בעזרת ה' יתברך - יום ד' פרשת נח, ג' מר-חשון, שנת תשפ"ד לפרט קטן
לכבוד ... נרו יאיר, קרית ברסלב
איך האב ערהאלטן דיין בריוו.
עס איז זייער א גרויסע מצוה אריין צו נעמען א קינד, אויפציען א קינד - וואס האט נישט קיין משפחה, אבער דאס זאלן טון משפחות וואס האבן נישט קיין קינדער, דו האסט א געבענטשע משפחה מיט קינדער - זאלסטו אויפציען דיינע אייגענע קינדער און זיין פאר זיי געטריי.
בנוגע געלט וכו'; וויסן זאלסטו, דורך אויפציען אייגענע קינדער באקומט מען זייער אסאך געלט, מען באקומט מער געלט ווי ווען מען נעמט אריין א פרעמדע קינד; מען באקומט שכר פונעם אייבערשטן, און אז מען רעדט שיין אין שטוב צו די ווייב, מען איז מכבד די ווייב - האט מען גרויס שפע.
איך מאך נישט אוועק די מצוה, עס איז זייער א גרויסע מצוה, אבער דאס זאלן טון די וואס ווארטן אז דער אייבערשטער זאל זיי געבן קינדער; דאס איז א גרויסע זכות נפקד צו ווערן מיט קינדער.
ברענג דיין זון אינדערפרי אין שול, ברענג אים צום מקוה, שטעל אויס דיין סדר היום אלעס פאר די טובה פון דיינע קינדער; חינוך פון דיינע קינדער זאל זיין ביי דיר דאס הייליגסטע, אפילו מען דארף אויסדרייען די גאנצע טאג.
א בלאט גמרא זאל זיין ביי דיר הייליג אזוי ווי לייגן תפילין.
דער אייבערשטער זאל העלפן זאלסט האבן הצלחה אין אלע ענינים.