וועט איר געהאלפן ווערן מיט ערליכע דורות. אזוי ווי דער הייליגער רבי שמעון זאגט, אז די פרוי וואס איז איידל און גייט אנגעטון איידל – איז זוכה צו קינדער צדיקים.

איך בין אין מירון, איך בעט פאר ענק, און איך בעט פאר אלע תלמידות, און איך האף צום אייבערשטן אז אלע "בית פיגא" תלמידות זאלן אויפוואקסן מיט א ליבשאפט צו איידלקייט, אלע זאלן ליב האבן די אמת'ע חן, איידל און באשיידן, און זיך עקלען און פאר'מיאוס'ן די פריצות'דיגע קליידער און פיראכצער.

בעזרת ה' יתברך - יום ג' פרשת אחרי קדושים, ח' אייר, כ"ג לעומר, שנת תשפ"ה לפרט קטן

מרת ... תחי', מנהלת בית פיגא קרית ברסלב ליבערטי

איך האב ערהאלטן אייער בריוו.

איך פריי זיך זייער אז מען האט אנגעהויבן לערנען מיט די תלמידות פאררעכטן קליידער, זיי זאלן קענען פאררעכטן די קליידער פון זייער משפחה סיי יעצט און סיי נאך זייער חתונה, דאס וועט זיי שפארן געלט.

אויך פריי איך זיך צו הערן אז איר נעמט צאם די סעקרעטעריס און בעבי סיטערס שמועסן מיט זיי, זען וואס מען קען מאכן בעסער און בעסער פאר בית פיגא.

איך וויל דערמאנען איר זאלט פערזענליך רעדן צו אלע תלמידות פון רעדן איידל, נישט רעדן פריוואטע זאכן. מען קען נישט יוצא זיין מיט איין מאל האבן גערעדט, די הייליגע חכמים זאגן (ברכות סא.) אויפן פסוק (בראשית ד, ז): "לַפֶּתַח חַטָּאת רֹבֵץ", אז דער יצר הרע זיצט ביים הארץ פונעם מענטש און מוטשעט און מוטשעט צו זינדיגן, און אז מען רעדט איין מאל פון זיך שפילן איידל און פון זיך פירן איידל - איז נישט גענוג, מען דארף רעדן נאכאמאל און נאכאמאל.

עס איז נישט גענוג אז די טיטשערס רעדן פון זיין אפגעהיטן, פון זיך שפילן איידל וכו', די מנהלת דארף אויך ארומגיין אין די קלאסן פון צייט צו צייט רעדן קלאר און דייטליך פון זיך פירן איידל און פון די שעדליכקייט פון נישט געזונטע נאנטקייט פון חבר'טעס און אויך משפחה.

איך בין אייך זייער דאנקבאר פאר אייער מסירות נפש פאר בית פיגא, בזכות וואס איר געבט זיך אזוי אוועק פאר אונזערע טעכטער וועט איר זען נחת ביי אייערע קינדער און קינד'ס קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת תזריע מצורע, ב' אייר, י"ז לעומר, שנת תשפ"ה לפרט קטן

... תחי'

איך בעט אייך זייער איר זאלט בלייבן טיטשן אין בית פיגא, די מנהלת תחי' זאגט מיר כסדר אז איר זענט אן אויסגעצייכנטע טיטשער, און מען דארף אייך האבן, בעט איך אייך זייער, לאזט נישט איבער בית פיגא.

