בריוון פונעם ראש ישיבה שליט"א

בעזרת ה' יתברך - יום ה' פרשת ויקהל-פקודי, כ"ג אדר, שנת תשפ"ו לפרט קטן

החתן ... נרו יאיר

מזל טוב פאר דיין שידוך, דער אייבערשטער זאל דיר העלפן דו זאלסט זוכה זיין אויפצושטעלן אן ערליכע שטוב, ערליכע דורות, און ברענגען נאר נחת פאר דיינע עלטערן.

בנוגע אויב דו זאלסט קומען קיין אמעריקע שאפן געלט פאר די חתונה; דו ווייסט אודאי וואס מוהרא"ש האט געהאלטן, קוק אריין אין אשר בנחל וואס מוהרא"ש שרייבט הונדערטער און טויזנטער מאל פאר מענטשן וואס ווילן קומען קיין אמעריקע שאפן געלט, מוהרא"ש שרייבט זיי אז עס איז דמיון, נישטא גארנישט אין חוץ לארץ, עס איז נישט כדאי איבער צו לאזן ארץ ישראל.

קום נישט קיין אמעריקע; אז דו ווילסט העלפן דיין טאטע - זאלסטו גיין הפצה אין ארץ ישראל, טייל אויס דעם רבינ'ס ספרים, דעם רבינ'ס התחזקות; מענטשן זענען אויסגעהונגערט פאר חיזוק, מענטשן געבן זייער שיין פאר די ספרים; אזוי וועסטו קענען העלפן דיין טאטע.

בנוגע קומען לערנען אין וויליאמסבורג; איך האב שוין געזאגט פארן מגיד שיעור ר' משה שמואל שליט"א אז עס איז נישט שייך צו קומען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויקהל-פקודי, כ"ב אדר, שנת תשפ"ו לפרט קטן

מרת ... תחי'

איך האב ערהאלטן אייער בריוו.

איר זענט נישט גערעכט, איר זענט נישט אייער מאן'ס פאליציי מאן אים איינצוטיילן וואס ער מעג טון און וואס ער מעג נישט טון; דאס איז נישט ריכטיג.

דאס וואס איר שרייבט אז איר זענט א רחמנות, אייער מאן שלאגט אייך און ער שפארט אייך איין אין א צימער וכו'; מען טאר נישט שלאגן, א איד טוט נישט אזוי צו זיין ווייב; אבער איר האט זיך דאס אלעס אליינס געברענגט, איר פירט זיך אויף צו אים נישט ווי מען דארף; מען קען נישט אוועק כאפן א קאמפיוטער, מען קען נישט ווארפן טעלערס אויפן מאן ווען ער זיצט ביים קאמפיוטער, איר שרייבט אז איר סטראשעט אים, איר זאגט אים ער זאל ארויסגיין פון שטוב דארט קוקן אויפן קאמפיוטער; זייט מיר מוחל, מען רעדט נישט אזוי צו א מאן, און קיינער האט נאכנישט אויסגעפירט מיט די וועג, און דאס איז די סיבה פארוואס ער איז אריין אין אזא כעס.

אז איר ווילט א ריינע שטוב האט איר איין עצה, שטילערהייט וויינען צום אייבערשטן, טאג נאך טאג, וואך נאך וואך, בעטן און בעטן: "הייליגער באשעפער געב מיר א ריינע הייליגע שטוב, געב מיר ערליכע קינדער, הייליגע קינדער, העלף מיר אין שטוב זאל נאר זיין קדושה וטהרה, עס זאל נישט זיין קיין כלים וואס מען קען זען עבירות און טומאה".

אז איר ווילט א ריינע שטוב דארפט איר מיט אלע כוחות רעדן שיין צו אייער מאן, און אז ער טוט זאכן וואס איר ווילט אנדערש - דארף מען נאכאלץ שיין רעדן, און אז ער האט די קאמפיוטער און ער איז פאר'כישופ'ט צו דעם - דארף מען נאכאלץ שיין רעדן; נאר מיט ליבשאפט, זיך אויסשמועסן, און אז מען פועל'ט נישט - זאל מען נאר בעטן דעם אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת ויקהל-פקודי, כ"ב אדר, שנת תשפ"ו לפרט קטן

החתן ... נרו יאיר, יבנאל

איך האב נישט וואס מוסיף צו זיין, איך קען נאר זאגן נאכאמאל אז מען טאר נישט אפשטופן א חתונה, עס איז א סכנה; זאלסט וואס שנעלער חתונה האבן, נעם א מנין אידן מיט אן ערליכער רב און האב חתונה.

אז דיין זיידע, באבע, פעטער, מומע און שווער שוויגער ווילן א שיינע חתונה און האבן ארויסגענומען א זאל פאר חדשים ארום - קענסט דעמאלט מאכן א שיינע מסיבה, אבער דאס האט נישט מיט די חתונה; ענק מוזן שוין חתונה האבן, און אז יעצט לאזט נישט די פאליציי מאכן א גרויסע חתונה צוליב זיכערהייט פון די מלחמה - זאלן ענק מאכן א קליינע חתונה.

איך מיש זיך נישט אין ענקער לעבן, אבער אז דו האסט געלערנט אין ישיבה און דו פרעגסט מיר - זאג איך דיר נאכאמאל: אפשטופן א חתונה איז א גרויסע סכנה, נישטא אזא זאך ווי אפשטופן א חתונה, זאל זיין וואס זאל זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויקהל-פקודי, כ"ב אדר, שנת תשפ"ו לפרט קטן

משה שמואל שטעסל נרו יאיר, מגיד שיעור ישיבת היכל הקודש ירושלים

איך האב געהערט אז דו האסט גערעדט זייער א שטארקע שיעור פאר די בחורים פון זיך אכטונג געבן פון ניבול פה, איך הער אז דו האסט גערעדט זייער שארף; אז אויב דו וועסט הערן א בחור רעדן ניבול פה - וועסטו אים ארויסווארפן פון ישיבה. איך וויל דיר זאגן אז דו זאלסט רעדן נאך מער שארף, איך מאך דיך א שליח דו זאלסט האלטן אונזערע ד' אמות ריין, איך וויל נישט עס זאלן זיין אין ישיבה בחורים וואס רעדן ניבול פה.

