בריוון פונעם ראש ישיבה שליט"א

בעזרת ה' יתברך - יום ד' פרשת ואתחנן, ח' מנחם-אב, שנת תשפ"ו לפרט קטן

לכבוד ... נרו יאיר

יעצט ווען מיר האלטן הלכות אבילות, מיר טרויערן אויפן חורבן בית המקדש דארפן מיר געדענקען אז מען טאר נישט זיין בעצבות ומרה שחורה, נאר גלייבן באמונה שלימה אז דער אייבערשטער האט אונז ליב, דער אייבערשטער האט א נחת רוח פון אונזערע מצוות ומעשים טובים, און גלייבן אז דער אייבערשטער וועט אונז שיקן משיח צדקינו וואס וועט אויפבויען דעם בנין בית המקדש השלישי.

בנוגע לערנען תשעה באב נאך חצות; מוהרא"ש זאגט אז מען קען גורס זיין אויפן סדר דרך הלימוד (המבואר בשיחות הר"ן, סימן עו) - שיעורים כסדרן וואס מען לערנט יעדן טאג. ספר אשר בנחל - דאס קען מען א גאנצע צייט לערנען, דאס קען מען אויך לערנען תשעה באב ביינאכט און תשעה באב צופרי; ווייל דאס איז פשוט חיזוק אויף אמונה און חיזוק אויף יראת שמים, וואויל איז דער וואס לערנט עס, דער וועט קיינמאל נישט פאלן.

דער אייבערשטער זאל העלפן זאלסט האבן הצלחה אין אלע ענינים.

א גרינגן תענית.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

לכבוד ... נרו יאיר

אז דו האסט נישט קיין פרנסה, דו האסט נישט וואס אהיים צו ברענגען - מעגסטו על פי הלכה גיין נאך געלט; אזוי ווערט גע'פסק'נט אין שולחן ערוך (יורה דעה, סימן רנג).

מוהרא"ש זאגט, אויב מען וויל נישט 'פושט רגל' זיין (באנקראטירן) - זאל מען 'פושט יד' זיין, זיך נישט שעמען אויסצושטרעקן די האנט בעטן הילף.

פאר זיך קען מען מקיל זיין, און אז מען האט נישט קיין געלט פאר זיך - איז נישט געפערליך, אבער ווען עס קומט צו די ווייב און קינדער - דארט איז נישטא קיין תירוצים: 'איך האב נישט וכו'', דארט מוז מען ברענגען געלט, די הייליגע חכמים זאגן (חולין פד:): "שֶׁהֵן תְּלוּיִין בּוֹ וְהוּא תָּלוּי בְּמִי שֶׁאָמַר וְהָיָה הָעוֹלָם", די ווייב און קינדער זענען אנגעהאנגען אינעם מאן, אבער דער מאן איז אנגעהאנגען אינעם אייבערשטן.

געדענק דיין התחייבות ביי דיין חופה, האסט אונטערגעשריבן אין די כתובה: "אֲנָא אֵיזִן, וְאוֹקִיר, וְאֶפְלַח לֵכִי", איך וועל דיך שפייזן וכו'; דארפסטו דאס מקיים זיין, און אויך קען די גאנצע שלום בית גיין שלאפן, די הייליגע חכמים זאגן (תמורה טז.): "אִשָּׁה כֵּיוָן שֶּׁאֵין לָהּ תְּבוּאָה בְּתוֹךְ בֵּיתָהּ מִיָּד צוֹעֶקֶת", אויב עס איז נישטא קיין עסן אין שטוב הייבט גלייך די ווייב אן צו שרייען; דאס נעמט אוועק די ליבשאפט און דאס איז גורם אז אלעס זאל צעפאלן.

קומענדיגע וואך וועט אם ירצה ה' זיין די יערליכע קאמפיין פאר די קהילה און די מוסדות, איך וויל דו זאלסט די יאר נעמען א חלק; נישט אבי יוצא צו זיין, איך וויל עס זאל זיין מיטן גאנצן הארץ.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

טייערער ... נרו יאיר

שטארק זיך, שטארק זיך מיט דיינע שיעורים כסדרן אין משניות און גמרא, אויך זאלסטו לערנען יעדן טאג דעם רבינ'ס ספרים, דאס וועט דיך ברענגען נענטער צום אייבערשטן.

