בעזרת ה' יתברך
יום ב' פרשת לך לך, ה' מרחשון, שנת תשפ"ב לפרט קטן
לכבוד מיין טייערער ... נרו יאיר, קרית ברסלב
איך וויל דיר מחזק זיין זאלסט דאווענען די דריי תפילות שחרית, מנחה און ערבית אין צייט מיט מנין.
וויסן זאלסטו, די דריי תפילות דאס איז וואס האלט א איד אין מחנה ישראל, מען דארף זייער נזהר זיין אין די דריי תפילות, דאס היט דעם מענטש פון אלעם שלעכטס (לקוטי מוהר"ן חלק ב', סימן ח); בפרט אז דו וואוינסט אין שטעטל, אויב מען שטייט נישט אויף אין צייט קען אויסקומען מען זאל נישט הערן ברכו, קדושה און קדיש א גאנץ יאר; איז שוין כדאי צוריק צו קומען אין שטאט ווי איידער צו האבן אזא סארט לעבן.
מוהרא"ש זאגט, דאווענען מיט מנין איז מסוגל פאר פרנסה; קען זיין פשט, אז מען שטייט אויף פרי, מען דאווענט - וועט מען האבן פרנסה, און אז מען שלאפט אריין אין טאג אריין - ווי קען מען האבן פרנסה? אויך שלום בית, אז די ווייב זעט דעם מאן שלאפן ביז'ן טאג אריין, נו וואס קען מען ערווארטן...
הלוואי זאלסטו אננעמען די ווערטער, זאלסט זיך באנייען, גיין דאווענען בזמן ובמנין.