בריוון פונעם ראש ישיבה שליט"א

#2880 - מען דארף האבן סבלנות און שכל אויך צו דערוואקסענע מענטשן
מדות טובות, חיזוק פאר פרויען, סבלנות, שלום

בעזרת ה' יתברך


יום ב' פרשת וישב, י"ח כסליו, שנת תשפ"ב לפרט קטן


 


מרת ... תחי' ברסלב, ליבערטי


אזוי ווי איר האט אייזערנע געדולד צו די קינדער אין סקול, איר זענט א געטרייע מחנכת, איר האט סבלנות צו די מיידלעך, איר ווערט נישט פארלוירן ווען א מיידל לאכט, שמייכלט, שטעקט ארויס די צונג וכדומה; נאך מער סבלנות און ווארעמקייט דארף מען האבן צו דערוואקסענע.


פארוואס זאג איך אייך דאס?


איך ווייס אז איר פרובירט מיט אלע כחות צו מאכן די וועכנטליכע צאמקום פאר די טייערע פרויען, נשות אנשי שלומינו. אין אנהייב ווען די שטעטעל איז געווען קליין, געציילטע משפחות - איז געווען ממש א מחי', אזוי ווי די שפריך ווארט גייט: "ווי קלענער דער עולם - אלץ גרעסער די שמחה"; מען איז געזיצן אינאיינעם די פאר פרויען, מען האט געשמועסט, מען האט גערעדט פון תפלה, פון צדיקים. יעצט איז די שטעטל זיך אביסל צואוואקסן איז אייך שווער צו האלטן שטיל די פרויען און הערן מעשיות פון תפילה, אזוי אויך ווען איר נעמט די מייק און איר בעט מען זאל זיין שטיל.


זאלט איר נישט נעמען גארנישט פערזענליך, קיינער מיינט נישט קיין שלעכטס; יעדער איז גוט, יעדער איז וואויל; מען דארף האבן סבלנות און שכל צו דערוואקסענע מענטשן אזוי ווי צו קינדער.


שטארקט זיך, זייט יעדן איינעם מחזק; אלע דארפן א גוט ווארט, אלע דארפן א שמייכל. דער וואס געדענקט צו שמייכלען צו יעדן איינעם, מאכט יעדן גוט שפירן - באקומט א שמייכל פונעם אייבערשטן אליינס; מען הייבט אן שפירן א נאנטקייט צום אייבערשטן, וואס אן אנדערער שפירט נישט.

#2879 - אפאר הנהגות פאר די הייליגע חנוכה טעג
מנהגים, חנוכה

בעזרת ה' יתברך


יום ב' פרשת וישב, י"ח כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


יעצט קומען די הייליגע חנוכה טעג, איך וועל דיר שרייבן אפאר הנהגות:


-         מיר פירן זיך אנצוטון בגדי שבת (שטריימל און בעקיטשע) בעפארן צינדן די הייליגע ליכט, מען בלייבט זיצן מיט די בגדי שבת די האלבע שעה אדער מער – וואס מען זיצט ביי די ליכט.


-         מיר צינדן נישט ביים פענסטער ווייל היינט איז די עיקר פרסומי ניסא אין שטוב, מיר צינדן ביי א טיר, ביי די לינקע זייט.


-         עס איז כדאי צו כאפן א טבילה בעפאר'ן צינדן, אבער דאס קען נישט אפשטופן דאס צינדן.


-         ערב שבת חנוכה צינדט דער מאן אן קודם די מנורה און גלייך נאכדעם צינדט די ווייב די שבת ליכט.


-         מוצאי שבת חנוכה מאכט מען קודם הבדלה און נאכדעם צינדט מען אן די חנוכה לעכט.


-         מען דארף זיין אין שטוב אלע נעכט חנוכה צייטליך, אפילו די וואס זענען עוסק אין די הייליגסטע זאך, אין הפצה – דארפן אלעס אפשטעלן און אהיים גיין צינדן אין צייט, זינגען און טאנצן מיט די משפחה.


-         חנוכה איז א צייט פון "להודות ולהלל", מען דארף דאנקען און לויבן דעם אייבערשטן אז מיר ווייסן פון רבי'ן, מיר האבן אזא רבי מיט אזעלכע תלמידים.

#2878 - זע צו זיין צייטליך אין שטוב צו צינדען די חנוכה ליכט
תודה והודאה, ניגונים, חנוכה, התחדשות

בעזרת ה' יתברך


יום ב' פרשת וישב, י"ח כסליו, שנת תשפ"ב לפרט קטן


 


לכבוד מיין טייערער ... נרו יאיר


יעצט קומט יום טוב חנוכה, דער הייליגער רבי זאגט (לקוטי מוהר"ן חלק ב', סימן ב): "יְמֵי חֲנֻכָּה הֵם יְמֵי הוֹדָאָה", חנוכה איז א צייט פון דאנקען און לויבן דעם אייבערשטן, דאס איז שעשועי עולם הבא.


דעריבער וויל איך דיר מחזק זיין דו זאלסט אנהייבן פון היינט, פונדאסניי - דאנקען דעם אייבערשטן אויף די ניסים וואס ער טוט מיט דיר.


זע צו זיין צייטליך, ביים זמן הדלקה - אין שטוב, זעקס אזייגער איז דער זמן. מאך זיך גרייט דו זאלסט קענען זיין צייטליך.


צינד די הייליגע מנורה, זינג זמירות און זאג: "שכוח אייבערשטער פאר מיין לעבן, שכוח אייבערשטער איך בין א איד, שכוח אייבערשטער איך האב א משפחה, שכוח פאר יעדע זאך"; דאנק און לויב אן א שיעור, דאס וועט עפענען א טיר אין הימל, עס וועט קומען נאך ניסים, נאך ישועות.