געב דיין ווייב געלט, דער עיקר זאלסטו זיך היטן זי זאל נישט האבן קיין אימה יתירה, איבריגע שרעק פון בעטן געלט פאר די שטוב זאכן וכדומה, און אזוי וועסטו האבן גרויס שפע, ווייל ווען עס איז דא ליבשאפט צווישן מאן און ווייב – איז דא שפע.

דער הייליגער צדיק רבי ישכר דוב – דער בעלזער רב זכותו יגן עלינו זאגט, אז דאס איז מרומז אין די ווערטער וואס די הייליגע חכמים זאגן (שבת קל.): "ליכא כתובה דלא רמו בי' תיגרא", 'תיגרא' איז א לשון פון תגר און מסחר, און די ווארט 'רמו' איז א לשון פון הרמה, אויפהייבן; אז ווען עס איז דא שלום בית ווערט גרויס שפע.

שטארק זיך מיט די גוטע מנהג נישט אריין צו ברענגען דיין אפיס אין שטוב; זמן אפיס לחוד – וזמן זיין א מאן און א טאטע פאר די קינדער – לחוד, מיש נישט אויס, מאך נישט כלאים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

מרת ... תחי'

דא האט איר א תפילה צו זאגן יעדן טאג:

"הייליגער באשעפער איך לויב דיך און דאנק דיך פאר אלע חסדים און טובות וואס דו טוסט מיר, וויפיל איך זאל נאר דאנקען וועל איך נישט אנקומען צו דאנקען אויף אלעס גוטס וואס דו טוסט מיט מיר.

אייבערשטער איך וויל זיך צו דיר אויסרעדן עפעס גאר פריוואט, מיין יונגסטע שוועסטער האט נאכנישט קיין קינדער און דאס טוט מיר אזוי שטארק וויי, איך קען עס נישט נעמען, ספעציעל ווען איך מאך א שמחה, אנשטאט איך זאל זיך פרייען - ווערט מיין הארץ פארקלעמט מיט די צער פון מיין שוועסטער; אנא ה', העלף מיין שוועסטער זי זאל אויך מאכן שמחות, און העלף מיר איך זאל זיך קענען שטארקן, איך זאל קענען קאנטראלירן מיינע מחשבות, זיך פרייען ביי מיינע שמחות, נישט אויסמישן די שמחות מיט די געפילן וכו', איך זאל דיך שטענדיג דאנקען, און שטענדיג זיין נאר בשמחה, אמן".

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר

דער אייבערשטער זאל שיקן א רפואה שלמה פאר דיין ווייב, זי זאל צוריק באקומען אירע כוחות, זי זאל קענען זיין א מאמע פאר די קינדער און א ווייב.

יעצט ווען די שטוב ארבעט איז געפאלן אויף דיר, זאלסטו זיך זייער שטארקן דאס צו טון מיט גרויס שמחה, אויך זאלסטו משמח זיין דיין ווייב, איר רפואה איז נאר אנגעהאנגען אין שמחה; נעם איר צו דאקטער פרייליך, דאקטער פרייליך איז דער גרעסטער און בעסטער דאקטער, "שמחה הוא הרפואה לכל" (לקוטי מוהר"ן חלק ב, סימן כד).

אויך איז דא א גרויסער פראפעסאר דאקטער פעלדמאן – איש שדה, לילך ביערים ובשדות, גיין צווישן די ביימער און פעלדער שמועסן מיטן אייבערשטן, אים בעטן אויף אלעס.

מוהרא"ש זאגט, דאס זענען געווען זיינע דאקטוירים וואס האבן אים געהאלטן ביים לעבן, דאקטער פרייליך, דאקטער פעלדמאן, דאקטער לערנער און דאקטער וואסערמאן; שמחה, התבודדות, תורה און מקוה; והבן למעשה.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, מאנסי

איך האב ערהאלטן דיין בריוו מיט די פדיון.

איך פריי זיך צו הערן אז דו ביסט זיך מחי' מיט די עצות און חיזוק פון הייליגן רבי'ן, דיין לעבן איז געווארן א לעבן, דער רבי מאכט דיר ליכטיג אין אלע פלעצער; ביים לערנען, ביים דאווענען, ביי שלום בית, ביים מחזק זיין די קינדער און ביי כיבוד הורים וכו' וכו'.

דער אייבערשטער זאל העלפן דו זאלסט האבן נחת ביי דיינע קינדער און הצלחה אין אלע דיינע וועגן.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, קרית ברסלב

דאס וואס דו פרעגסט אז דיין שווער און שוויגער ווילן כסדר קומען, און עס איז שווער פאר דיין ווייב, דו ווילסט וויסן וואס איז ריכטיג.