איך ווייס אז עס איז אייך שווער, אבער גלייבט מיר, מיר איז אויך שווער, און פון ווען מוהרא"ש האט מיר געשריבן: "אִיבֶּערְדֶעם זָאלְסְטוּ זִיךְ גָארְנִישְׁט שְׁרֶעקְן, זָאלְסְט מַמְשִׁיךְ זַיין דַיין הֵיילִיגֶע עֲבוֹדָה, הֵן אֶמֶת אִיךְ וֵוייס אַז דוּ בִּיסְט גֶעדְרִיקְט יֶעצְט זֵייעֶר אִין גֶעלְט, אוּן דוּ וִוילְסְט אוֹיפְהֵייבְּן דִי הֶענְט וְכוּ', בֶּעט אִיךְ דִיר הֵייבּ אוֹיף דִי הֶענְט נָאר פַארְ'ן בּוֹרֵא כָּל עוֹלָמִים, אַזוֹי וִוי עֶס שְׁטֵייט בַּיי מֹשֶׁה רַבֵּינוּ וֶוען עֶר הָאט מִלְחָמָה גֶעהַאלְטְן מִיט עַמָלֵק'ן (שְׁמוֹת יז, יא) "וְהָיָה כַּאֲשֶׁר יָרִים מֹשֶׁה יָדוֹ וְגָבַר יִשְֹרָאֵל וְכַאֲשֶׁר יָנִיחַ יָדוֹ וְגָבַר עַמָלֵק", דַרְשֶׁנֶ'ן אוֹיף דֶעם דִי חַזַ"ל (רֹאשׁ הַשָׁנָה כט.), "וְכִי יָדָיו שֶׁל מֹשֶׁה עוֹשׂוֹת מִלְחָמָה אוֹ שׁוֹבְרוֹת מִלְחָמָה? אֶלָא לוֹמַר לָךְ כָּל זְמַן שֶׁהָיוּ יִשְֹרָאֵל מִסְתַּכְּלִין כְּלַפֵּי מַעֲלָה וּמִשְׁעֲבְּדִין אֶת לִבָּם לְאַבִיהֶם שֶׁבַּשָׁמַיִם הָיוּ מִתְגַבְּרִים וְאִם לַאו הָיוּ נוֹפְלִים", טו איך אזוי; ווען די ארבעט ווערט מיר שווער הייב איך אויף די הענט צום אייבערשטן און איך וויין: "אייבערשטער העלף מיר, אייבערשטער איך האב מער נישט קיין כח, אייבערשטער זאג מיר וואס צו טון, העלף מיר".

איך האף צום אייבערשטן אז איר וועט ענדיגן די יאר לכל הפחות, און נישט אוועק גיין, מיר איבערלאזן מיט די קינדער, און הלואי וואלט איר געבליבן קומענדיגע יאר, ווייל נאר מיט די געטרייע טיטשערס וואס קומען, זיי זענען זיך מוסר נפש, זיי געבן אוועק זייער הויז, זייער אפרוען, זייער שלאפן - פאר אונזערע קינדער, נאר אזוי קען איך ממשיך זיין מיט בית פיגא.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת תזריע מצורע, ב' אייר, י"ז לעומר, שנת תשפ"ה לפרט קטן

... תחי', תלמידה בית פיגא

איך האב ערהאלטן א בריוו פון אייער מאמע תחי', זי שרייבט, זי מיינט אז קיין איין מאמע האט נישט אזא טאכטער וואס העלפט מיט אזא גוטע געפיל און מיט אזא שמחה - אזוי ווי אייך, זי שרייבט אז איר האט אפגעקאכט עסן פאר די גאנצע יום טוב פסח, און געהאלפן אזוי סאך, און ווען אייער מאמע האט אייך געזאגט איר קענט גיין שפילן - האט איר זי געזאגט אז איר ווילט מיט נעמען די קליינע קינדער זיי זאלן איר נישט שטערן, זי זאל זיך קענען אפרוען, איר זארגט נאר פאר איר זי זאל האבן כח און נאר ווי איר קענט איר עפעס העלפן.

אויך שרייבט אייער מאמע אז ביים איינקויפן קליידער ווילט איר אלץ גיין איידל אנגעטון און איר פארלאנגט נישט קיין טייערע קליידער, איר זענט צופרידן מיט וואס זי געבט אייך.

איך בין זייער איבערגענומען פון אייך, איר מאכט א גרויסע נחת רוח פארן אייבערשטן, און בזכות וואס איר העלפט אייער מאמע זאלט איר האבן א זיסע און גוטע לעבן, איר זאלט טרעפן א גוטע שידוך און האבן ערליכע געזונטע דורות און איר זאלט זיין געזונט און שטארק.

