בעזרת ה' יתברך - יום ד' פרשת חקת, ד' תמוז, שנת תשפ"ד לפרט קטן
לכבוד מיין טייערער ... נרו יאיר, רחוב ירושלים קרית ברסלב ליבערטי
איך וויל דיר בעטן דו זאלסט אכטונג געבן ווען דו פארסט אריין מיט דיין קאר אויף די גאס ירושלים – נישט צו פארן שנעל; עס איז א גרויסע סכנה, עס איז פול מיט קינדער און מאמעס, עס איז א גרויסע סכנה צו פארן שנעל. אזוי אויך בעט איך דיר, אויב דו זעסט א צווייטער וואס פארט שנעל – זאלסטו יענעם בעטן צו אכטונג געבן, עס זאל נישט פאסירן קיין אומגליק חס ושלום.
איך ציטער עס זאל גארנישט שלעכטס פאסירן ביי ענקער גאס ווען אזויפיל קינדער שפילן זיך מיט בייקס, סקוטערס וכו' און קארס קומען אריין מיט א שנעלקייט, דער אייבערשטער זאל ענק היטן.
אויך זאלסטו קומען דאווענען די דריי תפילות, שחרית מנחה מעריב – מיט מנין, מיט דרך ארץ. קום אנגעטון מיט א הוט און רעקל, אזוי ווי מען גייט צו א חשוב'ער מענטש, אזוי ווי מען גייט להבדיל צו א פאלעטישן שתדל'ען וכו'.