בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן
מיין טייערער ... נרו יאיר
איך האב דיך שוין אזוי לאנג נישט געזען, איך בענק זיך צו דיר, איך וויל הערן וואס דו מאכטס, וואס דו טוסט.
איך וויל דיר בעטן זאלסט נישט קוקן קיין קליפס פון נארישע מענטשן וואס האלטן זיך אויבער חכמים, ווייל אין זייערע ווערטער ליגט באהאלטן סם המות, עס זעט אויס שיין, עס זעט אויס זיס, אזוי ווי עס שטייט: "כי נופת תטפנה שפתי זרה", די ליפן וואס רעדן פרעמדע דעות פון אפיקורסות, ציען זייער, עס טראפט פון זייערע ליפן זיסקייט, אבער "ואחריתה", איר סוף איז, "מרה כלענה", ביטער, ווי א ביטערע גראז, "חדה כחרב פיות", עס איז אזוי ווי א שארפע שווערד וואס ברענגט טויט.
טייערער ליבער ... נרו יאיר, ווארף אוועק די נישט גוטע כלים אויף וואס דו קוקסט די שלעכטע זאכן, איך וועל דיר ברענגען א וואוילע כלה, אן איידעלע זיסע כלה, דו וועסט האבן א גוטע לעבן, נישט קיין געמאכטע לעבן, וועסט נישט דארפן רעדן אויף קליפס, עס וועט דיר גוט זיין, הלוואי וועסטו מיר גלייבן, אז די ערליכע לעבן איז זיס און שיין, הלוואי וועסטו מיך אויסהערן און געטרויען און פירן א שיינע ערליכע לעבן.
דו האסט אזעלכע טייערע טאטע מאמע, זיי זענען אזעלכע וואוילע מענטשן, זיי האבן דיך אזוי ליב, איך האב דיך אויך זייער ליב, איך וויל דו זאלסט האבן די זיסע לעבן וואס איך האב.
איך בעט דיך זייער, איך וויל הערן פון דיר, איך בעט דיר ענטפער מיר עפעס, בלייב ביים רבי'ן אין היכל הקודש, הער נישט קיין פאדקעסט, הער נישט קיינעם אויס, נאר ערליכע אידן וואס רעדן פון תורה, פון אמונה, פון יראת שמים.
