היינט מיטוואך משפטים אווענט קומט בעז"ה פאר א מסיבה לטובת די כולל היכל הקודש אין וויליאמסבורג, בראשות פונעם ראש ישיבה שליט"א, ווי אינגעלייט וואס תורתם אמונתם הארעווען זיך צו משלים זיין בש"ס ופוסקים והוראה. דער טיי אווענט קומט פאר אין שטוב פון מו"ה יצחק משה רייך הי"ו אויף 1515 54סטע גאס. כי טוב סחרה מכל סחורה בריוו פונעם ראש ישיבה איבער די חשיבות פונעם כולל היכל הקודש
נעכטן נאכט איז פארגעקומען א מסיבה פארן כולל היכל הקודש וויליאמסבורג בנשיאות דער ראש ישיבה שליט"א, ווי עס זיצן אין לערנען אינגעלייט תלמידי חכמים וואס תורתם אומנותם, און זענען זיך משלים בש"ס ופוסקים ובהוראה. דער מסיבה איז פארקומען מיט גרויס סוקסעס אין שטוב פון מו"ה העניך אינדיג הי"ו, אויף 450 קענט עוועניו. בילדער
די יומא דהילולא קדישא פון כ"ק מרן מוהרא"ש זי"ע איז אויסגענוצט געווארן דורך אידן איבער דער גארער וועלט בכלל, און דורך אנשי שלומינו בפרט, זיך צו דערמאנען די ליכטיגע זכרונות פון מוהרא"ש און צו איבער'חזר'ן זיינע הייליגע לימודים און עס אנהאלטן אויך אויף ווייטער. אין לויף פון זיין גאנצן הייליגן לעבן האט מוהרא"ש נאר געוואלט איין זאך, און אויף דעם האט ער געארבעט טאג און נאכט, אריינצוברענגען די לימודים פון הייליגן רבי'ן אין יעדע אידישע הויז איבער די גאנצע וועלט. צו שטארקן און מחזק זיין יעדן איד אז ער זאל וויסן און געדענקען אלעמאל אז דער אייבערשטער איז שטענדיג מיט אים, און אין סיי וועלכע מצב א איד געפונט זיך נאר קען ער אייביג זיין נאנט צום אייבערשטן, און ער קען זיך שטענדיג צוריק קערן צום אייבערשטן. יעצט, אין די צייט פון די יומא דהילולא קדישא, דערמאנען זיך אידן ווי אזוי זיי האבן באקומען חיזוק פון די הייליגע ספרים און קונטרסים פון מוהרא"ש במשך די אלע יארן, און נוצן אויס די צייט ווייטער ממשיך צו זיין צו לערנען די הייליגע ספרים און צו מקיים זיין וואס דארט שטייט, און מיט דעם זיך איינקויפן א פרייליך און גליקליך לעבן ברוחניות ובגשמיות. דורכאויס די גאנצע וואך, ובפרט אין די טאג פון יארצייט, האבן צענדליגע טויזנטער אידן פון איבער די גאנצע וועלט פוקד געווען דעם ציון הקדוש אין יבנאל און זיך אויסגעבעטן בדבר ישועה ורחמים. פילע האבן זוכה געווען אויסצוזאגן גאנץ תהלים בלי הפסק ביים ציון הק', אזוי ווי מוהרא"ש האט צוגעזאגט אין זיין צוואה אז ווער עס וועט אויסזאגן גאנץ תהלים ביי זיין קבר וועט ער זיך משתדל זיין צו איינרייסן און פועל'ן פאר יענעם א ישועה, און ספעציעל ווען א בחור אדער מיידל וועט דארט אויסזאגן תהלים, וועלן זיי זיכער געהאלפן ווערן מיט א שידוך בקרוב ובניקל. מוהרא"ש האט געשריבן אין זיין צוואה אז אזוי ווי ביי זיין לעבן זענען אידן נתעורר געווארן צו תשובה דורך אים, די זעלבע וועט אויך זיין נאך זיין הסתלקות אז ווער עס וועט קומען צו זיין קבר וועט נתעורר ווערן תשובה צו טון און זיך צוריק צו קערן צום אייבערשטן. און דאס האט מען ספעציעל געקענט זען יעצט ביי די יומא דהילולא, די געוואלדיגע התעוררות וואס האט געהערשט אויפ'ן פלאץ, ווען פילע טויזנטער אידן האבן שופך שיח געווען און זיך אויסגעגאסן דאס הארץ ביים ציון הק'. דאהי אין אמעריקע איז פארגעקומען דער צענטראלער סעודת הילולא בבית מדרשינו אין וויליאמסבורג. עס זענען זיך צוזאמגעקומען פילע אידן פון איבעראל זיך צו שטארקן אינאיינעם אין דעם געהויבענעם טאג. ביי די סעודה האט מען געהערט דברות קודש פונעם ראש ישיבה שליט"א וואס האט ארויסגעברענגט ווי שטארק מיר דארפן דאנקען דעם אייבערשטן אויף די געוואלדיגע מתנה וואס מיר