א יישר כח פאר אלס וואס דו האסט געהאלפן פאר די נסיעה; איך וועל מתפלל זיין פאר דיר, פאר דיין ווייב און קינדער.

#2877 - א גרויסע שמחה אז דער דיין שליט"א האט זיך ארויסגעצויגן אין שטעטל
שטעטל

בעזרת ה' יתברך


יום ב' פרשת וישב, י"ח כסליו, שנת תשפ"ב לפרט קטן


 


לכבוד מיין טייערער ליבער תלמיד הרב הגאון ר' ... שליט"א, דיין דקהילתינו


הפעם אודה את ה' אויף די בשורה טובה אז מעלת כבודו האט זיך שוין ארויסגעצויגן אין שטעטל, דאס איז פאר מיר פריוואט און פאר די גאנצע קהילה בכלל א גרויסע שמחה.


גלייך נאך שבת האבן גערופן די אינגעלייט דערציילן פונעם שיינעם שבת, פון די שיעורי תורה, פון די ווארעמקייט און פון די חיזוק.


אויך האט מיר מיין זון הרב ... נרו יאיר דערציילט אז דער דיין איז געווען קוקן די מקוה טהרה "מקוה מלכה" און די אויסדרוקן פונעם דיין זענען אז דאס איז א מקוה "למהדרין מן המהדרין, כשר בתכלית הכשרות".


דער אייבערשטער זאל דיר געבן כח וסייעתא דשמיא צו פירן די קהילה און מצליח זיין בכל ענינים.


דיין ראש ישיבה וואס בעט פאר דיר; יואל בן ריצא רעכיל.

#2876 - ס'איז דא חובות, נישטא קיין געלט איינצוקויפן, די מוחות זענען צעקוועטשט
פרנסה, חובות, התחזקות, תודה והודאה, נסיונות

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד מיין טייערער ליבער ... נרו יאיר וזוגתו ... תחי'.


ווי איך פארשטיי גייט איר אריבער יעצט א צייט פון א נסיון; פרנסה איז ענג, עס איז דא חובות, נישטא קיין געלט איינצוקויפן; דאס מאכט די מוחות אביסל צעקוועטשט.


בעט איך ענק זייער זייער שטארק, פארלירט אייך נישט, עס איז אן אריבערגאנג; באלד וועט זיין גרויס שפע. עס איז נאר א נסיון צו זען אויב איר וועט בלייבן שטארק מיט אמונה, בלייבן באהבה ושלום. איך האף איר וועט דאס קענען באווייזן, נישט ווערן צעבראכן - וועט איר זען גרויסע ניסים אין לעבן.


דערמאנט אייך נאר די גרויסע נסים ביז אהער, צינדט אן לעבעדיגע מוזיק אין שטוב, טאנצט און פאטשט - וועט נמתק ווערן אלע דינים.

#2875 - זינג די זמירות און זינג אייגענע אויפגעמאכטע היימישע ניגונים
תודה והודאה, ניגונים, חנוכה

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


יעצט קומט דער הייליגער יום טוב חנוכה, חנוכה איז א צייט פון דאנקען און לויבן דעם אייבערשטן. דער הייליגער רבי זאגט (לקוטי מוהר"ן חלק ב', סימן ב): "יְמֵי חֲנֻכָּה", די חנוכה טעג, "הֵם יְמֵי הוֹדָאָה", זענען טעג פון לויבן דעם אייבערשטן; וויל איך דיר שוין בעטן דו זאלסט טון אלעס אין דער וועלט צו זיין צייטליך אין שטוב, צינדן די הייליגע מנורה ביים זמן.


זעקס אזייגער דארף מען שוין זיין נאך מעריב, נאך מקוה און נאך אלע הכנות – צינדן די הייליגע מנורה. מען דארף זיצן ביי די ליכט ווייניגסטנס א האלבע שעה, זינג די זמירות און זינג אייגענע אידישע ניגונים, אייגענע אויפגעמאכטע אויסגעטראכטע היימישע ניגונים, ווי צום ביישפיל:


"אייבערשטער איך געדענק נאך - נישט לאנג צוריק בין איך געווען אין לאך.


איך בין געווען איינער אליין - נישט געהאט וואו צו גיין.


געשלאפן אין גאס - קאלט און נאס.


יעצט זיך איך אין שטוב - מען האט זיך אזוי ליב.


מיט מיין ווייב און קינד - אויף דעם דאנק איך דיר אצינד".


קוק אויף די ליכט און דאנק דעם אייבערשטן אויף די ניסים, ווייל דו ביסט א גרויסער נס.


 

#2874 - עס זענען דא משפחות וואס עס איז זיי זייער וויכטיג א שבת התוועדות
אומאן, חסידות ברסלב, שבת קודש, שלום, שבת התוועדות

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


בנוגע דעם שבת התוועדות וואס מיר מאכן, דו זאגסט אז אינגעלייט זאגן דיר זיי ווילן נישט קומען וכו', וואס פעלט עס אויס?


דארפסט פארשטיין, עס זענען דא משפחות וואס עס איז זייער וויכטיג פאר זיי א שבת התוועדות, דאס לעבט זיי אויף, דאס פרישט זיי אויף; נאר צוליב דעם מאך איך דאס. איך בין באקוועם אין שטוב, איך זוך נישט אוועק צו גיין פון שטוב; יעדעס מאל מען מאכט א שבת אינדרויסן פון שטוב איז מיר דאס אן אפקומעניש, דאך מאך איך דאס פאר די משפחות וואס לעבן אויף און זענען זיך פריש מקרב צום רבי'ן.


