בריוון פונעם ראש ישיבה שליט"א

בעזרת ה' יתברך - יום ד' פרשת ויקהל, כ"ו אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

שטארק זיך אין דיין עבודת השם, נוץ אויס דיינע יונגע יארן צו לערנען און דאווענען, די יונגע יארן – אז מען נוצט אויס אויף תורה און עבודת השם – קען מען זוכה זיין אסאך מער ווי אויף דער עלטער, איין טאג אלס אינגערמאן איז ווי א גאנצע יאר אויף דער עלטער.

אויך זאלסטו מאכן צייט יעדן אויף דער נאכט צו שמועסן מיט דיין ווייב, דו האסט זוכה געווען צו אן אשת חיל, זי איז פול מיט געטליכקייט, זי איז נישט פארנומען מיט נארישקייטן, איר קאפ איז ביים אייבערשטן, זי וויל אבער אביסל חיזוק פון דיר, און אויפמערקזאמקייט. גרייט זיך אן עפעס וואס צו שמועסן, דערצייל איר דיין סדר היום, ווי דיין טאג איז געווען.

מוהרא"ש האט מיר כמה פעמים געזאגט, עס טוט אים וויי אז ער האט נאך די חתונה נישט געוואוסט ווי וויכטיג עס איז צו שמועסן אביסל מיט די ווייב, נאך די חתונה האט ער זייער פלייסיג געלערנט, און ווען זיין ווייב האט אים עפעס געפרעגט, האט ער געענטפערט: "נא נא", אזוי ווי מען ענטפערט אינמיטן דאווענען וואו מען קען נישט אויסרעדן, מען ווייזט מיטן פינגער אויפן מויל און מען ברומט "נא נא"; מוהרא"ש האט געזאגט: "וואלט איך געהאט די ספרים אשר בנחל – וואלט איך געוואוסט פון התמדה, און אז די ווייב קומט שמועסן – שמועסט מען, אזוי קען מען נאכדעם נאך מער לערנען, אזוי ווי חכמינו זכרונם לברכה זאגן (מנחות צט.): 'בטולה של תורה, זהו קיומה'".

איך האב זוכה געווען אסאך יארן צו משמש זיין מיין גרויסע זיידע זכותו יגן עלינו אין מירון, זיין התמדה איז דאך געווען אין לשער, ער האט נישט מבטל געווען קיין רגע פון לערנען, ער האט זיך נישט אריינגעלייגט אין בעט, ער האט נאר אביסל געדרימלט אויפן בענקל, ער איז געזיצן שעות און געלערנט די הייליגע תורה, דאך האט ער יעדן טאג געמאכט צייט צו רעדן מיט מיין באבע עליה השלום, דעמאלט איז נאכנישט געווען סעלפאונס, אויך אין אונזער דירה אין מירון איז נישט געווען קיין טעלעפאן, זענען מיר געגאנגען צום טעלעפאן; אינדרויסן פון די מערה איז געווען א טעלעפאן, א פאבליק טעלעפאן, מען האט אריינגעלייגט געלט און גערופן קיין אמעריקע, און מיין זיידע האט געפרעגט מיין באבע וואס זי מאכט, און ער האט אלץ געהאט עפעס צו דערציילן, פון די וועטער און דאס גלייכן, און פון דארט איז ער צוריק געגאנגען לערנען.

מיט חברים איז א שאד צו רעדן, אבער מיט די ווייב – דארף מען רעדן, בפרט מיט א ווייב וואס איז דיר אזוי געטריי און וויל נאר רוחניות, דארפסטו זיכער רעדן.

בעזרת ה' יתברך - יום ד' פרשת ויקהל, כ"ו אדר א', שנת תשפ"ד לפרט קטן

מרת ... תחי', קרית ברסלב

דאנקט און לויבט דעם אייבערשטן אז איר האט א מאן וואס לערנט אזוי פלייסיג די הייליגע תורה און דינט דעם אייבערשטן; נישטא גליקליכערס פון דעם, גליקליך איז די פרוי וואס איר מאן לערנט בהתמדה.

איך וועל מחזק זיין אייער מאן נרו יאיר ער זאל מאכן צייט צו שמועסן מיט אייך, ער איז אזוי אריינגעטון אין לערנען, ער כאפט נישט די זאך פון שמועסן, אז דאס מיינט אסאך פאר די ווייב, איך וועל אים מחזק זיין אין דעם פרט.

נאכאמאל, מיט די זאך וואס שטערט אייך, אז ענק שמועסן ווייניג ווייל ער לערנט און לערנט; זאלט איר געדענקען אז גארנישט אין די וועלט איז בעסער פון זוכה זיין צו א מאן וואס לערנט די הייליגע תורה און דינט דעם אייבערשטן.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

א גרויסן יישר כח פארן געבן צדקה, פארן העלפן צאלן רענט פאר די ישיבה און פאר אונזערע שולן, בזכות די גרויסע מצוה זאלסטו זוכה זיין צו אלע ברכות.

שטארק זיך מיט דיין עבודת השם, גיי יעדן טאג התבודדות, עס לוינט זיך אנצוהויבן דעם טאג מיט התבודדות, גארנישט טון איידער מען גייט התבודדות. הויב אן מיט פינף מינוט, און נאכדעם זאלסטו צולייגן נאך פינף מינוט און נאך פינף מינוט. גיי אין א שטילע פלאץ, לכתחילה אין פעלד, (אין שטעטל קען מען גרינג מקיים זיין דאס מאכן התבודדות אין פעלד, אלע וואוינען אין פעלדער, אלע שטיבער זענען צווישן פעלדער), שמועס זיך אויס דיין הארץ מיטן אייבערשטן, בעט אים ער זאל דיך מקרב זיין צו אים, דו זאלסט זוכה זיין צו פארברענגען דיין לעבן מיט תכלית, מיט תורה, תפילה, דביקות בה', בעט אים זאלסט זיך נישט לאזן נארן, די וועלט נארט. דער רבי זאגט (שיחות הר"ן, סימן נא): "אֶת זֶה תְּקַבְּלוּ מִמֶּנוּ", דאס זאלט איר מקבל זיין פון מיר, "שֶׁלא יַטְעֶה אֶתְכֶם הָעוֹלָם", די וועלט זאל דיך נישט לאזן נארן; נאר תורה און תפילה איז תכלית, נאר דאס בלייבט, נאר דאס נעמט מען מיט אויף אייביג.