האבן באקומען אז מיר האבן געהאט מוהרא"ש מיט אונז וואס האט אונז געלערנט די הייליגע לימודים פון רבי'ן, און די לימודים זענען ווייטער חי וקים, מיר דארפן עס נאר ווייטער לערנען און חזר'ן. דער ראש ישיבה שליט"א האט געזאגט אז ווען ס'קומט צו רעדן פון מוהרא"ש, איז דאס זייער שווער, מוהרא"ש האט אונז אזויפיל געגעבן אין לעבן, ער האט אזוי סאך געהאלפן אזויפיל אידן איבער די וועלט, אז ס'איז ממש נישט מעגליך דאס אראפצוברענגען און איבערדערציילן, כל המוסיף גורע, וויפיל מ'וועט רעדן וועט קיינמאל נישט זיין גענוג. דעריבער איז דער עיקר צו רעדן פון די לימודים און די עצות פון מוהרא"ש, ווי אזוי מיר קענען זיך שטארקן אין זיי און דאס ווייטער פארשפרייטן, דאס זענען גרעסטע מופתים פון מוהרא"ש, און דאס איז וואס מיר דארפן חזר'ן כסדר. אזוי ווי רבי נתן האט געזאגט אויפ'ן רבי'ן, אז די עיקר מופתים וואס מ'האט געזען ביים רבי'ן איז געווען אז יעדער איד וואס איז געקומען צום רבי'ן, ער האט אויסגעהערט און גענומען די עצות פון רבי'ן, איז געווארן איבערגעדרייט צו א נייער מענטש, ער איז געווארן אן אמת'ער ערליכער איד. דאס איז אן אמת'ער רבי, דער וואס קען העלפן אידן, ער קען אין זיי אריינברענגען א ריינע אמונה, ער קען אין זיי אריינברענגען א שטארקייט און א פרישקייט זיך שטענדיג אויפצוהויבן און זיך שטארקן צו דינען דעם אייבערשטן. דער ראש ישיבה שליט"א האט ארויסגעברענגט וואס מוהרא"ש האט געטון ווען ער איז געווען א יונגער בחור'ל און ער האט געטראפן א ספר'ל פון הייליגן רבי'ן, און דאס האט אים געטוישט זיין לעבן, ס'האט אים געברענגט נאנט צום אייבערשטן, און דערפאר האט מוהרא"ש נישט געוואלט האלטן דעם סוד פאר זיך, האט ער גענומען פאר זיך א ציל אין לעבן, צו פארשפרייטן דעם הייליגן רבינ'ס ווערטער איבער די גאנצע וועלט. אין יענע צייטן איז דער נאמען פון רבי'ן נאך נישט געווען באקאנט בכלל פאר זייער אסאך אידן, און חפץ ה' בידו הצליח אז ער האט זוכה געווען אריינצוברענגען די עצות און לימודים פון רבי'ן אין די גאנצע וועלט. דאס איז אונזער פליכט ווייטער ממשיך צו זיין, יעדער האט זיך זיין וועג ווי אזוי ער קען איבערגעבן די לימודים ווייטער פאר נאך אידן, אויב דער אייבערשטער האט אונז געהאלפן און אונז געברענגט צום הייליגן רבי'ן, דארפן מיר דאס פארגינען אויך פאר נאך איינעם. נארישע מענטשן האבן מורא פון די "כאפערס", די געטרייע מפיצים וואס טראגן ארום און פארשפרייטן די הייליגע ספרים און קונטרסים. וואס וויל זיי דען? וואס שטייט אין די קונטרסים? די איינציגסטע זאך וואס די קונטרסים ברענגען ארויס איז דאך נאר צו מקרב זיין יעדן איד צום אייבערשטן, צו ווייזן פאר יעדן איינציגסטן מענטש אז ער האט נאך אויך א וועג מצליח צו זיין אויף דער וועלט, אז ער זאל קיינמאל נישט אויפגעבן נאר שטענדיג זיך אויפהויבן און זיך מחזק זיין, צו וויסן א וועג ווי אזוי מחנך צו זיין די קינדער, ווי אזוי צו האבן שלום בית, און נאך פילע גוטע עצות אין לעבן. ווען דער מפיץ קומט צום טיר מיט א קונטרס, איז ער נישט דא געקומען צו פארכאפן מענטשן קיין ברסלב, ער איז געקומען מזכה צו זיין אידן מיט חיזוק און אמונה, מיט עצות און הילף, מ'זאל ווייטער קענען אנגיין אין לעבן, נאר אויך ארייננעמען דעם אייבערשטן אין זייער לעבן. נאך די דרשה האט מען געבענטשט ברכת המזון, און דערנאך איז פארגעשטעלט געווארן א שיינע סלייד פרעזענטאציע איבער די גרויסקייט פון הפצה, מען האט געהערט ערשטהאנטיגע מעשיות פון פילע מפיצים ווי אזוי די הייליגע ספרים און קונטרסים זענען מחי' און מחזק אזויפיל טויזנטער אידישע קינדער איבער די גאנצע וועלט. דערנאך איז דער עולם זיך צוגאנגען מיט פרישע קבלות טובות זיך צו שטארקן ווייטער מיט די לימודים פון מוהרא"ש און ארויסהעלפן דאס פארשפרייטן איבער די וועלט. דער אייבערשטער זאל העלפן אז מיר זאלן טאקע זיך ווייטער האלטן אינאיינעם און ממשיך זיין צו דינען דעם אייבערשטן מיט שמחה אזוי ווי מוהרא"ש האט אונז געלערנט, ביז מיר וועלן שוין זוכה זיין צו די גאולה שלימה בב"א. לזכר עולם יהיה צדיק! בילדער