קוק נישט אויף קיינעם, האב נישט מורא פון קיינעם, זאל זיין ווער זאל זיין, נישטא קיין רעדן ניבול פה, אפילו מיר וועלן בלייבן מיט א קליינע צאל תלמידים, אפילו ווייניגער פון מנין; ווייל אז מען רעדט ניבול פה פארטרייבט מען די שכינה הקדושה, מען איז גורם אז עס זאלן פאלן באמבעס פון די רוצחים אויף אידישע שטיבער און אידישע קינדער זאלן געשעדיגט ווערן, חכמינו זכרונם לברכה זאגן (שבת לג:): "בַּעֲווֹן נִבוּל פֶּה צָרוֹת וּגְזֵרוֹת מִתְחַדְּשׁוֹת", צוליב די עבירה פון ניבול פה קומען אסאך צרות און נייע גזירות אויף די וועלט, "וּבַחוּרֵי יִשְׂרָאֵל מֵתִים, חַס וְשָׁלוֹם", יונגע מענטשן שטארבן, "וִיתוֹמִים וְאַלְמָנוֹת צוֹעֲקִים וְאֵינָם נַעֲנִין" יתומים און אלמנות שרייען פאר הילף און זיי ווערן נישט געענטפערט; דורכדעם וואס בחורים רעדן ניבול פה קומען די באמבעס השם ישמרינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויקהל-פקודי, כ"א אדר, שנת תשפ"ו לפרט קטן

מרת ... תחי'

וואויל איז אייך אז איר זענט באשעפטיגט מיט מחזק זיין אידישע קינדער, זיי פרייליך מאכן און זיי ברענגען צו זיין נאנט צום אייבערשטן.

ביטע אויב איר קענט מחזק זיין די תלמידה ... תחי', זי זאל זיך נישט נאכלאזן אין שטוב פארן מאן, זי זאל זיך שיין מאכן פארן מאן; דאס דארף מען לערנען מיט אידישע טעכטער, זיי זאלן וויסן דאס גרויסקייט פון גיין אנגעטון אין שטוב פארן מאן שיין, ריין, מיט טעם און חן; "אַל תִּהְיוּ כְּסוּס" (תהלים לב, ט), א איד איז נישט ווי א פערד; א פערד - אין גאס באצירט מען איר, און אין שטאל ליגט זי שמוציג; א איד איז פארקערט, אין גאס זוכט מען נישט צו ציען פרעמדע אויגן און אין שטוב איז מען שיין באצירט.

עס איז א גרויסע מצוה איר צו מחזק זיין, ווייל זי מיט איר מאן זענען צוויי טייערע מענטשן, און ער באקלאגט זיך אז זי שטעלט זיך נישט אהער וכו' וכו'.

נאכאמאל, איר דארפט זיך זייער פרייען אז אייער לעבן גייט אריבער מיט זאכן וואס וועלן בלייבן אויף אייביג, מיט מחזק זיין אידישע טעכטער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויקהל-פקודי, כ"א אדר, שנת תשפ"ו לפרט קטן

... נרו יאיר, בארא פארק

ווען דו ביסט געווען ביי מיר מיט דיין ווייב האסטו מיר געבעטן א ברכה אויף פרנסה, אויף שפע; איך האב נישט געוואלט פרעגן - ווען דיין ווייב הערט - אויב דו דאווענסט די דריי תפילות מיט מנין; וויסן זאלסטו, דאס איז די שליסל פון פרנסה, צו גיין אין שול דריי מאל א טאג דאווענען די דריי תפילות. ווייל חכמינו זכרונם לברכה זאגן (ברכות ז:) אויפן פסוק (תהלים סט, יד): "וַאֲנִי תְפִלָּתִי לְךָ ה' עֵת רָצוֹן", ווען איז אן עת רצון? ווען דער ציבור דאווענט; אין ווען עס איז אן עת רצון - קען מען אלעס פועל'ן, מען קען פועל'ן פרנסה, מוהרא"ש זאגט, אז מען דאווענט מיט מנין האט מען א דבר שבמנין (געלט).

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויקהל-פקודי, כ"א אדר, שנת תשפ"ו לפרט קטן

... נרו יאיר

אז מען האט דיר אנגעשראקן אז עפעס איז מיטן הארץ פונעם קינד, זאלסטו שוין גיין צו א ציון פון א צדיק (גיי קיין ריבניץ), און זיי זיך דארט מקבל אז דו גייסט היטן דיין הארץ דורך היטן די אויגן; לייג ארויף די שטערקסטע פילטער אויף דיינע כלים, געענדיגט מיט קוקן שמוץ, מיט נאך קוקן פרויען און רעדן פון די זאכן וכו' השם ישמרינו.

אויך זאלסטו זיך שטארקן אין זאגן יעדן טאג אכצן פרקים משניות. דער הייליגער רבי זאגט (שיחות הר"ן, סימן יט), אפילו א מענטש וואס איז זייער ווייט פון די קדושה - ער טוט עבירות רחמנא לצלן און ער איז שוין אראפגעפאלן אין שאול תחתית, אפילו אזא מענטש קען די תורה אויך העלפן, די תורה האט אזא כח אז עס קען ארויסנעמען דעם מענטש פון די עבירות, און אויב וועט ער זיך מאכן א קביעות צו לערנען יעדן טאג 'כך וכך' - וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס אז עס נעמט ארויס דעם מענטש פון זיין שלעכטס; און רבי נתן זאגט (חיי מוהר"ן, סימן תקעג): "ווען דער רבי האט געזאגט די שיחה פון פריער, אז די תורה איז אן עצה ארויס צו שלעפן דעם מענטש פון עבירות, האב איך געפרעגט דעם רבי'ן 'אויב תורה קען אויך העלפן אזא איינעם וואס איז אראפגעפאלן אין די עבירה פון פגם הברית, הוצאת זרע לבטלה רחמנא לצלן?' האט דער רבי געשריגן אויף מיר און געזאגט: 'דו ווייסט ווי גרויס די כח פון תורה איז?! תורה איז העכער פון אלעס!" אפילו א מענטש וואס ליגט אין די נעגל פונעם סמ"ך מ"ם, ער זינדיגט אין די עבירה פון פגם הברית, הוצאת זרע לבטלה רחמנא לצלן, אויב וועט ער לערנען יעדן טאג תורה - וועט ער ארויסקריכן פון אלעם שלעכטס און ווערן אן ערליכער איד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויקהל-פקודי, כ"א אדר, שנת תשפ"ו לפרט קטן

מרת ... תחי'

א פרוי איז פטור פון דאווענען וויבאלד זי איז פארנומען מיט די קינדער וכו', אבער ברכות השחר דארף מען זאגן; געוואוינט זיך צו צו זאגן יעדן טאג ברכות השחר און אויך קריאת שמע, און אז אינדערפרי האט איר נישט קיין צייט, איר דארפט זארגן פאר די קינדער וכו' – זאלט איר זאגן די ברכות השחר נאכן אנטון און געבן עסן פאר די קינדער, עס נעמט נישט מער פון אפאר מינוט, אויף דעם דארף מען קענען מאכן צייט.