זעט אויך אין סקול, אין בית פיגא - צו זיין פון די קינדער וואס העלפן די טיטשערס און די מנהלת מיטן זיין דרך ארץ'דיג, און ווען מען לערנט אדער מען טוט זאכן וואס די קינדער האבן נישט קיין נערווען – זאלט איר זיין פון די קינדער וואס זענען דא צו העלפן בויען בית פיגא און זיך פירן מיט גרויס דרך ארץ.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת תזריע מצורע, ב' אייר, י"ז לעומר, שנת תשפ"ה לפרט קטן

... תחי'

איך פריי זיך צו הערן פון אייער אידיש טיטשער אז איר דאווענט שיין הויך אויפן קול; אוי ווי שיין ווען מען דאווענט צום אייבערשטן, אלע מלאכים זענען מקנא דעם איד אז ער קען יעדן טאג נאכאמאל דאווענען צום אייבערשטן ווען זיי קענען נאר איינמאל אין לעבן דאנקען דעם אייבערשטן.

טייערע ... תחי', איך וויל אזוי שטארק אז אלע אונזערע תלמידות פון בית פיגא זאלן דאווענען, אלע זאלן וויסן אז נאר דאס איז אונזער האפענונג, און אז מען קען אלעס באקומען אז מען דאווענט צום אייבערשטן.

ביי שמונה עשרה, איידער מען טרעט אויס, דארט איז א גוטע פלאץ זיך אויסצובעטן ביים אייבערשטן אין די אייגענע שפראך, זאלט איר נעמען די סידור און עס לייגן אויפן פנים, אזוי וועט איר נישט זען קיינעם און נישט ווערן געשטערט פון קיינעם, און בעטס שטילערהייט דעם אייבערשטן פאר אייער שידוך, פאר אייערע דורות, פאר אייער געזונט, פאר אייער אלעס; ווייל מיט תפילה, און נאר מיט תפילה - באקומט מען אלעס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת שמיני, כ"ד ניסן, ט' לעומר, שנת תשפ"ה לפרט קטן

מרת ... תחי', מנהלת בית פיגא קרית ברסלב

איך האב ערהאלטן א בריוו פון משפחת ... שיחיו, זיי קענען זיך נישט גענוג באדאנקען פאר די חינוך פון בית פיגא. זיי שרייבן אז חול המועד ווען זיי זענען אנגעקומען צו א פארעם און געזען אז עס איז צו טייער און געזאגט פאר די מיידלעך אז מען גייט אהיים - האבן די קינדער נישט געגעבן קיין איין קרעכץ, זיי האבן געזאגט: "אונזער טיטשער האט אונז געלערנט נישט צו מוטשען די עלטערן".

אויך ווען זיי זענען געווען ביי זייער זיידע און דער זיידע האט נאר געוואלט קיצלען וכו', הערן זיי ווי זי זאגט פאר די זיידע: "איך האב נישט ליב ווען מען קיצלט מיך און ווען מען רירט מיך אן".

דאס איז אביסל איר זאלט וויסן און הערן וואס בית פיגא טוט מיט אונזערע קינדער.

מיר זענען אייך זייער מכיר טובה פאר אלעס וואס מיר ווייסן וואס איר טוט און פאר אלעס וואס מיר ווייסן נישט וואס מען טוט מיט אונזערע טעכטער, דער אייבערשטער זאל אייך געבן כח צו קענען ווייטער טון מיט אונזערע טעכטער און נחת פון אייערע קינדער.

בעזרת ה' יתברך - ד' פרשת משפטים, כ"ב שבט, שנת תשפ"ה לפרט קטן

מרת ... תחי', קרית ברסלב

דאס וואס איר זאגט אז די קומענדיגע יאר ווילט איר מער נישט זיין א טיטשער ביי אונז אין בית פיגא, ווייל די עלטערן פון יענע קלאס זענען אומצופרידענע, זיי פירן זיך נישט אויף שיין צו א טיטשער וכו'.

