בריוון פונעם ראש ישיבה שליט"א

בעזרת ה' יתברך - ערב שבת קודש פרשת ואתחנן - נחמו, י"ב מנחם-אב, שנת תשפ"ד לפרט קטן

לכבוד מיין טייערער ... נרו יאיר

די מצוה פון כיבוד אב ואם איז אין לשער, אוודאי איז עס נישט גרינג, אבער די מצוה איז אזוי גרויס אז אלעס פאלט אוועק.

בנוגע קויפן א דירה נעבן דיין שווער וכו'; עס איז כדאי, אזוי וועט דיין ווייב תחי' – וואס זי איז די יונגסטע – קענען העלפן אירע עלטערן, עס וועט דיר נישט שאטן, עס וועט דיר גארנישט פעלן. עס איז אזא גרויסע מצוה – כיבוד אב ואם, אלעס איז כדאי; מען פארדינט סיי אויף די וועלט און סיי אויף יענע וועלט, אויך איז כיבוד אב ואם מכפר עוונות (עיין תנא דבי אליהו רבה, פרק כו).

געוואוין זיך צו אנצוהויבן דיין טאג מיט תפילה והתבודדות, כאפ א שפאציר, שמועס מיטן אייבערשטן, שמועס אויף דיין שפראך; הויב אן מיט דאנקען, דאנק אים אויף אלעס וואס ער טוט מיט דיר און בעט אויף ווייטער.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

לכבוד מיין טייערער ... נרו יאיר

זיי מחזק דיין ווייב זי זאל נישט ווערן וויי געטון פון די שכנים, ווען מען מוסר'ט איר אז זי קען נישט מחנך זיין וכו'; עס איז קיינעמ'ס געשעפטן ווי אזוי ענק זענען מחנך ענקערע קינדער, ענק זאלן מחנך זיין אויף ענקער וועג און די שכנים זאלן מחנך זיין אויף זייער וועג, און אז די שכנים ווילן נישט זייערע אינגלעך זאלן שפילן מיט מיידלעך – האט דאס מיט זיי, דארפן זיי אויסלערנען זייערע קינדער ווי אזוי זיך צו פירן.

איך בעט דיך זייער, זיי דן לכף זכות יעדן איינעם, דער סמ"ך מ"ם זוכט צו מאכן פירוד לבבות צווישן אנשי שלומינו, ער קען נישט ליידן אז מען האט זיך ליב, ער קומט צו יעדן איינעם מיט אן אנדערע וועג ווי אזוי צו מאכן מחלוקת מיט פיינטשאפט.

איך בין מחזק מיינע קינדער זאלן רעדן מיט דרך ארץ צו עלטערע, און אויב איך הער זיי רעדן מיט חוצפה צו עלטערע – בין איך זייער שטרענג און איך קנס'ע זיי אויף דעם. איך געדענק מיין טאטע שליט"א איז געווען צו מיר זייער שטרענג אויב ער האט מיך געהערט רעדן מיט זלזול צו איינעם עלטער פון מיר.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

לכבוד מיין טייערער ליבער ... נרו יאיר

עס איז דא א גרויסע יצר הרע צו פארברענען די נעכט און נאכדעם אויפשטיין שפעט, בעט איך דיר זאלסט אויסדרייען דיין סדר, גיי שלאפן פרי און שטיי אויף פרי, עס איז אנדערש ווען מען גייט שלאפן פרי און מען שטייט אויף פארטאגס.

בעט דעם אייבערשטן זאלסט וויסן ווי אזוי זיך צו פירן, גיי יעדן טאג א שפאציר צווישן די ביימער און גראז און שמועס מיטן אייבערשטן כאשר ידבר איש אל רעהו, בעט דעם אייבערשטן ער זאל דיך מקרב זיין צו אים, בעט אים זאלסט זיין א צדיק.

דער הייליגער רבי האט אונז דערציילט אז אזוי האט ער זוכה געווען צו קומען צו זיינע מדריגות, דורך תפילה והתבודדות בתמימות ופשיטות; נאר אזוי קומט מען אן צו זיין א צדיק.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

לכבוד מיין טייערער ... נרו יאיר

מען הערט שוין די ניגון 'אומאן אומאן, ראש השנה, אומאן אומאן, ראש השנה', מען פארט שוין צום רבי'ן זוכה זיין צו אלע תיקונים און צו א שנה טובה ומבורכת.

איך וויל דיר זייער בעטן און אויך אלע וואס העלפן מיר אין אומאן, איר זאלט אויפנעמען אלעמען בסבר פנים יפות, מיט א שמייכל, און אז מען רעדט זיך אפ און מען פארשעמט וכו', זאל מען דאס נישט נעמען צום הארצן, נאר דן זיין אלעמען לכף זכות, מען פארט א לאנגע וועג, מענטשן זענען איבערגעשטרענגט, ממילא פאסירט אז מען שרייט וכו'.

מוהרא"ש זאגט, עס שטייט (שמואל א כב, ב): "וַיִּתְקַבְּצוּ אֵלָיו כָּל אִישׁ מָצוֹק", ביי דוד המלך האבן זיך צאמגענומען אלע צעבראכענע מענטשן, "וְכָל אִישׁ אֲשֶׁר לוֹ נֹשֶׁא", אלע וואס האבן חובות, "וְ'כָל אִ'ישׁ מַ'ר נֶ'פֶשׁ", ראשי תיבות אומן; ווער קומט צום רבי'ן? דער וואס איז געלאפן צו דוד המלך, די צעבראכענע הערצער; דארף מען זיין גרייט נישט צו נעמען זאכן פערזענליך.

בעט דעם אייבערשטן אלעס זאל זיין בשלום, יעדער זאל קומען געזונטערהייט און צוריק פארן מיט ישועות, אויך זאל זיין וואסער, לעקטער, עסן וכו' וכו'.

עס לוינט צו העלפן אין אומאן, די הייליגע חכמים זאגן (עירובין נד.), א תלמיד פון רבי אליעזר האט געדארפט באקומען אן עונש שריפה, "אָמְרוּ, הַנִּיחוּ לוֹ, אָדָם גָדוֹל שִׁמֵּשׁ", מען האט אים פריי געלאזט בזכות וואס ער האט משמש געווען א צדיק.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

מיין טייערער ... נרו יאיר

ביסט א חידוש אין דיין חסד וואס דו טוסט מיט אנדערע, דו טוסט און טוסט פאר אידישע קינדער אזויפיל חסדים, ממש צו באוואונדערן.

וויל איך דיך מחזק זיין, זאלסט ווייטער טון חסד און אויך זאלסטו העלפן דיין ווייב מיט דיינע קינדער, ווייל אמאל קען פאסירן ביי די וואס טוען אסאך חסד אז דאס גייט אויפן חשבון פון די משפחה, מען קומט נישט אהיים, מען פארגעסט צו שמועסן מיט די ווייב – פון זיין אזוי אריינגעטון צו טון גוטס.

