נעכטן אווענט איז פארגעקומען א שיינע שיעור פון הלכות פסח אין בית המדרש פון שטעטל קרית ברסלב, ווי א גרויסע צאל אנשי שלומינו האבן זיך באטייליגט, דער דיין שליט"א האט פארגעלרענט די הלכות פון רייניגן אויף פסח, ליל הסדר א.א.וו. מיט א שיינע סדר, און אויף א פראקטישע וועג, פון וואס דער עולם האט ארויסגענומען גאר א גרויסע תעולת. חסל סידור פסח כהלכתו
ווי שוין באריכטעט פאריגע וואך גייט שוין דער מצה בעקעריי ברוך השם אן און שטעלט צו מצות פאר אנשי שלומינו, דער מצה בעקעריי ווערט געפירט לויט די פערזעליכע הדרכה פונעם ראש ישיבה וואס גייט כסדר דורך אלע פרטים פונעם בעקערי מיטן מענעדזשער מו"ה אהרן וועבערמאן הי"ו, אזוי אויך האט דער ראש ישיבה געשטעלט דעם דיין הגאון רבי יונה זינגער שליט"א, וואס קומט כסדר אראפ און האלט אן עינא פקיחא אויף אלצדינג. דער דיין האט זיך אויסגעדרוקט "עס נישטא נאך אזעלעכע מהודר'דיגע מצות ווי דאס". דער ראש ישיבה האט איינגעפירט אז בשעת'ן באקן די מצות זאל שפילן אין די בעקעריי די גאנצע צייט ניגונים פון אמונה, ניגונים פון בענקשאפט צום אייבערשטן, ניגונים פון תפלה, און אזוי טאקע באקט מען די הייליגע מצות, ווען דער קנעטער בעט דעם אייבערשטן בשעת'ן קנעטן אז עס זאל זיך גוט אויסקנעטן, און אז די מצות זאלן ארויסקומען בתכלית הכשרות, און עס זאל אריינגעבן אמונה אין די וואס עסן עס, אזוי אויך טוען די וועלגערער, די רעדלער, דער שיבער, און די פאקערס. אינעם ברסלבן מצה בעקעריי הערשט א געוואלדיגע סדר, און הידור, אבער אויסער דעם שפירט מען אין די בעקעריי די גאנצע צייט א פרייליכע געשמאקע אטמאספערע, עס פילט זיך א שמחה של מצוה, מען איז גליקליך צו קענען צושטעלן און באקן פאר אידישע קינדער די הייליגע מצות מצוה. די גאנצע ארבעט אינעם ברסלבן מצה בעקעריי איז איין שטיק אמונה, תפלה און שמחה של מצוה. דער ראש ישיבה האט געזאגט אז אזוי איז עס טאקע "מיכלא דמהימנותא" א מאכל פון אמונה. דערפאר שפירן אנשי שלומינו א זכיה צו קענען איינקויפן פון די ברסלב'ע מצות וואס איז אין כדוגמתה בכל העולם, מצות פון אמונה, מצות פון שמחה, מצות פון תפלה. אנשי שלומינו האבן זיך שטארק צוגעכאפט, און עס איז שוין נישטא קיין סאך מצות צו באקומען, דער וואס וויל נאך באשטעלן פון די היילגע מצות דארפן שוין רופן מו"ה ישראל שלום זעלקאוויטש הי"ו אויף 347-661-2579, צו מאכן זיכער אז מען קען נאך אננעמען דעם ארדער.