די גאנצע טאג, די גאנצע לעבן – איז אנדערש אז מען איז זיך מתבודד.

בעזרת ה' יתברך - יום ב' פרשת ויקהל, כ"ד אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

נאר מיט שחרית מנחה מעריב קען מען האבן עשירות, אן דאווענען די דריי תפילות האט מען גארנישט; חלום נישט פון מצליח זיין אן די דריי תפילות.

זיי שטארק ווי א לייב, ווען עס קומט צו דאווענען – לאז אלעס אפ, לאז אלעס קראכן, שטופ נישט אפ דאס דאווענען פאר גארנישט. נעם אריין דעם אייבערשטן אין דיין ביזנעס, שחרית מנחה מעריב זאל זיין א חלק פון דיין ביזנעס, פון דיין לעבן; וועסטו זייער מצליח זיין.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית יואל

דו שמועסט דאך יא מיט מענטשן, קענסטו זיין פרעגן: "וואס?"

דאס האט דער רבי געזאגט פאר רבי נתן (שיחות הר"ן, סימן רפו), מען וואלט ווען געדארפט פרעגן מענטשן וואס טראכטן נישט פון תכלית: "וואס?" וואס האט מען פון נאכלויפן די וועלט? וואס וועט בלייבן פון אלע נארישקייטן? וואס וועסטו ענטפערן אויבן ווען מען וועט דיר פארהאלטן: פארוואס האסטו נישט געלערנט? פארוואס האסטו נישט כאטשיג איינמאל געענדיגט די תורה?

טייערער ברודער, מאך זיך א שיעור אין רבינ'ס ספרים, בפרט אין ספר הקדוש אשר בנחל, וואס איז בעצם די ספרים פון רבי'ן, עצות פון רבי'ן, שכל פון רבי'ן, חיזוק צוריק צו קומען צום אייבערשטן; אז מען לערנט דעם רבינ'ס ספרים – וועקט מען זיך אויף פון שלאף, מען הויבט אן בענקען צום אייבערשטן.

זיי עוסק אין הפצה, פארשפרייט פאר אלע דיינע חברים די ספרים פון רבי'ן, דו קומסט פון א גוט פלאץ, חסידי סאטמער זענען זייער טייער און מיט די עצות פון רבי'ן קען יעדער אנקומען צו הויכע מדריגות.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך פריי זיך זייער צו הערן שיינע גריסן אויף דיר, אז דו לערנסט, ביסט קובע עתים לתורה און דו דאווענסט די דריי תפילות מיט מנין; מער פון דעם דארף מען נישט, דאס איז דער עיקר פון א איד, אזוי ווי דער הייליגער רבי האט געזאגט (שיחות הר"ן, סימן רפז): "מען דארף נישט מער טון, נאר דאווענען, לערנען און דאווענען.

איך בעט דיר זייער זאלסטט אויסלויבן דיין ווייב מיט איר איידלקייט און מיט איר איידעלע וועג ווי זי גייט אנגעטון. איך ווייס די בלוט קאכט דיר, איך ווייס דו האלסט עס פעלט נישט אויס, ביז דערווייל איז דאס נישט אינטערעסאנט און חשוב, דאך בעט איך דיר, שלעפ נישט אראפ איר צניעות, מאך איר נישט אויסטון איר שיינע איידעלע וועג ווי זי גייט אנגעטון. וועסט זען נאך א שטיק צייט אז איידלקייט איז נאר א מעלה, איידלקייט העלפט האבן א זיסע לעבן. איך קען נישט אלעס שרייבן, איך האף דו וועסט מיר גלייבן וואס איך זאג דיר, געלויבט דעם אייבערשטן איך האב דיך נישט פארפירט ביז אהער; נישט דיר און נישט קיינעם. מוהרא"ש האט מיר כמה פעמים געזאגט: "קענסט זיך בארימען האסט קיינעם נישט אפגענארט, אפילו די תלמידים וואס גייען אוועק פון דיר – האסטו נישט אפגענארט, אויב עפעס האסטו זיי מזכה געווען מיט לכל הפחות איין מאל ששה סדרי משנה וכו'", און איך וועל דיר ווייטער נישט פארפירן.

בעט איך דיר זייער זאלסט אויסרימען דיין ווייב מיט איר איידלקייט, און אז די בלוט קאכט – זאלסטו לערנען גמרא מיט משניות און גיין התבודדות.

די וואס מיינען אז די ווייב וועט גיין קורצער, שמאלער, אויסגעשניטן - דאס פעלט זיי, און נאכדעם וועלן זיי זיך בארואיגן – די האבן א טעות; עס העלפט נישט, עס בארואיגט זיך נישט, עס מאכט נישט זאט, איין זיך מאכט זאט – תורה און נאכאמאל תורה.

איך האב דיך זייער ליב, איך וויל נאר דיין גוטס, איך וויל זאלסט מיר שרייבן אז מיר זאלן בלייבן נאנט.