ריכטיג איז – וואס מער ארייננעמען די עלטערן פאר שבתים און ימים טובים, בפרט ווען די עלטערן ווערן פארעלטערט – איז ריכטיג וואס מער זיי צו מכבד זיין, וואס מער זיי ארייננעמען אין שטוב, און אז זיי פירן זיך אנדערש, און דו טראכסט אז עס וועט גיין אויף די חשבון פון די קינדער, דאס איז נישט אזוי, די קינדער וועלן נאר שענער אויפוואקסן בזכות כיבוד הורים.

(נאר אויב פאר דיין ווייב'ס מח איז דאס נישט גוט, זי פאלט צוריק וכו' – דעמאלט זאלסטו שיינערהייט זאגן אז עס איז אונז יעצט אביסל שווער וכו', חייך קודמין, ערשט קומט די געזונט פיזיש, און נאך מער די נפש גייסטיש).

האלט אן דיין גדר פון נישט האבן טעקסט מעסעדזש.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, קרית ברסלב

מאכסט מיך אזוי פרייליך מיטן גיין יעדע נאכט צום גמרא שיעור, עס איז אזוי הייליג צו לערנען די הייליגע תורה; אז מען לערנט תורה ווערט מען צוגעקלעבט צום אייבערשטן, מען ווערט אויסגעלייטערט און אויסגערייניגט, "אין לך בן חורין אלא מי שעוסק בתורה" (אבות ו, ב), מען ווערט באפרייט פון די שלעכטע תאוות און שלעכטע מידות.

זייער גוט טוסטו אז דו ביסט שטארק מיט דיין גדר נישט צו האבן א טעלעפאן מיט וואטס עפפ, דו ווערסט נישט דערשראקן פון דיין בעל הבית; אזוי זאלסטו ווייטער טון, ווייל די נסיונות פארשוועמען די בעסטע און די חשוב'סטע... נישטא קיין עצה, נאר צו גיין קאפ אין וואנט, בלייבן פעלזן פעסט מיט די גדרים וואס מען נעמט אויף זיך, און נאר מיט תפילה והתבודדות; בעטן דעם אייבערשטן פאר זיך, פאר די משפחה און פאר די דורות.

זיי נישט מוותר אויף לערנען יעדן טאג ח"י פרקים משניות, און אויף זאגן א יום תהלים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

מרדכי אינדיג נרו יאיר, מנהל תלמוד תורה היכל הקודש קרית ברסלב ליבערטי

איך האב געהערט דיינע מעסעדזשעס, און איך פריי זיך זייער אז דו באקומסט נאך גוטע מלמדים פאר קומענדיגע יאר הבא עלינו לטובה; איך בעט אסאך אויף דעם, היינט אינדערפרי איז געווען א ברית ביים מדפיס נחמן נתן בוים, און זיצנדיג אויפן כסא של אליהו ביים זיין סנדק האב איך געבעטן אויף דעם פרט, אויף גוטע מלמדים, גוטע טיטשערס אין אונזער מוסד.

אויך פאריגע וואך דאנערשטאג פרשת דברים איז געווען צוויי ברית'ן, איך האב געבעטן זייער שטארק פון אליהו הנביא: "עמוד על ימיני וסמכני, שטיי מיר צו מיין האנט איך זאל האבן כח ווייטער צו האלטן די מוסדות".

איך דאנק דיך פארן זיין ווארעם צו די מלמדים, זיי זאגן מיר אלע בפה אחד אז נאר בזכות די ווארעמקייט און חיזוק פונעם מנהל – האבן זיי כח ממשיך צו זיין און משפיע זיין פאר די תלמידים.

איך האב היינט געגעבן דריי שיעורים; פאר די פרויען צאמקום, פאר מלמדים און טיטשערס; דאס איז אויסער די שיעור אינדערפרי, די דף גמרא, און אויסער די שיעור פאר בית פיגא; אשרינו.

לאז מיר וויסן וואו דו האלסט מיטן מגי' זיין ספר הקדוש אשר בנחל באידיש; איך האב צוגעזאגט אז איך וויל דאס ארויסגעבן...

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר

איך האב געזען די נייע שיינע קונטרסים אין אידיש און אין לשון הקודש, עס איז הערליך שיין, איך בין מקנא דיין זכות.

