בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן
לכבוד ... נרו יאיר, קרית ברסלב
איך הער דיין געוויין אז דיין ווייב וויל זיך קויפן א נישט כשר'ע טעלעפאן; איך פארשטיי נישט פארוואס דו ביסט אזוי דערשראקן און פארוויינט ווען דו אליין דרייסט זיך ארום טאג און נאכט מיט די נישט כשר'ע טעלעפאן; פארוואס דו יא און זי נישט? זי זאגט פארקערט, איך יא און דו נישט.
אמאל האסטו מיר געפרעגט אז דו דארפסט האבן אין די אפיס א טעלעפאן פאר ביזנעס, האבן מיר גערעדט אז דו וועסט לאזן די טעלעפאן אין אפיס און דאס וועט זיין נאר פאר געשעפטן, קען עס אזוי זיין; למעשה ביסטו אין שול פארנומען מיטן טעלעפאן, און וואו דו גייסט און וואו דו שטייסט ביסטו אויפן טעלעפאן, און יעצט אז דיין ווייב וויל זיך אויך שפילן מיט א טעלעפאן און קענען אוועק לויפן פון די מציאות וואס הייסט 'לעבן' - ווערסטו דערשראקן...
גיי התבודדות, בעט דעם אייבערשטן: "רבונו של עולם, וואס וועט זיין מיט מיר, איך בין אזוי איינגעטונקען אין נארישקייטן, א האלבע טאג אדער מער גייט מיר אוועק מיט די טעלעפאן, מיט נייעס און סתם שטותים, הייליגער באשעפער, אין די צייט וואלט איך געקענט לערנען און דאווענען, אין די צייט וואלט איך געקענט גיין הפצה, צוריק ברענגען מענטשן צו דיר.
רבונו של עולם, העלף מיר איך זאל פאלגן די הייליגע צדיקים וואס האבן געוויינט אויף די כלים וואס פארדארבן די היינטיגע וועלט און זיך געבעטן ביי אונז נישט צו האבן די זאכן, העלף מיר איך זאל זיך קענען אפטשעפען פון די זאכן, און נאר זיין פארנומען מיט דיך דינען".
גיי התבודדות, בעט דעם אייבערשטן דו זאלסט וויסן וואס איז אפיס, וואס איז ביזנעס און וואס איז שול, ווי אזוי מען פירט זיך אין שול; עס איז דאך אזוי נישט אויסגעהאלטן צו קומען אין שול מיט די טעלעפאן און קוקן נייעס, קוקן שטותים. גיי התבודדות, בעט דעם אייבערשטן זאלסט זוכה זיין צו ישוב הדעת, וויסן ווי צו צעטיילן די ביזנעס און די שטוב.
דער אייבערשטער זאל העלפן זאלסט האבן הצלחה אין אלע ענינים.