מיט גרויס פרייד טוען אנשי שלומינו אויפנעמען די גוטע בשורה, אז נאך חדשים ארבעט פון פלאנירונג און בויען האט זיך די מוהדר'דיגע ברסלבע מצה בעקעריי אין קרית ברסלב ברוך השם געעפענט היינט זונטאג תזריע בשעה טובה ומצלחת. דער בעקעריי טראגט ברוך השם די שטרענגע השגחה פונם דיין שליט"א, וואס מאכט זיכער בעזרת השם יתברך אז די מצות זענען געבאקן מיט די העכסטע מאס כשרות שטאפלען, מיט אלע חומרות והידורים וואס עס פעלט זיך אויס. די הנהלה האט אויפגענומען א פולע שטאב פון טויגליכע היימישע ארבייטער יראי השם, אסאך פון זיי מיט פילע יארן עקספיריענס, מען האט זיך דורכגערעדט מיט וועטעראן אנפירער פון היימישע בעקערייען אין ניו יארק, וויאזוי אויסצושטעלן דעם בעקעריי אויפן בעסטן פארנעם, און געלויבט דעם אייבערשטן, אז די מצות קומען ארויס העכסט געלונגען, פיינע געשמאקע מהודרדיגע מצות. צוליב די קורצע צייט ביז יום טוב, איז שטארק באגרעניצט וויפיל מצות מען וועט קענען אניאגן צו באקן, דערפאר אויב ווילט איר באשטעלן פון די מהודרדיגע ברסלבע מצות דארפט איר רופן ווי אמשנעלסטן מו"ה ישראל שלום זעלקאוויטש הי"ו אויף 347-661-2579, און מאכט זיכער אז מען קען נאך אננעמען אייער ארדער. עס זענען נאך דא עטליכע פאזיציעס וואס זענען נאך אוועיליבל אינעם בעקעריי, דער וואס וויל זיך איינשרייבן צו ארבעטן אין די בעקעריי זאלן זיך ווענדן צו מו"ה שלמה יאקאבאוויטש הי"ו, וואס איז געשטעלט געווארן דערויף מטעם דעם בית האופה. אין א בריוו פון ראש ישיבה שליט"א געשריבן ערבי פסחים תשפ"א, זעט מען ווי דער ראש ישיבה שליט"א קוקט ארויס צו האבן אויף דאס יאר דעם ברסלבער מצה בעקעריי: בעזרת ה' יתברך יום ב' פרשת צו, ט' ניסן, שנת תשפ"א לפרט קטן לכבוד ... נרו יאיר, קרית ברסלב, ליבערטי געב איבער פאר אלע בודקים פונעם עירוב אז איך וועל מיט'ן אייבערשטנ'ס הילף מאכן די עירובי חצירות, זיכוי פת פאר’ן עירוב אין שטעטל – ערב שבת הגדול, ערב פסח אינדערפרי, גלייך נאך שחרית ביי מיר אין שטוב; איך וויל אז אלע בודקים זאלן זיך באטייליגן. איך האב גרויס הכרת הטוב פאר אייך אלע פאר אייער איבערגעגעבנקייט וואס איר געבט זיך אוועק יעדע וואך בודק זיין דעם עירוב ארום דעם שטעטל. זעט צו זיין פונקטליך ווייל איך פאר אריין אין שטאט באקן ערב פסח מצות. מיט’ן אייבערשטנ’ס הילף וועלן מיר קומענדיגע יאר זיין אין ארץ ישראל, און אויב נישט וועלן מיר האבן א מצה בעקעריי אין שטעטל. דאס איז נאך א רינגל אין די קייט פון פעולות אראפצושטעלן אלע געברויכן וואס א אידישע קהלה דארף האבן, און עס וועט זיך נישט אפשטעלן דא, נאר מען וועט ווייטער ארבעטן אהערצושטעלן אלעס וואס פעלט זיך נאר אויס. ובעזרת השם נעשה ונצליח. ונאכל שם מן הזבחים ומן הפסחים