יעצט הער איך אז מיט די פארגעשריטענע טעכנעלאגיע קען מען נעמען א גאנצע שיעור וואס איז געזאגט אין אידיש, און ביז אפאר סעקונדעס קומט ארויס די גאנצע שיעור אפגעטייפט ווארט ביי ווארט. ווען איך האב דאס געהערט האב איך באלד געטראכט פון דיר מיט דיין חבר ... נרו יאיר, וואס ענק זיצן שעות אויף שעות טעג אויף טעג אפצוטייפן מיינע שיעורים; א שאד אויף די צייט, א שאד די הארעוואניע, קענסט נעמען א גאנצע פייל מיט שיעורים און דאס מאכן פאר ספרים אין אפאר סעקונדעס. קענסט צוריק נעמען די מלמדות און אויך ארויסגעבן די ספרים, ווייל מיט די טעכנעלאגיע גייט דאס אין סעקונדעס.

שטארק זיך מיט די עצה פון התבודדות, גיי יעדן טאג א שפאציר און שמועס מיטן אייבערשטן, דערצייל אים ווי שטארק דו ווילסט זיין גוט, ווי דו ווילסט זיין ערליך, ווי דו ווילסט זיין דבוק צו אים, און וואס עס גייט אלץ אריבער אויף דיר; דאס וועט דיך ברענגען צו א שטארקע דביקות, דו וועסט באקומען גדלות המוחין, און צו תשובה שלמה.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר

נעכטן נאכט נאך מעריב בין איך געזיצן ביי א גרופע אינגעלייט וואס גייען אויך די יאר העלפן די יערליכע קאמפיין פון "אנשי חיל", מיר האבן גערעדט צוויי און א האלב שעה ווי אזוי מיר קענען מאכן אז אלע אנשי שלומינו זאלן טון דאס מערסטע צו שאפן געלט פאר די מוסדות און קהילה.

עס איז מיר געווען אינטערעסאנט אז דו ביסט נישט געקומען, איך האב זיך נאכגעפרעגט אויף דיר.

איך וויל דיך מחזק זיין, די הייליגע חכמים זאגן (עיין במדבר רבה כב, ד): "המתחיל במצוה אומרים לו גמור", די וואס הייבן אן טון – דארפן אסאך חיזוק נישט אפצולאזן, 'אומרים לו', מען דארף אים זאגן: "ברודער לויף נישט אוועק, לאז נישט אפ, 'גמור', ענדיג טון די גוטע זאכן".

וואס מיינסטו, איך קען נישט אנטלויפן? איך קען נישט אפלאזן (חס ושלום)? איך וויל נישט אנטלויפן, איך וויל נישט אפלאזן, דער הייליגער רבי זאגט (עיין חיי מוהר"ן, סימן רכט): "איך וויל אויספירן און איך וועל ענדיגן".

איך וויל דיר בעטן זאלסט מיר אויך די יאר און אויך אלע יארן העלפן מיט די קאמפיין, סיי אליינס גיין נאך געלט, און סיי מחזק זיין אנשי שלומינו, אלע זאלן גיין נאך געלט און זיך נישט שעמען פון קיינעם.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, קרית יואל

איך האב ערהאלטן דיין בריוו מיט די פדיון.

איך בין מתפלל פאר דיינע קינדער זיי זאלן אויסוואקסן ערליך, אויך בין איך מתפלל פאר דיר דו זאלסט זיך קענען דערהאלטן יעצט ווען דו גייסט אריבער דיין פרשה ה' ירחם.

והעיקר זאלסטו נישט פארגעסן צו אויפזוכן גוטס אין דיין חשכות, אין דיין צרה, און דו זאלסט דאנקען דעם אייבערשטן; דאס וועט דיר געבן מוחין און כח צו קענען זיך דערהאלטן און אנגיין אין דיין לעבן, קענען דינען דעם אייבערשטן בשמחה ובטוב לב.

גיי ארויף צום ציון פון הייליגן רבי'ן זכותו יגן עלינו מסאטמער, גיס אויס דיין הארץ און דערצייל דעם אייבערשטן דיין גאנצע פרשה, און אז די הארץ איז פארקלעמט זאלסטו זיך אויסרעדן אן די הארץ, ווייל די טרוקענע תפילות זענען זייער חשוב אין הימל.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך דאנק דיך פארן זיין יעצט אין די זומער וואכן מיין זון ...'ס מלמד, מיר – איך און מיין ווייב – האבן זייער אסאך הכרת הטוב פאר דיר, איך פרעג יעדן טאג מיין זון ער זאל מיר דערציילן פון חדר, ער דערציילט מיר אזעלכע שיינע זאכן... געבענטשט זאלסטו זיין.