אויך זאלט איר זיך נעמען א גוטע חבר'טע, עס איז זייער וויכטיג פאר עבודת השם א גוטע חבר'טע מיט וועם מען קען זיך מחזק זיין; נעמט זיך א גוטע חבר'טע און זייט זיך מחזק מיט איר, איין מאל וועט איר געבן חיזוק און איינמאל וועט זי אייך געבן חיזוק, אמאל פאלט מען אריין אין א קטנות הדעת און א גוטע חבר'טע קען זייער ארויסהעלפן. אזוי ווי דער הייליגער רבי זאגט (לקוטי מוהר"ן חלק א, סימן לד), דורך א חבר קען מען זייער מצליח זיין, און מיר געפינען אין חזל (תענית ז.): "הַרְבֵּה לָמַדְתִּי מֵרַבּוֹתַי, וּמֵחֲבֵרַי יוֹתֵר מֵרַבּוֹתַי", פון חברים קען מען לערנען מער ווי מען לערנט פון א רבי.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויקהל-פקודי, כ"א אדר, שנת תשפ"ו לפרט קטן

... נרו יאיר, קרית ברסלב

די עפפ 'זינג' איז נישט גוט; ענדערש זאלסטו באקומען די ניגונים דורך א כשר'ע וועג, די עפפ האט אויך פאדקעסטס וואס קען אוועק נעמען די גאנצע יראת שמים, בפרט די אידישע און די וואס זעען אויס חסידי'ש - דאס איז נאך פיל ערגער.

געב זיך אכטונג, האלט דיין שטוב ריין, און אפילו דיינע שכנים און חברים זאגן דיר אז אלע האבן דאס - זאלסטו דאס נישט האבן.

נעם דיין שכל פון רבינ'ס ספרים, מאך זיך א שיעור אין אשר בנחל און אין ספר עצתו אמונה; פון דארט זאלסטו נעמען דיינע השקפות אין לעבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויקהל-פקודי, כ"א אדר, שנת תשפ"ו לפרט קטן

שלמה זולדן נרו יאיר, בני ברק

שטארק זיך מיט דיין הייליגע ארבעט פון העלפן אין בית הדפוס; איך הער זאגן אז דו געבסט אוועק שעות ארבעט בהתנדבות צו העלפן דרוקן די גליונות און קונטרסים און דאס פארשפרייטן אין בני ברק, מחזק זיין נשמות ישראל.

מוהרא"ש זכותו יגן עלינו דערציילט, ווען דער הייליגער צדיק רבי יצחק מדרוביטש זכותו יגן עלינו איז נפטר געווארן, איז אים רש"י הקדוש אנטקעגן געקומען אויבן אין הימל און אים געפרעגט: "וואס פאר א גוטע מעשים טוט אייער זון רבי מיכל זלאטשובער, אז אויבן אין הימל מאכט מען אזא רעש פון אים?" האט דער טאטע רבי יצחק מדרוביטש געענטפערט: "ער לייגט אריין כוחות אינעם דאווענען וכו'", האט אים רש"י הקדוש געזאגט: "פאר דעם אליינס וואלט מען נישט געמאכט אזא רעש דא אין הימל פון אים; אסאך צדיקים לייגן אריין כוחות אינעם דאווענען און מען מאכט נישט אזא גרויסע עסק פון זיי", האט דער טאטע רבי יצחק געזאגט: "ער לערנט זייער פלייסיג", האט אים רש"י הקדוש געענטפערט: "דאס קען אויך נישט זיין די סיבה, ווייל אסאך צדיקים לערנען פלייסיג די הייליגע תורה, און פאר דעם אליינס רעש'ט זיך נאכנישט", האט ער געזאגט: "צוליב זיין חסד און צדקה וכו'", האט רש"י נאכאלץ נישט מסכים געווען, ביז רבי יצחק מדרוביטש האט אים געזאגט: "אפשר ווייל ער ברענגט צוריק מענטשן צום אייבערשטן? ער איז עוסק אין דעם זייער שטארק", האט רש"י הקדוש געזאגט: "'היינו דאהני ליה', יעצט פארשטיי איך שוין פארוואס עס רעש'ט זיך פון אים".

הלואי זאלן ענק צוריק מאכן די הפצה פארברענג, איינמאל א וואך זאלסטו צאמנעמען די חברים, אינגעלייט און בחורים, זיך מחזק זיין מיט הפצה, יעדער זאל דערציילן זיינע שיינע מעשיות וואס ער האט געהאט די וואך ביי הפצה. ווייז דעם בריוו פאר דיינע חברים, טייל איין אלע שולן און כוללים וכו' אין בני ברק צווישן אייך, (די בתי מדרשים וואס ווילן נישט די גליונות - איז נישט כדאי דארט צו לייגן, עס איז דא אזויפיל שולן און כוללים וואס זענען זיך מחי' מיט די גליונות, דארט דארף מען דאס לייגן).

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויקרא, כ"ו אדר, שנת תשפ"ו לפרט קטן

... נרו יאיר, בית שמש רמה ד'

איך האב ערהאלטן דיין בריוו.

איך פריי זיך זייער צו באקומען א באריכט פון יעדן פרט ביי ענק אין שול, בעיקר פריי איך זיך צו הערן אז עס איז דא ביי ענק שלום און ליבשאפט, דאס איז דער עיקר, דאס איז די הצלחה פון א שול.

בנוגע פארלערנען ביי שלש סעודות; עס פעלט נישט אויס פאר צו לערנען דוקא אין א סדר, עס איז דא לענגערע שיחות, און מענטשן ווילן הערן חיזוק, מענטשן ווילן א גוט ווארט, א גלעט; אזוי טוט מען ביי אונז אין ישיבה, מען לערנט פאר גרינגע שיחות פון רבי'ן, וואס מען קען ארויסנעמען גרינג אויף למעשה.

שטארקטס ענק, און הלואי זאלן ענק זיך שטארקן אין הפצה, זיך איינטיילן מיטן לייגן די גליונות אין אלע שולן. (לייגט נישט אין שולן וואו מען צערייסט די גליונות, לייגט אין די שולן וואס זענען זיך מחי' דערמיט). אנשי שלומינו מוזן האבן א חלק אין הפצה, עס איז נישט שייך צו זיין א ברסלב'ער חסיד אן הפצה, דער רבי וויל דאס פון אונז אלע, מיר אלע זאלן עוסק זיין אין הפצה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויקרא, כ"ו אדר, שנת תשפ"ו לפרט קטן

מיין טייערער ... נרו יאיר, ירושלים

איך האב ערהאלטן דיין בריוו.

איך האב מברר געווען ביים מנהל יצחק פאפנהיים נרו יאיר אז ער איז זייער שטארק צופרידן פון דיין ארבעט, ער זאגט אז דו ביסט א גוטער מלמד, דו לייגסט אריין אין די קינדער דיין גאנצע הארץ.

אויך זאגט ער מיר אז מען וויל זייער שטארק אז דיין ווייב תחי' זאל קומען זיין א לערערין אין בית פיגא, און אויב עס איז דיר און איר נישט אזוי שווער צו קומען קיין בית שמש העלפן בית פיגא - וועלן מיר זיך זייער פרייען.