וואס זאל איך אייך זאגן, צו זיין א טיטשער און צו האבן צו טון מיט מענטשן - איז בכלל נישט קיין גרינגע זאך. מוהרא"ש זאגט, יעדער וואס טוט מיט מענטשן - וועט זיין אויף אים קריטיק, עס וועט גארנישט נוצן, אזוי מוז זיין, און ווער עס קען נישט אויסהאלטן - זאל שטיין ווייט פון דעם.

אבער דאס גרויסקייט פון טון מיט מענטשן - בפרט ווען עס רעדט זיך פון לערנען תורה, אמונה, תפילה, קדושה, יראת שמים, מידות טובות, איידלקייט מיט אידישע טעכטער - איז נישט צום באגרייפן, דער הייליגער זוהר זאגט (זהר חדש לך לך): "דירתו עם השכינה", דער אייבערשטער רוט ביי דעם מענטש, און אז מען קען זען אפי שכינתא.

נאך זאגן די הייליגע חכמים (סנהדרין צב.), דער וואס לערנט תורה מיט אנדערע, "זוכה ומלמדה לעולם הבא", אויף יענע וועלט וועט מען אויך זיין א טיטשער, מען וועט לערנען מיט די נשמות.

איך וועל אייך נישט זאגן וואס צו טון, איך ווייס גאר גוט וואס מיינט זיין א טיטשער, ארבעטן שווער און צוריק באקומען טענות וכו', איך טו דאס שוין איבער צוואנציג יאר און מען באקומט נאר צוריק טענות, ווייניג מענטשן האבן די שיינע מידה פון הכרת הטוב, זיך באדאנקען, איך ווייס די שוועריקייט, אבער אויב איר וועט העלפן בויען 'בית פיגא' - וועט אייער שכר זיין זייער גרויס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - ד' פרשת משפטים, כ"ב שבט, שנת תשפ"ה לפרט קטן

תלמידות בית פיגא אכטע קלאס, שתחיו

יישר כח פארן מאכן קוגל פאר די חתונות פון אנשי שלומינו וואס קומט פאר אין ישיבה, ענק האבן א גרויסע מצוה, עס איז די מצוה פון הכנסת כלה.

מען האט שוין געמאכט אין די לעצטע פאר יאר אין ישיבה א חשבון פון קרוב צו הונדערט חתונות וואס איז בחינם פאר ביידע מחותנים, און נאר דורך די הילף פון די פרויען פון די לעידיס עקזילערי און פון די הילף פון די בית פיגא תלמידות - וואס העלפן אנגרייטן די קוגל און אלעס צושטעלן - קענען מיר דאס באווייזן.

איך וויל ענק אויך מחזק זיין ענק זאלן מיט האלטן די נייען, ענק מיינען אז עס איז איבריג, ענק מיינען אז עס איז א נישט וויכטיגע זאך; וואס זאל איך ענק זאגן, ענק וועלן זען נאך ענקער חתונה ווי וויכטיג דאס איז; ווייל די וואס האבן נישט געלערנט נייען - דארפן ארום לויפן פאר יעדע קלייניקייט צו א שניידער, יעדע ריר קאסט אזויפיל צייט און געלט, און די וואס לערנען זיך אין סקול נייען  - די קענען פאררעכטן די קליידער פון זיך, פון די מאן און קינדער.

טייערע תלמידות טראסטס מיך, איך וויל נישט לייגן אויף ענק נישט וויכטיגע זאכן, יעדע ריר פון בית פיגא; וואס מען זאל לערנען און וואס מען זאל מאכן - שטיי איך אונטער דעם, און אז ענק - די גרויסע תלמידות - וועלן זיך צושטעלן, ענק וועלן מיטהאלטן אלעס פון סקול - וועלן ענק מיר העלפן.

דער אייבערשטער זאל העלפן ענק זאלן האבן הצלחה אין אלע ענינים.

