הונדערטער משפחות אנשי שלומינו לעבן מיט אן אומבאשרייבליכע שבת התוועדות אין ארמון האטעל

די פאפיר איז צו קורץ אפצושרייבן באריכות דעם הערליכן שבת, וואס איז אריבער אויף די אריבער 500 משפחות פון אנשי שלומינו דעם פארגאנגענעם שבת קודש אינעם ארמון האטעל סטעמפארד קאנעטיקוט.   מיר וועלן אבער פרובירן אראפצושרייבן ממש אויפן שפיץ גאפל א שטיקל באריכט פונעם שיינעם שבת, ווי אלע באטייליגטע האבן זיך אויסגעדריקט איז דער שבת געווען צוגעשטעלט אויפן העכסטן סטאנדארט ברוחניות ובגשמיות. אלע האבן ארויסגענומען פונעם שבת א גאר גרויסן תועלת, סיי די עלטערן, סיי קינדער, מענער און פרויען. אלעס איז געווען גאר גוט אהערגעשטעלט. סיי די סעודות, די דרשות, די פראגראמען.   פרייטאג נאכמיטאג האט זיך אנגעהויבן די פלוס פון געסט וואס זענען געקומען צו פארן פון די גאנצע וועלט, בפרט איז געקומען א גרויסע עולם פון ארץ ישראל, פון ענגלאנד, און פון קאנאדע.   אלע באטייליגטע זענען געווארן זייער שיין אויפגענומען דורך די עסקנים, וואס האבן געגעבן פאר די משתתפים א זעקל מיט א נייע קונטרס "תפילות פאר די אידישע שטוב" תפילות פאר פרויען פון מוהרא"ש, אלע גליונות פון די וואך, און נאך פארשידענע זיסווארג.   די צימערן זענען געווען זייער שיין צוגעגרייט, אזוי אויך איז געווען א גאר געשמאקע טועמיה צוגעשטעלט.   עש"ק ביים זמן זענען די פרויען געגאנגען צינדן לעכט ביים דעזיגנירטע פלאץ, ווי די פרויען האבן אויסגעבעטן ביי די לעכט ערליכע דורות. די קינדער אנגעפירט דורך די פילע געטרייע מלמדים זענען געווען פארזאמעלט אין די לאבי און געזונגען שיינע ניגונים לכבוד שבת קודש.   דערנאך איז מען אריין אין ביהמ"ד, דער דיין הרה"ג ר' יונה זינגער שליט"א האט געדאווענט א ווארימע מנחה. דערנאך האט מען געהערט אפאר ווערטער פון ראש ישיבה, וואס האט ארויסגעברענגט אז דער ציל פונעם שבת איז זיך מחזק צו זיין ווייטער צו לערנען יעדן טאג א בלאט גמרא. אויך האט דער ראש ישיבה ארויסגעברענגט אז יעצט שבת זכור דארף מען געדענקען זיך נישט לאזן פון עמלק וואס וויל מאכן אז אידישקייט זאל ווערן פונעם טפל און מיר זאלן פארגעסן ח"ו פונעם עיקר.   דערנאך האט מען געדאווענט א געשמאקע קבלת שבת מיטן בעל תפילה מו"ה מאטי המייליך הי"ו.   נאכן דאווענען האט מען אויסגערופן אז נאכן סעודה וועט זיין דער באטע, מיטן שלום זכור און וואך נאכט צום בן הנולד ביי מו"ה רפאל פורסט הי"ו, און צום שבע ברכות פון החתן אברהם נ"י בן הר"ר חיים אלי' צוויבל שליט"א, עב"ג בת הר"ר אהרן וועבערמאן שליט"א.   דער סעודה איז געווארן הערליך אפגעראכטן אין לאנטש רום, און די קינדער האבן געגעסן עקסטער, די אינגלעך מיט די מלמדים, און די מיידלעך מיט די טיטשערס.   