דעם קומענדיגן מאנטאג פ' משפטים וועט אי"ה פארקומען די חתונה פון הבה"ח לייבי הי"ו בן מו"ה אייזיק אפפעל הי"ו, עב"ג בת מו"ה יצחק קאפלאן הי"ו. די חתונה וועט פארקומען אין בית המדרש היכל הקודש ברסלב אין וויליאמסבורג. ווי ביי די פריערדיגע חתונות, וועט דאס מאל אויך אלעס ווערן צוגעשטעלט גענצליך אומזיסט פאר ביידע זייטן, אלע משפחות פון די קהלה לייגן צו א האנט צוצושטעלן אלע געברויכן פון די חתונה, און גלייכצייטיג איז ערווארטעט אז דאס וואס זיין גאר א פרייליכע חתונה, ווי ביי די פריערדיגע חתונות אין ישיבה. דער אייבערשטער זאל העלפן אז ס'איז זאל א קשר של קימא און א בנין עדי עד, מיט דורות ישרים ומבורכים געזונטערהייט. מיט די פארמערונג פון חתונות אין היכל הישיבה, ווערט פון איין זייט די רעש פון "א חתונה אין בית המדרש" שטילער, אבער פון די אנדערע זייט שרייעט די שטילקייט אזש עס קען ממש טויב מאכן די אויערן. פאר אן אפהאנדלונג איבער די פילע חתונות אין ישיבה, ליינט דעם פרישן ארטיקל (לינק בייגעלייגט פון אונטן) ארטיקל: ס'מערן זיך חתונות אין היכל הישיבה
צוליב די גרויסע נאכפראגע ביי אידן וועלכע לעכטצן נאך די עצות און חיזוק פונעם רבין וואס ווערט געשריבן דורך ראש ישיבה שליט"א אין די קונטרסים "עצתו אמונה" וואס קענען נישט ליינען קיין אידיש, נאר ענגליש, האבן זיך אריינגעלייגט אין די ארבעט עטליכע אידן מומחים במלאכה, איבער צו זעצן די בריוו אויף ענגליש. און עס האט באקומען דער נאמען "The Light of Emunah". דער ענגליש רעדנדע ציבור באוואונדער די פראפעסיאנעלע ארבעט וואס ווערט אריינגעלייגט דערין, פון איין זייט זאל עס זיין פליסיג און גרינג, און פון די אנדערע זייט נישט אוועקצוגיין פון די ווערטער וואס דער ראש ישיבה שליט"א שרייבט. גלייך נאדעם וואס עס איז ארויס פון דרוק עטליכע הונדערט שטיק, איז עס תיכף צוכאפט געווארן, און מען האט געדארפט איבער דרוקן, כדי נאכצוקומען דעם פארלאנג. דאס איז אויסער די עצתו אמונה וואס ווערט איבערגעזעצט אויף לשון הקודש דורך די מערכת "חיזוק יומי המתורגם", וואס מאכט א געוואלדיגע ארבעט ביי די אידן וואס רעדן נאר לשון הקודש, און ווערט צוכאפט דורך זיי יעדע וואך. די אידישע און די ענגלישע עצתו אמונה איז דא צו באקומען יעדע וואך א פרישע באנד, אין ישיבה אויף 27 סקילמאן סט., אזוי אויך קען מען עס באקומען ביי די מפיצים. אויך קענט איר עס באקומען דעליווערט צום טיר דורך רופן די מערכת "חיזוק צום טיר" 347-509-4908 וואס וועלן אייך צוברענגען צום טיר וואס איר דארפט, סידיס, קונטרסים, ספרים, עס די קארדס, א.א.וו. דא אויפן וועבסייט קענט איר עס טרפען צו זען און צו דאונלאודען, אינטערן בלאט "ספרים". (לינק) לא רעב ללחם, ולא צמא למים, כי אם לשמוע את דבר ה'
