בעזרת ה' יתברך - יום ד' פרשת וזאת הברכה א', צווייטע אות פון שם הוי"ה, י"ב תשרי, שנת תשפ"ז לפרט קטן
... נרו יאיר
עס איז נישט ריכטיג צו גיין אין די פרייטאג כולל וואס דיין טאטע מאכט, און צוליב דעם אהיים קומען ממש ביים זמן, דיין טאטע מאכט דאס פאר זיין געגנט אין קרית יואל, אבער אז דו דארפסט נאך פארן ביזן שטעטל – איז דאס נישט ריכטיג, און אז דיין טאטע וועט האבן צער אז דו קומסט נישט אין זיין כולל – זאלסטו אים ווייזן דעם בריוו, אז דער ראש ישיבה זאגט מען קען נישט אנקומען אהיים ערב שבת די לעצטע מינוט.
זארג נישט פאר פרנסה; דו פלעגסט באקומען אין די ערב שבת כולל הונדערט דאלער א וואך, יעצט ווען דו וועסט זיין אין שטוב אין צייט העלפן אנגרייטן דעם שבת – וועסטו באקומען אסאך מער געלט. די אלע אינגעלייט וואס ארבעטן פרייטאג און קומען אהיים די לעצטע מינוט; זיי מיינען אז זיי מאכן געלט, באמת מאכן זיי נישט קיין געלט, ווייל ערב שבת נאך חצות קען מען גארנישט פארדינען, נאר אין דמיון פארדינט מען; אזוי ווי קליינע קינדער וואס שפילן 'קויפן און פארקויפן', און אפילו מען פארדינט האט מען נישט קיין ברכה אין די געלט.
ערב שבת, פון חצות – איז דא נאר איין זאך צו טון: זיין אין שטוב אנגרייטן דעם שבת, און אז מ'קען זיך אביסל אראפלייגן און אביסל לערנען און אפווארטן דעם שבת.
וואויל איז דעם וואס ווארט אפ שבת, וועט ער האבן נחלה בלי מצרים (שבת קיח.).