אז מען מאכט א שבת התוועדות מוז נישט יעדער קומען, אז מען קומט נישט - ווערט מען נישט אויס תלמוד, אויס ברסלב'ער. איין פלאץ דארפן מיר גיין - קיין אומאן אויף ראש השנה; דארט האט דער רבי געזאגט (חיי מוהר"ן, סימן תג): "אִישׁ לֹא יֵעָדֵר", קיינער טאר נישט פעלן.


איך האף דו וועסט אריינברענגען ליבשאפט צווישן אנשי שלומינו, מען זאל זיך ליב האבן, נישט אז מען זאל זיך פליקן און שטעכן.

#2873 - אויסלערנען די מיידלעך ווי אזוי צו טאנצן
חתונה, חיזוק פאר מיידלעך, סקול

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


מרת ... תחי'


אויב איר וואלט געהאט אביסל צייט און כח צו קומען צוויי דריי מאל אין סקול בית פיגא אויסלערנען די מיידלעך ווי אזוי צו טאנצן - וועל איך אייך זייער דאנקבאר זיין.


יארן צוריק האט איר דאס געלערנט מיט די מיידלעך, זיי זאלן וויסן ווי אזוי צו טאנצן ביי חתונות. אלע פון זיי האבן שוין חתונה געהאט, יעצט איז דא א פרישע דור, זיי ווייסן נישט ווי אזוי צו טאנצן.


מיט יעדע זאך וואס מען העלפט די מוסד איז דאס א חלק פון הפצה, פון אריינברענגען אין די וועלט דעם רבינ'ס עצות.


יישר כח.

#2872 - זע עס זאל זיין אין דיין שטאט א בית המדרש "היכל הקודש"
בית המדרש, הפצה, מוהרא"ש, היכל הקודש

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד מיין טייערער ... נרו יאיר


זיי מקיים די ווילן פון מוהרא"ש, זע עס זאל זיין אין דיין שטאט א בית המדרש "היכל הקודש", און זע מען זאל עס פירן אזוי ווי מוהרא"ש האט געוואלט.


מיר מוזן טון מוהרא"ש'ס ווילן, עס מוז זיין אין יעדע פלאץ אין די וועלט א בית המדרש היכל הקודש; א פלאץ וואו מען רעדט דעם רבינ'ס ווערטער אן קיין דריידלעך, נאר אזוי ווי דער רבי האט אונז געלערנט.


זיי ממשיך מיט הפצה; פארשפרייט די גליונות, קארטלעך, קונטרסים, סידיס און וואס עס זאל נאר זיין, דער ציל איז אז נאך א מענטש זאל באקומען די עצות און חיזוקים פון רבי'ן.


איך בין דיר גרייט צו העלפן מיט א בית המדרש, איך ווארט צו הערן.

#2871 - א שיינע תפלה פאר געזונטע ערליכע קינדער
חיזוק פאר פרויען, קינדער, תפילות אויף אידיש

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


מרת ... תחי' ברסלב, ליבערטי


דא האט איר א שיינע תפלה צו זאגן יעדן טאג פון די חדשים:


"רבונו של עולם איך דאנק דיר פאר אלע חסדים וואס דו טוסט מיט מיר, איך דאנק דיר אז איך בין חתונה געהאט, איך האב א מאן, און יעצט ווארט איך בשעה טוב ומוצלחת א שמחה.


איך בעט דיר זייער, העלף מיר, מאך מיר א גרינגע לידה, העלף מיר עס זאל אלעס אריבערגיין גרינג, בנקל ובנחת. דער קינד זאל זיין געזונט ברמ"ח איברים ושס"ה גידים, דער קינד זאל אויסוואקסן א גרויסער צדיק.


העלף מיר בזכות די צדיקים וואס האבן זיך מוסר נפש געווען זייער גאנץ לעבן פאר דיינעט וועגן, העלף מיר בזכות די אבות הקדושים אברהם אבינו, יצחק אבינו און יעקב אבינו, בזכות משה רבינו, אהרן הכהן, יוסף הצדיק און דוד המלך, בזכות דער גרויסער צדיק רבי יצחק לוריא אשכנזי און דער גרויסער צדיק רבי ישראל בעל שם טוב און בזכות רבינו נחמן בן פיגא ותלמידיו, ובזכות רבינו מוהרא"ש זכר צדיקים לברכה, יהיו לרצון אמרי פי והגיון לבי לפניך ה' צורי וגואלי".

#2870 - חנוכה איז א יום טוב פון חינוך הבנים והבנות
חינוך הילדים, חנוכה

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


עס קומט שוין די הייליגע חנוכה טעג, דער הייליגער יום טוב.


מוהרא"ש האט זייער אסאך גערעדט מיט אונז אז חנוכה איז א יום טוב פון חינוך הבנים והבנות, דעריבער דארף מען זייער אכטונג געבן צו זיין צייטליך אין שטוב צינדן מיט די אינגלעך ביים זמן, זעקס אזייגער זאלסטו שוין שטיין מיט'ן שמש זאגן דעם לשם יחוד; מאך אלע הכנות פארויס, מקוה וכדומה, אלעס זאלסטו טון פריער אין טאג אז ביים זמן זאלסטו שוין צינדן.


זיץ ביי די ליכט; קודם זינג די זמירות, נאכדעם זאלסטו דערציילן דיינע קינדער פון די נס חנוכה און אונזער נס אז מיר ווייסן פון רבי'ן, נאכדעם זאלסטו זיך מתבודד זיין; מוהרא"ש זאגט, ביי די לעכט איז א צייט פון פועל'ן ישועות.