בעזרת ה' יתברך - יום ג' פרשת יתרו, י"ג שבט, שנת תשפ"ה לפרט קטן

... תחי', תלמידה בית פיגא

איך הער שיינע זאכן אויף אייך פון די מנהלת און פון אייערע טיטשערס.

איך וויל אייך בעטן איר זאלט זיך פארלייגן צו דאווענען ערליך, ארויסזאגן די ווערטער שיין און קלאר. דאווענען איז די הייליגסטע זאך, בפרט פאר א בית פיגא תלמידה, וואס דאס איז דאך ברסלב'ע חסידות, צו דאווענען און בעטן דעם אייבערשטן.

דאס ווייסט איר אודאי אז דער רבי האט געוואלט מען זאל אים רופן 'רבינו נחמן בן פיגא', ווייל זיין מאמע פיגא האט אים מגדל געווען און אריינגעלייגט יראת שמים אין אים. זי פלעגט אים נעמען כסדר צום קבר פון איר זיידן דער הייליגער בעל שם טוב זכותו יגן עלינו און דארט וויינען אז דער קינד זאל אויסוואקסן א גרויסער צדיק.

יעצט איז די צייט צו דאווענען און בעטן ביים אייבערשטן אויף א גוטע שידוך און אויף ערליכע געזונטע דורות.

געבט א גרוס פאר אייערע עלטערן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת שמות, י"ג טבת, שנת תשפ"ה לפרט קטן

לכבוד מיין טייערער ... נרו יאיר, קרית יואל

איך וויל דיר בעטן אויב דו קענסט מיר העלפן מיט די "בית פיגא" אין מאנרא. די טיטשערס דארפן דארט אסאך חיזוק, מען דארף דארט מסדר זיין די דרך ארץ און צוגאנג.

איך האב נישט קיין אינטערעס צו האבן נאך א סקול כאילו בית פיגא; אדער שטעלט מען די שולע צוריק ווי עס דארף צו זיין, אדער דארף מען דאס פארמאכן ווי שנעלער.

איך וויל הערן פון דיר אויב דו קענסט מיר העלפן מיט דעם.

בעזרת ה' יתברך - יום ד' פרשת ויחי, ח' טבת, שנת תשפ"ה לפרט קטן

... תחי', תלמידה בית פיגא

איר זענט א גוט קינד, איר זענט א טייער קינד, איך האף בקרוב וועט איר א כלה ווערן און אויפשטעלן א שיינע אידישע שטוב, וואו די שכינה וועט רוען, און ברענגען ערליכע דורות פארן אייבערשטן.

איך בעט אייך, האלטס אויס דאס ביסל אין סקול, פירט זיך מיט דרך ארץ, שטעלט זיך צו צו די סקול, ווען מען דאווענט - דאווענט מיט, און ווען מען לערנט - זאלט איר מיט האלטן, און אויך ווען מען נייט - זאלט איר מיט נייען, אפילו עס איז אייך גאר ווייניג אינטערעסאנט; דאס אליין איז די וויכטיגסטע זאך אין לעבן, זיך אויסלערנען אז מען טוט נישט נאר וואס מען וויל און וואס מען האט ליב, מען טוט וואס איז ריכטיג, מען טוט וואס מען דארף טון.

איך בעט אייך מיט מיין גאנצע הארץ, האלטס אויס ביז איר ווערט א כלה; א שאד דאס ביסל צייט וואס איר האט נאך - ארויס צו פאלן פון די ווארעמע היים "בית פיגא", אפילו עס איז אייך ביטער שווער. בעטס דעם אייבערטן א תפילה איידער איר גייט אריין אין קלאס: "רבונו של עולם, געב מיר די כוחות זיך איינצובייגן מיין רוקן ביין און מיין קאפ פאר די טיטשערס, רבונו של עולם געב מיר הכנעה, רבונו של עולם העלף איך זאל קענען פאלגן וואס שטייט דא אינעם בריוו".

מיטן אייבערשטנ'ס הילף וועט איר באלד טרעפן אייער שידוך, אבער איך בעט אייך פאלגט מיר.