דער ראש ישיבה איז געקומען צום באטע אין ביהמ"ד אום 10:30 ווי מען האט אינאיינעם געזונגען זמירות שבת קודש, עקסטער האט מען געזונגען דעם "מעין עולם הבא" מיט גרויס התערורות, אויך ביי "צמא נפשי" האט מען זיך שטארק צופייערט.   דער ראש ישיבה האט ארויסגעברענגט ביים באטע, פארוואס מ'איז דא, מענטשן זאלן נישט טראכטן פארוואס קום איך, פארוואס קומט ער. ווען משיח וועט קומען וועט ער אויסלערנען אז מ'זאל קוקן אויף די נקודות טובות פון אידישע קינדער, און א מענטש דארף האלטן פון זיך, האבן אמונה אין אייבערשטן אין צדיק און אין זיך, און אזוי  מעקט מען אויס עמלק.   אינדערפרי, איז נישט געווען קיין שיעור אין ספר פעולת הצדיק. אנשי שלומינו האבן געזען א ביישפיל וואס מיינט העלפן אין שטוב. דער ראש ישיבה איז געווארן פארנומען מיט געבן צו עסן פאר זיינע קליינע קינדער וואס האבן זיך אויפגעוועקט פרי.   פארן דאווענען האבן זיך צוזאם גענומען א גרופע קינדער מיט די מלמדים, און געזאגט תהלים מיט גרויס התעוררות.   אום 9:30 איז דער ראש ישיבה אריינגעקומען אין ביהמ"ד צום דאווענען. פסוקי דזמרה האט געדאווענט הר"ר עזרא בוים שליט"א, און צו שחרית איז דער ראש ישיבה צוגעגאנגען. ביים ליינען האט מען צוטיילט די עליות פאר די פילע בעלי שמחה קיין עין הרע.   נאכן דאווענען איז געווען א ברייטע קידוש, ווי דער ראש ישיבה האט פארגעלערנט סיפורי מעשיות, דער ראש ישיבה האט ארויסגעברענגט וואס דער רבי זאגט "ווילאנג דער בלעטל היט אויף דיר, דארפסט פון גארנישט מורא האבן". אז דאס גייט ארויף אויפן "בלאט גמרא", און האט ארויסגעברענגט אז לערנען האט גארנישט צו טון מיט קיין פארטייען.   דאן איז מען געגאנגען צום סעודה וואס איז געווען צוגעשטעלט כיד המלך לכבוד שבת בשר וגדים וכל מטעמים, מען האט געזונגען אסאך שיינע זמירות ותשבחות צום אייבערשטן אינאיינעם.   נאכן סעודה איז דער ראש ישיבה געגאנגען צו די זאל ווי קינדער האבן געגעסן, און געזאגט מיט זיי תהלים, און געזאגט א הארציגע שמועס, דער ראש ישיבה האט פארציילט מעשיות פון רבין, און אריינגעלייגט יראת שמים אין די קינדער. דערנאך האט דער ראש ישיבה געטיילט גוט זאכן פאר די קינדער.   ביי שלש סעודות איז געווען א גאר ווארימע שמועס פון ראש ישיבה, וואס האט ארויסגעברענגט די גרויסע עת רצון וואס ווערט אין הימל ווען א איד זאגט פארן אייבערשטן אז ער וויל צוריק קומען צום אייבערשטן, און ווי שטארק דער אייבערשטער ווארט אויף אונז, אז מיר זאלן רעדן צו אים.   נאך מעריב איז געווארן אויפגעשטעלט א מחיצה אין לאבי, און דער ראש ישיבה איז ארויפגעגאנגען הויך אויפן שטאק אז יעדער זאל קענען מיטהאלטן די הבדלה. דערנאך האט מען זיך ארויסגעלאזט אין א טאנץ מיט מוזיק, און געדאנקט דעם אייבערשטן אויף די שיינע שבת וואס מ'איז אריבער.   