פארגאנגעם וואך איז הבחור החשוב ממזכי את הרבים (פון די רעדאקציע פון די "חיזוק יומי המתורגם") איציק מענדאלוויטש געווען געפארן קיין אייראפע צו מתפלל זיין אויף קברי צדיקים, דעם זונטאג מיטאג איז דער חשובער בחור געפארן אויפן וועג פארנדיג אין א טעקסי אויפן וועג ארויס פון ליזענסק ווי ער האט מתפלל געווען ביים הייליגן ציון פונעם רבין רבי אלימלך זי"ע, און איז זיך רואיג געשלאפן אויפן הונטערשטן זיץ, זייענדיג אויסגמוטשעט פון זיין לאנגע רייזע, ווען פלוצלינג האט דער קאר געכאפט א שרעקליכן גליטש אויף די אייז, און האט זיך אינגאנצן איבערגעדרייט, און איז אין איילעניש אריינגעפירט געווארן אין שפיטאל אין א שווערן מצב, און ביז יעצט האט ער זיך ליידער נאך אלץ נישט אויפגעוועקט. ברוך השם אז מען האט אים נעכטן נאכט אפגעפירט קיין ארץ ישראל וואו די דאקטוירים פראבירן אים צו ראטעווען. אידן ווערן געבעטן צו מתפלל זיין פאר יצחק בן אהובה שושנה. בילדער
היינט דינסטאג אווענט אור ליום י"ז שבט, ווען עס פאלט אויס די פערטע יארצייט פון מוהרא"ש ז"ל, וועלן זיך אנשי שלומינו צוזאם קומען אין ביהמ"ד היכל הקודש ברסלב וויליאמסבורג, אויף 27 סקילמאן סט. ווי מען וועט זיך וואשן צום יארצייט סעודה, און זיך מחזק זיין אינאיינעם צו גיין ווייטער אין זיינע וועגן, צו זיין גרייט אלעס אוועק צו געבן פון זיך אלעס אבי פאר נאך א איד זאל גיין גוט, נאך א איד זאל וויסן אז מען קען יא האבן שלום בית, נאך איינער זאל געוואר ווערן אז אויך ער קען לערנען כל התורה כולה. מען וועט זיך מחזק זיין אין דאס וואס ער האט געלייגט דער עיקר דגוש בחיים חיותו, אז מיר אלע זאלן זיך אנשטרענגען צו מפיץ זיין די תורה פון הייליגן רבין אויף די גאנצע וועלט. און בכלל מחזק זיין די מפיצים אויף אלע מיני אופנים וואס מיר קענען נאר. און מיטן אייבערשטענס הילף ווייטער גיין אין זיינע הייליגע וועגן, און לערנען זיינע הייליגע ספרים. דער ראש ישיבה שליט"א וועט בעז"ה אויפטרעטן מיט דברי חיזוק וואס מיר וועלן אלע מיטנעמען מיט זיך צו קענען אנגיין ווייטער, און דינען דעם אייבערשטן. תורתו מגן לנו הוא מאירת עינינו
פארגאנגעם וואך דינסטאג איז געגאנגען אונטער די חופה החתן הילל בן מו"ה ישראל אשר ווייס הי"ו מחשובי אנ"ש אין קרית יואל מיט די טאכטער פון הר"ר יואל טייטלבוים שליט"א גבאי ביהמ"ד עצי תמרים קרית יואל. די חתונה איז פארגעקומען אין קרית יואל מיט די באטייליגונג פון פילע אנ"ש און שכנים און ידידים וואס קומען כסדר אריין אין ביהמ"ד פונעם מחותן, וויסנדיג אז דארט איז א פלאץ ווי מ'וועט ארויסגיין מיט פילע באגאדזשן חיזוק און אמונה צו קענען מיטנעמען אהיים. אזוי אויך איז דער ראש ישיבה שליט"א ספעציעל ארויס געקומען קיין קרית יואל זיך צו באטייליגן ביים געהויבענעם חתונה, און זיך מיטגעפריידט מיט די געהויבענע שמחה. שבת שבע ברכות איז אפגעהאלטן געווארן אינעם בית המדרש פונעם מחותן "היכל הקודש" קרית יואל עצי תמרים, ביי של"ש זענען מכובד געווארן מיט זמירות שב"ק די זיידעס פון חתן כלה, הר"ר מאיר יוסף טייטלבוים שליט"א, הר"ר יושע שמאיע שליט"א, הר"ר חיים מאיר הכהן סאנדער שליט"א און הר"ר אברהם ישעי' ווייס שליט"א. מיט ברכת המזון איז מכובד געווארן הר"ר אלי' שלמה קאהן שליט"א, מנהל בית רחל קרית יואל. בילדער
פארגאנגעם שבת וארא הבעל"ט איז דער ראש ישיבה שליט"א ארויסגעפארן צו קעטסקיל בערג קיין עלענוויל צו פראווען א שיינע שבת התוועדות מיט אן ענגע צאל אינגעלייט מיט זייערע משפחות וואס העלפן ארויס מיט גאר שיינע סכומים צו בויען דעם נייעם בנין אין אומאן. דער שיינער שבת איז אפגעראכטן אויף א גאר שיינעם פארנעם מיט ווארימע תפילות, שיינע סעודת, ווי דער ראש ישיבה שליט"א האט משמיע געווען דרשות פול מיט חיזוק און עצות. די אינגעלייט זענען אהיים געפארן אנגעזאפט מיט כחות אנצוגיין ווייטער אויפן לאנגן ווינטער. בילדער דרשה ביים מלוה מלכה מוצש"ק