האסט א טייערע פרוי מיט ליכטיגע קינדער, זאלסט מיט זיי אויך טון חסד.

אויך זאלסטו בעטן דעם אייבערשטן נישט צו האלטן אין שטוב א סמ' טעלעפאן, נאך אביסל האסטו בחורים, און זיי וועלן נאכמאכן וואס זיי זעען אין שטוב, דארף מען באצייטנס זען וואס מען קען ראטעווען.

איך האב דיך ליב, דעריבער שרייב איך דיר.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

לכבוד מיין טייערער ... נרו יאיר

די גרעסטע מצוה וואס איז דא – איז עוסק זיין אין הפצה, פארפלייצן און פארשפרייטן די הייליגע ספרים און קונטרסים, עצות און התחזקות פון הייליגן רבי'ן – פאר די גאנצע וועלט.

אלע צדיקים קומען צו דעם מענטש וואס איז עוסק אין הפצה. אזוי זאגט דער רבי (ספר המדות אות פדיון שבוים חלק ב', סימן י): "מִי שֶׁעוֹסֵק בְּפִדְיוֹן שְׁבוּיִים", ווער עס נעמט ארויס געפאנגענע פון זיין פארשלאסן, "גְּדוֹלֵי הַדּוֹר נִכְלָלִים בּוֹ עַל יְדֵי זֶה", אלע צדיקים ווערן נכלל אין דעם מענטש; מוהרא"ש זאגט, דאס מיינט מען דער וואס איז מפיץ דעם רבינ'ס ספרים, דאס איז דאך פדיון שבוים, ארויסנעמען מענטשן פון די קליפות און טומאה, צו דעם מענטש קומען אלע צדיקים, אברהם אבינו, יצחק אבינו, יעקב אבינו, משה רבינו, אהרן הכהן, יוסף הצדיק, דוד המלך, נשמת רבי שמעון בר יוחאי, דער אריז"ל, דער בעל שם טוב הקדוש, דער הייליגער רבי, דער הייליגער רבי נתן וכו'; אלע ווילן ווערן איינס מיט דעם מפיץ.

שטארק זיך, האב נישט קיין חלישות הדעת, קוק נישט אויף קיינעם, גיי ווייטער פון שול צו שול, פון שטוב צו שטוב און פארפלייץ ווי מער די קונטרסים און ספרי אשר בנחל וכו'.

כתיבה וחתימה טובה.

בעזרת ה' יתברך - יום א' פרשת עקב, י"ד מנחם-אב, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך בעט דיר זייער זאלסט זיך שטארקן מיט אמונה, גלייב באמונה שלימה אז אלעס וואס דער אייבערשטער טוט – איז נאר פאר גוטס, נישטא קיין טעותים, נישטא קיין פערצופאל. די הייליגע חכמים זאגן (חולין ז.): "אֵין אָדָם נוֹקֵף אֶצְבָּעוֹ מִלְּמַטָּה", מען כאפט נישט קיין קלאפ אין פינגער, "אֶלָא אִם כֵּן מַכְרִיזִין עָלָיו מִלְּמַעְלָה", נאר אז מען רופט אויס אין הימל 'פלוני אלמוני זאל כאפן א קלאפ אין פינגער, אין פיס'; נישט נאר עס איז נישט קיין פערצופאל, נאר מען רופט גאר אויס די נאמען; ווער רופט אויס מיין נאמען? וואו רופט מען אויס מיין נאמען? אין הימל, בהשגחה פרטית; דארף דאס אויפהייבן און נישט אראפווארפן, דאס דארף שטארקן, אז 'דער אייבערשטער מאכט מיט מיר זאכן אז איך זאל זיך אויפוועקן און צוריק קומען צו אים'.

געב איבער א גרויסן דאנק פאר דיין ווייב תחי' פארן זיך מתנדב זיין צו העלפן אין בית פיגא באקוקן די האר פון די קינדער, מאכן זיכער אז עס נישטא קיין לייז וכו', יעדע זאך וואס מען טוט פארן רבי'ן, ובפרט פאר די מוסדות – איז אן אייביגע זכות.

אויך א דאנק פאר וואס זי געבט אוועק אירע נעכט צו העלפן אין די מקוה טהרה, דאס איז וואס ענק וועלן מיט ענק מיטנעמען.

בעזרת ה' יתברך - יום א' פרשת עקב, י"ד מנחם-אב, שנת תשפ"ד לפרט קטן

לכבוד מיין טייערער ... נרו יאיר

איך זע דיך זייער ווייניג, איך הער כמעט נישט פון דיר, אבער איך טראכט נאך פון דיר, און איך געדענק די ליבשאפט וואס מוהרא"ש האט געהאט צו דיר און דיין ווייב, ווי ענק פלעגן פרייליך מאכן מוהרא"ש וכו' וכו'.

איך דאווען צום אייבערשטן דו זאלסט מצליח זיין, סיי אין פרנסה און אויך אין פרנסה פאר די נשמה; זאלסט קומען אין שול דריי מאל א טאג דאווענען די דריי תפילות און לערנען חומש און משניות.

חודש תשרי וועל איך זיין די יאר אם ירצה ה' אין קרית ברסלב.

איך האב דיך ליב.

בעזרת ה' יתברך - יום ה' פרשת דברים, ד' מנחם-אב, שנת תשפ"ד לפרט קטן

לכבוד ... נרו יאיר

איך האב געזען די הערליכע גליון וואס דו מאכסט, די נייע גליון: "טעראפי", עס איז הפלא ופלא, צאמגענומען עצות פון הייליגן רבי'ן אויף אלע גייסטישע פראבלעמען וואס מענטשן ליידן השם ירחם. דער גליון וועט אסאך אויפטון, ווייל מענטשן זענען הונגעריג און מען זוכט טעראפי צו ווערן געהאלפן, און מיטן רבינ'ס עצות ווערט מען אויסגעהיילט, דעם רבינ'ס עצות איז די בעסטע און שטערקסטע טעראפי.

עס איז כדאי זאלסט לייגן ערשט די קלענערע תשובות און צווייט די לענגערע תשובות, ווייל די מח פון מענטשן זענען זייער איבערגעשטרענגט, און אז מען זעט א לאנגע תשובה - ווערט מען נאך מער איבערגעשטרענגט.

אויך האב איך נאך זאכן וואס מען קען שענער מאכן, ביטע זיך פארבינדן מיט מיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת דברים, ג' מנחם-אב, שנת תשפ"ד לפרט קטן

לכבוד ... נרו יאיר

דו האסט נישט קיין אנונג דיינע זכותים וואס ווארט דיר אפ אויף יענע וועלט פון מזכה זיין את הרבים מיט די בריוו פון עצתו אמונה; הונדערטער און טויזנטער מענטשן האבן אזויפיל חיזוק וועכנטליך און טאג טעגליך מיט די נייע ספרים, די בריוו פון עצתו אמונה, גענומען פון מוהרא"ש זכותו יגן עלינו וואס האט אונז אראפגעברענגט דעם הייליגן רבינ'ס תורות אויף לעובדא ולמעשה.