בעזרת ה' יתברך

ערב שבת קודש פרשת ויקרא, שבת זכור, י"ב אדר ב', שנת תשפ"ד לפרט קטן

לכבוד מיינע טייערע חברים פון ארץ ישראל, ה' עליהם יחיו

איך בענק זיך זייער צו ענק, איך וויל זיך שוין טרעפן מיט יעדן איינעם פון ענק, בפרט מיט די תלמידים; סיי די בחורים אין ישיבה, און מיט די תלמידים פון חדר; איך באקום גוטע גריסן אויף די בחורים און אויף די קינדער, איך האלט מיט פון דערווייטנס אלעס, איך האב גרויס נחת.

איך וויל ענק שרייבן אפאר ווערטער וואס מיר האבן גערעדט דעם ליל שישי, מיר האבן גערעדט אז מיר דארפן זיך זייער פרייען אז די וואך זענען מיר זוכה, מיר זענען מקיים די מצוה פון אויסמעקן עמלק. חכמינו זכרונם לברכה זאגן (תנחומא תצא, ד): "אָמְרוּ יִשְׂרָאֵל", אידישע קינדער זאגן פארן אייבערשטן, "רִבּוֹנוֹ שֶׁל עוֹלָם, אֵין אָנוּ יְכוֹלִין בּוֹ", הייליגער באשעפער דו זאגסט אונז מיר זאלן אויסמעקן עמלק, מיר קענען נישט, "אוֹמֵר לָהֶם הַקָּדוֹשׁ בָּרוּךְ הוּא, תִּהְיוּ אַתֶּם מַזְכִּירִין שְׁמוֹ מִלְּמַטָּה, וַאֲנִי מוֹחֵק שְׁמוֹ מִלְמַעְלָה", זאגט דער אייבערשטער, ענק זאלן ליינען די פרשה פון די מצוה פון אויסמעקן עמלק און איך וועל שוין טון דאס איבריגע, איך וועל אים אויסמעקן.

דאס איז מורא'דיגע חיזוק פאר אונז, ווען מיר זעען ווי שטארק די נסיונות זענען, מען שפירט ווי מען קען נישט באזיגן דעם יצר הרע און מען שרייט: "אֵין אָנוּ יְכוֹלִין בּוֹ", באשעפער איך קען נישט באזיגן דעם יצר הרע, דעם עמלק; דארף מען זיך מחזק זיין, דער אייבערשטער זאגט: "תִּהְיוּ אַתֶּם מַזְכִּירִין שְׁמוֹ מִלְּמַטָּה", דו בעט און בעט, דו שריי און שריי, "וַאֲנִי מוֹחֵק שְׁמוֹ מִלְמַעְלָה", און איך וועל דיר העלפן; דער אייבערשטער וויל נאר מיר זאלן רעדן צו אים, מיר זאלן אים בעטן.

אויך האבן מיר גערעדט אז עס קומט א הייליגע טאג, דער יום טוב פורים, מען זעט עפעס גרויסע זאכן טוט זיך פורים, אפילו מענטשן וואס א גאנץ יאר טאנצן זיי נישט און זענען נישט פרייליך, ווען עס קומט פורים - טאנצן אלע; אלע שמייכלען, אלע זינגען, אלע רעדן פון באשעפער, עס איז זייער א הייליגע טאג, אלעס קען מען פועל'ן מיט טאנצן און מיט שמחה, דער אייבערשטער זאל העלפן יעדער זאל פועל'ן אלעס וואס ער דארף; מיט שמחה, מיט פאטשן און טאנצן - קען מען אלעס פועל'ן.

איך וויל דיר בעטן איין זאך, געב אכטונג אויף דיין שלום בית, רעד מיט דרך ארץ אין שטוב, רעד שיין, ווייך און איידל. אויף שלום בית זאלט איר דאס מערסטע אכטונג געבן, ווייל נאר אזוי קען מען האבן א ריינעם מח, קדושת מרדכי ואסתר. מוהרא"ש האט אונז אויסגעלערנט אז מען קען דינען דעם אייבערשטן אין שטוב, מיט א ווייב, מיט קינדער. מוהרא"ש האט אונז אויסגעלערנט נישט האבן צוטון מיט די ווילדע מעשיות פון איבערלאזן די ווייב אליין אין שטוב, זיין אינדרויסן פון שטוב ביינאכט; דינט דעם אייבערשטן אין שטוב מיט די ווייב און קינדער.

נאך איין זאך, האטס ענק ליב, זוכט ליבשאפט, גייט שרייען צום אייבערשטן: "'כִּי נִמְכַּרְנוּ אֲנִי וְעַמִּי לְהַשְׁמִיד לַהֲרוֹג וּלְאַבֵּד' (אסתר ז, ד), הייליגער באשעפער המן וויל מיך הרג'ענען, הייליגער באשעפער איך בין אזא רחמנות, איך בין פארנומען מיט דעם, מיט יענעם, ווען איך אליין בין נאך אזוי ווייט! הייליגער באשעפער וואס וועט דא זיין מיט מיר? ווען וועל איך שוין זוכה זיין צו געדענקען אז איך בין דא א גאסט און נאך אביסל וועט מען מיך אוועק לייגן אין א ווינקל אין פעלד און עס וועלן וואקסן גראז אויף מיר, איז וואס בין איך פארנומען מיט דעם, מיט יענעם?" אזוי זאלט איר שרייען צום אייבערשטן טאג נאך טאג, און אזוי וועלן מיר זיך נישט דארפן שעמען.

די הייליגע מגילה, די זיסע מגילה, די ווערטער וואס אסתר בעט דעם קעניג - די ווערטער דארפן מיר בעטן דעם אייבערשטן (אסתר ח, ג): "'לְהַעֲבִיר אֶת רָעַת הָמָן הָאֲגָגִי, וְאֵת מַחֲשַׁבְתּוֹ', ווי קען מען אוועק נעמען די שלעכטע מחשבות, העלף מיר באשעפער, ראטעווע מיך פון עבירות".