#2869 - מען מוז זיך פרייען מיט די גוטע זאכן
חסידות ברסלב, שמחה, נקודות טובות

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד מיין טייערער ... נרו יאיר


איינע פון די פונדאמענטן פון ברסלב איז די תורה פון "אזמרה" (לקוטי מוהר"ן חלק א', סימן רפב), מען זאל זוכן אין זיך גוטע זאכן, "וַאֲפִלּוּ כְּשֶׁמַּתְחִיל לְהִסְתַּכֵּל בְּעַצְמוֹ וְרוֹאֶה שֶׁאֵין בּוֹ שׁוּם טוֹב", אפילו מען זעט אין זיך אז מען האט נישט קיין שום גוטס, "וְהוּא מָלֵא חֲטָאִים", נאר מען איז פול מיט זינד, "אַף עַל פִּי כֵן אָסוּר לוֹ לִפֹּל מִזֶּה", מיט דעם אלעם טאר מען נישט ווערן געפאלן פון דעם, "רַק צָרִיךְ לְחַפֵּשׂ וְלִמְצֹא בְּעַצְמוֹ אֵיזֶה מְעַט טוֹב", נאר מען דארף זוכן אין זיך עפעס גוטס, "כִּי אֵיךְ אֶפְשָׁר שֶׁלֹּא עָשָׂה מִיָּמָיו אֵיזֶה מִצְוָה אוֹ דָּבָר טוֹב", עס קען נישט זיין מען זאל נישט האבן געטון אמאל אין לעבן עפעס א גוטע זאך, און אפילו די גוטע זאך וואס מען טרעפט שוין יא אין זיך איז נישט אזוי ווי עס דארף צו זיין, עס איז אויך פארשמירט וכו' וכו', - דאך מוז מען זיך פרייען מיט די גוטע זאכן. קוק אריין אין די תורה, לערן דאס און חזר דאס, ווייל דאס איז א פונדאמענט פאר אונזער לעבן.


ברודער, מיט'ן רבינ'ס עצות קען מען האבן א חיים טובים, אז מען זוכט אין זיך גוטס, מען טרעפט א מעט וואס מען איז נישט שלעכט - "וְעוֹד מְעַט וְאֵין רָשָׁע", ווערט מען א צדיק - "וְהִתְבּוֹנַנְתָּ עַל מְקוֹמוֹ וְאֵינֶנּוּ".

#2868 - רעד מיט אלעמען דבורי אמונה, מיט אידן און להבדיל מיט גוים
פרנסה, אמונה, ניבול פה, גוים, רעדן

בעזרת ה' יתברך


ערב שבת קודש פרשת וישלח, ט"ו כסליו, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


זאלסט רעדן מיט אלעמען דבורי אמונה, מיט אידן און להבדיל מיט גוים; ווען מען רעדט פון אייבערשטן ווערט ליכטיג, אלע פראבלעמען פאלן אוועק.


מוהרא"ש זאגט מען זאל רעדן דבורי אמונה אפילו מיט גוים; מוהרא"ש זאגט דאס איז אן עצה ווען מען דארף טובות פון זיי זאל מען זיי זאגן אין זייער שפראך: "יברכך ה'" - דער אייבערשטער זאל דיך בענטשן; דעמאלט ווערן זיי בטל ומבוטל, זיי טוען אלעס וואס מען בעט זיי.


איך אליינס האב דאס געהאט צענדליגער מאל, איך האב געדארפט אנקומען צו זייערע טובות און נאכן מזכיר זיין שם שמים, נאכן זאגן עפעס ווערטער פון אייבערשטן - האבן זיי געטון וואס איך האב געבעטן.


אז דו ווילסט מצליח זיין - זאלסטו אכטונג געבן עס זאל זיין אלעס בקדושה. געב אכטונג דיינע ארבעטערס זאלן נישט רעדן ניבול פה, ארבעטערס וואס רעדן ניבול פה פארטרייבן די שכינה הקדושה און אז מען פארטרייבט דעם אייבערשטן איז נישטא קיין הצלחה.


דער אייבערשטער זאל העלפן זאלסט האבן הצלחה אין אלע ענינים.

#2867 - שכר לימוד איז נישט קיין נדבה
מדות טובות, חובות, מוסדות, שכר לימוד

בעזרת ה' יתברך


יום ה' פרשת וישלח, י"ד כסליו, שנת תשפ"ב לפרט קטן


 


לכבוד ... נרו יאיר


מען זאגט מיר פון אפיס אז דו ביסט שולדיג קרוב צו צען טויזנט דאלער פאר שכר לימוד; קען זיין דו ביסט געדרוקט, דו האסט נישט קיין געלט צו צאלן, אבער דאס איז נישט קיין תירוץ אויף דעם וואס דו הייבסט נישט אויף דעם טעלעפאן ווען מען רופט דיר פון אפיס.


עס איז זייער נישט שיין פון עלטערן דאס צו טון פאר די מוסד וואו די קינדער לערנען. די גאנצע מוסד; די מלמדים, די טיטשערס - ארבעטן ביטער שווער, זיי טוען אזויפול פאר די קינדער, קומט אונז דאס צוריק צו טון? זיך נישט וויסנדיג מאכן? צו שפייען אין פנים?!


שכר לימוד איז א נדבה? ווען מען צאלט שכר לימוד טוט מען איינעם א טובה? דאס איז א נדבה?! דאס איז פאר די אייגענע קינדער! דאס איז פאר מענטשן וואס זיצן פון אינדערפרי ביז ביינאכט מיט דיינע קינדער, מיט די גרעסטע מאס סבלנות, דאס טוסטו צוריק?!