אויך די עצתו אמונה פאר קינדער איז עפעס אויסנאם שיין, די קינדער באלעקן זיך די פינגער מיט די מעשה און בילד, אלע קינדער ווארטן און פרעגן אויב די וואך וועט אויך זיין א מעשה מיט א בילד. דאס דערציילן די עלטערן שבת פאר די קינדער, אויך אין תלמוד תורה ביי די אינגלעך דערציילן דאס די מלמדים, און אין בית פיגא מאכן זיי די בילד אין גרויס, מען קאלירט דאס און מען לערנט דאס, עס איז א גאנצע לימוד, די גאנצע וואך דרייט זיך ארום די מעשה.

געב איבער א גרויסן שכוח פאר אברהם אליהו נרו יאיר פארן באצאלן דעם מעלער, דאס איז א גרויסע זכות; די מעשיות נעמט מען צאם און מען דרוקט דאס, און מען וועט דאס דרוקן און דרוקן פאר די קומענדיגע דורות.

די וואך בעט דעם מעלער זאל מאלן א בילד פון דעם צדיק דער באבא סאלי זכותו יגן עלינו, ווי ער זיצט ביי זיך אין שטוב, דער ספר ליקוטי מוהר"ן ליגט אויפן טיש (עס איז ידוע אז שטענדיג איז געלעגן ביים צדיק דער ספר ליקוטי מוהר"ן אויפן טיש), און פון די אנדערע זייט פון טיש שטייט אן עלטערע פרוי, געבינדן די קאפ מיט א טיכל, מיט קנייטשן אויפן שטערן, ווי זי וויינט, און נעבן איר פון דער זייט שטייט א הויכער מענטש, מיט א קליינע קאפל, מיט די הענט אין טאש, מיט א נישט פרייליכע פנים.

די פרוי שטייט און כליפעט... זי וויינט: "רבי העלף מיר, איך בין אן עלנדע פרוי, מיין מאן לעבט שוין נישט, און מיין זון שלאגט מיך און ער שטויסט מיך... רבי איך האלט נישט אויס... רבי, מיין זון, ער וויל מיך הרג'ענען..."

טייערע קינדער, די וואך דערציילן מיר א שרעקעדיגע מעשה וואס האט פאסירט ביים צדיק דער באבא סאלי זכותו יגן עלינו. צום ערשט ווילן מיר פרעגן, ווער ווייסט וואס מיינט באבא סאלי?

דער צדיק רבי ישראל אבוחצירא זכותו יגן עלינו איז געווען רב אין מאראקא, אין די שפראך מאראקיש איז באבא א 'חכם', און סאלי איז 'אידן', די חכם פון די אידן. נאכדעם איז ער געפארן קיין ארץ ישראל און זיך באזעצט אין די שטאט נתיבות, דארט האט דער צדיק געדינט דעם אייבערשטן און אידן זענען געקומען צו אים בעטן ברכות און ישועות.

איין טאג קומט אריין אן אלטע פרוי מיט א הויכער מענטש, די אלטיטשקע פרוי האט אויסגעפלאצט אין א געוויין: "רבי, איך בין אן עלנדע פרוי, מיין מאן לעבט שוין נישט, און מיין זון שלאגט מיך און ער שטויסט מיך... רבי איך האלט נישט אויס... רבי, מיין זון, ער וויל מיך הרג'ענען..."

דער צדיק האט אנגעהויבן וויינען, ער האט זיך ממש געשטיקט מיט וויינען: "אוי וויי... אוי וויי... וואלט איך געהאט א מאמע וואלט איך איר געהאלפן, איך וואלט געזיצן מיט איר, איך וואלט געגאנגען שפאצירן מיט איר..." דער צדיק וויינט אויפן קול: "אוי וויי, אוי וויי, א מאמע שלאגט מען...?!"

דער זון האט געהערט ווי דער צדיק וויינט האט עס אנגערירט זיין נשמה און ער האט גלייך תשובה געטון, ער רופט זיך אן צום צדיק: "איך זאג צו, איך וועל מער קיינמאל נישט שלאגן מיין מאמע, איך וועל איר מער נישט וויי טון, איך וועל שוין זיין א גוטער איד".

טייערע קינדער, מיר אלע זאגן אויך צו: "מיר וועלן קיינמאל נישט שלאגן א מאמע, מיר וועלן קיינמאל נישט וויי טון א מאמע, מיר וועלן זיין גוטע אידן".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ט' מנחם-אב, שנת תשפ"ד לפרט קטן

מרת ... תחי'

איר דארפט א סגולה פאר אייערע ביינער וואס טוען וויי; דער רבי האט דערציילט (חיי מוהר"ן, סימן נח):