אז מיר וועלן פאלגן דעם רבי'ן, מיר וועלן יעדן טאג גיין התבודדות, זיך אויסשמועסן מיטן אייבערשטן, אים בעטן ער זאל אונז מקרב זיין צו אים - וועלן מיר זוכה זיין צו קומען צו גאר שיינע זאכן בזה ובבא.

א פרייליכן שבת און א פרייליכן פורים.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך הער זאגן אז דו גייסט אריבער שווערע דחקות ועניות, דו האסט נישט קיין געלט, האסט נישט קיין הייצונג, דו זיצט מיט דיין משפחה אין די ביטערע פרעסטן, האסט נישט גארנישט.

ליבער ברודער, איך וויל דיר בעטן צוויי זאכן, ערשטנ'ס אז דו ביסט אין אזא מצב – זאלסטו גיין נאך געלט, על פי הלכה מעג מען נעמען צדקה אויב מען האט נישט. גיי ביים דאווענען צווישן די מנינים, בעט ביי אנשי שלומינו צדקה, זאג פארוואס דו גייסט, פארוואס דו נעמסט צאם; פאר הייצונג, פאר דיין משפחה, דיין בעבי זאל נישט פארפרוירן ווערן. צווייטנ'ס, גיי צווישן די גראז, גיי פון הינטער דיין שטוב אין פעלד, הייב אויף דיינע אויגן צום הימל און זאג: "הייליגער באשעפער, געב מיר א מתנת חנם, געב מיר א גענאדע, געב מיר שפע איך זאל קענען מפרנס זיין מיין משפחה, הייליגער באשעפער, איך ווייס אז איך בין שולדיג, צוליב מיינע זינד האב איך נישט פרנסה, איך טו תשובה, איך האב חרטה אויף מיינע זינד, פארגעב מיר, זיי מיר מוחל, איך גיי שוין זיין וואויל, רבונו של עולם האב רחמנות אויף מיר, העלף מיך ארויסגיין פון אלע מיינע חובות".

אויך זאלסטו זיך ווענדן צו האברך אשר בער נרו יאיר, ער איז געשטעלט מטעם די הנהלה צו העלפן אלע אנשי שלומינו קענען באקומען די פראגראמען וואס די שטאט געבט פאר משפחות וואס קענען נישט צאלן הייצונג, עסן וכדומה.

אויך זאלסטו רעדן צו מיין זון הרב אלחנן חיים נרו יאיר, ער האט א צדקה קאסע צו העלפן משפחות נצרכים.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית יואל

שטיי אויף פארטאגס, גיס אפ נעגל וואסער, לויף אין מקוה און זאג דעם "יום תהילים", דאס וועט זיין א סגולה פאר דיר פאר קינדער. דער הייליגער רבי זאגט (ספר המידות אות בנים, סימן סה): "הַשִּׁירוֹת וְהַתִּשְׁבָּחוֹת, שֶׁאוֹמְרִין קדֶם אוֹר הַיּוֹם, הוּא סְגֻלָּה לְבָנִים" , זינגען און לויבן צום אייבערשטן פארטאגס - איז א סגולה פאר קינדער, "גַּם לְאִשָּׁה שֶׁנֶּחְסַר חֲלָבָהּ", אויך איז דאס א סגולה פאר א פרוי וואס האט ווייניג מילך, "גַּם לְאִשָּׁה רָעָה שֶׁהִיא כַּעֲסָנִית", אויך איז דאס א סגולה פאר א פרוי וואס איז שלעכט און כעס'יג.

פלעכט אריין דיינע אייגענע תפילות צווישן די פסוקים, לויב אין דאנק אין דיין שפראך; אידיש, ענגליש, רוסיש, ספאניש, נישט קיין חילוק וואס פאר א שפראך; זאג: "שכוח אייבערשטער פאר די חסדים", הויב אן זוכן, זוך גוט וועסטו זען עס איז מיט גרויסע חסדים, דער אייבערשטער איז נאר גוטס; דאס וועט עפענען די הימלען פאר דיר פאר זרע של קיימא.

בעזרת ה' יתברך - יום ג' פרשת ויקהל, כ"ה אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך בין נעכטן געווען באזוכן אין שטעטל פון פארטאגס ביז אויף דער נאכט, איך בין געווען דורכאויס דעם גאנצן טאג אין חדר, ישיבה, בית פיגא און אין אפיס, איך בין געזיצן מיט די איינגעשטעלטע אין אפיס, מיטן אדמיניסטראטאר, מיטן מנהל און די סעקרעטעריס, ווי אזוי מען קען מאכן זאכן ארבעטן בעסער.

איך וויל דיר בעטן זאלסט מחזק זיין דיין ווייב זי זאל ווייטער בלייבן העלפן אין אפיס, זי טוט א גוטע ארבעט, א גאר גוטע ארבעט, איך ווייס נישט צי די עלטערן ווייסן וואס טוט זיך אונטערן ווארט 'חדר', אונטער די ווארט 'בית פיגא', די אפערעישן וואס די אפיס שטעלט אהער, אז די מוסד זאל קענען אנגיין.

געב איר איבער אז מיר זענען זייער צופרידן פון די ארבעט וואס זי לייגט אריין טאג טעגליך, ובזכות המצווה הזאת זאלן ענק זען ישועות, בני חיי ומזוני, געזונט, און מיט שמחה.

ברודער, אינדערפרי גיי א שפאציר מיטן אייבערשטן, הויב אן די טאג מיט א שפאציר, הייב אויף דיינע אויגן צום הימל און זאג ארויס אפאר ווערטער, אלעס וועט דיר גיין גרינגער.