דערנענטערנדיג זיך צו די יומא דהילולא קדישא פון כ"ק מרן מוהרא"ש זי"ע, דערקענט זיך גאר שטארק די התעוררות און התרגשות ביי אנשי שלומינו בפרט, און ביי אידן איבער די וועלט בכלל, צו דעם געהויבענעם טאג. מוהרא"ש פלעגט זאגן אז ביי די יומא דהילולא פון א צדיק, דעמאלט קומט ארויס און מען זעט וואס דער צדיק האט איבערגעלאזט פאר די וועלט, די לימודים און עצות וואס ער האט אויסגעלערנט וואס זענען ווייטער חי וקים און זענען ווייטער מחזק און מעורר אידישע קינדער און דערנענטערט זיי צום אייבערשטן. מיר ווייסן דאך זייער גוט וואס מוהרא"ש האט געטון פאר אונז אלע זיינע יארן, ווי אזוי ער האט אונז געשטארקט אין יעדן מצב און אונז מחזק געווען צו דינען דעם אייבערשטן ווי עס דארף צו זיין. און דעריבער איז דער טאג אזוי גרויס, ווען מען נעמט זיך צוזאם און מען חזר'ט איבער זיינע ווערטער, און מען איז ווייטער ממשיך צו גיין אין זיינע וועגן. פילע אנשי שלומינו פארן ארויס קיין ארץ ישראל, זיך צו משתטח צו זיין אויפ'ן ציון הקדוש אין יבניאל אינ'ם טאג פון די יארצייט, אנדערע אידן וועלן זיך צוזאמנעמען בכל מקומות מושבותיהם און איבער'חזר'ן דאס וואס מוהרא"ש האט אונז געלערנט אלע יארן, און די פילע ספרים וואס ער האט אונז איבערגעלאזט בירושה. דער אייבערשטער זאל העלפן מיר זאלן ווייטער ממשיך זיין זיך צו האלטן בדיבוק חברים און פאלגן וואס מוהרא"ש האט אונז געלערנט. אין וויליאמסבורג וועט מען זיך צוזאם קומען אי"ה צום יארצייט קומענדיגע וואך דינסטאג פרשת יתרו אין ביהמ"ד היכל הקודש ברסלב אויף 27 סקילמאן סט. אום 8:00 אווענט. ווי מען וועט זיך מחזק זיין צו גיין ווייטער אין די וועגן פון מוהרא"ש צו פארשפרייטן דעם רבינס עצות אויף די גאנצע וועלט, און אזוי ברענגען די גאנצע וועלט צום אייבערשטן. אנשי שלומינו וועלן אויך אויסנוצן דעם געהויבענעם טאג זיך אנצושטרענגען אויסצופירן דאס וואס מוהרא"ש האט געטון זיין גאנץ לעבן, צו דרוקן דעם רבינ'ס ספרים און עס פארשפרייטן איבער די וועלט, און אזוי אריינברענגען די הייליגע לימודים פון רבי'ן איבער די גאנצע וועלט. מ'וועט זיך משתתף זיין מיט שיינע סכומים ארויסצוהעלפן דעם בית הדפוס וואו מ'דרוקט די ספרים און קונטרסים. הוא ימליץ טוב בעדינו!
די פרייליכע חתונה וואס איז אפגעראכטן געווארן פאר צוויי וואכט צוריק, דער פערטער חתונה אין צאל צו ווערן געפראוועט אין ישיבה גענצליך בחנם פאר אלע מחותנים, האט איבערגעלאזט שאק כוואליעס אין די גאנצע חרדישע וועלט. בפרט יעצט ווען עס האט אנגעהויבן ארום פארן דער נייער קליפ "א חתונה אומזיסט", די פאכמאנישע ארבעט פונעם מומחה "שרוליק סאמעט", ווי מען זעט קורצע אויסצוגן פון די חתונה, די ווארימע חופה, די פרייליכע טענץ, און די אויסטערלישע פרייליכע אטמאספערע ביי די חתונה. מענטשן ציפן זיך די באקן "בין איך וואך, אדער איך חלום?", אידן ווייסן נישט צו זיי זאלן וויינען צו לאכן. "פארוואס דען טראג איך אויף מיינע פלייצעס צענדליגע טויזנטער דאלאר חובות, איך האב נישט קיין טאג און קיין נאכט, אויב נישט ווייל נאר אזוי האב איך געקענט מאכן א נארמאלע חתונה?" וויינען געוועזענע מחותנים. ביי אנדערע האט זיך אנגעצינדן א שטראל פון האפענונג "יעצט קען איך שוין אנהייבן אויסהערן שידוכים פאר מיינע קינדער, עס איז שוין בכלל נישט קיין צרה זיי חתונה צו מאכן. קוק ווי שיין א חתונה אומזיסט קוקט אויס" טראכטן זיי. דער קליפ "א חתונה אומזיסט"
