בעזרת ה' יתברך - ערב שבת קודש פרשת מטות מסעי, כ"ו תמוז, מברכין החודש, שנת תשפ"ו לפרט קטן
לכבוד מיינע טייערע ליבע אנשי שלומינו, תלמידי היכל הקודש פון ארץ ישראל
איך בענק מיך זייער נאך ענק, איך בעט ענק זייער, זייט מיר דן לכף זכות אז עס קומט מיר נישט אויס צו ענטפערן אויף די אלע בריוון וואס איר שיקט מיר, און עס קומט מיר נישט אן צו ענטפערן די טעלעפאנען וואס איר רופט מיר.
זייט מיר דן לכף זכות; איך בין אזוי פארנומען, יעצט אין די זומער וואכן בין איך ארויסגעקומען אין שטעטל, און איך האב נישט קיין אפיס, און איך האב נישט מיין קאמפיוטער, און ניטאמאל דעם טעלעפאן האב איך צייט אויפצוהייבן און זען ווער עס רופט מיר.
איך בעט ענק זייער, טייערע חברים, שטארקט אייך מיט דעם רבינ'ס עצות. מיט די עצה פון התבודדות און תפילה. דער הייליגער רבי האט אונז געגעבן א וועג אז א מענטש קען רעדן צום אייבערשטן, מען דארף נישט קיין אפוינטמענט, מען דארף נישט קיין פראטעקציע, מען דארף נישט ווארטן צי מען וועט יא זען מיין אימעיל צי מען וועט נישט זען מיין אימעיל; צי מען וועט יא ליינען מיין בריוו, צי מען וועט נישט ליינען מיין בריוו; יעדער מענטש קען דירעקט און פערזענליך אנקומען צום מלך מלכי המלכים הקדוש ברוך הוא, און זיך פאר אים אויסגיסן דאס הארץ, און אים דערציילן אלעס וואס גייט אויף אים אריבער.
איך קום יעצט פון שפיטאל, איך בין געגאנגען באזוכן איינער פון אונזערע טייערע חברים; אוי, וויפיל דארף מען דאנקען דעם אייבערשטן אז מען איז געזונט און מען קען זיצן אין שטוב מיט די ווייב און קינדער, מען קען זיצן ביי די סעודות שבת און זיין פרייליך מיט די משפחה; וויפיל דארף מען דאנקען דעם אייבערשטן אז מען איז געזונט, מען קען וואקן, מען קען זיך באוועגן.
דער אייבערשטער זאל העלפן און מיר זאלן זוכה זיין צו ניצן די עצות פון רבי'ן, עס איז געווען א ברסלב'ער חסיד, רבי ישראל קארדונער זכרונו לברכה, ער האט געהאט א תלמיד ר' ישראל בער זכרונו לברכה וואס איז אלץ געווען צוגעלייגט, האט רבי ישראל קארדונער געזאגט: "די חילוק פון אונז איז, דו ווייסט דעם רבינ'ס עצות און איך ווייס דעם רבינ'ס עצות, אבער איך באניץ זיך מיטן רבינ'ס עצות"; אז מען ניצט דעם רבינ'ס עצות פון התבודדות און שמחה, קען מען זיך דערהאלטן און מען האט כח פאר אלעס.
א פרייליכן שבת!