עֶס אִיז גֶעוֶוען אַ אִיד וָואס פְלֶעגְט גֵיין צוּם הֵיילִיגְן בַּעַל שֵׁם טוֹב זְכוּתוֹ יָגֵן עָלֵינוּ, דֶער אִיד אִיז לֹא עָלֵינוּ קְרַאנְק גֶעוָוארְן, דֶער אִיד הָאט גֶעשִׁיקְט אַ שָׁלִיחַ צוּם הֵיילִיגְן בַּעַל שֵׁם טוֹב בֶּעטְן עֶר זָאל קוּמֶען צוּ אִים, וְכֵן הֲוָה, דֶער בַּעַל שֵׁם טוֹב אִיז גֶעפָארְן מְבַקֵּר חוֹלֶה זַיין, אוֹיפְן וֶועג הָאט דֶער שָׁלִיחַ גֶעפְרֶעגְט דֶעם בַּעַל שֵׁם טוֹב: "אִיךְ הָאבּ דָאךְ גֶעהֶערְט פוּן אַייךְ אַז אוֹיבּ מֶען טוּט אֱמֶת'דִיג תְּשׁוּבָה וֶועט מֶען זִיכֶער נִישְׁט שְׁטַארְבְּן פַאר דִי צַייט, אוֹיבּ אַזוֹי וִוי קֶען זַיין אַז דֶער חוֹלֶה צוּ וֶועם מִיר פָארְן יֶעצְט עֶר הָאט דָאךְ תְּשׁוּבָה גֶעטוּן אוּן עֶר אִיז אַן עֶרְלִיכֶער אִיד וִוי קֶען זַיין עֶר זָאל שְׁטַארְבְּן פַאר דִי צַייט?" הָאט דֶער הֵיילִיגֶער בַּעַל שֵׁם טוֹב גֶעעֶנְטְפֶערְט: "עֶס אִיז טַאקֶע וָואר דָאס וָואס אִיךְ הָאבּ גֶעזָאגְט, אַז אוֹיבּ מֶען טוּט אֱמֶת'דִיג תְּשׁוּבָה וֶועט מֶען נִישְׁט שְׁטַארְבְּן פַאר דִי צַייט אוּן עֶס אִיז אוֹיךְ וָואר אַז דֶער אִיד הָאט אֱמֶת'דִיג תְּשׁוּבָה גֶעטוּן אוֹיף זַיינֶע עֲבֵירוֹת, אָבֶּער עֶר הָאט זִיךְ נִישְׁט מִתְוַדֶה גֶעוֶוען פַארְן אֱמֶת'ן צַדִיק, דֶערִיבֶּער קֶען עֶר נִישְׁט וֶוערְן אוֹיסְגֶעהֵיילְט, אוּן דֶערְפַאר פָאר אִיךְ צוּ אִים כְּדֵי עֶר זָאל זִיךְ קֶענֶען מִתְוַדֶה זַיין פַאר מִיר, אוֹיבּ עֶר וֶועט זִיךְ מִתְוַדֶה זַיין פַאר מִיר וֶועט עֶר גְלַייךְ אוֹיסְגֶעהֵיילְט וֶוערְן, אוּן אוֹיבּ עֶר וֶועט זִיךְ נִישְׁט וֶועלְן מִתְוַדֶה זַיין - וֶועט עֶר וֶוערְן נָאךְ מֶער קְרַאנְק אוּן עֶר וֶועט אָנְהוֹיבְּן שְׁרֵייעֶן 'גֶעוַואלְד, וֵויי וֵויי' - פוּן גְרוֹיס וֵוייטָאג, בִּיז עֶר וֶועט שְׁטַארְבְּן, אוֹיבְן אִין הִימְל רֶעכְנְט מֶען אִים נִישְׁט דִי עֲבֵירוֹת וַוייל עֶר הָאט שׁוֹין תְּשׁוּבָה גֶעטוּן, אוּן אוֹיךְ נָאכְן שְׁטַארְבְּן וֶועלְן דִי קְלִיפּוֹת אוּן דִי חִיצוֹנִים נִישְׁט הָאבְּן קַיין שׁוּם כֹּחַ אוֹיף אִים וַוייל עֶר הָאט שׁוֹין תְּשׁוּבָה גֶעטוּן ,אָבֶּער וִוי לַאנְג עֶר לֶעבְּט נָאךְ וֶועלְן דִי חִיצוֹנִים זִיךְ נוֹקֵם זַיין אִין אִים".

וְכֵן הֲוָה, דֶער בַּעַל שֵׁם טוֹב אִיז גֶעקוּמֶען אוּן אִים גֶעזָאגְט בָּזֶה הַלָּשׁוֹן: "זָאג מִיר דַיינֶע עֲבֵירוֹת וָואס דוּ וֵוייסְט, דֶער אֵייבֶּערְשְׁטֶער וֵוייסְט אוּן אוֹיךְ וָואס אִיךְ וֵוייס", דֶער בַּעַל שֵׁם טוֹב הָאט דָאס אִיבֶּערְגֶעזָאגְט דְרֵיי מָאל, אָבֶּער דֶער אִיד הָאט נִישְׁט גֶעוָואלְט, עֶר הָאט זִיךְ גֶעשֶׁעמְט, אוּן עֶר הָאט אָנְגֶעהוֹיבְּן שְׁרֵייעֶן: "אוֹי וֵויי, אוֹי וֵויי" - אוֹיף זַיינֶע וֵוייטָאג, וַוייל זַיינֶע גְלִידֶער הָאבְּן אָנְגֶעהוֹיבְּן זִיךְ צֶעבְּרֶעכְן, בִּיז עֶר אִיז גֶעשְׁטָארְבְּן.

נָאכְן דֶערְצֵיילְן דִי מַעֲשֶׂה הָאט דֶער רֶבִּי מְגַלֶּה גֶעוֶוען דִי תּוֹרָה (לִקּוּטֵי מוֹהֲרַ"ן חֵלֶק א', סִימָן ד), וואוּ דֶער רֶבִּי לֶערְנְט אוּנְז, אַז דוּרְךְ וִדּוּי דְבָרִים פַארְן צַדִיק, גֵייעֶן אַרוֹיס אַלֶע שְׁלֶעכְטְס פוּן דִי בֵּיינֶער.

היינטיגע צייטן קען מען מקיים זיין וידוי דברים לפני הצדיק דורכן גיין צו קברי צדיקים און דארט דערציילן וואס מען האט אלץ געטון, אדער דורך לערנען די ספרים פון צדיק און זיך מתודה זיין אויפן ספר וכו'.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ט' מנחם-אב, שנת תשפ"ד לפרט קטן

מיין טייערער ... נרו יאיר

איך האב ערהאלטן דיין בריוו.

איך בין זייער איבערגענומען פון וואס עס שטייט אינעם בריוו, אז דו האסט געהאט א טעבלעט אפן צו גילוי עריות און נאך אסאך תפילה און אסאך חיזוק פון הייליגן רבינ'ס עצות האסטו געהאט די שטארקקייט דאס צו צעברעכן.

יעצט קומט דיר א גוטע שידוך, יעצט אז דו ביסט ארויס פון די קליפות קומט דיר א נס, דער רבי זאגט (ספר המדות אות ישועה, סימן טז): "כְּשֶׁאָדָם בָּא לְאֵיזֶה נִסָּיוֹן" ווען א מענטש האט א נסיון, "יֵדַע כְּשֶׁיַּעֲמוֹד בְּזֶה הַנִּסָּיוֹן" דארף ער וויסן, אז אויב ער וועט בייקומען די נסיון - "שֶׁהַקָּדוֹשׁ בָּרוּךְ הוּא יַעֲשֶׂה לוֹ נֵס" וועט דער אייבערשטער מאכן מיט א נס, און אז דו ביסט בייגעקומען די שווערע נסיון, דו האסט אוועק געווארפן די טעבלעט - וועסטו זען גרויסע ניסים.

שרייב מיר כאטשיג איין מאל א וואך א בריוו, מיר זאלן בלייבן צוגעבינדן איינער מיטן צווייטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

מיין טייערער ליבער הארציגער ... נרו יאיר

איך פריי זיך זייער צו הערן אז דו נעמסט אן וואס איך זאג דיר, איך האב דיך ליב, איך וויל נאר דיין טובה; ביז אהער האב איך דיר ברוך ה' נישט אפגענארט, און יעצט וויל איך דיר ווייטער נישט אפנארן. מאך זיך א חשבון וויפיל טובות דו האסט באקומען די פאר יאר דא אין היכל הקודש, פון די טיפע פלאנטערס וואס דער רבי האט דיך ארויסגעצויגן, ממש 'מאשפות ירים אביון' פון די מיסט האט דער אייבערשטער רחמנות געהאט אויף מיר ארעמאן, און ווי האט מיך דער אייבערשטער געברענגט? 'להושיבי עם נדבים' צו די גרויסע צדיקים.

