בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן
לכבוד מיין טייערער ליבער הארציגער ... נרו יאיר
געב אכטונג אויף דיין שלום בית, געדענק צו געבן אסאך גוטע ווערטער אין שטוב. זיי נישט קיין טרוקענער, זיי נישט קיין קאלטער, זיי ווארעם צו דיין ווייב, דאס איז עבודת השם, דאס איז א מצוה ווי אלע מצוות; מען דארף געדענקען צו געבן גוטע ווערטער, זאגן ליבשאפט ווערטער, ווי שטארק מען האט ליב און ווי שיין זי איז; דאס איז א מצות עשה דאורייתא.
אינטערעסאנט, פסח זוכט מען צו וויסן אויב די מצה האט א כזית, און אויב די כוס האט א רביעית, און ביי שלום בית - דארט זוכט מען נישט יוצא צו זיין אלע שיעורים, מען פטר'ט זיך אז מען האט שוין אמאל געזאגט א גוט ווארט. אזוי ווי די ווייטאגליכע ווערטל גייט, אן עלטערע אידענע ביי די ניינציג יאר האט געפרעגט איר מאן היתכן ער זאגט איר נישט קיין גוטע ווערטער, ער זאגט איר נישט ער האט איר ליב, זי ווארט שוין צענדליגער יארן צו הערן עפעס א גוט ווארט, האט ער איר געענטפערט מיט א פראגע: "איך זאג דיר נישט? איך האב דיר געזאגט אין יחוד שטיבל אז איך האב דיך ליב, אויב וואלט זיך עס געטוישט וואלט איך דיר געזאגט".
זיי נישט קיין קאלטער טרוקענער, זיי ווארעם און געב גוטע ווערטער; וועט די שכינה הקדושה רוען ביי דיר און עס וועט זיין פרנסה בשפע.
דער אייבערשטער זאל העלפן זאלסט האבן הצלחה אין אלע ענינים.