בנוגע וכו'; אלע האבן בלבולים, בפרט די וואס טוען פארן רבי'ן, די וואס טוען פאר אידישע קינדער - די האבן שטענדיג בלבולים וכו', מען פאלט אריין כסדר אין א קטנות הדעת וכו' וכו'; שטער זיך נישט פון דעם, האלט זיך נישט אפ צוליב דעם, זיי ממשיך און טו נאך מער פארן רבי'ן; ווייל וויפיל מיר ווייסן יעדער איינער ביי זיך אין הארץ וואס דער רבי האט געטון מיט אים, און דאס איז נאר וואס מיר ווייסן יעצט, און וויפיל מיר ווייסן גארנישט וואס דער רבי פארעט זיך מיט אונזער נשמה, מיט אונזער עתיד; דארפן מיר אלעס טון צו בלייבן משמש זיין דעם רבי'ן, זיך צוקניפן ביים רבי'ן אויף אייביג.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת ויקרא, ב' ניסן, שנת תשפ"ו לפרט קטן

לכבוד ... נרו יאיר

עס איז גוט דו זאלסט זיך אראפלייגן ערב שבת, אויך דיינע קינדער זאלן זיך אראפלייגן; די זמן ווערט שוין שפעט, עס איז נישט קיין פארגלייך די שבת'דיגע סעודות ווען מען איז אויסגערוט, ווען מען האט זיך אביסל אראפגעלייגט, און דערפאר ברענגט דער הייליגער מנחת אלעזר זכותו יגן עלינו (דברי תורה ט, יג) בשם דער הייליגער מעזריטשער מגיד זכותו יגן עלינו, ער האט געזאגט: "איך וואונדער זיך פארוואס עס שטייט נישט אין די עשרת הדברות מען זאל שלאפן ערב שבת"; ווייל נאר ווען מען שלאפט ערב שבת קען מען מאכן א שיינע סעודה, זינגען זמירות, אביסל לערנען פאר די סעודה און נאך די סעודה, אז נישט - שלאפט מען איין ביי די סעודה, מען זינגט נישט קיין זמירות און מען רעדט נישט מיט די קינדער.

אויך זאלסטו נעמען דיינע קינדער אין מקוה פרי, עס איז נישט כדאי צו נעמען די קינדער די לעצטע שעה פארן זמן אין מקוה, דעמאלט איז דא א געדרענג, עס איז נישט איידל; גיי מיט זיי פריער, עס לוינט די ארבעט, עס לוינט די אינוועסטירונג, שפעטער האט מען שיינע נחת, ערליכע דורות.

א גאנץ שבת זאלסטו נאר זיין פרייליך, וועסטו זוכה זיין אז די קומענדיגע וואך וועט זיין גרויס שפע, וועסט קענען איינקויפן אויף יום טוב.

א פרייליכן שבת.

בעזרת ה' יתברך - יום ה' פרשת ויקרא, ראש חודש ניסן, שנת תשפ"ו לפרט קטן

לכבוד ... נרו יאיר

היינט ראש חודש ניסן איז די יום הולדת פון הייליגן רבי'ן, דער רבי איז געבוירן 'ראש חודש' דאס איז דעם רבינ'ס לימוד, דער רבי לערנט אונז זיך צו באנייען שטענדיג.

טייערער ברודער, הארציגער חבר, באניי זיך, הייב אן פון יעצט דינען דעם אייבערשטן, גיי אין שול דאווענען די דריי תפילות, דאווען מיט מנין מיט א סידור, רעד נישט ביים דאווענען, הייב אן פונדאסניי זיין א גוטע איד; ביים רבי'ן איז געווען דער עיקר זיך באנייען, דער רבי לערנט אונז אויס מיר זאלן שטענדיג אנהייבן פון פריש, "אלט טאר מען נישט זיין" - האט דער רבי געזאגט (שיחות הר"ן סימן נא), "אן אלטער חסיד איז נישט גוט צו זיין, און אן אלטער צדיק איז נישט גוט צו זיין".

זיי מחזק דיין ווייב מיט אריינברענגען דעם יום טוב פסח; מיט אפאר גוטע ווערטער קענסטו איר ממש געבן פרישע כוחות און א פרישע גייסט צו קענען אנגיין מיט די שטוב ארבעט, זאג פאר דיין ווייב דאס וואס דער הייליגער בעל קדושת לוי זכותו יגן עלינו זאגט, אז פון די ארבעט פון די פרויען וואס מאכן פסח'דיג; פון זייער קראצן, רייבן און כשר'ן - ווערן באשאפן מלאכים, די זעלבע מלאכים וואס ווערן באשאפן ראש השנה ווען מען בלאזט שופר.

דו זאלסט אויך העלפן מיט וואס דו קענסט אויסרוימען די חמץ פון שטוב, בעיקר זאלסטו ארויסנעמען אלע נישט כשר'ע ביכער, האלט נישט אין שטוב ביכער וואס האבן נישט א הסכמה פון ערליכע רבנים, און רייניג אויס דיין שטוב פון צייטונגען און מאגעזינען, (הלואי וועסטו מיך פאלגן און מער נישט קויפן קיין שום צייטונג, קיין שום מאגעזין, וועסטו זיין מער געזונט גייסטיש).

היינט נאכט וועט זיין א ראש חודש סעודה אין קרית יואל, אינאיינעם מיט מסיבת הכרת הטוב פאר אלע וואס העלפן מיר אנגיין מיט די מוסדות, איך ווארט דיך צו זען.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ד' פרשת ויקרא, כ"ט אדר, ערב ראש חודש ניסן, שנת תשפ"ו לפרט קטן

לכבוד ... נרו יאיר

די עצה צו מבטל זיין שלעכטע מידות; גאוה וכדומה - איז צו רעדן ווי מער פון אמונה; ווי מער מען נעמט אריין דעם אייבערשטן, ווי מער מען טראכט פונעם אייבערשטן - פאלט פון זיך אליינס אוועק אלעס אנדערש.

דאס האבן מיר זוכה געווען צו הערן פון מוהרא"ש; נאר רעדן פון אמונה, נישט זיין פארנומען מיט זיך מבטל זיין. עס איז דא צוויי וועגן ווי אזוי מען קען מבטל זיין די גאוה; אדער זיין פארנומען מיט די שלעכטס, אדער רעדן אזויפיל פון אמונה ביז עס ווערט אזוי ליכטיג אז אלע שלעכטס פאלט אוועק. עס שטייט ביי די מראה פון יחזקאל הנביא (יחזקאל מג, ב): "וְהָאָרֶץ הֵאִירָה מִכְּבֹדוֹ" – די וועלט איז ליכטיג געווארן פונעם כבוד פונעם אייבערשטן; אז מען רעדט פונעם אייבערשטן ווערט ליכטיג און עס פאלן אוועק אלע שלעכטע מידות און שלעכטע תאוות וכו'.