איך וויל דיך זייער בעטן, רעד שיין צו דיין ווייב, האלט איר טייער, און אז זי שרייט און זי דמיונ'ט וכו' - זאלסטו נאך מער רחמנות האבן אויף איר, און אז זי זידלט דיך אפ, זי שרייט אויף דיר אז דו רודפ'סט איר, זי זאגט אלעמען אז דו ביסט נישט גוט - זאלסטו דאס נעמען פאר כפרת עוונות, אזוי וועסטו זוכה זיין צו ווערן געראטעוועט פון גיהנום.

עס איז געווען א איד וואס זיין ווייב האט אים זייער דערביטערט די יארן, ביז איינמאל האט ער איר געזאגט: "כאטשיג וועל איך נישט אנקומען אין גיהנום צוליב דיר, ווייל חכמינו זכרונם לברכה זאגן (עירובין מא:) 'מי שיש לו אשה רעה' ווער עס האט א שלעכטע פרוי, 'אינו רואה פני גיהנום' וועט נישט גיין אין גיהנום", האט זי געזאגט: "ניין, ניין, ניין, דאס נישט, איך וועל דאס נישט דערלאזן אז דו זאלסט נישט האבן קיין גיהנום, פון היינט, וועל איך דיר מער נישט טשעפען, איך וועל זיין צו דיר זייער שיין", איז דער איד געלאפן צום רב וויינען: "מיין ווייב איז א שלעכטע, זי איז צו מיר נאר גוט ווייל זי וויל נישט איך זאל אפקומען מיינע עבירות..."

נעם ארויס פון דעם אז מען דארף זוכן דאס גוטס; אויב די ווייב שרייט און זידלט דארף מען טראכטן 'זי איז אן אשה טובה, זי ברענגט מיר איך זאל נישט דארפן אריבערגיין די ברענעדיגע גיהנום'.

טראג איר און ברענג איר, שפּאַר איר נישט איין אין שטוב, און אז זי בעט דיר זאלסט איר נעמען צום דאקטער - זאלסטו איר נעמען, שלמה המלך זאגט (משלי יב, י): "יוֹדֵעַ צַדִּיק נֶפֶשׁ בְּהֶמְתּוֹ", דער ערליכער איד ווייסט וואס זיין משפחה דארף, ער העלפט זיי אלע; זיין ווייב, זיינע קינדער, און אפילו אויף די בהמות האט ער רחמנות.

איך בין זייער איבערגענומען פון דיר, ווייל איך זע ווי דו פאלגסט דעם רבי'ן מיט מסירות נפש, דו האסט אוועקגעווארפן די משקה המשכר; וואס עס נעמט פאר אנדערע יארן לאנג, מען גייט פון איין ריהעב צום צווייטן, און מען קען נישט אפלאזן דעם ביטערן טראפ, און ביי דיר איז דאס פשוט; א ווארט פון רבי'ן איז א ווארט, און אזוי מיט דיינע אנדערע זאכן וואס דער רבי האט דיך אויסגעהיילט, זאלסטו נאך די איין זאך פאלגן דעם רבי'ן, רעדן שיין צו דיין ווייב - וועסטו אלעס פאררעכטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

מרת ... תחי'

וואס ווילט איר פון אייער מאן? וואס עסט איר אים אויף זיינע קושקעס? איר זענט דאך א אידישע טאכטער, א אידיש קינד טאר זיך נישט אזוי אויפפירן, וואס איז ער שולדיג אז איר זענט איבערגעשטרענגט? וואס ווילט איר פון אים? ביי מיר איז קלאר אז דאס וואס איר ווארט אזוי לאנג אויף אייער ישועה וכו' - איז נאר צוליב די צער און ווייטאג וואס איר זענט מצער אייער מאן, און אלע סגולות און אלע זאכן וואס ענק טוען - האלט זיך אפ, ווייל איר פארטרייבט די שכינה הקדושה פון שטוב.

איך זאג אייך צו, אויב איר וועט אויפהערן וויי טון אייער מאן – וועט איר געהאלפן ווערן וכו', און די סגולות פון אזויפיל יארן וועלן אנהויבן ארבעטן, אייער מאן איז א טייער קינד, ער טוט אלעס פאר אייך.

איך ווארט צו הערן אז איר האט אנגענומען די ווערטער וואס איך שרייב מיט בלוט פון הארץ.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

...

מען טאר נישט אריינגיין אין יענעמ'ס שטוב אן קלאפן אין טיר, און אז מען קומט קלאפן און יענער עפנט - מיינט נאכנישט אז מען קען אריינשפאצירן, אפשר איז יענעם יעצט נישט איינגענעם וכו'; אפילו א שוועסטער.

לייגט זיך נישט אן אויף אייער שוועסטער. אפילו עלטערן דארפן פארשטיין ווען און וויפיל צו גיין צו די קינדער, שלמה המלך זאגט (משלי כה, יז): "הֹקַר רַגְלְךָ מִבֵּית רֵעֶךָ" האלט צוריק דיינע פיס פון גיין צו דיין פריינד'ס שטוב, "פֶּן יִשְׂבָּעֲךָ" טאמער וועסטו גיין צופיל וועט ער זאט ווערן פון דיר, "וּשְׂנֵאֶךָ" און ער וועט דיך פיינט האבן.

מען קען גיין צו א שוועסטער אין שטוב, מען דארף אבער וויסן ווען און וויפיל.

זאגט יעדן טאג די דרייצן אני מאמין – וועט איר באקומען א שטארקע אמונה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

איך ווייס נישט וואס צו שרייבן, איך האב דיך זייער ליב, ביסט אן ערליכער מענטש, אבער ווי קען איך זאגן פאר דיין ווייב זי זאל זיך נישט גט'ן ווען זי האט א ריכטיגע טענה, זי וויל א מאן און דו לעבסט נישט מיט איר, דו לויפסט אוועק פון שטוב יעדע נאכט מיט א צווייטע מעשה.

גלייב מיר, איך האב דיך ליב, אבער איך האב זייער רחמנות אויף דיין ווייב, זי האט א גערעכטע טענה. חנה צירל, רבי נתן'ס טאכטער האט דאס גע'טענה'ט צו איר טאטן רבי נתן: "טאטע איך דארף א מאן, נישט קיין מלאך"; איר מאן רבי נחמן, א זון פונעם ברסלב'ן רב רבי אהרן - איז געווען אפגעשיידט, זי האט געזאגט: "איך וויל א מאן", און זי האט זיך גע'גט און נאכאמאל חתונה געהאט, און דער רבי נחמן איז אוועק פון די וועלט.