איך זאג דיר קלאר דו זאלסט וויסן, אויב דו וועסט זיך נישט וויסנדיג מאכן, דו וועסט איגנארירן די מוסד - וועלן מיר ווייטער לערנען מיט דיינע קינדער, איך גיי זיי נישט פארשעמען, איך גיי זיי נישט אהיים שיקן; אבער וואס איז מיט דיר? וואס בעט איך פון דיר? איך בעט סך-הכל הייב אויף דעם טעלעפאן ווען מען רופט דיר, הער וואס מען בעט; ווער זאגט מיר דארפן די גאנצע צען טויזנט דאלער וואס דו ביסט שולדיג? מיר וועלן זיין צופרידן מיט א צוואנציגער, מיט א צענער; וואס הייסט מען מאכט זיך נישט וויסנדיג?!

#2866 - פילע אידישע שטיבער שטייען דורך די גליונות און בריוו
הפצה, צדקה, סגולות, עצתו אמונה, בריוו, גליון, ישועות

בעזרת ה' יתברך


יום ג' פרשת וישלח, י"ב כסליו, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


יא, זיכער; אז דו וועסט געבן צדקה צו דרוקן די גליונות און די נייע ספרים עצתו אמונה - וועסטו האבן א ישועה.


די הבטחה וואס מוהרא"ש האט צוגעזאגט, אז ווער עס וועט נעמען א חלק אין דרוקן אשר בנחל וועט זען ישועות, דאס גייט אויך ארויף אויף די גליונות און קונטרסים. וואס שטייט אין די גליונות? וואס שטייט אין די נייע ספרים? עס שטייט נאר ווערטער, שכל און חיזוק פון מוהרא"ש, אזויפיל אידן זענען זיך מחזק מיט דעם, אזויפיל אידישע שטובער שטייען בזכות דעם, אזויפיל קומען צוריק צום אייבערשטן בזכות דעם, וואס איז בכלל די פראגע?


וואויל איז דעם וואס נעמט א חלק אין דרוקן די גליונות מידי שבת בשבתו; די גליונות מאכן אזא מהפכה אין די וועלט, עס איז נאכנישט געווען אזא הפצה אין ברסלב אזוי ווי די הפצה מיט די גליונות. אלע ליינען דאס, אלע ווארטן אויף דעם; מענטשן גייען פון שול צו שול זוכן א גליון, מען ווערט צוגעקלעבט צו דעם, בפרט צו די בריוו פון עצתו אמונה, איש אמונות; מענטשן זאגן אז דאס לעבט זיי אויף, דאס איז זיי אזוי מחזק.


דער אייבערשטער זאל העלפן זאלסט האבן הצלחה אין אלע ענינים.

#2865 - גוים זאלן זיך נישט דרייען אין די בנינים בשעת די קינדער זענען דארט
מוסדות

בעזרת ה' יתברך


יום ד' פרשת וישלח, י"ג כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


איך בעט דיר זייער זאלסט אכטונג געבן אז דער גוי וואס רייניגט אין תלמוד תורה, אין מיידל סקול - זאל נישט האבן קיין שייכות מיט די קינדער; נישט זען די קינדער און נישט זיין אינעם בנין וואו די קינדער לערנען.


אויב מען דארף האבן העלפערס ביי די קינדער - זאלסטו נאר נעמען ערליכע אינגעלייט, בשום אין אופן זאלן זיין גוים צווישן די קינדער.


איך האף דו וועסט טון מיין ווילן.


דער אייבערשטער זאל העלפן זאלסט האבן הצלחה אין אלע ענינים.

#2864 - מ'קען זייער גרינג אלעס איבערדרייען צום גוטן
תפילה והתבודדות, שאלות, צרות, תהלים, תכלית, נאמען, חכמות

בעזרת ה' יתברך


יום ב' פרשת וישלח, י"א כסליו, שנת תשפ"ב לפרט קטן


 


... תחי', תלמידה בית פיגא ברסלב


איך האב ערהאלטן אייער בריוו.


איך פריי זיך זייער צו הערן אז איר זאגט תהילים און איר האט שוין מסיים געווען די זעקסטע מאל ספר תהלים.


מען קען זיך נישט פארשטעלן דאס גרויסקייט פון זאגן תהלים; דער רבי זאגט (לקוטי מוהר"ן חלק ב, סימן עג) אז תהלים ברענגט צום אייבערשטן, תהלים ווייזט די וועג ווי אזוי מען ווערט נאנט צום אייבערשטן; אז מען זאגט תהלים האט מען כח נישט אראפצופאלן, מען בלייבט אן ערליכער איד.