אויך דאנק איך דיר פארן אראפנעמען פון מיר דעם עול פון העלפן אנשי שלומינו חתונה מאכן בחנם דא אין שטעטל, דאס איז פון די חשוב'סטע זאכן ביי אונז אין די קהילה, אז אנשי שלומינו זאלן קענען אויסלעבן די יארן, חתונה מאכט די קינדער אן כאפן הארץ אטאקעס און קראנק ווערן פון ווערן בעלי חובות, כידוע וואס טוט זיך אפ אין אנדערע מקומות, מען קען נישט מאכן שמחות מיט שמחה, מען קומט צו די קינדער'ס חתונות מיט שווערע הונדערטער טויזנטער דאלער חובות.

אויך מאך איך זיך די חשבונות פון די לעצטע אכט יאר קאמפיינס, האסטו מיר געהאלפן שאפן צדקה געלט אלעס אינאיינעם געברענגט די סכום פון ניין טויזנט פונף הונדערט און איין און זעכציג טויזנט דאלער, איך בין דיר זייער דאנקבאר, און איך האף אז אויך די יאר וועסטו מיר העלפן שאפן געלט און גיין נאך געלט פאר די צוועק.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

מנחם נרו יאיר

דיין זכות איז זייער גרויס מיטן העלפן בויען די שטעטל, איך דאנק דיך זייער פאר אלעס וואס דו טוסט, ספעציעל פארן זען עס זאל זיין שלום, און אפילו עס איז דא חלוקי דעות דאך איז די ליבשאפט שטארק, מען פארגעסט נישט אונזער ציל, צו מגלה זיין און מפרסם זיין פאר אלעמען דעם רבינ'ס חיזוק, דעם רבינ'ס עצות; אין דעם ליגט אונזער הצלחה. אפילו די גויים וועלן אונז כסדר אונטער לייגן פיסלעך, זיי וועלן אונז מאכן שמאל, אונז נישט לאזן בויען וכו'; דאס איז נישט אונזער פראבלעם, ווייל אויב מיר וועלן זיך ליב האבן וועלן מיר זייער מצליח זיין, קיינער וועט אונז נישט קענען שטערן; אזוי האב איך געהערט פון הייליגן סאטמער רבי זכותו יגן עלינו: "א מוסד מאכט זיך נישט צו פון נישט האבן געלט, א מוסד פארמאכט זיך פון מחלוקת, פון שנאה און קנאה".

איך דאנק דיך פארן העלפן אלע יארן ביים קאמפיין, איך מאך די חשבונות פון די לעצטע אכט יאר, זע איך אז דו האסט מיר געהאלפן ברענגען פאר די קהילה א חשבון פון פינף און זיבעציג טויזנט דאלער, נאר פון די קאמפיינס אליינס; דאס איז אויסער וואס דו האסט געגעבן אזויפיל אייגענע געלט, האסט געגעבן איבער א מיליאן דאלער צו בויען די חדר, און פאר די שול האסטו געגעבן הונדערט פופציג טויזנט דאלער, און נאך אסאך; דאך איז מיר מער חשוב די קאמפיין געלט, ווייל דאס גיין נאך געלט איז מיר מער חשוב ווי געבן אייגענע געלט; וואס עס איז ידוע פון צדיקים אז מיט גיין נאך געלט איז מען מתקן ד' מיתות בית דין און כריתות, מען מאכט זיך א חלוקא דרבנן מיט וואס צו זיצן אין גן עדן.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

שטארק זיך מיט אלע כוחות, אפילו עס איז דיר ביטער שווער, שוין אזוי לאנג וואס דו דארפסט א שידוך, שוין אזויפיל יאר וואס דו ביסט אליין, און עס גייט איבער וואס גייט איבער; דאך זאלסטו זיך שטארקן באמונה שלמה אז דו האסט אויך א שידוך, און ישועת ה' כהרף עין.

איך בין דיך זייער דאנקבאר, ווייל איך בין איבערגעגאנגען די חשבונות פון די לעצטע אכט יאר וואס מיר מאכן די קאמפיין, אינאיינעם האסטו מיר געהאלפן ברענגען פאר די קהילה א חשבון פון איבער הונדערט און צען טויזנט דאלער, און איך האף אז אויך די יאר וואסטו מיר העלפן גיין נאך געלט.