איך האב דיר שוין אזויפיל געשריבן זאלסט זיך פירן ווי מיר האבן מקבל געווען פון מוהרא"ש די וועג פון לעבן מיט די ווייב, און דאס זאל זיין עבודת השם; א שאד דו האלסט זיך קלוגער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

דער רבי זאגט (לקוטי מוהר"ן חלק ב', סימן צה): "כְּשֶׁהָאָדָם אוֹמֵר תְּחִנּוֹת וּבַקָּשׁוֹת" ווען א מענטש דאווענט צום אייבערשטן, "וְחוֹשֵׁב בְּלִבּוֹ וּמְצַפֶּה שֶׁיִּבְכֶּה" און ער טראכט 'ווען גיי איך שוין אביסל וויינען? ווען גיי איך קענען בעטן מיט טרערן?' "זֹאת הַמַּחֲשָׁבָה אֵינָהּ טוֹבָה" דאס אליין איז מחשבות זרות, "וְהִיא מְבַלְבֶּלֶת גַּם כֵּן אֶת דַּעְתּוֹ" און עס שטערט פון אינזין האבן וואס מען בעט, "כִּי מֵחֲמַת זֶה אֵינוֹ יָכוֹל לוֹמַר הַבַּקָּשׁוֹת בְּלֵב שָׁלֵם בִּשְׁלֵמוּת" און דאס שטערט אים פון קענען אינזין האבן זיינע בקשות, "כִּי צְרִיכִין בִּשְׁעַת אֲמִירַת תְּחִנּוֹת וּבַקָּשׁוֹת לְהַרְחִיק מֵעַצְמוֹ כָּל מִינֵי מַחֲשָׁבוֹת חוּץ שֶׁבָּעוֹלָם, רַק לְכַוֵּן דַּעְתּוֹ אֶל הַדִּבּוּרִים שֶׁהוּא מְדַבֵּר לִפְנֵי הַשֵּׁם יִתְבָּרַךְ כַּאֲשֶׁר יְדַבֵּר אִישׁ אֶל רֵעֵהוּ" ווען מען דאווענט דארף מען אוועק לייגן אלע מחשבות וואס זענען אויסער פירוש המילות, נאר וועלן זיך אויסבעטן ביים אייבערשטן אזוי ווי מען רעדט צו א גוטער פריינד, "וְאָז מִמֵּילָא בְּקַל יִתְעוֹרֵר לִבּוֹ עַד שֶׁיָּבוֹא לִבְכִיָּה גְּדוֹלָה בֶּאֱמֶת" וועט שוין במילא זיך עפענען דאס הארץ און מען וועט זיך קענען אויסוויינען, "אֲבָל כְּשֶׁחוֹשֵׁב וּמְצַפֶּה עַל זֶה שֶׁיִּבְכֶּה" אבער אז מען שטייט און מען ווארט מען זאל קענען וויינען, "אֲזַי זֶה וָזֶה אֵינוֹ עוֹלֶה בְּיָדוֹ" האט מען גארנישט, נישט דאס וויינען און נישט דאס דאווענען, "כִּי הָאֲמִירָה בְּעַצְמָהּ נִתְבַּלְבְּלָה עַל יְדֵי זֶה כַּנַּ"ל" מען קען נישט אינזין האבן דאס דאווענען, "כִּי זֶה שֶׁחוֹשֵׁב וּמְצַפֶּה שֶׁיִּבְכֶּה, הוּא גַּם כֵּן בְּחִינַת מַחֲשָׁבָה זָרָה שֶׁמְּבַלְבֶּלֶת הַכַּוָּנָה, שֶׁאֵינוֹ יָכוֹל לִשְׁמֹעַ הֵיטֵב מַה שֶּׁהוּא מְדַבֵּר עַל יְדֵי זֶה" ווייל די מחשבות פון ווארטן צו קענען וויינען שטערט דאס אינזין האבן פירוש המילות, "כִּי הָעִקָּר לְדַבֵּר הַדִּבּוּר בֶּאֱמֶת לִפְנֵי הַשֵּׁם יִתְבָּרַךְ בְּלִי שׁוּם מַחֲשָׁבוֹת אֲחֵרוֹת כְּלָל כַּנַּ"ל, וְאִם יִזְכֶּה לִבְכִיָּה בֶּאֱמֶת מַה טּוֹב, וְאִם לָאו לָאו, וְלֹא יְבַלְבֵּל אֲמִירָתוֹ בִּשְׁבִיל זֶה כַּנַּ"ל, עיין שם.

זיי זיך נישט מבלבל פון גארנישט, העיקר זאלסט בעטן דעם אייבערשטן ער זאל רחמנות האבן אויף דיר, און קוק נישט אויף די אלע מחשבות וכו' וואס דאס קומט פונעם יצר הרע.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

מרת ... תחי'

עס וועט אריבערגיין די טונקעלע טעג, עס וועט באלד אויפשיינען די זון; אזוי גייט די וועלט, (בראשית א, ה): "וַיְהִי עֶרֶב וַיְהִי בֹקֶר", קודם איז טונקל, נאכדעם ווערט ליכטיג.

חכמינו זכרונם לברכה זאגן: "ברישא חשוכא", ערשט איז פינסטער, ערשט איז שווארץ, מען ליידט, מען מוטשעט זיך – "והדר נהורא" (שבת עז.), נאכדעם ווערט ליכטיג, נאכדעם ווערט זיס און געשמאק.

איר האט א טייערער מאן, און אז ער ווערט דערשראקן ווען איר רעדט מיט אייער מאמע וכו' - זאלט איר זיין גענוג קלוג צו רעדן צו אייער מאמע ווען ער איז אין שול אדער ביי די ארבעט.

זייט פרייליך, וועט איר זען גרויסע ישועות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

מרת ... תחי'

איך האב ערהאלטן אייער בריוו.

ווען א פרוי באנעבעכט אייך פארן האבן אזוי נאנט איין קינד צום צווייטן  - זאלט איר ענטפערן מיט א שמייכל: "איך בין נישט קיין נעבעך, א נעבעך איז די וואס ווארטן אויף קינדער"; לאזט נישט די ווערטער איבערנעמען אייער מח און צוליב דעם מאכן נישט גוטע החלטות אין לעבן וכו'.

נאך מער זאלט איר וויסן, דאס איז די מאדע ביי אסאך יונגע פרויען; מען טרעפט א צווייטע פרוי און מען וויל זיך באגריסן, מען פרעגט די נאמען און וויפיל קינדער מען האט, און אפילו באמת וויל מען יא קינדער און מען פרייט זיך מיט קינדער - שטעלט מען זיך אהער כאילו מען איז מעכטיג און מען זאגט: "נעבעך, האסט קינדער!" און אנשטאט מען זאל יענעם זאגן: "נעבעך קינדער? איך בין א נעבעך? נעבעך איז ווער עס האט נישט קיין צדיק און נעמט זיין וועג פון לעבן פון די גוי'אישע גאס".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת דברים, ב' מנחם-אב, שנת תשפ"ד לפרט קטן

מרת ... תחי', קרית ברסלב

איך פריי זיך זייער צו הערן אז איר זאגט תהילים און איר האט שוין געזאגט און געענדיגט איבער פיר הונדערט מאל תהילים.