אויך דורכדעם וואס מען משפט זיך, מען דערציילט דעם אייבערשטן אלעס וואס מען האט געטון, און מען בעט אים ער זאל אננעמען די תשובה - דאס איז אויך מבטל די גאוה; ווייל אז מען האט די מעשים פאר די אויגן איז ווי אזוי איז שייך זיך צו גרויסן? גיי התבודדות, גיי א שפאציר מיטן אייבערשטן, דערצייל אים אלעס וואס גייט אריבער אויף דיר און בעט אים ער זאל דיך מקרב זיין צו אים און דיר פארגעבן אויף אלע נישט גוטע מעשים, התבודדות קלעבט צו דעם מענטש צום אייבערשטן.

היינט זאגן אלע יום כיפור קטן, אפילו די וואס זאגן נישט א גאנץ יאר זאגן אויך ערב ראש חודש ניסן, און מארגן וועלן מיר מאכן א סעודת ראש חודש אינאיינעם מיט א מסיבת הכרת הטוב פאר די וואס העלפן א גאנץ יאר די מוסד אינאיינעם מיט די ליל שישי שיעור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ויקרא, כ"ז אדר, שנת תשפ"ו לפרט קטן

לכבוד ... נרו יאיר

רעד מיט דרך ארץ אין שטוב צו דיין ווייב, דאס איז א סימן פון יראת שמים, דער וואס רעדט שיין און איידל איז אן ערליכער איד. אויך זאלסטו זיך פירן הייליג וכו', חכמינו זכרונם לברכה זאגן (פסחים מט:), מען זאל נאר נעמען אן איידעם אן ערליכער איד, איינער וואס לערנט און דאווענט, ווייל דער עם הארץ פירט זיך ווילד, אזוי ווי ביי די אומות העולם וואס די פרוי איז נישט מער ווי א שמאטע, מען פייניגט איר, מען באצווינגט איר און מען שלאגט איר פאר די אייגענע הנאה השם ישמרינו; להבדיל אלף אלפי הבדלות ביי אידישע קינדער וואס היטן די תורה, זיי פירן זיך איידל און הייליג, נישטא קיין צווינגען, נישטא קיין ווארפן א שרעק השם ישמרינו.

טשעפע נישט דיין ווייב, און אז דו ווערסט געטשעפעט פון איר זאלסטו נישט צוריק טשעפען, "ישמע בזיונו ידום וישתוק" (לקוטי מוהר"ן חלק א, סימן ו), האב רחמנות אויף איר, רעד ווייך, רעד הארציג. די הייליגע חכמים זאגן (בבא מציעא נט.) א פרוי וויינט שנעל; פרויען זענען מער הארציג, מער געפיליש, און אויב מען מאכט זיי וויינען - קען מען באקומען א גרויסע שטראף.

ברודער מיר זיצן דאך ביים רבי'ן, מיר זענען אין רבינ'ס חדר און מיר זיצן ביים טיש פון מוהרא"ש וואס האט אזוי שטארק פארלאנגט פון אונז שלום בית; עס איז נישט געווען קיין שיעור וואס מוהרא"ש זאל אונז נישט מוסר'ן און מחזק זיין אז מיר זאלן זיך איינבייגן דעם קאפ, מיר זאלן שלינגען, מיר זאלן נישט צוריק טענה'ן און נישט צוריק ענטפערן.

אפילו די ווייב שרייט - איז נאכנישט עק וועלט, מען טאר נישט ווערן צעפאלן ווען די ווייב שרייט און מען כאפט אריין בזיונות וכו', מען דארף דן זיין לכף זכות און זוכן מיט חכמה וואס מען קען טון איר צו בארואיגן.

איך האב נאך אסאך צו שרייבן, איך דארף מקצר זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויקרא, כ"ו אדר, שנת תשפ"ו לפרט קטן

לכבוד ... נרו יאיר

פאר אלע פחדים און שרעקעדיגע מחשבות איז די עצה צו דאנקען און לויבן דעם אייבערשטן; ווי מער מען טוט דאנקען דעם אייבערשטן - אלץ מער ווערט די מח מחשבה מיושב און מסודר, מען באקומט א שטארקע אמונה, מען קען זיך שטארקן אויף די שרעק.

[באזונדער פאר תושבי ארץ ישראל; יעצט אין די צייט וואס עס קומט פאר די מלחמה מיט איראן, און עס פליען באמבעס אויך פון לבנון, וואס חיזבאלא שיסן, און עס פייפט כסדר, און די קינדער מיט די עלטערן ווערן צעטומלט פון דארפן לויפן אין די שוץ צימער, דארף מען געדענקען אז אפילו בשעת עס פייפט און מען גייט זיך באשיצן - זאל מען געדענקען צו דאנקען און לויבן דעם אייבערשטן; דאס געבט מוחין, דאס געבט שטארקע נערווען].

קוק נישט אויף אנדערע; די לעבן איז נישט קיין פארמעסט ווער קען מער וכו' און ווער איז מער וכו', יעדער איינער דינט דעם אייבערשטן אויף זיין וועג, און אין הימל קוקט מען אריין אין הארץ, זען ווער האט גוטע מחשבות, ווער מיינט אמת'דיג. דער רבי האט אונז געלערנט דעם דרך התם, דער תם פלעגט זאגן (ספורי מעשיות מעשה ט, פונעם חכם ותם): "דאס איז מיין מעשה און דאס איז זיין מעשה, און וואס דארף איך רעדן פון אנדערע"; ער פלעגט שטענדיג קוקן אויף זיך, וויפיל ער פארדינט, און אזוי ווייטער.

מען האט היינט אנגעהויבן ספר ויקרא, הייב אן לערנען די פרשה, לערן יעדן טאג שנים מקרא ואחד תרגום. טייל עס איין לויט די טעג פון די וואך, לערען יעדן טאג אביסל פון די פרשת השבוע. אויך זאלסטו לערנען רש"י, מוהרא"ש זאגט בשם צדיקים: "אז מען לערנט חומש רש"י ווערט מען אפגעהיטן פון נכשל ווערן אין עבירות, אויך איז מען זוכה צו זיין אין רש"י הקדוש'ס היכל".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת כי תשא, שבת פרה, י"ז אדר, שנת תשפ"ו לפרט קטן

מרת ... תחי'

איך האב ערהאלטן אייער בריוו.

איך האב זיך זייער דערשראקן צו ליינען די בריוו אז איר זענט אריינגעפאלן אין אזא עצבות ומרה שחורה ביז איר קומט צו חילול שבת רחמנא לצלן; ווייל וויסן זאלט איר, אז מען היט נישט קיין שבת - קען מען באקומען א גרויסע שטראף, די תורה זאגט (שמות לא, יד): "ושמרתם את השבת כי קודש הוא לכם מחלליה מות יומת", מען רייסט זיך אפ פון כלל ישראל און פונעם אייבערשטן; פארוואס זאלט איר זיין אין אזא עצבות ומרה שחורה? פארוואס זאלט איר נישט זען די חסדים וואס דער אייבערשטער טוט מיט אייך?