בעזרת ה' יתברך - יום א' פרשת פקודי, א' דראש חודש אדר ב', שנת תשפ"ד לפרט קטן

לכבוד מיין טייערער ... נרו יאיר

עס קומט די הייליגע יום טוב פורים, זאלסטו אויסנוצן דעם טאג מיט תפילה והתבודדות. די ערשטע נאכט (די יאר איז עס מוצאי שבת קודש) טרינקט מען נישט, עס איז נישט קיין מצוה צו טרינקען – נאר פורים בייטאג; זאלסטו גיין שלאפן פרי און אויפשטיין פורים פרי, גיי אין מקוה און אז דו קענסט אויסזאגן תהלים – מה טוב ומה נעים. צדיקים טייטשן וואס די הייליגע חכמים זאגן (ירושלמי מגילה א, ד): "כָּל הַפּוֹשֵׁט יַד נוֹתְנִים לוֹ", דאס גייט ארויף אויף תפילה, פורים קען מען פועל'ן ישועות.

דו דארפסט דאך א גרויסע ישועה, דו דארפסט א שידוך; זאלסטו פורים זאגן תהילים און בעטן: "הייליגער באשעפער, געב מיר מיין שידוך, הייליגער באשעפער איך בין פול מיט פארדרייטע חכמות, איך זאג אפ שידוכים, איך ווער עלטער און עלטער, העלף מיר איך זאל אפלאזן מיינע חכמות, נאר חתונה האבן פאר דיינעט וועגן".

בעזרת ה' יתברך - יום ב' פרשת פקודי, ב' דראש חודש אדר ב', שנת תשפ"ד לפרט קטן

לכבוד מיין טייערער ליבער ... נרו יאיר, קרית ברסלב

עס קומט יעצט דער הייליגער יום טוב פורים, עס קומט אראפ די הייליגקייט פון מרדכי ואסתר; קענען מיר זיך מיט כאפן און אויך זוכה זיין צו די לימודים פון מרדכי ואסתר. דער הייליגער רבי לערנט אונז די לימודים פון מרדכי ואסתר, מען זאל דאווענען, בעטן דעם אייבערשטן; מרדכי ואסתר האבן געוויזן פאר יעדן אז עס איז דא תפילה.

חכמינו זכרונם לברכה זאגן (מגילה יב:): "האיר עיניהם של ישראל בתפלתו", מרדכי הצדיק האט ליכטיגע געמאכט פאר די אידן מיטן אויסלערנען אז עס איז דא תפילה, נישטא אזא זאך ווי אויפגעבן, אפילו די גזירה איז שוין גע'חתמ'עט, אבער תפילה איז שטערקער.

אויך אסתר המלכה, איר גאנצע זאך איז געווען אויסלערנען מען זאל זיך נישט פארלאזן אויף א בשר ודם. חכמינו זכרונם לברכה זאגן (שם, טו:) פארוואס האט אסתר געבעטן אחשורוש צו רופן המן צו די סעודה? ווייל זי האט געוואלט דערשרעקן די אידן, זי האט געוויסט אז די אידן דאווענען נישט צום אייבערשטן פאר די גזירה, זיי טראכטן "אחות יש לנו בבית המלך", מיר האבן א שוועסטער אין קעניג'ס פאלאץ, "ויסיחו דעתן מן הרחמים", און זיי בעטן נישט דעם אייבערשטן, און אז זיי זעען אז אסתר איז נאנט מיט המן זעען זיי אז מען קען זיך נישט פארלאזן נאר אויפן אייבערשטן.

יעצט איז א צייט וואס מען קען זוכה זיין צו אפלאזן אלע שטותים, אויפהערן זיך פארזיכערן אויף דעם און אויף יענעם, נאר עוסק זיין אין תפילה, נאר עוסק זיין אין התבודדות.

בעזרת ה' יתברך - יום ב' פרשת פקודי, ב' דראש חודש אדר ב', שנת תשפ"ד לפרט קטן

לכבוד מיין טייערער ... נרו יאיר, מאנסי

עס קומען יעצט זייער הייליגע טעג, פורים איז א צייט וואס (אסתר ט, א): "וְנַהֲפוֹךְ הוּא", מען קען זיך אינגאנצן איבערדרייען, "יש עניין שיתהפך הכל לטובה" (ליקוטי עצות התחזקות, סימן לו), מען קען זוכה זיין צו ווערן א צדיק, אפלאזן דעם 'ארור המן' און ווערן 'ברוך מרדכי'; אפילו אויב מען איז אין (מגילה יג:): "חֵיקוֹ שֶׁל אֲחַשְׁוֵרוֹשׁ", מען דערטרונקט זיך אין בלאטע – לערנען אונז די צדיקים מרדכי ואסתר: "אנטלויף פון די טומאה, לויף צום צדיק", חכמינו זכרונם לברכה זאגן (שם), אסתר זאגט אונז: "עוֹמֶדֶת מֵחֵיקוֹ שֶׁל אֲחַשְׁוֵרוֹשׁ", שטיי אויף פון די שויס פון אחשורוש, "טוֹבֶלֶת", גיי אין מקוה, "וְיוֹשֶׁבֶת בְּחֵיקוֹ שֶׁל מָרְדְכַי", גיי צו מרדכי הצדיק'ס שויס.

דער רבי זאגט (לקוטי מוהר"ן חלק ב', סימן עד): "וְעַכְשָׁיו, וְלֹא סִיֵּים", קען מען זאגן: "ענדיג נישט זאגן 'ועכשיו'", מען דארף א גאנץ לעבן זיין גרייט צו זאגן "'ועכשיו', איך הויב יעצט אן", 'ולא סיים', און נישט ענדיגן אנהויבן מאכן פרישע התחלות.