מוצאי שבת קודש איז פארגעקומען דער גרויסער סיום סדר מועד על סדר הש"ס, צו וואס נאך פילע הונדערטער משפחות זענען געקומען צו פארן.  פילע הונדערטער אנשי שלומינו מיט זייערע משפחות האבן זיך געפרייט אינאיינעם בשמחת התורה, ווען די גאנצע קהילה סיי די טייערע בחורים, די אינגעלייט, און די בעלי בתים, האבן אלע אינאיינעם זוכה געווען במשך די לעצטע צוויי יאר יעדן טאג, טאג איין טאג אויס לערנען איין בלאט פון ש"ס, און יעצט זוכה געווען אז מען הייבט שוין אן סדר נשים אין ש"ס.   דער יושב הר"ר מרדכי אינדיג שליט"א האט ארויסגעברענגט וואס ברענגט צוזאם די אלע אידן פון אלע שיכטן, פון אלע עקן וועלט, פון אלע חסידות'ן, דאס איז די גמרא, דאס ברענגט אונז צוזאם.   דערנאך האט מען געהערט שטארקע ווערטער פונעם דיין הרה"ג ר' יונה זינגער שליט"א, וואס האט צוגעברענגט די גמרא וואס זאגט אז מען האט געוויזן פאר די אידן פארן אהיים פארן פון עולה רגל זיין אז די ברויט פון לחם הפנים איז נאך הייס, און די גמרא פירט אויס אז מען האט געזאגט פאר די אידן "ראו חבתם לפני המקום", האט ער געזאגט אז דאס קומט אונז דערמאנען אז מיר גייען יעצט אהיים, דארפן מיר געבן פאר אונזערע קינדער "ווארימע ברויט", א ווארימע שטוב, דורך דעם וואס מיר זאגן פאר זיי "דער אייבערשטער האט ענק ליב".   הר"ר יעקב לעסער שליט"א האט מסיים געווען מסכת חגיגה, און דערנאך האט מען זיך ארויסגעלאזט אין א פייערדיגע טאנץ און געדאנקט דעם אייבערשטן אז מען האט די זכיה צו לערנען די הייליגע תורה.   דערנאך האט מען געהערט זייער א שיינע שמועס פון ראש ישיבה, דער ראש ישיבה האט שטארק גערעדט איבער דריי זאכן איבער זיך שטארקן צו לערנען יעדן טאג א דף גמרא, און זאגן די ווערטער, איבער דעם אז א איד זאל פרובירן די עצה פון הייליגן רבין און רעדן צום אייבערשטן, און אזוי פועלן אלע ישועות, און איבער רעדן שיין צו די ווייב, און זיך היטן די אויגן, און אזוי וועט מען ליב האבן אהיים צו קומען צו די ווייב. דער ראש ישיבה האט בתוך הדברים ארויסגערופן א בחור וואס האט פאריגע וואך ביי זיין בר מצוה זוכה געווען צו פראווען דארט זיין סיום הש"ס.   דערנאך האט מען געוויזן פרעזענטאציע פון די נסיעה פון ראש ישיבה צו די מקומות הקדושים אין אונארן. און צום לעצט האט דער ראש ישיבה געטיילט פארן גאנצן עולם קליינע גמרות מסכת יבמות, געאייגענט מיט צו נעמען אויפן וועג.   נאכן בענטשן האט מען זיך ווייטער געפרייט און געטאנצט ביז אין די פריע פארטאגס שעה.   בילדער, קליפס, דרשות וועלן בעזרת השם נאכפאלגן אין די קומענדיגע טעג.   פקודי ה' ישרים משמחי לב

< זעה מער י אדר ב' תשפ"ב 📝

דער לאנג ערווארטערטער אלבום "איך דארף נישט קיינעם" ערשינען!