קומענדיגע וואך דינסטאג, מיטוואך און דאנערשטאג פרשת ראה – וועט אם ירצה ה' זיין די יערליכע קאמפיין פון 'אנשי חיל'; איך בעט דיר זייער, העלף מיר ארויסגיין פון מיינע חובות, די חובות זענען נישט מיינע, דאס בארג איך פאר ענק, צו בויען די קהילה און די מוסדות פאר די דורות הבאים.

הייב אן זאגן יעדן טאג דעם יום תהלים, און זיי מסיים יעדע וואך ספר תהלים, און פלעכט אריין דיינע אייגענע לויב ווערטער און תפילות ובקשות פאר א גוטע שידוך מיט געזונטע דורות.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך בענק זיך צו פאריאר זומער ווען דו פלעגסט קומען אינדערפרי צום גמרא שיעור, הלוואי זאלסטו קומען אינדערפרי אנהייבן דעם טאג מיט לערנען גמרא און אביסל חיזוק פון רבינ'ס עצות.

אם ירצה ה' קומענדיגע וואך מאך איך די יערליכע קאמפיין פון "אנשי חיל", איך גיי איבער די חשבונות, איך זע אז די לעצטע דריי יאר האסטו קאמפיינט און געברענגט צדקה געלט פאר די קהילה די חשבון פון אכט טויזנט דריי הונדערט איין און זיבעציג דאלער, איך בין דיר זייער דאנקבאר, און איך האף אז אויך די יאר וועסטו מיר העלפן קאמפיינען, מיך ארויסנעמען פון מיינע חובות, די חובות זענען נישט מיינע, דאס זענען פון די קהילה און די מוסדות.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

בני הרב ... שליט"א

איך האב גרויס נחת פון דיר און פון דיין איידעלע ווייב מיט דיינע זיסע ליכטיגע קינדער.

אם ירצה ה' קומענדיגע וואך מאך איך די יערליכע קאמפיין פון "אנשי חיל", איך מאך די חשבונות פון די אלע קאמפיינס אינאיינעם, האסטו מיר געהאלפן ברענגען צדקה פאר די קהילה און מוסדות אכט טויזנט פיר הונדערט און ניין דאלער, איך בין דיר זייער דאנקבאר און איך בעט דיר, אויך די יאר זאלסטו זיך אנשליסן צו קאמפיינען און גיין נאך געלט פאר די קהילה און מוסדות.

אויך זאלסטו ממשיך זיין א גאנץ יאר מיט דיין פריוואטע צדקה קאסע צו העלפן משפחות הנצרכים אין די קהילה, בפרט תלמידי חכמים הלומדים מתוך הדחק.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

אויף דיין פראגע וכו'; די הייליגע תורה זאגט (דברים כג, טו): "וְלֹא יִרְאֶה בְךָ עֶרְוַת דָּבָר, וְשָׁב מֵאַחֲרֶיךָ", דארט וואו עס איז דא ערוה – 'וְשָׁב מֵאַחֲרֶיךָ', גייט די שכינה אוועק; איז דאך נישטא קיין ברכה און קיין הצלחה, איז אפילו די ווייבל איז א גוטע ארבעטער, אבער אז זי קומט אויסגעטון ה' ישמרינו, זי קומט מיט בגדי פריצות – איז דארט נישטא קיין ברכה, איז וואס דארפסטו אן אפיס אן ברכות; איז זיכער איר זאגן שיינערהייט אז זי קען ווייטער בלייבן, אבער זי דארף קומען אנגעטון איידל. דער אייבערשטער זאל העלפן דו זאלט מצליח זיין, סיי איר משכנע זיין צו גיין איידל, און סיי עס זאל זיין גרויס שפע.

אם ירצה ה' קומענדיגע וואך מאך איך א קאמפיין אז די גאנצע קהילה זאל גיין נאך געלט פאר די קהילה, איך מאך די חשבונות פון די לעצטע אכט יאר, אלע קאמפיינס אינאיינעם האסטו מיר געהאלפן ברענגען פאר די קהילה איין און צוואנציג טויזנט ניין הונדערט און צוועלעף דאלער, איך האף אז די יאר וועסטו מיר העלפן, איך בין דיר זייער דאנקבאר פאר אלעס וואס דו העלפסט מיר.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך בין זייער צופרידן פון דיינע בחורים, איך האב זיי זייער ליב, איך זע ווי זיי ווערן מער און מער ליכטיג בתורה ויראת שמים; געב זיי איבער, זאלן זיי וויסן אז איך האב זיי ליב.

