תוכן השאלה
לכבוד דער ראש ישיבה שליט"א,
איך האב געליינט א בריוו אין עצתו אמונה, וואס דער ראש ישיבה שליט"א שרייבט אז איינער האט אים זייער וויי געטון און נאכאלץ האט דער ראש ישיבה שליט"א איבערגעבעטן יענעם מענטש. דער ראש ישיבה שליט"א שרייבט דארט, "דעם פארגאנגענעם ערב שבת האב איך איבערגעבעטן איינעם וואס יענער האט מיר זייער וויי געטון, איך האב אפילו געוויינט ווען יענער האט מיך געטשעפעט און וויי געטון; דאך האב איך זיך מתבודד געווען און געטראכט 'יענער האלט אז איך האב אים וויי געטון און איך האלט אז יענער האט מיך וויי געטון, איז ווי קען מען זיך איבערבעטן?' איך האב געבעטן דעם אייבערשטן, זיך געשטארקט און יענעם איבערגעבעטן, און עס איז געווארן שלום ושלוה."
און דער ראש ישיבה שליט"א שרייבט דארט ווייטער, "איך שרייב דיר דאס ווייל איך ווייס דו האסט אויך אזעלכע מעשיות, דו ביסט פארשעמט געווארן און דו ווארסט יענער זאל דיך איבערבעטן; פארשטיי אז יענער האט אויך טענות, סברות און ראיות אז דו האסט אים וויי געטון, זיי זיך מתבודד און בעט איבער די וואס האבן דיך וויי געטון, אבי עס זאל זיין שלום. התבודדות קלארט אויס די מעשה, אן התבודדות קען מען זיך גוט אפנארן."
איך וויל וויסן אויב איך דארף איבערבעטן די מנהלת פון מיין אלטע סקול, אפאר חדשים אין א צי האט זי יעדן איינציגסטן טאג געשיקט די סעקרעטערי און אין פארנט פון די גאנצע קלאס מיך אהיימגעשיקט צוליב א פערזענליכע קריגעריי וואס זי האט געהאט מיט מיינע עלטערן וועגן געלט וואס זי האט געהאלטן אז איך דארף ברענגען. דארף איך איר איבערבעטן?
יישר כח
תשובה מאת הראש ישיבה שליט"א:
יום ג' פרשת דברים, ב' מנחם-אב, שנת תשפ"ד לפרט קטן
מרת ... תחי'
איך האב ערהאלטן אייער בריוו.
איר דארפט איבערבעטן? אייער מנהלת האט פארגאסן אייער בלוט טאג נאך טאג, דארפט איר איבערבעטן? איר דארפט איר נישט איבערבעטן, זי דארף אייך איבערבעטן פארן אייך פארשעמען און פארן אייך אהיים שיקן וכו'.
איינער וואס פארשעמט קינדער, און זיכער אויב איינער טוט פארשעמען קינדער וועגן חשבונות מיט די עלטערן וכו' - אזא איינער טאר נישט ארבעטן מיט קינדער, אזא איינער איז עתיד ליתן את הדין; ווייל אז מען פארשעמט קינדער - ווערן זיי צעקלאפט פאר זייער גאנץ לעבן.
יעצט, וואס איז נוגע פאר אייך; צעברעכט זיך נישט, בעטס דעם אייבערשטן די ווייטאג זאל ארויסגיין, איר זאלט זיין פרייליך, און איר זאלט קענען פארגעבן אלע וואס האבן אייך וויי געטון אין אייערע יונגע יארן.
איר קענט נאך יעצט זיך אויסבעטן ביים אייבערשטן ער זאל אייך שיקן א ישועה בזכות די בזיונות; ווער עס האט א בזיון און שווייגט אפ, מען ענטפערט נישט - קען פועל'ן ישועות, און אפילו שפעטער ווען מען דערמאנט זיך פון אמאליגע בושות און מען ווערט נאכאמאל פארווייטאגט - קען מען זיך גוט אויסבעטן ביים אייבערשטן.
דער אייבערשטער זאל העלפן איר זאלט האבן הצלחה אין אלע ענינים.