בעזרת ה' יתברך - יום ד' פרשת ויחי, ח' טבת, שנת תשפ"ה לפרט קטן

... תחי'

איך בעט נאכאמאל, סיי אייך און סיי אייערע חבר'טעס, מען זאל נישט רעדן קיין ניבול פה. איך הער אז מען רעדט ווייטער פון בחורים, מען רעדט ניבול פה; אויב מען וועט אזוי ווייטער ממשיך זיין - וועל איך פארמאכן ענקער קלאס, ענק וועלן מער גארנישט האבן מיט בית פיגא.

אויך איז די דרך ארץ זייער נישט גוט, ענק לאכן זיך אויס פון די געטרייע טיטשערס; עס טוט מיר זייער וויי.

בעזרת ה' יתברך - יום ג' פרשת ויגש, א' דראש חודש טבת, ו' דחנוכה, שנת תשפ"ה לפרט קטן

מרת ... תחי'

בנוגע לערנען מזלות מיט די מיידלעך; מען קען דאס לערנען מיט זיי, דאס איז אויך א חלק פון די תורה, אבער נאר נאכן לערנען וואס איז מער וויכטיג, ערשט דארף מען אוועקשטעלן הלכות וואס איז וויכטיג פאר פרויען צו וויסן; הלכות שבת, הלכות ברכות, הלכות יחוד וכדומה לזה. אויך ווי צו האלטן א כשר'ע קאך, בשר בחלב, און ווי אזוי מען איז בודק עסן פון ווערעם; דאס איז זייער זייער וויכטיג, ווייל נאר אז מען לערנט אלס מיידל הלכות קען מען פירן א כשר'ע קאך, און היטן שבת.

עס האבן מיר דערציילט אן א שיעור ווייבלעך אז זיי האבן געלערנט אין זייער סקול כל מיני טיפע לימודים, אבער פשוט'ע הלכות קענען זיי נישט, זיי זענען נעבעך מחלל שבת אן וויסן אז די זאכן טאר מען נישט טון.

דעריבער בעט איך אייך מען זאל אוועק שטעלן דאס לערנען הלכות פון די ערשטע און וויכטיגסטע.

דער אייבערשטער זאל העלפן איר זאלט האבן הצלחה אין אלע ענינים.

א פרייליכן חנוכה און א גוטן חודש.

בעזרת ה' יתברך - יום ג' פרשת ויגש, א' דראש חודש טבת, ו' דחנוכה, שנת תשפ"ה לפרט קטן

... תחי'

איך האב ערהאלטן אייער בריוו.

איך האב זייער הנאה צו הערן אז איר האט זייער הנאה געהאט פון די שבת התוועדות מיט בית פיגא תלמידות, ווי איר האט געזען מיידלעך וואס זענען פרייליך, מען לעבט אן קיין דרוק, מען לעבט נישט פאר א צווייטן.

דאס וואס איר שרייבט אז איר זענט טרויעריג אז איר דארפט צוריק גיין צו אייער סקול וואו אלעס איז פרעשור וכו' וכו', און ווען איר בעט פון אייערע טייערע עלטערן צו קומען צו בית פיגא, זאגן זיי: "עס איז נאכנישט די צייט", איר פרעגט וואס איר קענט טון.

תפילה איז די עצה, בעטס דעם אייבערשטן איר זאלט זיין צוגעבינדן צום רבי'ן, לעבן מיט די עצות פון רבי'ן, בעיקר מיט די עצה פון שמחה. דער רבי זאגט (לקוטי מוהר"ן חלק ב', סימן כד), עס איז זייער א גרויסע מצוה צו זיין שטענדיג פרייליך, ווי אזוי איז מען פרייליך? ווי אזוי קומט מען צו די גרויסע מדריגה? דורך זוכן דאס גוטס וואס דער אייבערשטער טוט שטענדיג און ארויסזאגן מיטן מויל: "שכוח אייבערשטער" אויף די חסדים.

