בעזרת ה' יתברך - יום ג' פרשת תזריע, ראש חודש ניסן, שנת תשפ"ד לפרט קטן
לכבוד מיין טייערער ליבער ... נרו יאיר
פסח איז א צייט פון חינוך הילדים, אלעס פונעם ליל הסדר דרייט זיך ארום די קינדער, פסח איז א צייט וואס דער טאטע רעדט צו די קינדער פון אמונה.
עס שטייט פון צדיקים, ווי אזוי מען פראוועט דעם ליל הסדר – אזוי וועט זיין די גאנצע יאר, וויל איך דיר זייער בעטן דו זאלסט טוישן דיין מהלך המחשבה; ביז אהער טראכסטו אז דיינע געשעפטן זענען דאס וויכטיגסטע און די קינדער מאכן נערוועז, יעצט זאלסטו מאכן פארקערט, די קינדער זאלן זיין דאס וויכטיגסטע און זאלסט ווערן נערוועז פון דארפן גיין ארבעטן, זאלסט זיך פרייען ווען עס ווערט פינף אזייגער אז דו ביסט באפרייט פון די צייטווייליגע שטותים און דו קענסט אהיימגיין צו חיים נצחיים, אויפשטעלן דורות נאמנים לה' ולתורתו.
טייערער ברודער, דיינע קינדער, דיינע דורות – זאלן דיר זיין דאס חשוב'סטע זאך, ביסט שוין גענוג נאכגעלאפן די בהמות (עיין ספורי מעשיות, מעשה יא), יעצט פסח זאלסטו ווערן באפרייט און אנהויבן לעבן א זיסע ערליכע לעבן, מחנך זיין די קינדער צו תורה און צו מעשים טובים.
א פרייליכן כשר'ן יום טוב.