איך וויל בעטן די יאר, קומענדיגע וואך, מאך איך עודך א קאמפיין, איך ווייס אז אנשי שלומינו האבן שוין נישט קיין כח און געדולד פאר דעם, אבער איך האב נישט קיין ברירות, איך האב געמאכט חובות פאר די קהילה און מוסדות, און איך דארף דאס באצאלן.

איך זע אז די פריערדיגע יארן, דורכאויס די אכט קאמפיינס וואס איז געווען, האסטו געברענגט צדקה געלט די שיינע סכום פון צוואנציג טויזנט אכט הונדערט צוויי און אכציג דאלער, איך בין דיר זייער דאנקבאר, און איך בעט דיר אויך די יאר זאלסטו מיר העלפן.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך פריי זיך זייער צו הערן אז דו ביסט שטארק מיט דיין גוטע גדר נישט אריינצונעמען אין שטוב די סמארטפאון און טעבלעט, איך פריי זיך אז מיין ארבעט פון מחזק זיין אזויפיל יארן – גייט נישט לאיבוד, און ביים סוף נעמט מען אן אז א אידישע שטוב גייט נישט מיט א טעלעפאן.

קומענדיגע וואך מאך איך דעם יערליכן דרייוו אז אלע מיינע תלמידים זאלן גיין נאך געלט, איך קוק איבער די חשבונות פון די פריערדיגע קאמפיינס, זע איך אז די פריערדיגע זיבן קאמפיינס האסטו מיר געהאלפן ברענגען פאר די קהילה א חשבון פון צוויי הונדערט זעקס און דרייסיג, פינף הונדערט און דריי טויזנט דאלער, נאר פון גיין נאך געלט ביי די קאמפיין, אויסער וואס דו העלפסט די מוסדות א גאנץ יאר.

איך וויל דיר בעטן דו זאלסט מיך די יאר אויך העלפן גיין נאך געלט, שעם זיך נישט פון קיינעם, בעט פון יעדן איינעם, און זיי מחזק דיינע חברים תלמידי הישיבה זיי זאלן זיך אלע אנשטרענגען די איין מאל אין יאר פאר מיר און פאר זיי.

בלייב שטארק מיטן נישט אריינברענגען אין שטוב די טעלעפאן, טעבלעט וכדומה, אזוי וועסטו האבן א הייליגע שטוב, הייליגע דורות.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

אז דו וועסט נישט רעדן ביים דאווענען, דו וועסט מכבד זיין די שול – וועסטו ארויסגיין פון די פלאנטער אין וואס דו ביסט אריינגעפאלן וכו'; נישט נאר דו וועסט נישט האבן קיין שאדן, נאר דו וועסט נאך ארויס גיין מיט גרויסע רווחים, נאר בתנאי אז דו ביסט מקבל מער נישט צו רעדן אין שול.

קומענדיגע וואך וועט אם ירצה ה' זיין די יערליכן קאמפיין פון 'אנשי חיל', איך גיי מיר איבער די חשבונות פון די לעצטע אכט יאר, זע איך אז פון אלע קאמפיינס אינאיינעם האסטו מיר געהאלפן ברענגען פאר די קהילה א חשבון פון פופציג טויזנט דאלער, דאס איז נאר פון גיין נאך געלט ביי די קאמפיינס, אויס וואס דו האסט מיר נאך גאר אסאך געהאלפן במשך אלע יארן, און איך האף אז דו וועסט מיר אויך די יאר העלפן מיט גיין נאך געלט, מיך ארויסנעמען פון די חובות וואס איך האב זיך אנגעמאכט נאר פאר אנשי שלומינו, און אויך רעדן צו אנשי שלומינו זיי זאלן נישט חוזק מאכן פון די קאמפיין, איך נעם עס זייער פערזענליך.

נאכאמאל, אז דו וועסט מקבל זיין נישט צו רעדן אין שול, און נישט זיצן ביי די טיש וואו מען שמועסט און מען קופקעט – וועסטו זען א גרויסע ישועה.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך דארף דיין הילף, איך מאך די יאר נאכאמאל א קאמפיין פאר אונזערע מוסדות, איך בעט דיר אז אויך די יאר זאלסטו מיר העלפן, אבער נישט אבי יוצא צו זיין, נאר מיט די גאנצע הארץ.

