בעזרת ה' יתברך - יום ג' פרשת שופטים, א' דראש חודש אלול, שנת תשפ"ד לפרט קטן
לכבוד ... נרו יאיר, מנהל תלמוד תורה היכל הקודש קרית ברסלב
ווען דו ביסט מיט די קינדער ביים עסן זאלסטו זיך אומקוקן אויב די קינדער עסן, און זיכער מאכן אז מען טרעט נישט אויף די קינדער. ווייל עס איז דא קינדער וואס זיי גלייכן נישט א געוויסע עסן, מאכן זיי חוזק פון די וואס עסן יא, עס ווערט א גאנצע רייץ ווער עס קען מער לאכן פון די עסן, דארף דער מנהל מיט די מלמדים זיין ביים עסן און זיכער מאכן אז קיינער זאל נישט ווערן געטשעפעט.
הויב אן דיין טאג מיט התבודדות, גיי נישט צו די ארבעט נאר נאכן זיך מתבודד זיין און זיך איבערגעבן אינגאנצן צום אייבערשטן. זיין א מנהל אדער א ראש ישיבה איז א גרויסע אחריות, ווייל דער רבי זאגט קלאר (לקוטי מוהר"ן חלק ב, סימן יח) אז זיין א מנהל און זיין א ראש ישיבה - איז א גרויסע סכנה, עיין שם. נאר אז מען געבט זיך איבער צום אייבערשטן, מען בעט זיך ביים אייבערשטן מען זאל נעמען די מלכות אויפצובויען נשמות ישראל, נאר דורך וויינען צום אייבערשטן עס זאל נישט ארויסקומען קיין שום שלעכטס.
דער אייבערשטער זאל העלפן זאלסט האבן הצלחה אין אלע ענינים.
א גוטן חודש און א גוט געבענטשט יאר.