בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן
לכבוד ... נרו יאיר
אשרינו מה טוב חלקינו, וואויל איז אונזער חלק אז מיר ווייסן פון הייליגן רבי'ן; וואו וואלטן מיר געווען, ווי וואלטן מיר אויסגעזען אנעם רבי'ן, ווי וואלטן מיר געקענט אנגיין אן די הייליגע עצות און התחזקות.
היינט איז מיין זיידע'ס יארצייט, הגאון הצדיק יחזקאל בן יצחק אייזיק זכרונו לברכה. מיין זיידע האט מיך גענומען קיין אומאן אלס בחור און געזאגט מיט מיר די תיקון הכללי מיט בכיות נוראות, מיין זיידע האט מיר אלץ מחזק געווען צו זאגן משניות אפילו אן פארשטיין, ער האט געהאט א שטארקע געפיל צום הייליגן רבי'ן.
טייערער ברודער, ווער נישט מיואש, געב נישט אויף, גיי אין א ווינקל און רעדט זיך אויס צום אייבערשטן אויף דיין אייגענע שפראך, וויין צו אים ער זאל רחמנות האבן אויף דיר און דיך מקרב זיין צו אים, דערצייל אים אלעס וואס דו גייסט אריבער, דערצייל אים בנוגע דיין שלום בית, דיינע נסיונות וכו' וכו' - וועסטו שפירן ווי דו ביסט באפרייט פון תפיסה, וועסט שפירן ווי דו טראגסט אפאר הונדערט פונט ווייניגער.
אויך זאלסטו געדענקען יעצט ווען מען גרייט זיך צום יום טוב פסח, די פרויען ארבעטן זייער שווער ארויסצוטראגן די חמץ - צו העלפן אין שטוב און געבן גוטע ווערטער, פיר זיך מיט יראת שמים פיר זיך ערליך.
דער אייבערשטער זאל העלפן זאלסט האבן הצלחה אין אלע ענינים.