בעזרת ה' יתברך
יום ה' פרשת וישב, כ"א כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
מיר זענען זייער צופרידן פון דיין מלמדות, די קינדער קענען זייער גוט די לימודים. זיי ווילן גיין אין חדר, זיי גייען מיט א שמחה; עס איז דא ביי דיר אין כתה א געשמאקע לופט, א פרייליכע לופט.
מלמדות איז א חכמה ואינה מלאכה; פון איין זייט דארף זיין א שטארקע דרך ארץ, א ווארט פון א מלמד דארף זיין א ווארט, מען מוז פאלגן, מען מוז זיין מיט דרך ארץ. פון די אנדערע זייט טאר אבער נישט זיין קיין שרעק, עס דארף זיין איינגענעם; נאר אזוי קענען די קינדער אויפכאפן די לימודים.
רעד צו די קינדער פון קדושה, רעד צו זיי קלאר וואס מען טאר נישט טון; קליינע קינדער קען מען נישט זאגן "אות ברית קודש", זיי ווייסן נישט וואס מען רעדט, מען דארף רעדן צו זיי קלארע ווערטער לויט זייער פארשטאנד.
יעצט קומט חנוכה, זאלסטו זיצן ביי די הייליגע ליכט און דאנקען דעם אייבערשטן אויף די גרויסע ניסים וואס ער טוט מיט דיר.
איך האב דיר זייער ליב.