זייט זיך נישט מבלבל אז איר האט אסאך נעמען; מוהרא"ש זאגט טאקע מען זאל נישט געבן פאר א קינד אסאך נעמען, מען זאל געבן אדער איין נאמען אדער צוויי נעמען, ווייל: "אסאך נעמען - מער פראבלעמען", אזוי האט מוהרא"ש געזאגט, אבער אז איר האט אפאר נעמען - מיינט נישט אז איר וועט ליידן. עס איז אזוי ווי ביי חכמת היד, וואס מוהרא"ש זאגט: "כָּל הַחָכְמָה הַזֹּאת הוּא אֱמֶת לַאֲמִתּוֹ", די חכמה פון קוקן אויף די האנט און זען וואס גייט זיין מיט'ן מענטש איז אן אמת'ע חכמה, "יֵשׁ קַו הַחַיִּים", מען קען זען אויפ'ן האנט ווילאנג מען גייט לעבן, "קַו הַחָכְמָה", מען קען זען אויב מען האט חכמה, "קַו הַשֻׁלְחָן", מען קען זען אויב מען וועט האבן פרנסה, "קַו הַגְּדוּלָּה", אויב מען וועט האבן גרויסקייט, "וַאֲפִלּוּ אִם קוֹרְאִים בְּקַו הַחַיִּים וְכוּ', שֶׁהָאָדָם הַזֶּה יֵשׁ לוֹ קִצּוּר יָמִים וְהוֹלֵךְ לָמוּת וְכוּ', אוֹ שֶׁנִּגְזַר עָלָיו עֲנִיּוּת וְכוּ'", דאך דארף מען וויסן, ווער עס קען די חכמה פון חכמת היד און זעט לויט די סימנים אויף די הענט אז ער וועט לעבן ווייניג, נישט האבן א שידוך, אדער נישט האבן קיין קינדער, "אִם רַק יְסוֹבֵב פָּנָיו אֶל הַקִּיר וְיִבְכֶּה בִּדְמָעוֹת שָׁלִישׁ אֶל הַקָּדוֹשׁ בָּרוּךְ הוּא, וְיַחְזֹר בִּתְשׁוּבָה שְׁלֵמָה, הַכֹּל יָכוֹל לְהִתְהַפֵּךְ לְטוֹבָה, כִּי אֵין הַקָּוִים מְחַיְּבִים כְּלָל", אויב וועט ער אויסדרייען זיין פנים צום וואנט און וויינען מיט הייסע טרערן צום אייבערשטן, ער וועט זיך צוריק קערן צום אייבערשטן, ער וועט זאגן איין קאפיטל תהילים אדער טון א חסד פאר א צווייטן איד, דורכדעם ווערט אויסגעדריידט אלע שלעכטס; אזוי איז ביי אלע זאכן, מען טאר זיך נישט צעברעכן פון קיין שום זאך אין די וועלט, מיר האבן די שטארקע געווער פון תפילה והתבודדות, מען קען מיט דעם אלעס איבערדרייען.


אויף אייער פראגע, אויב עס איז א פראבלעם אז איר שפירט ווי די טעג פליען וכו'; אז מען טראכט אריין זעט מען אז עס איז טאקע אזוי, די טעג פליען אריבער אזוי שנעל א שאטן, "כַּצֵּל יָמֵינוּ עַל הָאָרֶץ וְאֵין מִקְוֶה" (דברי הימים-א כט, טו), זאגן אויף דעם חכמינו זכרונם לברכה (בראשית רבה צו, ב): "הַלְּוַאי כְּצִלּוֹ שֶׁל כּוֹתֶל, אוֹ כְּצִלּוֹ שֶׁל אִילָן, אֶלָּא כְּצִלּוֹ שֶׁל עוֹף בְּשָׁעָה שֶׁהוּא עָף", הלואי זאלן אונזערע טעג זיין אזוי ווי א שאטן פון א וואנט וואס נעמט אביסל צייט ווי לאנג עס גייט אריבער, אדער ווי א שאטן פון א בוים, אבער אז מען קוקט גוט זעט מען אז דאס לעבן פונעם מענטש איז ניטאמאל ווי אזא שאטן, נאר עס פליט דורך ווי די שאטן פון א פייגל וואס פליט.


אויף אייער פראגע אויב מען ווערט טמא וכו'; אז מען גייט אריין אין א בית הכסא, אפילו מען גייט אריין נאר צו נעמען עפעס - ווערט מען טמא, מען דארף זיך וואשן די הענט.


נעמט די עצה פון רבי'ן פון תפילה והתבודדות - וועט איר שפירן ווי א נייער מענטש, ווי איינער וואס איז אויסגעלייזט.


דער אייבערשטער זאל העלפן איר זאלט האבן הצלחה אין אלע ענינים.

#2863 - פרעגט אייערע עלטערן ווי אזוי זיך צו פירן
כיבוד אב ואם, צניעות, חיזוק פאר מיידלעך, דרך ארץ

בעזרת ה' יתברך


יום א' פרשת וישלח, י' כסליו, שנת תשפ"ב לפרט קטן


 


... תחי', תלמידה בית פיגא ברסלב


איך האב ערהאלטן אייער בריוו.


איך פריי זיך זייער צו הערן פון אייערע טיטשערס אז איר פירט זיך מיט דרך ארץ, ביים רבי'ן איז געווען דרך ארץ פון די וויכטיגסטע זאכן. דער רבי האט זיך אמאל אויסגעדרוקט: "ווען קסרים און קעניגן וואלטן געוויסט וואס פאר א דרך ארץ איך לערן מיט מיינע תלמידים, וואלטן זיי געשיקט זייערע קינדער לערנען ביי מיר"; אזוי שטארק איז געווען ביים רבי'ן דער זאך פון דרך ארץ.


בנוגע דער שכן וואס איר פלעגט שפילן מיט אים ווען איר זענט געווען יונג און יעצט איז ער שוין עלטער און ער זוכט צו רעדן מיט אייך, ער פרעגט אייך שאלות; מאכט זיך נישט וויסנדיג פון אים ווען ער פרעגט אייך שאלות, געבט אכטונג, יעצט זענט איר שוין עלטער קענט איר מער נישט רעדן מיט פרעמדע בחורים אדער אינגעלייט.


בנוגע אויב איר זאלט גיין מיט א הארץ קייטל וכו'; פרעגט אייערע עלטערן, זיי זענען זייער ערליך און איידל, ווי אזוי זיי זאגן אייך - אזוי זאלט איר זיך פירן.