בעזרת ה' יתברך - יום ב' פרשת פקודי, ב' דראש חודש אדר ב', שנת תשפ"ד לפרט קטן

לכבוד מיין טייערער ... נרו יאיר

עס קומט יעצט דער הייליגער יום טוב פורים, מען קען זיך דערנענטערן צום אייבערשטן דורך מרדכי הצדיק וואס לערנט אונז מיר זאלן שטענדיג גיין צום אייבערשטן, די גאנצע מגילה דרייט זיך ארום מיט די ווערטער (אסתר ה, יג): "מָרְדֳּכַי הַיְּהוּדִי יוֹשֵׁב בְּשַׁעַר הַמֶּלֶךְ", מרדכי זיצט ביים טויער פון קעניג, מרדכי גייט אלץ צוריק צום אייבערשטן.

טייערער ברודער, פרוביר אויס די עצה פון מרדכי הצדיק, פון גיין צום אייבערשטן. די עצה פון המן ארבעט נישט, זיין טרויעריג, "אָבֵל וַחֲפוּי רֹאשׁ" (שם ו, יב), - דאס ארבעט נישט; די עצה פון צדיקים, זיך נישט מייאש זיין פון גיין צום אייבערשטן – די עצה העלפט.

פורים אינדערפרי זאלסטו גיין אין מקוה און גיין א שפאציר, התבודדות; זיך אויסבעטן זוכה זיין צו קדושת מרדכי ואסתר.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

עס איז שוין אריבער אפאר יאר און דו ווארסט אויף קינדער, דו ווילסט אזוי שטארק געהאלפן ווערן מיט קינדער, דו פרעגסט: "וואס קען איך טון זוכה זיין צו קינדער?"

דער רבי פרעגט דיין פראגע (ספר המדות אות בנים, סימן כב): "מַה יַּעֲשֶׂה אָדָם", וואס זאל מען טון, "וְיִהְיֶה לוֹ בָּנִים", זוכה זיין צו קינדער? "יְפַזֵּר מְעוֹתָיו לַעֲנִיִּים", געבן צדקה, געבן געלט פאר ארעמעלייט, "וִישַׂמַּח אֶת אִשְׁתּוֹ לִפְנֵי תַּשְׁמִישׁ", און פרייליך מאכן די ווייב.

אויך זאלסטו געבן צדקה צו דרוקן ספר אשר בנחל; מוהרא"ש האט צוגעזאגט, אז מען וועט געבן צדקה צו דרוקן דעם הייליגן ספר אשר בנחל – וועט מען זען אויסטערלישע ישועות, און פארגעס נישט וואס איז אויבן געשריבן; פרייליך מאכן די ווייב.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

שטארק זיך מיט אלע דיינע כוחות צו זיין ערליך, און הייליג, אז מען שטארקט זיך אויף די שווערע נסיונות – זעט מען ניסים. דער רבי זאגט (ספר המדות אות נאוף, סימן כ): "כָּל הַבָּא דְּבַר עֲבֵרָה לְיָדוֹ", דער וואס האט א נסיון צו טון עבירות, "וְאֵינוֹ עוֹשְׂאָהּ", און ער טוט בלייבט שטארק, ער טוט נישט די עבירה, "עוֹשִׂים לוֹ נֵס", מאכט מען אים ניסים, עס לוינט צו בלייבן שטארק.

שטארק זיך מיט דיינע שיעורים כסדרן אויפן סדר דרך הלימוד פון רבי'ן, און מיט דאווענען די דריי תפילות שחרית מנחה מעריב מיט מנין דוקא. ווען מען דאווענט מיט מנין איז דעמאלט אן 'עת רצון' צו פועל'ן ישועות.

דער אייבערשטער זאל דיר מאכן ניסים.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

שטארק זיך מיט דיין הייליגע ארבעט, מיטן גיין פארשפרייטן די ספרים און קונטרסים וואס מוהרא"ש האט געשריבן; עצות און שכל פון הייליגן רבי'ן וואס איז מחי' ומחזק די גאנצע וועלט.

די וואס גייען הפצה – די האבן אלעס, סיי די וועלט און סיי יענע וועלט, סיי פרנסה בשפע, סיי די זכותים זענען זייער גרויס, מען איז מתקן אלע פגמים, עס איז א תיקון גמור אויף פגם הברית רחמנא לצלן, און מען איז מקרב די גאולה שלימה.

יעצט קומט די ווארעמע טעג, דארף מען אסאך חיזוק אויף די אויגן; זאלסטו נעמען די קונטרסים חיזוק פאר די אויגן, סיי אין אידיש, לשון הקודש און אזוי ווייטער.

האלט חשבון וויפיל שעה דו ביסט עוסק אין הפצה, און ווען מיר וועלן זיין ראש השנה ביים רבי'ן – זאלסטו דאס זאגן דעם רבי'ן.

בעזרת ה' יתברך - יום ב' פרשת פקודי, ב' דראש חודש אדר ב', שנת תשפ"ד לפרט קטן

מרת ... תחי'

איך האב זייער רחמנות אויף אייך, איר קוקט עקלדיגע מאוויס, איר זענט פארכאפט ביי ושתי; חכמינו זכרונם לברכה זאגן (מגילה יב:): "היתה ושתי הרשעה מביאה בנות ישראל", ושתי האט גענומען טייערע אידישע טעכטער, "ומפשיטן ערומות", און זיי אויסגעטון, אוועקגענומען זייער איידלקייט און הייליגקייט.

פורים איז א הייליגע טאג, פורים קען מען אויסבעטן ביים אייבערשטן מען זאל זוכה זיין צו מרדכי הצדיק, זוכה זיין צו ווערן הייליג, אנטלויפן פון אחשורוש.

פורים זאלט איר בעטן אויף די איין זאך: "הייליגער באשעפער, 'כִּי נִמְכַּרְנוּ אֲנִי', איך בין פארכאפט ביי די טומאה, איך בין צוגעקלעבט צו מאוויס, הייליגער באשעפער געב מיר ריינקייט, געב מיר הייליגקייט".