עס איז אונז א שמחה מיטצוטיילן מיט חשובן ציבור וואס באנוצט זיך מיט אונזער וועבסייט, אז געלויבט השי"ת עס איז יעצט געווארן צוגעלייגט עטליכע נייע זייער נוצבארע אפציעס צום וועבסייט. 1) שעירן (מיטטיילן) עס מאכט זיך כסדר ביי פילע באנוצער ווען זיי הערן א שיעור/ליינען א בריוו, און זיי טראכטן "דאס איז א געוואלדיגע שיעור/בריוו, איך וואלט עס געוואלט שיקן/מיטטיילן מיט אנדערע", און זיי האבן געבעטן מען זאל צולייגן אן אפציע פון שעירן. דעפאר קומען מיר יעצט מיט די גוטע נייעס, אז נאך אסאך ארבעט, איז ב"ה געלונגען צוצושטעלן דעם אפציע פון שעירן ביי אלע אפטיילונגען פונעם וועבסייט, ווי איר וועט זען די אייקאנס פון אימיעל, טוויטער און פעיסבוק, גראד אונטערן שיעור/בריוו, ווי איר וועט קענען מיט איין דרוק שעירן דעם שיעור, בריוו מיט וועם איר ווילט. 2) דאונלאודן (אראפ נעמען) פילע האבן געבעטן אז זיי ווילן האבן די מעגליכקייט צו דאונלאודן די שיעורים אויף זייערע אייגענע מוזיק פלעיערס צו קענען האבן די מעגליכקייט צו הערן די שיעורים אין די צייטן וואס זיי זענען נישט אין אפיס, צום ביישפיל אינדערהיים, אדער אין קאר, ווי זיי האבן נישט די צוטריט צו א קאמפיוטער און אינטערנעט. יעצט ב"ה האט מען געענדיגט מיט די ארבעט פון צולייגן די אפציע פון "דאונלאוד". און ב"ה מ'קען שוין דאונלאודן אלע אוידיא און ווידיא שיעורים ביים וועבסייט. צו דאונלאודן א שיעור וועט איר בלויז דארפן געבן א דרוק אויפן דאונלאוד קנעפל (א בילד פון אן עראו אראפ), און אויסוועלן די לאקאציע וואו איר ווילט עס האבן. די אנפירער פון די וועבסייט שלאפן נישט, טאג און נאכט טראכטן זיי און ארבעטן שווער צו מאכן דעם וועבסייט בעסער און באקוועמער. מיר האפן אייך כסדר צו האלט אפדעיטעד מיט אלע נייע פארבעסערונגען און אפדעיטס בעזרת השם יתברך. שמעו ותחי נפשכם
א שיינע באשיידענע וואך נאכט איז פארגעקומען די וואך מאנטאג נאכט אין שטוב פון מו"ה יעקב לעזער הי"ו צום געבורט פון זיין צווילינג למזל טוב. יענקי איז פון די חשובע כולל יונגעלייט צומארגענס דינסטאג אינדערפרי איז פארגעקומען די ברית'ן אין ביהמ"ד היכל הקודש ברסלב בארא פארק. עס איז געווען א גרויס התעוררות ביי אנ"ש וועלכע זענען געווען פארזאמעלט, ווען יעדער האט זיך געבעטן שטילערהייט זיינע תפלות און בקשות צום באשעפער בשעת'ן ברית, געדענקענדיג וואס מוהרא"ש פלעגט שטענדיג זאגן ביי א ברית ווען מ'פלעגט זיך מזכיר זיין, "וואס בעטסטו מיר? אליהו הנביא קומט דאך יעצט, בעט אים"... דער מוהל איז געווען הרב ר' אהרן ווייס שליט"א, מיט סנדקאות איז מכובד געווארן איין קינד דער זיידע הרב ר' יצחק, און איין קינד דער זיידע הרה"ג ריווניצער רבי פון בארא פארק. די קינדער האט מען א נאמען געגעבן "נחמן נתן" און "צבי אלימלך". "נחמן נתן" נאכן הייליגן רבין און זיין גרויסן תלמיד ר' נתן. עס איז באוויסט אז מוהרא"ש פלעגט זאגן מען זאל נישט געבן נחמן אליינס, נאר מיט נאך א נאמען. מוהרא"ש פלעגט זאגן מען זאל געבן נחמן נתן צוזאמען. דער צווייטער קינד האט מען א נאמען געגעבן "צבי אלימלך" נאכן הייליגן בני יששכר, וואס זיין יארצייט איז אויסגעפאלן דעם טאג, און דאס קינד איז אן אייניקל פון דעם גרויסן צדיק. מען האט זיך געוואשן צו א סעודה, און געזינגען שיינע ניגונים, און געדאנקט דעם אייבערשטן פאר זיינע גרויסע חסדים. אן עקסטרע מזל טוב קומט פאר אונזער חשובע מנהלת די מאמע פון די צווילניג, פארן זיך אזוי איבער געבן פאר אונזערע קינדער טאג און נאכט. עס איז נישט דא נאך א פלאץ ווי די מיידלעך זאלן זיין אזוי צוגעקלעבט צו זייער פריציפל ווי אין בית פיגא, ווי מ'זעט יעצט ווען די מנהלת קומט נישט אין סקול, ווארטן די מיידלעך און בענקען זיך און שיקן בריוו וכו'. זאל דער אייבישטער העלפן זיי זאלן זוכה זיין צו ערציען זייערע קינדער גרינגערהייט, און זאלן זיין אמתדיגע ערליכע אידן וואס זענען צוגעקלעבט צום אייבערשטן. כשם שנכנס לברית כן יכנס לתורה ולחופה ולמעשים טובים בילדער פון ברית בילדער פון וואך נאכט