דער אייבערשטער זאל העלפן איר זאלט האבן הצלחה אין אלע ענינים.

#2862 - איין שיינע מעשה קען צוריק ברענגען א מענטש צום אייבערשטן
שלום בית, כיבוד אב ואם, תשובה, התחזקות, סיפורי צדיקים, משפחה

בעזרת ה' יתברך


יום א' פרשת וישלח, י' כסליו, שנת תשפ"ב לפרט קטן


 


לכבוד ... נרו יאיר


איך האב ערהאלטן די בריוו פון דיר און דיין ווייב.


עס איז זייער ווייטאגליך צו הערן וואס איז געשען מיט איר מאמע, ווי זי פירט זיך השם ישמרינו.


דיר בעט איך זייער, זיי מחזק דיין ווייב, שטארק איר; זי דארף יעצט אסאך כח, איר מח קען דאס נישט דערהייבן. זאג איר אז זי קען ווייטער רעדן מיט איר מאמע, ווען זי רופט איר זאל זי איר דערציילן מעשיות פון די קינדער און מעשיות פון תפילה; מען קען נישט וויסן וואס איין שיינע מעשה קען יענעם כאפן ביים הארץ און צוריק ברענגען צום אייבערשטן.


אז עס שטערט נישט ענקער שלום בית זאלט איר ארייננעמען די געשוויסטער פאר שבתים, עס איז זייער א גרויסע מצוה; ווייל ווי ביטער ענק איז - איז זיי אסאך מער ביטער. איר זענט חתונה געהאט, איר האט אייער לעבן, זיי זענען נאך אליינס, זיי איז דאס אסאך שווערער.


זייט אייך נישט מייאש, בעט דעם אייבערשטן פאר איר און פאר אלע אידן; אלע זאלן תשובה טון, אלע זאלן צוריקקומען צו די דרך התורה.


ווייז דעם בריוו פאר דיין ווייב.

#2861 - אפילו אידישע ווידיאס איז נישט גוט צו קוקן
תפילה והתבודדות, תודה והודאה, מאוויס

בעזרת ה' יתברך


יום א' פרשת וישלח, י' כסליו, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


איך פריי זיך זייער צו הערן פון דיר, אויך פריי איך זיך צו הערן אז דו געדענקסט נאך ביז יעצט די שיינע הקפות פון שמחת תורה; עס איז גוט אריין אין דיר די הקפות, די שמחה, די שיינע ניגונים און טענץ.


בנוגע דיין פראגע, דו ווילסט וויסן אויב דו זאלסט קוקן אידישע ווידיאוס; עס איז בעסער נישט צו קוקן.


יעדע זאך וואס דו דארפסט - זאלסטו בעטן דעם אייבערשטן; רעד צום אייבערשטן אין אידיש, אויף דיין אייגענע שפראך. דער רבי האט געזאגט אז ער איז צוגעקומען צו זיינע מדריגות נאר ווייל ער האט אסאך גערעדט און געשמועסט מיט'ן אייבערשטן (שיחות הר"ן, סימן קנד).


דאנק דעם אייבערשטן פאר דיינע עלטערן, דו האסט זייער טייערע עלטערן.

#2860 - מ'טוט א גאנצן טאג פאר'ן רבי'ן
ישיבה, חסד, שטעטל, משמש דעם רבי'ן, ראש ישיבה

בעזרת ה' יתברך


יום ג' פרשת ויצא, ה' כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


האברך ... נרו יאיר דערציילט מיר אז דו העלפסט בויען דעם שטעטל; ווען מען דארף הילף קומסטו מיט דיין גאנצע הארץ העלפן בויען. סיי ביי די מקוה טהרה, סיי ביי די בתי מדרשים און יעצט ביי די מצה בעקעריי - אלץ קומסטו העלפן מיט אזא געפיל. ער זאגט מיר: "דער ראש ישיבה ווייסט נישט ווי געטריי די אינגעלייט זענען, אלע באזונדער, איינס ביי איינס - יעדער העלפט, יעדער טוט חסד" - דאס איז מיר ממש מחי'.


געלויבט דעם אייבערשטן איך פרוביר אויך צו טון א גאנצן טאג פאר'ן רבי'ן, א גאנצן טאג בין איך אין ישיבה. מאנטאג נאכט בין איך געגאנגען זינגען, מיר ענדיגן יעצט נאך א סידי, נעכטן נאכט האב איך געמאכט א סיום ביי מיר אין שטוב פאר אלע בחורים וואס לערנען הלכה, זיי האבן מסיים געווען א חלק הלכות שבת.


שבת חנוכה האף איך מיט'ן אייבערשטנ'ס הילף צו קומען מיט די ישיבה אין שטעטל, איך מאך א שטיקל פראגראם מיט אלע בחורים וואס גייען נאך געלט פאר די ישיבה, איך וועל זיין מיט זיי פון דאנערשטאג ביז זונטאג נאכט אין שטעטל.

#2859 - מיט'ן קול קריכט מען ארויס פון פלאנטער און מ'קומט אן צום אייבערשטן
תפילה והתבודדות

בעזרת ה' יתברך


יום ג' פרשת ויצא, ה' כסליו, שנת תשפ"ב לפרט קטן


 


לכבוד מיין טייערער ... נרו יאיר


איך בענק זיך זייער צו דיר, איך ווארט צו הערן פון דיר וואס דו טוסט, וואס דו לערנסט.