קערט אייך צוריק צום אייבערשטן, הייבט צוריק אן היטן שבת. חכמינו זכרונם לברכה זאגן (שבת קיח:), ווער עס היט שבת איז אים דער אייבערשטער מוחל אויף אלע עבירות; און בזכות וואס איר וועט היטן שבת וועט דער אייבערשטער היטן אויף אייך און אויף אייער קינד, און איר וועט נישט אנקומען אין גיהנום, ווייל ווער עס היט שבת, ביי אים איז פארלאשן די פייער פון גיהנום (עיין זוהר פרשת תרומה דף קנ:; תיקוני זוהר תיקון כד, סט:).

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - ערב שבת קודש פרשת כי תשא, שבת פרה, י"ז אדר, שנת תשפ"ו לפרט קטן

... תחי', תלמידה בית פיגא קרית ברסלב

איך האב ערהאלטן אייער בריוו.

איך פריי זיך זייער צו הערן אז פאריאר ביי אייער געבורטס טאג האט איר זיך מקבל געווען אנצוגרייטן נעגל וואסער יעדע נאכט איידער איר גייט שלאפן, און זיך אפגיסן ביים בעט, און נישט אראפטרעטן פון בעט אן זיך אפגיסן נעגל וואסער, און אויך טוט איר די מצוה פון כיבוד אב ואם, איר גרייט אן נעגל וואסער פאר אייער טייערע עלטערן און פאר אייער שוועסטער.

איר פרעגט וואס איר זאלט זיך פארנעמען די יאר, עפעס א גוטע קבלה, לכבוד אייער צענטע געבורטס טאג; נעמט זיך פאר צו בענטשן ברכת המזון אינעווייניג אין א בענטשער אדער א סידור. ווייל דער וואס בענטשט ברכת המזון ווערט אפגעהיטן פון אלע צרות, ווייל אין די גאנצע בענטשן איז נישטא די אות 'ף' וואס ווייזט אויף דינים, ווייל דורך בענטשן ברכת המזון מיט כוונה נעמט מען אוועק די 'אף' און 'קצף', מען ציט צו זיך רחמים וחסדים.

פירט זיך אין בית פיגא מיט דרך ארץ, און זאגט פאר אייערע חבר'טעס אז איך בעט זיי אלע זיי זאלן זיך פירן מיט דרך ארץ; נישט רעדן ווען א טיטשער רעדט און זיך שטענדיג באדאנקען פאר יעדן איינעם.

געבט א גרוס פאר אייערע טייערע עלטערן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תרומה, ב' אדר, שנת תשפ"ו לפרט קטן

לכבוד יואל מנחם גרשון

וואויל איז דיר אז דו ביסט עוסק אין די הייליגע ארבעט פון ארויסגעבן די הערליכע ספרים פון 'עצתו אמונה' און 'איש אמונות', אזויפיל מענטשן זענען זיך מחי' מיט די ספרים, אזויפיל מענטשן נעמען זייער וועג אין לעבן פון די ספרים; דו דארפסט זיך זייער שטארקן אז דאס איז דיין חלק, דיין לעבן גייט דיר אריבער מיט אזא הייליגע ארבעט.

איך פריי זיך זייער אז מען גרייט זיך ארויס צו געבן די קינדער גליון 'מעשה'לעך פאר קינדערלעך'; שוין לאנג וואס איך ווארט צו זען אין די שולן א קינדער גליון וואס דערציילט פאר קינדער מעשיות פון צדיקים אויף לעובדא ולמעשה, א גליון וואס לערנט פאר קינדער מידות טובות און יראת שמים מיט די הקדמות פון רבי'ן. ווייל דער רבי האט געזאגט (שיחות הר"ן, סימן לה): "שֶׁהוֹלֵךְ אֶפִּיקוֹרְסוּת גָּדוֹל עַל הָעוֹלָם", פאר משיח וועט קומען וועט אראפקומען א מבול פון כפירות און אפיקורסות; אויך איז דא א מבול פון נאוף, מיר האבן היינט דעם דור המבול און דעם דור הפלגה אינאיינעם; אידישע קינדער, בני הנעורים - אינגלעך, בחורים און מיידלעך, פאלן אראפ נעבעך אין ביטערע עבירות, מען קען אזוי גרינג אנקומען צו זען און טון דאס ערגסטע, דארף מען פארשפרייטן אמונה, מען דארף גיסן אמונה אין די גאסן אז מען זאל זיך קענען באשיצן.

די וואך וויל איך מאכן א מעשה'לעך פאר קינדערלעך, די מעשה פון רבי נחמן טולטשינער, ווי ער האט אמאל געטאנצן מיט די נאכט קליידער וכו'.

בעט דעם מעלער זאל מאלן א בילד א בעט, נעגל וואסער, אויפן בעט א ליקוטי תפילות, און ווי צוויי קינדער קוקן אריין פון א פענסטער און מען זעט ווי א מענטש טאנצט מיט נאכט קליידער.

"קוק ער טאנצט מיט א נאכט העמד און א שלאף קאפל... עס איז אזוי פאני... ווער איז דאס?"

קינדער לאכט נישט, עס איז נישט קיין שיינע מדה צו לאכן פון א צווייטן איד, קינדער איך וועל ענק דערציילן ווער דער איד איז, דער איד איז א גרויסער צדיק, לאמיר זען פארוואס ער טאנצט מיט זיינע נאכט קליידער...

דער הייליגער רבי נתן זכותו יגן עלינו האט געהאט א תלמיד זייער א גרויסער צדיק, מען האט אים גערופן רבי נחמן טולטשינער, ער האט שטענדיג באדינט רבי נתן זייער געטריי מיט זיין גאנצע כח און הארץ.

ער האט געבעטן רבי נתן ער זאל אים געבן א וועג ווי אזוי מען איז זוכה צו זיין אן ערליכער איד און א גרויסער צדיק, רבי נתן האט אים געזאגט אז אויב ער וויל זיין א צדיק דארף ער יעדן טאג גיין התבודדות, זיך אויסרעדן זיין הארץ מיטן אייבערשטן אזוי ווי מען רעדט צו א גוטער פריינד, אלעס זאל ער דערציילן פארן אייבערשטן, און אויך האט רבי נתן אים געזאגט, אז אויב מען וויל זיין אן ערליכער איד מוז מען זיין פרייליך, און צו זיין פרייליך איז זייער וויכטיג צו טאנצן, ווייל די שליסל אריין צו גיין צו די קדושה איז שמחה; ווען מען איז פרייליך ווערט מען זייער נאנט צום אייבערשטן, און דערפאר קומט דער יצר הרע און מאכט אלץ דעם מענטש זייער טרויעריג אויף גארנישט און נישט, "איך זאג דיר נחמן, יעדן טאג גיי א טענצל".