דער אייבערשטער זאל רחמנות האבן אויף אייך.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

א גרויסן יישר כח פארן העלפן אזוי געטריי די מוסדות; ווי מער מען טוט פארן רבי'ן – איז דאס א סימן אז מען איז דאנקבאר פאר אלעס וואס מען האט זוכה געווען צו באקומען פון רבי'ן.

עס קומט יום טוב פורים, עס פעלט נישט אויס אריינצוקומען אין שטאט, בלייב אין שטעטל. נעמט אייך צוזאם אנשי שלומינו, דאווענט מנחה, מאכט א סעודה, אלע זאלן ברענגען עפעס לכבוד די סעודה, טרינקט וויין לכבוד פורים, טאנצט אינאיינעם און שרייט אויס: "להודיע שכל קויך לא יבושו ולא יכלמו לנצח כל החוסים בך!"

אויך געב איבער פאר אלע אברכים מען זאל נישט ארויפקומען צו מיר אין שטוב פורים, ווער עס וויל ברענגען משלוח מנות – קען ברענגען, אבער נישט קומען זיצן ביי מיר און נישט קומען מיט די משפחה למען קדושה וצניעות, איך האב א קליינע דירה און עס איז נישט אויסגעהאלטן צו קומען מיט די משפחה.

איך האף צום אייבערשטן אז אנשי שלומינו וועלן זיך צוהערן און טון וואס איז ריכטיג, ביי מוהרא"ש איז געווען א קליינע עולם, איז געווען אנדערש, היינט ביי אונז וואס דער עולם וואקסט – מוז מען מאכן אנדערש.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, וויליאמסבורג

קום דאווענען צווישן אנשי שלומינו, דריי זיך אין היכל הקודש, דארט וואו מען רעדט פון רבי'ן, פון די עצות פון רבי'ן; דאס וועט אויפבויען ביי דיר אמונה.

דער הייליגער רבי זאגט (שיחות הר"ן, סימן רפב): "עִקַּר הָאֱמוּנָה תּוֹלֶה בַּהִתְקָרְבוּת לַצַּדִּיקִים הָאֲמִתִּיִּים", אמונה באקומט מען דורך זיין נאנט ביים אמת'ן צדיק, און חס ושלום אויב מען גייט אוועק פונעם צדיק – פארלירט מען די אמונה, אזוי ווי דער הייליגער זוהר זאגט (תקוני זוהר, כא), דער צדיק איז די עק פונעם 'ד', און אז מען טיילט זיך אפ פונעם צדיק – ווערט פונעם 'ד' א 'ר', עס ווערט חס ושלום 'אל אחר', כפירות, און נאר דורך דעם צדיק ווערט א 'ד', ה' אחד ושמו אחד.

מאך זיך א שיעור אין ספר עצתו אמונה, בריוו וואס איז געשריבן פאר בחורים און אינגעלייט וואס גייען אריבער שווערע ביטערע נסיונות, און די בריוו איז זיי מחזק. די בריוו זענען די זעלבע ווערטער וואס שטייט אין ספר הקדוש "אשר בנחל", עס איז נאר אראפגעברענגט נאך מער אראפ, נאך מער פאר דעם דור, אזוי ווי מוהרא"ש האט מיר געזאגט ביים לעצטן שמועס, א וואך פאר די פטירה, אז מען דארף נעמען די דיבורים און דאס מער אראפברענגען פארן דור.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, מאנסי

"אז עס איז גאר שלעכט, איז מען זיך אינגאנצן מבטל", אזוי האט דער רבי געזאגט פאר רבי נתן, האט רבי נתן געפרעגט: "ווי אזוי איז מען זיך מבטל?" האט אים דער רבי געענטפערט (שיחות הר"ן, סימן רעט): "מען פארמאכט די מויל און מען פארמאכט די אויגן, דאס איז ביטול"; אז מען איז זיך מבטל צום אייבערשטן, מען פרעגט נישט קיין קשיות און מען וויל גארנישט פארשטיין, מען ווייסט אז דער אייבערשטער מאכט נאר גוט, נישטא קיין שלעכטס, נישטא קיין גרייזן, אלעס אלעס איז לטובה, בצדק ובמשפט ובחסד וברחמים.

געב זיך איבער צום אייבערשטן, און חזר אמונה; חזר זיך: "אלעס איז דער אייבערשטער", דומם צומח חי מדבר, אלעס איז דער אייבערשטער, אלעס מאכט ער, אלעס טוט ער, נישטא קיין טעותים.

בעזרת ה' יתברך - יום ה' פרשת תצוה, שובבי"ם, י"ג אדר א', שנת תשפ"ד לפרט קטן

לכבוד מיין טייערער נחמן נתן נרו יאיר, מלמד בתלמוד תורה היכל הקודש קרית ברסלב

איך בין זייער צופרידן פון דיין ארבעט, איך באקום אויסנאם גריסן פון די טאטעס און פון מרדכי מנהל.

דו ווייסט ווי שטארק איך מוטשע זיך צו קענען אויפהאלטן די מוסד, איך עפן נישט די מצה בעקעריי די יאר נאר אז די מלמדים זאלן באקומען זייער געהאלט. אין א צווייטע פלאץ וואלט אזוינס נישט פאסירט, עס איז א בושה אז זאכן ארבעטן זיך נישט אויס, מיר אינטערעסירט נישט וואס דער זאגט, וואס יענער זאגט, איך בעט דעם אייבערשטן צו טון וואס איז ריכטיג; אז די מצה בעקעריי איז א לאך פאר די מוסד - וועל איך די יאר עסן מצות פון אנדערע קהילות און ענדערש באצאלן אין צייט די מלמדים.