האלטס אן די שיינע מנהג פון זאגן און ענדיגן יעדע וואך תהילים, אויך זאלט איר אריינפלעכטן אייערע אייגענע געבעט, אייער אייגענע לויב ווערטער, הערט נישט אויף דאנקען דעם אייבערשטן פאר אייער לעבן, פאר אייער מאן און קינדער, און פאר אלעס.

אויך זאלט איר בעטן פאר אייערע דורות, אלע זאלן אויפוואקסן מיט אמונה, אמונת חכמים, יראת שמים און מידות טובות.

בעזרת ה' יתברך - יום ה' פרשת עקב, י"ח מנחם-אב, שנת תשפ"ד לפרט קטן

לכבוד ... נרו יאיר

ווער פירט דיין שטוב - דו אדער דיינע קינדער? מען פרעגט נישט קינדער אויב זיי ווילן דאווענען, אויב זיי ווילן גיין אנגעטון איידל; קינדער טוען וואס די עלטערן זאגן, עלטערן דארפן זיין שטארק ווי אזוי מען פירט די שטוב, און נישט וואס די קינדער זאגן, ווילן, וויינען און שרייען - מיינט אז מען דארף אזוי טון.

זיי נישט פארנומען מיט זאגן מוסר פאר דעם און יענעם, ווען דו אליין דארפסט נאך אליין פאררעכטן וכו' וכו', מוהרא"ש זאגט, ביי אנשי שלומינו האט מען זיך געזארגט אויף די אייגענע רוחניות און אויף יענעמ'ס גשמיות, נישט אויף די אייגענע גשמיות און אויף יענעמ'ס רוחניות. חכמינו זכרונם לברכה זאגן (תענית לא.), ווען מען האט געזוכט שידוכים, אלע האבן געוואלט מען זאל זיי נעמען פאר שידוכים, "מכוערות שבהם מה היו אומרות" די מיאוס'ע האבן געזאגט: "קחו מקחכם לשום שמים", קוקט נישט אויף יחוס, קוקט נישט אויף געלט, נעמט אונז פאר כלות לשם שמים, "ובלבד שתעטרונו בזהובים", און ענק זאלן אונז געבן גאלדענע צירונג; שטייט פון צדיקים, וואס רופט מען זיי אן מיט אזא מיאוס'ע טיטל 'מכוערות' די מיאוס'ע? ווייל דער וואס איז פארנומען זאגן יענעם מוסר ווען זיין קאפ ליגט אים אין געלט, יענעם זאגט מען 'האב אינזין לשם שמים' און תוך כדי דיבור בעטן זיי גאלדענע צירונג - די זענען מיאוס'ע, ודו"ק.

בעט דעם אייבערשטן זאלסט קענען אויסארבעטן דיינע מידות, נישט זען שלעכטס ביי אנדערע, נאר זען גוטס ביי אלעמען. מיט תפילה קען מען ווערן א גרויסער צדיק, דער רבי האט געזאגט (שיחות הר"ן, סימן קנד) ער האט זוכה געווען צו קומען צו זיינע מדריגות נאר ווייל ער האט אסאך גערעדט צום אייבערשטן, און אז מיר וועלן דאס טון וועלן מיר אויך ווערן צדיקים.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, י"ז מנחם-אב, שנת תשפ"ד לפרט קטן

לכבוד ... נרו יאיר

נעם ארויס צוביסליך פון שטוב אלע ליין מאטריאל, עס איז נישט גוט צו האבן אין שטוב צייטונגען און מאגאזינען פון די פרעמד, אפילו די אידישע וואס איז געדרוקט מיט אידישע אותיות, און אפילו די וואס טוען עס אן מיט א לבוש פון תורות - איז עס פול מיט ליצנות און עס שאדט פאר יראת שמים.

מיר האבן אייגענע ליין מאטריאל וואס איז ריין פון ליצנות, אונזערע ליין מאטריאל, די שטעטל בלעטל איז אנגעפילט מיט יראת שמים, מיט אמונה און חיזוק אויף תפילה, אויך די גליונות איז מלא יראת שמים, און ווער רעדט נאך פון די נייע קונטרסים עצתו אמונה, דאס איז פול מיט חיזוק און יראת שמים, שכל און הדרכה פון מוהרא"ש זכותו יגן עלינו. אלע בריוו זענען פון אשר בנחל; מוהרא"ש האט מיר בפירוש געזאגט נאך די ליל שישי שיעורים: "פון יעדע שיעור זאלסטו מאכן הונדערט שיעורים", און דאס איז די בריוו פון עצתו אמונה, ווייל פון יעדע בריוו אין אשר בנחל קען מען שרייבן גאנצע בענדער ספרים, פון די שכל און וועג ווי מוהרא"ש האט אונז געלערנט ווי אזוי צו לעבן.

א גרויסן דאנק פארן העלפן מיט די יערליכע קאמפיין 'אנשי חיל' צו העלפן אונזערע מוסדות.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת עקב, ט"ז מנחם-אב, שנת תשפ"ד לפרט קטן

לכבוד ... נרו יאיר

טרעף א פלאץ פאר דיין ווייב וואו זי זאל זיין ראש השנה אין די טעג וואס דו פארסט קיין אומאן. בעסער איז זי זאל זיין אדער אין שטוב אדער ביי אירע עלטערן, נישט אוועק פארן מיט חבר'טעס פארברענגען וכו', ווייל ראש השנה איז א יום הדין, עס איז נישט קיין צייט פון פארברענגען וכו'.

עס איז טאקע שווער פאר א פרוי אז דער מאן פארט אוועק פאר א וואך, אבער אז מען ווייסט וואו מען פארט, פארוואס מען פארט און וואס מען טוט אויף מיטן פארן - איז דאס נישט שווער. דער הייליגער רבי האט זיך אויסגעדרוקט מיט די גרעסטע לשונות ארויס צו ברענגען ווי שטארק ער וויל מען זאל קומען צו אים, ער האט געזאגט (חיי מוהר"ן, סימן רכ): "וואס זאל איך אייך זאגן, קיין גרעסערס פון דעם איז נישט פארהאן"; נאך האט ער געזאגט (שם, סימן תה): "הָרֹאשׁ הַשָּׁנָה שֶׁלִּי הוּא חִדּוּשׁ גָּדוֹל וְהַשֵּׁם יִתְבָּרַךְ יוֹדֵעַ שֶׁאֵין הַדָּבָר הַזֶּה בִּירֻשָּׁה מֵאֲבוֹתַי, רַק הַשֵּׁם יִתְבָּרַךְ נָתַן לִי זֹאת בְּמַתָּנָה שֶׁאֲנִי יוֹדֵעַ מַהוּ רֹאשׁ הַשָּׁנָה", דער אייבערשטער האט מיר געגעבן א מתנה אז איך ווייס וואס איז ראש השנה, איך האב דאס נישט באקומען בירושה פון מיינע עלטערן, נאר איך האב דאס באקומען א מתנה פונעם אייבערשטן, "לֹא מִבָּעֲיָא אַתֶּם כֻּלְּכֶם בְּוַדַּאי תְּלוּיִין בָּרֹאשׁ הַשָּׁנָה שֶׁלִּי, אֶלָּא אֲפִילּוּ כָּל הָעוֹלָם כֻּלּוֹ תָּלוּי בָּרֹאשׁ הַשָּׁנָה שֶׁלִּי", און נישט נאר איר זענט אנגעהאנגען אין מיין ראש השנה, נאר די גאנצע וועלט שטייט אויף מיין ראש השנה.