רבי נחמן האט געפאלגט, ער האט אלע טאג געטאנצן; אמאל אין שול, אמאל ביי א שמחה, און אמאל אין שטוב מיט די קינדער, און אויך אמאל אליין, און ווען ער פלעגט זיך דערמאנען ביינאכט ווען יעדער איז שוין געשלאפן - פלעגט ער אליין טאנצן, ער האט געוואוסט אז ער מוז דאס טון.

איינמאל האט רבי נחמן טולטשינער שוין אנגעגרייט נעגל וואסער און געליינט קריאת שמע און זיך אנגעטון די נאכט קליידער, ער ליגט אין בעט און ער שמועסט מיטן אייבערשטן, אינמיטן געבט ער זיך א כאפ: 'איין מינוט... איין מינוט... איך האב דאך היינט נאכנישט געטאנצן, וואס טוט מען דא? מיין רבי, רבי נתן - האט מיר דאך געגעבן א וועג צו טאנצן יעדן טאג...' ער געבט א שפרינג ארויס פון בעט און הייבט אן טאנצן מיט זיין נאכט העמד און שלאף קאפל, ער טאנצט: "טאטע איך לויב דיך, טאטע איך דאנק דיך - ווייל איך בין א איד".

אלע קינדער הייבן אן טאנצן: "טאטע איך לויב דיך, טאטע איך דאנק דיך - ווייל איך בין א איד, טאטע איך לויב דיך, טאטע איך דאנק דיך - ווייל איך האב דיך ליב, אשרינו - מה טוב חלקינו, ומה נעים – גורלינו, ומה יפה ירושתינו..."

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

לכבוד מרדכי אינדיג נרו יאיר, מנהל תלמוד תורה היכל הקודש קרית ברסלב ליבערטי

ווען איך בין געווען אין חדר א וואך פאר פורים האב איך מיטגעהאלטן ווי אזוי די קינדער טאנצן, עס איז געווען אזוי פרייליך, אזוי לוסטיג; א שאד אז מען טוט דאס נישט יעדן טאג. אין בית פיגא איז דאס א חלק פון די לימודים, די קינדער פון אלע כיתות טאנצן יעדן טאג. עס איז גוט מען זאל דאס איינפירן אין תלמוד תורה, די קינדער זאלן טאנצן אפאר מינוט איידער מען גייט עסן מיטאג. עס איז זייער וויכטיג אז עס זאל זיין זייער פרייליך, ווייל אז קינדער טאנצן, זיי געבן זיך אויס - פארשפאָרט מען אסאך פראבלעמען.

איך וויל דיר נאכאמאל דערמאנען וואס איז די פליכט פון זיין א מנהל, א מנהל איז דא פאר איין זאך, ער זאל מחזק זיין די מלמדים, געבן גוטע ווערטער פאר די מלמדים, שמייכלען צו יעדן מלמד און העלפן די מלמדים. מען דארף נישט קיין מנהל פאר טעכנישע זאכן, אלע זאכן וואס זענען טעכניש - דאס קען טון דער מענעדזשער, דער סגן מנהל וכו', דער מנהל דארף מען פאר איין זאך - פאר די נשמה, פאר די חיות; יעדער מלמד זאל שפירן ווי ער האט א פלאץ ביים מנהל אין הארץ און ער האט איינער וואס שטארקט אים, דאס איז סיי פאר א מנהל און סיי פאר א מנהלת.

אויך וויל איך דיר בעטן זאלסט שוין אנגרייטן די פלענער פאר זומער, רעד מיט האברך יודל נרו יאיר אויב ער וויל נאכאמאל זיין מיט די קינדער וכו', און אויך אנגרייטן די גאנצע סטעף פארן זומער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

מרת ... תחי', ירושלים

דאס אז אייער ניס וויל מער נישט רעדן מיט אייך, זי זאגט אז איר מאן לאזט איר נישט רעדן מיט אייך ווייל איר זענט היכל הקודש, עס טוט אייך וויי וכו'.

איר דארפט איר פארשטיין, זי איז נישט שולדיג; מען רעדט שלעכט, מען רעדט לשון הרע; וואס קען מען טון? איך האב דאס אויך געהאט, מיין ווייב האט געהאט חבר'טעס, און פלוצלונג האבן זיי אויפגעהערט צו רעדן מיט איר, ווייל זי האט א מאן וואס איז ברסלב, דאס אלעס קומט פון לשון הרע.

דער הייליגער רבי האט שוין פאראויס געזאגט (שיחות הר"ן, סימן קפב): "מען קריגט נישט אויף מיר, מען האט זיך נאר אויסגעשניצט א מענטש און אויף אים קריגט מען, איך קריג אויך אויף דעם מענטש, אויף אזא מענטש וואס טוט אזעלכע זאכן וואס טויגן נישט - קריג איך אויך".

שטארקט אייך, און פרייט זיך אז דאס איז אייער פראבלעם, דאס איז אונזער פלעק אז מיר קריגן נישט אויפן צדיק, מיר האבן ליב דעם צדיק און מיר שטרעבן און ווילן נכלל ווערן אינעם צדיק, דורכן זיך מבטל זיין און אננעמען בתמימות ופשיטות אלעס וואס ער זאגט.

זאגט תהלים, פרובירט צו זאגן יעדן טאג דעם יום תהלים. דער הייליגער רבי זאגט (חיי מוהר"ן, סימן תפה): "א גוט קאפיטל תהלים איז אזוי ווי פאנטש"; ווען א מענטש איז אויסגעטריקנט און אפגעמאטערט נעמט ער א טרונק וואס פרישט אים אויף, אזוי איז א קאפיטל תהלים, עס פרישט אויף דעם מענטש און עס ברענגט אים גרויסע ישועות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

לכבוד ... נרו יאיר, קרית ברסלב

מען טאר נישט מסיח דעת זיין פון זיין פרייליך מיטן אייבערשטן און מיט די מצוות וואס מען איז זוכה אריינצוכאפן - אפילו פאר איין רגע נישט, און אפילו מען זעט זיך זייער שלעכט און מען קען נישט טרעפן אין זיך קיין איין גוטע זאך - דארף מען זיך פרייען מיט דעם אז מען איז א איד, און מיט דעם וואס מען דינט נישט עבודה זרה. חכמינו זכרונם לברכה זאגן (מגילה יג.): "כָּל הַכּוֹפֵר בַּעֲבוֹדָה זָרָה נִקְרָא יְהוּדִי", יעדער וואס לייקנט אין די עבודה זרה ווערט אנגערופן 'איש יהודי'.