מיר האלטן אינמיטן בויען א שיינע שול אין שטעטל פאר א מנינים צענטער, איך האב דאס געלייגט אין די זייט נאר אז מען זאל קענען באצאלן די מלמדים צייטליך, ווייל דאס איז ריכטיג און דאס איז וויכטיג.

יעצט האבן מיר געמאכט אז מען געבט די מלמדים צעטלעך 'מן', מיר מאכן דאס ווייל מיר ווילן העלפן די מלמדים זאלן קענען לעבן. איך האף עס וועט זיך אויסארבעטן, און אז עס וועט זיין צו שווער - וועלן מיר אויסארבעטן בעסערע וועגן, אלעס נאר כדאי די מלמדים זאלן קענען לעבן וד"ל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... שליט"א, קרית ברסלב

זיי מחזק די בחורים ביי דיר אין ישיבה זאלן עוסק זיין אין גיין נאך געלט פאר די ישיבה; א גאנץ יאר זאלן זיין עוסק זיין אין די מצוה, בפרט אינעם יום טוב פורים.

די בחורים קענען זיך צאמנעמען און גיין אין הייזער, טאנצן און פרייליך מאכן, און בעטן צדקה פאר אונזער ישיבה.

אויך זאלסטו זיי מחזק זיין זיך אויפצופירן מיט דרך ארץ, איך הער פון מענטשן אז בחורים גייען נאך געלט ביי אונזער גראסערי צו קויפן פיצא וכו'. זאג זיי עס איז נישט קיין דרך ארץ, עס איז נישט קיין גוטע געוואוינהייט; סיי דאס עסן אין געשעפט ווען עס איז דא עסן אין ישיבה, און סיי דאס בעטן געלט פון מענטשן פאר איבריגע זאכן.

ווער נישט מיד און שוואך ווען דו זעסט אז נאכן רעדן פועל'ט מען נישט, גלייב אז דיינע ווערטער גייען אריין אין די טייערע הערצער און יעדעס ווארט וואס מען רעדט מיט הארץ – ווערט אנגענומען, נכנסין ללב.

דו רעד, אז מען רעדט – פועל'ט מען, אמאל גלייך און אמאל נעמט עס אביסל צייט.

רעד צו זיי פון אמונה, פון תפילה, פון קדושת היסוד, און אפהיטן אות ברית קודש און פון מדות טובות.

ווען דו ווערסט מיד – זאלסטו זיך דערמאנען ווי מוהרא"ש האט געהאט כח צו אונז, גערעדט און גערעדט צו אונז און נישט געווארן מיד.

איך האב צוגעזאגט פאר דיינע תלמידים צו מאכן א שבת התוועדות מיט זיי, איך האף צום אייבערשטן צו גיין מיט זיי אויף א שבת זיי מחזק זיין, זיי אויפבויען מיט די חיזוק און עצות פון רבי'ן.

פון דיין ראש ישיבה וואס בעט פאר דיין הצלחה.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

עס קומט דער הייליגער יום טוב פורים, מען גייט ליינען די הייליגע מגילה. צדיקים זאגן עס לוינט אריבער צו גיין אלעס וואס מען גייט אריבער, אבי זוכה זיין צו הערן איין מאל די מגילה. בשעת'ן ליינען די מגילה קומט אראפ אזא הייליגקייט, מען קען זיך אזוי דערנענטערן צום אייבערשטן, מען איז זוכה צו תשובה מאהבה, אלע עבירות ווערן זכיות.

עס לוינט נישט זיך אריין צו שלעפן אין שטאט, גלייב מיר, פרייליך איז נישט די פלאץ, פרייליך איז אין הארץ. נעם צאם אנשי שלומינו אין שטעטל, דאווענט מנחה, מאכט א סעודה, טרינקט וויין און טאנצט "אשרינו שזכינו להתקרב לרבינו", וואו מען איז קען מען זיין פרייליך, און וואו מען רעדט פון רבי'ן – דארט איז דער רבי.

הויב אן דיין טאג מיט התבודדות, זיץ צווישן די ביימער און שריי צום אייבערשטן ער זאל רחמנות האבן אויף דיר.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, לעיקוואד

עס איז גאר אנדערש ווען מען בעט אויף יעדע זאך דעם אייבערשטן; אויף עסן, אויף קליידער און אזוי ווייטער. אוודאי דארף מען דער עיקר בעטן אויף עבודת השם, אבער אויך דארף מען יעדע זאך בעטן.

דער הייליגער רבי זאגט (שיחות הר"ן, סימן רלג), דער וואס בעט נישט אויף יעדע זאך דעם אייבערשטן, אפילו דער אייבערשטער געבט אים טאקע אלעס, ער האט קליידער, פרנסה, אבער דאס לעבן איז אזוי ווי דאס לעבן פון בהמות, ווייל אז מען בעט נישט אויף יעדע זאך דעם אייבערשטן – "עַל כֵּן כָּל חִיּוּתוֹ הוּא כְּמוֹ חִיּוּת בְּהֵמָה מַמָּשׁ", איז דאס לעבן ווי דאס לעבן פון בהמות, "כִּי הָאָדָם צָרִיךְ לְהַמְשִׁיךְ כָּל חִיּוּתוֹ וְהִצְטָרְכוּתוֹ מֵהַשֵּׁם יִתְבָּרַךְ עַל יְדֵי תְּפִלָּה וְתַחֲנוּנִים דַּוְקָא", נאר יעדע זאך דארף מען בעטן דעם אייבערשטן.

די לצים פון ברסלב זאגן אויף היכל הקודש "דאס איז נישט ברסלב", איך זאג דיר, דער קלענסטער תלמיד אין היכל הקודש האט זיך נישט וואס צו שעמען פון קיינעם אין ברסלב, דוק ותשכח; אלע קענען דעם רבינ'ס ספרים, מען לערנט מקרא, משנה, גמרא, הלכה, אגדה, חסידות, מוסר וכו' וכו'.