מאכט זיך א קביעות יעדן טאג צו דאנקען און לויבן דעם אייבערשטן אין אייער שפראך, אין אידיש, זאגט: "שכוח אייבערשטער איך בין א איד, שכוח אייבערשטער איך בין געזונט, שכוח אייבערשטער פאר מיינע טייערע עלטערן, שכוח אייבערשטער איך קען זען, שכוח אייבערשטער איך ווייס פון די עצות פון רבי'ן", און אזוי ווייטער.

דאס דאנקען און לויבן דעם אייבערשטן טראגט ארויס אלע פרעשור, מען פליט אריין אין גן עדן, מען ווערט פרייליך, מען ווערט אין א גוטע מוט.

בעטס דעם אייבערשטן איר זאלט קענען לערנען אין רבינ'ס סקול, און בעטס שוין פאר אייערע דורות, אלע זאלן זיין ביים רבינ'ס מוסדות, אייערע דורות זאלן לערנען און דאווענען, און איר זאלט זיי נישט שטערן, עס זאל זיין די שענסטע זאך אז מען טראגט דעם רבינ'ס נאמען, עס זאל נישט זיין קיין בושה.

געבט א גרוס פאר אייערע טייערע עלטערן.

בעזרת ה' יתברך - יום ג' פרשת וישב, ט"ז כסליו, שנת תשפ"ה לפרט קטן

... תחי', תלמידה בית פיגא טברי'

איך האב ערהאלטן אייער בריוו.

איך פריי זיך זייער אז איר האט הנאה אין בית פיגא. הערט זיך גוט איין וואס אייערע לערערינס לערנען, נאך אביסל גייט איר ארויס פון סקול, איר גייט חתונה האבן, עס איז אזוי ווי מען פאלט אריין אין א רוישיגע וואסער, און נאר אויב מען האט זיך גוט געלערנט שווימען - קומט מען אן בשלום, אזוי איז די לעבן; די יארן וואס מען גייט אין שולע לערנט מען אויס שווימען, מען לערנט אויס ווי זיך צו ראטעווען אין לעבן; דורך רעדן צום אייבערשטן, דורך אמונה, דעם רבינ'ס עצות ראטעוועט דעם מענטש מען זאל זיך נישט דערטרענקען.

זאגט יעדן טאג תהילים, אפילו אביסל; ווייל ווער עס זאגט תהילים איז זוכה צו ווערן נאנט צום אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת וישב, ט"ז כסליו, שנת תשפ"ה לפרט קטן

לערערין ... תחי'

די עלטערן שרייבן מיר אז די קינדער קומען אהיים פון אייער כיתה אזוי פרייליך און אזוי ליכטיג.

וואויל איז אייך און וואויל איז אייער חלק אז איר געבט זיך אוועק פאר בית פיגא, איר לייגט אריין אייער הארץ און אייערע כוחות פאר אונזערע קינדער, זיי זאלן אויפוואקסן מיט א ריינע חינוך, א חינוך פון אמונה, א חינוך פון ליב האבן דעם אייבערשטן און ליב האבן די הייליגע תורה וועג, נישטא די ווערטער אראפצומאלן וואס פאר א שכר עס ווארט פאר לערערינס וואס לערנען בנאמנות, פארן אייבערשטנ'ס וועגן.

עס איז אנגעשריבן אנהויב יאר וויפיל עגמת נפש יעדער מענטש דארף אריבערגיין, ראש השנה שרייבט מען אפ פינקטליך וויפיל פלאג און מיה מען וועט האבן די יאר; ביי איינעם איז עס פלאג און מיה וואס בלייבט גארנישט דערפון, און ביי דער וואס איז זוכה - איז די פלאג אין מיה אין זאכן וואס בלייבט, סיי ביי די משפחות וואס ברענגען קינדער, דאס קאסט פלאג און מיה, און סיי ביי די וואס געבן זיך אוועק אויפצושטעלן מוסדות וכו'.

דער אייבערשטער זאל העלפן איר זאלט האבן הצלחה אין אלע ענינים.