פון די שמחה קען מען נישט פאלן, ווייל אפילו מען זאל זיין דער ערגסטער און דער ווייטסטער מענטש - קען מען זיך נאכאלץ פרייען אז מען איז א איד און נישט קיין גוי. אזוי ווי עס איז געווען די מעשה (הובא בספר פרי צדיק חג השבועות, אות יג), דער הייליגער קדושת לוי זכותו יגן עלינו פלעגט יעדן טאג זאגן די ברכות השחר הויך אויפן קול, איין טאג האט ער פארפעלט צו זאגן די ברכה "שלא עשני גוי", איז איינער צוגעגאנגען צו אים און געזאגט: "רבי, איר האט אויסגעלאזט א ברכה, די ברכה פון שלא עשני גוי", האט אים דער הייליגער קדושת לוי געזאגט: "איך האב שוין געמאכט היינט די ברכה! ווען איך בין אויפגעשטאנען אינדערפרי בין איך געווען זייער צעבראכן ביי מיר, איך האב נישט געקענט טרעפן קיין שום זאך מיט וואס איך זאל זיך קענען מחיה ומחזק זיין, האב איך געטראכט צו מיר: 'א איד בין איך דאך, איך בין נישט קיין גוי', און פון גרויס שמחה האב איך מיך נישט געקענט איינהאלטן, און איך האב גלייך געמאכט די ברכה 'שלא עשני גוי', מיט דעם האב איך זיך מחי' געווען".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

לכבוד ... נרו יאיר, קרית יואל

אזא שאד אז דו האסט זיך אפגעקילט פון היכל הקודש און יעצט איז דיין גאנצע אידישקייט אפגעקילט, א שאד דו האסט זיך געטראפן חברים לצים וואס שפעטן פון די הייליגע צדיקים וואס זענען זיך מוסר נפש זייער גאנץ לעבן צו ברענגען נשמות ישראל צום אייבערשטן; פורים האבן אלע דיינע חברים צו מיר געוויינט אויף דיר אז דו האסט זיך אפגעקילט און אפגעלאזט דעם רבי'ן.

אפילו דו ביסט געפאלן אין די טיפע אפגרונד, דו געפינסט זיך אין שאול תחתית רחמנא לצלן, פון וואס דו האסט אלץ עובר געווען, זאלסטו וויסן אז אויב דו וועסט פון די רגע אויפהערן טראכטן פון די אלע זאכן וואס דו האסט עובר געווען, און דו וועסט זיך אנהייבן מחיה זיין מיט די גוטע זאכן וואס דו האסט זוכה געווען צו טון; מיט דיין ציצית, תפילין, תורה, תפילה, צדקה, שבת וכו' און דו וועסט זיך זייער פרייען מיט דעם - קענסטו זוכה זיין אז אלע דיינע עבירות וועט איבערגעדרייט ווערן צו זכותים, און דו וועסט ארויפגיין העכער און העכער, ביז דו וועסט נכלל ווערן אינעם אייבערשטן.

אבער וויסן זאלסטו אז דער סמ"ך מ"ם וועט נישט צולאזן דו זאלסט זיך אנהייבן פרייען, ער וועט קומען צו דיר מיט א פארשטעלאכץ, ער וועט דיר זאגן: 'טאקע, דורך שמחה קען מען אנקומען צו גאר הויכע מדריגות, אבער דאס מיינט מען נישט דיר, ווייל דו ביסט שוין א פארטיגער, דיר העלפט שוין גארנישט'; זאלסטו וויסן ליבער ברודער אז דאס איז נישט אמת, ווייל אויך דו קענסט נאך ארויסגיין פון אלע טומאות און ווערן א גרויסער צדיק; באניי זיך, הייב אן פון די רגע זיך פרייען מיט די גוטע זאכן וואס דו האסט שוין געטון.

לאז זיך נישט פארנארן פונעם סמ"ך מ"ם, וויסן זאלסטו ער האט אפאר וועגן ווי אזוי ער קומט צום מענטש, אמאל קומט ער צום מענטש מיט א פארשטעלאכטץ, ער פארשטעלט זיך מיט מצוות, ער קומט מיט א פרומע פנים, כאילו עס איז א גרויסע מדריגה צו זיין דערביטערט און צעקלאפט, און אזוי ווארפט ער אריין דעם איד אין שאול תחתית, דורך עצבות ומרה שחורה; ברודער אנטלויף פון די מרירות, הייב זיך אן צו פרייען מיט דיינע גוטע זאכן - וועסטו אריינגיין אין די קדושה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

לכבוד ... נרו יאיר, קרית ברסלב

דער עיקר דארף מען זיך האלטן אין איין מחדש זיין, פונדאסניי אנהייבן דינען דעם אייבערשטן. דער רבי האט דערציילט (שבחי הר"ן סימן ה-ו), אז ביי אים איז שטענדיג אזוי געווען, ער האט זיך אלץ באנייט, און אויך אין זיינע יונגע יארן ווען ער האט אנגעהויבן דינען דעם אייבערשטן און ער האט געשפירט ווי ער איז אראפגעפאלן - האט ער זיך צוריק אויפגעהויבן און געזאגט: "איך הייב אן פונדאסניי", כאילו ער האט נאך קיינמאל נישט געטון די עבודה; "וְכֵן בְּכָל פַּעַם וּפַעַם, תָּמִיד הָיָה רָגִיל לְהַתְחִיל מֵחָדָשׁ", אזוי פלעגט דער רבי אלץ אנהייבן פונדאסניי, "וְהָיָה לוֹ כַּמָה הַתְחָלוֹת בְּיוֹם אֶחָד", אין איין טאג האט ער אפאר מאל נאכאמאל אנגעהויבן פון פריש, "שֶׁגַּם בְּיוֹם אֶחָד לִפְעָמִים נָפַל מֵעֲבוֹדָתוֹ וְהָיָה מַתְחִיל מֵחָדָשׁ וְכֵן כַּמָּה פְּעָמִים בְּיוֹם אֶחָד", אפילו אין איין טאג אליינס האט ער זיך שטענדיג באנייט; דאס איז די אידישע וועג, דאס איז די וועג ווי אזוי מען קען זוכה זיין צו ווערן אן ערליכער איד, א גרויסער צדיק.

דער עיקר זאלסטו אויפזוכן דאס גוטס וואס דער אייבערשטער טוט מיט דיר; דער אייבערשטער טוט אזויפיל גוטס מיט יעדן מענטש, און אנשטאט קרעכצן און זיך אפרעדן אויף וואס עס פעלט - דארף מען עוסק זיין אין דאנקען און לויבן דעם אייבערשטן, ווייל ווי מער מען דאנקט דעם אייבערשטן - אלץ מער ישועות קומט אויפן מענטש. מוהרנ"ת זאגט: "ווען א מענטש רעדט זיך אפ, זאגט מען אין הימל: 'קוקט אן דעם מענטש, מען געבט אים גוטס און ער רעדט זיך אפ, לאמיר אים ווייזן וואס מיינט שלעכט', אבער ווען א מענטש דאנקט דעם אייבערשטן, זאגט מען אין הימל: 'קוקט אן דעם מענטש, ער איז פרייליך און דאנקבאר, לאמיר אים ווייזן וואס מיינט גוט', און מען געבט אים אלע ישועות.

דער אייבערשטער זאל העלפן זאלסט האבן הצלחה אין אלע ענינים.