נאך חדשים וואס דער ראש ישיבה שליט"א ארבעט אויפן נייעם אלבום "איך דארף נישט קיינעם", האט דער אייבישטער געהאלפן, אז דער נייער אלבום איז היינט ערשינען לאור עולם, צו די גרויסע שמחה פון אלע אונזערע ליינער.   אין דעם פראיעקט איז אריינגענומען געווארן דאס בעסטע פון דאס בעסטע. דער ראש ישיבה האט אויסגעוועלט און געקליבן די בעסטע ניגונים פון ישיבה, און ב"ה עס איז געלונגען צוזאם צו שלעפן א פראפעסיאנאלע סטעף פון די בעסטע מוזיקאלישע עקספערטן פון אמעריקע און ארץ ישראל וואס האבן באגלייט און ארענדזשט דעם גאנצן פראיעקט, און אויסגעשטעלט די מוזיק מיט די באגלייטונג פון א גאר רייכע היימישע כאאר. עס איז געווארן אראפגעכאפט אין די פארגעשניטענסטע רעקארדינג סטודיאס, און געווארן געמיקסט דורך די בעסעטע מיקסינג מומחים.   דער אייבישטער האט געהאלפן, אז עס ארויסגעקומען א גאר גאר רייכער אלבום, מיט א קאלעקציע פון ניגונים וואס בארירן די טיפסטע סטורנעס פון הארץ, פלאקערן אויף די אידישע נשמה, און בלאזט אריין חיות אין אידישע קינדער.   די וואס האבן עס אויסגעהערט זאגן עדות, אז אזא סידי איז נאך נישט געווען אויף די אידישע מארקעט, א סידי וואס איינמאל מען לייגט עס אריין אינעם פּלעיער, קומט עס נישט ארויס פון דארט, עס ציעט דאס הארץ, און צינדט א אומאויפערליכע בענקעניש צום אייבערשטן, וואס מען קען נישט אויסלעשן.   💿 צו קויפן דער סידי פאר בלויז $2.99 🎧 צו הערן דעם סידי אנליין אויף "ברסלב סענטער" 💿 שיינע סידיס פון ישיבה פאלגענד זענען די עלף טרעקס פון דעם נייעם הערליכן אלבום:   1 - באניי מיר באשפער באניי מיר מיין הארץ, איך וויל זיך צו דיר צוריק קערן,  באשפער באניי מיר מיין הארץ, איך וויל שוין א צדיק ווערן, באשפער באניי מיר אינגאנצן, פלאקער מיר אויף מיין הארצן, איך הייב יעצט אן פון ניי!   2 - איך דארף נישט קיינעם מי לי בשמים, ועמך לא חפצתי בארץ, איך דארף נישט קיינעם, נאר דיר באשעפער אליין! נישט דער וועלט, נישט יענער וועלט, נאר דיר באשעפער אליין!   3 - נארישקייטן ווילאנג נאך - רבונו של עולם, וועל איך טון נארישקייטן, האב רחמנות אויף מיר, איך וויל זיין אן ערליכער איד!   4 - טאטע טאטע, איך וויל זיין אן ערליכער איד, דער יצר הרע ברענט און בריעט, ער לאזט מיר נישט אפ, ער ווארפט מיר כסדר אראפ.   טאטע - וויפיל איך פרוביר, ס'געט זיך גארנישט קיין ריר, איך ווער נאר אלץ ווייטער און ווייטער פון דיר.   טאטע - איך בין אזוי צובראכן, אזוי ווייט בין איך פארקראכן,  מיין נשמה - צושניטן און צוריסן, אין די זייט, אזוי ווייט, אזא לאנגע צייט.   טאטע - איך פאלג נאר דעם יצר דעם שלעכטן, אוי - ווער קען מיין נשמה פאררעכטן, יעדן טאג - איך ווער נאר ערגער פון נעכטן.   טאטע - איך גייט טון וואס דער רבי זאגט, רעדן צו דיר יעדן טאג, דאס איז די איינציגסטע עצה וואס איך פארמאג,   טאטע - די עצה פון רעדן צו דיר, דערציילן א יעדע ריר, קיין אנדערע עצה איז נישטא פאר מיר.   