די לעצטע אכט יאר האסטו זייער שיין געברענגט, די חשבונות זענען אז דו האסט געברענגט איבער דרייסיג טויזנט דאלער (31,375), דאס איז נאר פון גיין נאך געלט, אויסער דעם וואס דו העלפסט מיר א גאנץ יאר ווען עס פעלט נאר אויס, איך האף דו וועסט מיר העלפן און אויך אנווארעמען אנשי שלומינו, ווייל איך קען זאגן מיט א ריינעם אמת אז עס איז נישט מיינע חובות, עס איז ענקערע חובות צו בויען די שיינע קהילה מיט די מוסדות.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך מאך אם ירצה ה' קומענדיגע וואך די יערליכע אנשי חיל קאמפיין, די פארגאנגענע יארן האסטו מיר געהאלפן גיין נאך געלט, און אלעס אינאיינעם האסטו מיר געברענגט די סכום פון צוויי טויזנט דריי הונדערט און דרייצן דאלער, איך וויל דיר בעטן די יאר זאלסטו מיר העלפן, איך זע אז פאריאר האסטו נישט קאמפיינט, איך בין נישט צופרידן; ווייל אז דו ביסט א חלק פון די קהילה – דארפסטו האבן א געפיל פאר די פלאץ, און אז דו האסט ווייטאג אויף מיין הנהלה, דו האלסט אז זיי קומען דיר געלט וכו' – זאלסטו זיי רופן צו דין תורה, און אז דו האלסט אז איך קום דיר געלט – זאלסטו מיר בעטן; איך וויל נישט דו זאלסט זיין מיט ווייטאג אויף מיר.

איך נעם זייער פערזענליך אז דו האסט פאריאר זיך נישט וויסנדיג געמאכט פון מיינע געבעטן, איך בעט דעם אייבערשטן אז איך זאל דיך קענען דן זיין לכף זכות.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר, מאנטריאל קאנאדע

שטארק זיך אין הפצה, רק הפצה, כל היום הפצה, ועוד מעט הפצה; דאס איז דיין תיקון בזה ובבא.

אם ירצה ה' קומענדיגע וואך מאך איך די יערליכע קאמפיין פון "אנשי חיל", איך מאך די חשבונות פון די פריערדיגע יארן, איך זע אז די לעצטע פינף יאר האסטו קאמפיינט און געהאלפן מיר בויען די מוסדות און קהילה, אלעס אינאיינעם האסטו געברענגט אכט טויזנט צוויי הונדערט און זעכציג דאלער, איך בין דיר זייער דאנקבאר, און איך בעט דיר זייער אז די יאר זאלסטו אויך קאמפיינען, אבער נישט אבי יוצא צו זיין, נאר מיט די גאנצע הארץ און געפיל.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

מיין טייערער ... נרו יאיר

די יאר איז שוין כמעט אריבער, די וואך איז שוין חמשה עשר באב, עס הייבט שוין אן בלאזן די ווינט פון די הייליגע טעג, נאך אפאר וואכן פארן מיר שוין צום הייליגן רבי'ן, אנשי שלומינו קומען צום רבי'ן מיט מתנות; דו האסט גאר א שיינע מתנה צו ברענגען, נאך א ש"ס, א דריטע מאל ש"ס מיט צענדליגער מאל משניות.

איך האב געמאכט די חשבונות וויפיל געלט דו האסט געברענגט אלע יארן ביים קאמפיין, איך זע אז דו האסט מיר זייער שיין געהאלפן, האסט געברענגט א חשבון פון צוועלף טויזנט דאלער, פון גיין נאך געלט ביי די צייט פון די קאמפיין.

איך האף צום אייבערשטן אז דו וועסט מיר די יאר אויך העלפן, איך זע אז פאריאר האסטו גארנישט געברענגט קיין געלט, איך האף אז דו ביסט נישט פון די וואס זאגן אז די קאמפיין איז נישט פאר מיר וכו' וכו', איך וויל נישט אריין גיין אין די נארישקייטן.

די קאמפיין איז מיך ארויסנעמען פון די חובות וואס איך האב פון בויען די מוסדות און די קהילה, איך האף אז דו וועסט די יאר שאפן צדקה, בעטן צדקה, גיין נאך צדקה.