אז דיין ווייב'ס מאמע וויל איר נישט ארייננעמען אויף יום טוב און אויך דיין מאמע וויל איר נישט ארייננעמען אויף יום טוב - זאלסטו איר מחזק זיין צו מאכן ראש השנה אין שטוב, אין שטעטל זענען דא משפחות וואס עסן אינאיינעם אין שול, מען מאכט זיך גרינגער איינער פארן צווייטן, אבער נישט אוועק פארן אין אזא הייליגע טאג, זיין צעלאזט וכו' - ווען ספרי חיים און ספרי מתים זענען אפן און מען איז דן וואס גייט זיין די גאנצע יאר.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

לכבוד ... נרו יאיר

זע דיין ווייב זאל קומען צו די וועכנטליכע פרויען שיעורים וועט אלעס זיך טוישן צום גוטן, טו אלעס וואס דו קענסט זי זאל קומען; בלייב אין שטוב זי זאל קענען גיין, און אז זי האט נישט קיין חשק צו גיין - זאלסטו מיט חכמה איר מחזק זיין צו גיין (נאר מיט חכמה און סבלנות); אלעס וועט זיך טוישן צום גוטן אז זי וועט גיין צו די שיעורים, און אז זי האט א פחד פון טרעפן מענטשן וכו' - זאל זי כאטשיג הערן די שיעורים פריוואט אין שטוב; דיין גאנצע שטוב זאל לעבן מיט די שיעורים.

אויך זאלסטו נישט מוותר זיין אויף די וועכנטליכע ליל שישי שיעור, וועסטו ביים סוף ווערן א צדיק און אויך מצליח זיין אין פרנסה; ווייל מיט די עצות פון רבי'ן איז מען מצליח - סיי ברוחניות און סיי בגשמיות, מיט די חיזוק און עידוד וואס דער רבי געבט - קען מען אפלעבן א חיים טובים, און אפילו דער וואס איז אין עבירות, ער איז געפאלן אין שאול תחתית - טוט תשובה און ווערט א צדיק, דעריבער פארלייגט זיך דער סמ"ך מ"ם זייער שטארק מען זאל אפלאזן דעם רבי'ן, מען זאל נישט קומען צווישן אנשי שלומינו.

דורך הערן דעם רבינ'ס ווערטער - ווערט מען א גרויסער צדיק, אזוי האט דער הייליגער רבי געזאגט (חיי מוהר"ן, סימן שנח): "מיט יעדע שיחה וואס איך שמועס מיט ענק קען מען זיין אן ערליכער איד, און נישט סתם אן ערליכער איד נאר אן ערליכע איד אזוי ווי איך מיין אן ערליכער איד", דורך דעם רבינ'ס ספרים און דיבורים ווערט מען אן אמת'ער בעל תשובה, דער רבי האט געזאגט (שם, סימן שמט): "שֶׁיְּכוֹלִין לִהְיוֹת נַעֲשֶׂה בַּעַל תְּשׁוּבָה גָּמוּר עַל יְדֵי לִמּוּד הַסֵּפֶר שֶׁלּוֹ", מען קען ווערן אן אמת'ער בעל תשובה אז מען לערנט ליקוטי מוהר"ן, "וְאָמַר, שֶׁמִּי שֶׁיֵּשֵׁב וְיַעֲסֹק בִּסְפָרָיו רַק בְּלִי קִנְטוּר וְנִצָּחוֹן, וְיִסְתַּכֵּל בּוֹ בֶּאֱמֶת, אָז בְּוַדַּאי יִהְיוּ נִבְקָעִין אֶצְלוֹ כָּל גִּידֵי קַשְׁיוּת לְבָבוֹ, ואמר בזו הלשון: 'סע וועט אים אלע אדערן טרענען'", און ווער עס וועט לערנען זיין ספר מיט אן אמת, וועט זיך אים עפענען אלע פארשטאפטע אָדערן און ער וועט ווערן אן ערליכער איד; דערפאר זאלסטו נישט אויסלאזן צו קומען הערן דעם רבינ'ס תורות, דעם רבינ'ס חיזוק און עצות.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת עקב, י"ד מנחם-אב, שנת תשפ"ד לפרט קטן

לכבוד ... נרו יאיר

חכמינו זכרונם לברכה זאגן (ברכות לב:): "מיום שחרב בית המקדש ננעלו שערי תפלה", און אפילו ווען אלע טירן זענען פארשלאסן, אבער 'שערי דמעה' איז נישט פארמאכט; זאגט דער הייליגער צדיק רבי משה לייב מסאסוב זכותו יגן עלינו, די טירן פון טרערן זענען טאקע נישט פארמאכט, דאך איז דא טירן, אבער עס איז דא א פלאץ וואס איז העכער פון וויינען, א פלאץ וואס מען דארף נישט קיין טירן, שמחה; ווען מען איז פרייליך מיטן באשעפער איז מען ביי די העכסטע פלאץ, ווען מען איז פרייליך דארף מען נישט קיין טירן אריינצוגיין, מען איז גלייך ביים אייבערשטן, שמחה ברענגט צו די העכסטע דרגות.

לאז נישט נאך פון זיין פרייליך, קעמף פאר דיין לעבן, זיי פרייליך פאר גארנישט און פאר נישט, און אז דער סמ"ך מ"ם וויל דיך איינרעדן אז דו ביסט א גארנישט, ענטפער אים: 'טאקע, איך בין א גארנישט, דאך בין איך פרייליך, ווייל דער רבי האט מיר געזאגט איך זאל זיין פרייליך'.

מוהרא"ש איז מדייק אין רבינ'ס ווערטער (לקוטי מוהר"ן חלק ב', סימן כד): "מצוה גדולה להיות בשמחה", עס איז א גרויסע מצוה צו זיין פרייליך, דער רבי זאגט נישט 'מנהג טוב להיות בשמחה', 'נכון להיות בשמחה', אדער 'טוב להיות בשמחה', דער רבי זאגט 'מצוה גדולה להיות בשמחה', עס איז א גרויסע מצוה צו זיין פרייליך, און אז דער רבי זאגט מען זאל זיין פרייליך - איז דא אויף וואס צו זיין פרייליך.

גיי אין מקוה, זיי נישט מוותר א טאג אן מקוה; מקוה איז טאקע נישט קיין מצוה, אבער עס ברענגט צו די שענסטע פלעצער.

דער אייבערשטער זאל העלפן זאלסט האבן הצלחה אין אלע ענינים.