טאטע - דער רבי טוט אונז דערמאנען, קיין יאוש איז גארנישט פארהאנען, מ'דארף זיך מיטן אייבערשטן אויס'טענה'ן, נישט אפלאזן, נישט אויפגעבן, א גאנצן לעבן.   טאטע - איך לאז אפ די וועג דעם שלעכטן, איך גיי מיינע מעשים פאררעכטן, איך וועל היינט זיין בעסער פון נעכטן.   5 - א גוטע עצה ותקנינו בעצה טובה מלפניך, רבונו של עולם, טאטע זיסער, געב מיר א גוטע עצה, איך זאל וויסן - וויזאוי זיך צו פירן.   6 - איך שריי טאטע איך שטיי אליינס צומישט, איך ווייס נישט די וועג, וואו אנצופאנגען,   ארויסגיין פון מיין שלעכסט, פון מיין יצר הרע, וואו איך בין געפאנגען.   איך בין אינגאצן פארלוירן, וואס גייט פאר מיט מיר, טאטע עפן מיר מיין מויל, איך וויל רעדן צו דיר!   טאטע, איך שריי צו דיר טאטע, איך בעט פון דיר טאטע, נעם אן מיין געבעט, אוי!   רבונו של עולם, איך ווייס נישט וואס צו טון, איך וויל זיין ערליך.   די יצר הרע ברענט, איך האלט עס מער נישט אויס,   ס'איז אזוי געפערליך!   רבונו של עולם, האב רחמנות אויף מיר, איך וויל באמת תשובה טון, עפן מיר די טיר!   טאטע, איך שריי צו דיר טאטע, איך בעט פון דיר טאטע, נעם אן מיין געבעט, אוי!   איך פיל מיך אזוי גוט, איך פיל מיך אזוי פיין, ווען איך טראכט פון דיר.   אפילו איך בין אליין, קיינער קען מיר נישט פארשטיי, אבער דו ביסט מיט מיר.   אין א יעדע מצב, נישט קיין חילוק וואס איך טו, פיל איך אזוי גוט, ווייל דו ביסט מיט מיר!   טאטע, איך שריי צו דיר טאטע, איך בעט פון דיר טאטע, נעם אן מיין געבעט, אוי!   7 קיין יאוש ברודער הער זיך צו, וואס דער הייליגער רבי טוט אונז זאגן: "געוואלד, זייט אייך נישט מייאש, וואס ס'זאל נאר זיין!"   ס'וועט נאך קומען גוטע צייטן, ס'וועט נאך זיין גוט, ברודער ברודער - זייט אייך נישט מייאש!   8 - אין ברסלב אין ברסלב ברענט א פייער, צינד עס אן אין מיין הארץ,   איך האב אויסגעפירט, און איך וועל אויספירן, איך האב געענדיגט, און איך וועל ענדיגן, איך בין א טייך וואס רייניגט, פון אלע שמוציגע פלעקן.   איך בין א וואונדער, און מיין נשמה איז א גרויסע וואונדער, אזא חידוש ווי איך בין, איז נאך קיינמאל נישט געווען.   9 - קשיות רבנו של עולם, איך בין אינגאנצן אליין. רבונו של עולם, קיינער קען מיר נישט פארשטיין! העלף מיר - רבונו של עולם: איך זאל נישט האבן קיין קשיות אויף דיר, איך זאל אייביג גלייבן אין דיר.   אוי אוי - העלף מיר שוין, העלף מיר - רבונו של עולם, איך זאל נישט האבן קיין קשיות אויף דיר, איך זאל אייביג גלייבן אין דיר.   10 - דע דע, שעיקר הדביקות והתחברות להשם יתברך, הוא על ידי התפלה.   אזוי זאגט דער היילגער רבי, אין ליקוטי מוהר"ן די צווייטע חלק סימן פ"ד, וויאזוי קען א מענטש ווערן נאנט צום הייליגן באשעפער, קען מען נאר דורך תפלה.   11 - געוואלד היילגער באשעפער, וואס וועט זיין מיט מיר, הייליגער באשפער, איך וויל זיך צוריק קערן צו דיר, געוואלד, טאטע אוי געוואלד, איך גיי דאך שוין אהיים צו דיר באלד! געוואלד, טאטע אוי געוואלד,   וואס וועל איך נעמען מיט מיר אין די האנט.  

< זעה מער ז אדר ב' תשפ"ב 📝