א געוואלדיגע שמחה הערשט צווישן אנשי שלומינו, בפרט ביי די מתפללי בית המדרש היכל הקודש קרית יואל (העיס). ווען עס איז ב"ה געבוירן געווארן א אינגל למזל טוב צו הרב יואל פארקאש שליט"א, גבאי פון בית המדרש. דער שלום זכור וועט פארקומען אי"ה דעם שב"ק ביים בעל שמחה אינדערהיים אויף 17 חברון רד. #101. "כשזכר בא לעולם, חסד בא לעולם" (ספר המידות, אות בנים סימן ק"ב)
א גאר פרייליכע חתונה איז פארגעקומען נעכטן אווענט, ווען החתן בנציון ב"ר שמחה יאקאבאוויטש איז געגאנגען אונטער די חופה מיט די כלה די טאכטער פון ר' משה ארי' שניטצלער הי"ו. די חתונה איז געווען צוגעשטעלט גענצליך בחינם פאר ביידע מחותנים אינעם בית המדרש היכל הקודש ברסלב וויליאמסבורג, אינעם זעלבן בית המדרש ווי דער חתן האט פארברענגט זיינע בחורישע יארן מיט תורה, תפלה ומעשים טובים. פינעף אזייגער נאכמיטאג איז מען זיך צוזאם געקומען צום קבלת פנים, וואס איז געווען שיין צוגעגרייט אין ביהמ"ד. דער חתן האט אויפגענומען אלע געסט בספר פנים יפות, און יעדעם צוריק געווינטשן בצהלות פנים, בשעת דער עולם האט געזונגען שיינע ניגונים. זעקס א זייגער איז מען ארויס אין גאס פארענט פונעם בית המדרש, ווי עס איז יעצט צום ערשטן מאל גענוצט געווארן די נייע חופה וואס איז געווארן אויפגעשטעלט ספעציעל צו נוצן פאר די חתונות אין בית המדרש. אויף די פיר זייטן פון די חופה איז געווארן אויפגענייט שיינע מאמרים פונעם רבין. הרה"ג ר' יצחק שטיין שליט"א פאלטישאנער דיין, איז מכובד געווארן מיט סידור קידושין, מיט כתובה ליינען איז מכובד געווארן דער זיידע פון די כלה הרב ברוך יודא שניצלער, טשאבע רב. די איבעריגע ברכות איז מכובד געווארן דער זיידע הרה"ח ר' ישי וועבער. נאך די חופה איז מען אריין אין בית המדרש צו די סעודה. דאס עסן איז געווארן צוגעשטעלט געווארן דורך די פרויען פון אנשי שלומינו. איינער האט געמאכט די פיש, א צווייטער די קוגלען, א דריטער די דיפס, א.א.וו.. פלייש האט מען גענומען פונעם 'בית התבשיל' וואס נעמט צוזאמען די איבעריגע מאכלים וואס בלייבט איבער פון שמחה זאלן. ביים סעודה האט מען נישט סערווירט דאס עסן, נאר די פלייש און צושפייז איז אלעס געווען אויסגעלייגט אין בעקעלעך, אזוי ווי ביי די וואכט נאכטס, און יעדער האט זיך אליינס גענומען וואס ער דארף, כרצון איש ואיש. מען האט געגעסן אין פּעיפּער גודס וואס די ישיבה האט צוגעשטעלט, און עס האט געהאט אלע טעמים... אום אכט אזייגער האט מען אנגעהויבן צו טאנצן. בשעת'ן טאנצן איז געווען שמחות ובכיות (לשון סיפורי מעשיות, מעשה פון די זיבן בעטלערס) מענטשן האבן געוויינט פארוואס זיי קענען דאס נישט באווייזן, זיי האבן געטראכט "וואס פעלט דען פון אזא חתונה? פארוואס דארפן מיר אויס געבן שווערע געלטער ווען מען קען דאס מאכן אומזינסט אן קיין חובות!". אנדערע האבן געלאכט, מען האט געלאכט פון פרייד אז מיר האבן א רבי וואס מאכט אונז קלאר וואס צו טון מיר זאלן זיך נישט פארלירן פאר נישטיגע כבוד המדמה און ווערן א בעל חוב אויפן גאנצן לעבן. פאר די מוזיק איז נישט געווען קיין בענד, און נישט קיין זינגער, עס האט געשפילט א פשוט'ע טעיפ אפגעכאפט פון אן אנדערע חתנה, מענטשן האבן געפרעגט "וואו איז דער שפילער? ווער זינגט דא? ווען מען האט זיי געענטפערט אז "דא שפילט