מוהרא"ש זאגט, עס שטייט אין זוהר הקדוש (השמטות, רסו ע"ב; עיין בעל הטורים) אז "סוּלָם" באטרעפט אזוי ווי "קוֹל"; אפילו א מענטש ליגט אויף דער ערד, "מֻצָּב אַרְצָה"; אויב נוצט ער זיין קול, ער האט דעם סולם, דעם לייטער, "וְרֹאשׁוֹ מַגִּיעַ הַשָּׁמָיְמָה", קומט ער אן ביזן הימל; אפילו מען איז אראפגעפאלן קען מען נאכאלץ ארויסגיין פון די פלאנטער און אנקומען צום אייבערשטן.


צו באקומען די לייטער קאסט נישט קיין געלט, מען דארף נאר עפענען דאס מויל און זאגן: "באשעפער איך גיי זיין גוט, באשעפער איך גיי שוין זיין וואויל".


שטארק זיך, דראפע זיך און דערהאלט זיך.

#2858 - איך וויל אויסטיילן נאך ספרי תהלים פאר די תלמידות
שלום בית, תודה והודאה, תהלים, שנה ראשונה, סקול

בעזרת ה' יתברך


יום ג' פרשת ויצא, ה' כסליו, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


טו מיר א טובה, באשטעל מיר נאך הונדערט תהלים'ס פון די גרויסע תהלים. אויפ'ן דעקל לייג ארויף די ברסלב'ער קרוין און פון אונטן קריץ אריין די ווערטער: "א מתנה פון דער ראש ישיבה".


די הונדערט תהלים'ס וואס דו האסט באשטעלט - איז מיר שוין אויסגעגאנגען, איך דארף שוין נאך; עס קומען אריין כסדר פרישע תלמידות, אלע ווילן די שיינע תהילים.


עס איז דא נאך א זאך וואס איך וויל געבן פאר אלע תלמידות; דאס וועל איך שוין רעדן מיט דיר.


שטארק זיך מיט תודה והודאה, דאנק און לויב דעם אייבערשטן אויף די חסדים, חסד חנם, וואס ער האט געטון מיט דיר ביז יעצט – וועט קומען צו גיין נאך גרעסערע חסדים.


מאך פרייליך דיין ווייב; דאס איז יעצט אין דיין ערשטע יאר, שנה ראשונה - דאס וויכטיגסטע זאך, וויכטיגער פון אלעמען.

#2857 - א חתונה אין ישיבה קאסט נישט קיין געלט, עס קאסט נאר א לאך
חתונה, אידיש געלט, שמחות

בעזרת ה' יתברך


יום ג' פרשת ויצא, ה' כסליו, שנת תשפ"ב לפרט קטן


 


לכבוד מיין טייערער ליבער ... נרו יאיר


איך וויל דיר בעטן אויב דו קענסט מיר העלפן מיט די חתונות אין ישיבה. זונטאג וישלח וועט אם ירצה ה' זיין נאך א חתונה אין ישיבה; איך קען נישט אלעס אליינס טון, איך דארף הילף פון אנשי שלומינו, נאר אז נאך אפאר חברים העלפן - קען איך אויספירן די רצון פון מוהרא"ש, מען זאל קענען מאכן שמחות בחנם.


עס לאזט זיך נישט גלייבן, מיר האלטן שוין ביי דרייסיג חתונות, מיר האבן געשפארט פאר זעכציג מחותנים הוצאות החתונה; עס איז גענצליך בחנם, עס ברענגט נישט קיין חובות, די מחותנים קומען און גייען אהיים פרייליך און צופרידן.


איינער פרעגט מיך פאריגע וואך וואס עס קאסט א חתונה אין ישיבה? זאג איך אים, עס איז גענצליך בחנם, עס קאסט נישט; עס קאסט נאר איין זאך, עס קאסט א לאך; עס מאכט לאכן צו זען ווי מענטשן קענען לעבן, מען לאזט לעבן, מען דארף נישט דאגה'נען א גאנץ לעבן ווי אזוי מען וועט חתונה מאכן, מען דארף נישט אוועקלייגן געלט, מען דארף נישט בארגן געלט, מען קען דערלעבן נחת פון די קינדער.


לאז מיר וויסן אויב דו קענסט מיר העלפן מיט די שמחות אין ישיבה, נעם די בחורים און אינגעלייט, אלע זאלן העלפן; ווען מען העלפט - העלפט מען זיך אליינס, אלע וועלן קענען מאכן שמחות בחנם.

#2856 - קיין איין גוטע ווילן גייט נישט לאיבוד
בריוו, רצונות

בעזרת ה' יתברך


יום ג' פרשת ויצא, ה' כסליו, שנת תשפ"ב לפרט קטן


 


לכבוד מיין טייערער ... נרו יאיר


איך האב ערהאלטן דיין בריוו.


איך האב געהאט א פראבלעם מיט מיין אימעיל, עס האט זיך פארמעקט זייער אסאך בריוו. איך האב נאכנישט געהאט א געלעגנהייט צו ליינען דיין בריוו, זיי אזוי גוט און שיק איבער די בריוו אויף וואס דו ווארטסט א תשובה; איך וועל דיר בלי נדר ענטפערן.


איך שטעל זיך פאר אז צענדליגער מענטשן מיינען אז איך וויל זיי נישט ענטפערן; וואס זאל איך טון אז דאס האט פאסירט.


גיי צום אייבערשטן, ביים אייבערשטן פארמעקט זיך נישט קיין איין ווארט, קיין איין גוטע ווילן, (פרשת תרומה, קנ:): "לֵית רְעוּתָא טָבָא דְּיִתְאֲבִיד מִקַּמֵּי מַלְכָּא קַדִּישָׁא", קיין איין גוטע ווילן גייט נישט לאיבוד.


בעט דעם אייבערשטן ער זאל רחמנות האבן אויף דיר.