א פשוטע טעיפּ", זענען זיי געבליבן אן לשון. פיקטשערס - ביי די מענער האט א בחור געכאפט, און ביי די פרויען - א פרוי מאנשי שלומינו. אום צען אזייגער האט מען זיך געשטעלט צום מצוה טאנץ. אנשטאט א "גראמער" וואס זאל גראמען ("גראגערן" אין קאפ) און אויפהאלטן דעם עולם ביז אין די פריע פארטאגס שעה'ן - האט זיך דער שמש פון בית המדרש ר' העניך אינדיג אויסגערופן "יעמוד יעמוד". אויף אלע פענימער האט זיך אנגעזען א שמייכל פון אויער צו אויער בשעת דער שמש האט געשריגן "יעמוד יעמוד", אלע האבן געזאגט פה אחד "וואס פעלט אויס צו זיצן דא און משוגע ווערן פון ליידיגיין ביז אינמיטן דער נאכט"... אום 11 אזייגער איז מען שוין געווען אינגאצן פערטיג מיט די חתונה, דער עולם איז שוין יעדער אהיים זיך אויסצורוען פארן קומענדיגן טאג, וואס יעדער האט זיך זיינע געשעפטן, דער ביי די ארבעט, און דער אין כולל, א.א.וו. מען האט תיכף שיין צוריק מסדר געווען די טישן און בענק און אויפגערוימט דער בית המדרש, אזוי אז מען זאל קענען מארגן אינדערפרי שוין קומען לערנען און דאווענען ווי יעדן טאג. יא, עס שטעלט זיך ב"ה ארויס, אז עס זענען דא אידן וואס באווייזן דעם קונץ פון צוזאם ברענגן אלע דריי זאכן צוזאמען "חתונה מאכן די קינדער", און יא, "די חתונה איז פרייליך אויפן העכסטן פארנעם און יעדער איז העכסט צופרידן", און צו דעם אויך "ארויסגיין אינגנאצן אן קיין פּעני חובות". "אַמָאל אִיז גֶעוֶוען אַ גְרוֹיסֶער יְרִיד, אִין אַ גְרוֹיסֶער שְׁטָאט. זֶענֶען אַהִין גֶעגַאנְגֶען אַלֶע בֶּעטְלֶערְס, אוּן דִי קִינְדֶער זֶענֶען אוֹיךְ אַהִין גֶעגַאנְגֶען. אִיז גֶעקוּמֶען דִי בֶּעטְלֶערְס אוֹיף דֶער דֵעָה, אַז זֵיי זָאלְן מְשַׁדֵךְ זַיין דִי צְוֵוי קִינְדֶער, אַז זֵיי זָאלְן זִיךְ אֵיינְס דָאס אַנְדֶערֶע נֶעמֶען. אוּן תֵּיכֶּף וִוי מֶע הָאט אָנְגֶעהוֹבְּן דֶערְפוּן צוּ שְׁמוּעסְן, אִיז דָאס זֵיי אַלֶע זֵייעֶר גֶעפֶעלְן, הָאט מֶען זֵיי מְשַׁדֵךְ גֶעוֶוען, לוּשְׁמִיר וִוי מַאכְט מֶען זֵיי חַתוּנָה, הָאבְּן זֵיי זִיךְ מְיַישֵׁב גֶעוֶוען, בַּאֲשֶׁר אִין דֶעם אוּן דֶעם טָאג, וֶועט זַיין בַיים מֶלֶךְ מִינִינֶעס, וֶועלְן אַהִין גֵיין אַלֶע בֶּעטְלֶערְס וֶועלְן זֵיי זִיךְ דָארְטְן אוֹיסְבֶּעטְן קוֹילִיטְשׁ אוּן פְלֵיישׁ, דֶערְפוּן וֶועט מֶען זֵיי מַאכְן חַתוּנָה. אִיז אַזוֹי גֶעוֶוען, זֶענֶען אַלֶע בֶּעטְלֶערְס גֶעגַאנְגֶען אוֹיף דִי מִינִינֶעס, אוּן הָאבְּן זִיךְ אוֹיסְגֶעבֶּעטְן פְלֵיישׁ אוּן בְּרוֹיט, אוּן זֵיי הָאבְּן נָאךְ פַארְנוּמֶען וָואס סֶע אִיז גֶעבְּלִיבְּן פוּן דֶער סְעוּדָה, פְלֵיישׁ אוּן קוֹילִיטְשׁ. אוּן זֶענֶען גֶעגַאנְגֶען, אוּן הָאבְּן זִיךְ אוֹיסְגֶעגְרָאבְּן. אַ גְרוֹיסְן גְרוּבּ, וָואס סֶע זָאל אִין אִים קֶענֶען אַרַיין הוּנְדֶערְט מֶענְטְשְׁן. אוּן זֵיי הָאבְּן אִים צוּגֶעדֶעקְט מִיט פְּרוּטֶעס, אוּן מִיט עֶרְד אוּן מִיט מִיסְט. אוּן זֵיי זֶענֶען אַהִין אַלֶע אַרַיינגֶעגַאנְגֶען. אוּן זֵיי הָאבְּן דָארְט גֶעמַאכְט חַתוּנָה דִי קִינְדֶער, אוּן זֵיי הָאבְּן זֵיי גֶעשְׁטֶעלְט אַ חוּפָּה, אוּן זֵיי זֶענֶען דָארְט זֵייעֶר זֵייעֶר פְרֵיילֶעךְ גֶעוֶוען, אוּן דִי חָתְן כַּלָה זֶענֶען אוֹיךְ זֵייעֶר פְרֵיילֶעךְ גֶעוֶוען." (לשון סיפורי מעשיות, מעשה זיבן בעטלערס) בילדער פון די חתונה בילדער פונעם קבלת פנים קליפס פון די חתונה בילדער ווי מג'גרייט צו די חתונה בילדער ווי מ'גרייט צו די חופה קליפ ווי מ'גרייט צו די חופה בילדער ווי מ'עמברוידערט די חופה קליפ ווי מ'עמברוידערט די חופה