דעם זונטאג איז פארגעקומען א גרויסע חלוקה אין שטעטל קרית ברסלב ליבערטי פון גאר אסאך שפייז פראדוקטן פון וואס פילע איינוואוינער אינעם שטעטל האבן נהנה געווען, צווישן די אייטעמס זענען געווען, פלייש, אייער, מזונות, פרוכט, גרינצייג, ברויט, מעל, סיריעל, דזשוס, מיליכיגס, נאש און נאך פילע זאכן. די גרויסע חלוקה איז צושטאנד געקומען בס"ד מיט די הילף פון די בארימטע "רבי ישעי'לעס קאך" פון וויליאמסבורג וואס ווערט געפירט דורכן איש החסד הרה"ח ר' שמעון פאזען הי"ו און אזוי אויך מיט די הילף פון הרה"ח ר' חיים יודא שווארץ הי"ו וואס קומען כסדר צו הילף פארן בית התבשיל אין שטעטל און געבן זיך אוועק בלב ונפש מיט אלעם וואס מעגליך צו פארשאפן זאכן צו קענען טיילן ביי די חלוקות אין קרית ברסלב. דער בית התבשיל'ס מיסיע איז צו פארזיכערן בסייעתא דשמיא, אז אלע אין שטעטל, נישט קיין חילוק זייער פינאנציעלער צושטאנד זאלן קענען צושטעלן פאר זייערע משפחות עסן צו דער זעט. פאר דעם צוועק, ארבעט מען אינאיינעם מיט די אויבנדערמאנדטע עסקנים פון וויליאמסבורג, און מען געבט אוועק שעות און מען הארעוועט אריין צו פארשאפן די פארשידנע מאכלים וואס מען קען נוצן אין א אידישע שטוב און מען לאדענט עס אן אויף טראקס און קארס, און מען דרייווט עס ארויס צו שטעטל ווי מען טיילט עס אויס בחנם פאר כל דכפין, צו אלעמענס צופרידנהייט. עקסטער פון דעם גייט אן וועכענטליך דער פראיעקט פונעם בית התבשיל פון "צאלן גראסערי ארדערס" פאר נויטבאדערפטיגע משפחות פון אנשי שלומינו. דער ראש ישיבה שליט"א טיילט אויס דאס געלט אין די אקאונטס פון משפחות וואס דארפן דאס האבן, און דאס ציעט אריין אין הוצאות פון איבער צוויי טויזענט דאלער יעדע וואך. דאס געלט קומט נישט פון קיין גרויסע עשירים און נדבנים, נאר ווערט אויפגעטריבן פון קליינע נדבות פון אנשי שלומינו וואס רופן זיך כסדר אן ווארעם צו די אפיעלס פונעם איבערגעגעבענעם מנהל מו"ה שלמה יאקאבאוויטש הי"ו, און אזוי ווערט שטילערהייט צוגעשטעלט אלע גראסערי געברויכן פון צענדליגע משפחות וועכענטליך בדרך כבוד. צו האבן די זכיה אנטייל צו נעמען אין די הייליגע ארבעט פונעם בית התבשיל, און העלפן אידן לייגן ברויט און מילך אויפן טיש, קען מען זיך אלץ ווענדן צו מו"ה שלמה יאקאבאוויטש הי"ו, אויף 845-637-5667, אדער קען מען געבן אויף בית התבשיל אנליין פלאטפארמע פיר און צוואנציג שעה אין טאג. מיר ענדיגן דעם באריכט מיט די ווערטער וואס דער ראש ישיבה שרייבט איבערן בית התבשיל: "אנא עפענט ענקערע הערצער אים צו העלפן קענען ווייטער ממשיך זיין מיט די מצווה. ובזכות די מצווה זאלט איר האבן שפע ברכה והצלחה." לשובע ולא לרזון, לברכה ולא לקללה 💳 לינק צו מנדב זיין אנליין פארן בית התבשיל 📸 בילדער 📰 א בקשה פון ראש ישיבה שליט"א ביים ציון אין קערעסטיר
אזוי ווי - געלויבט דעם אייבערשטן - דער שטעטל קרית ברסלב ליבערטי וואקסט קע"ה, סיי אין שטח, און סיי מיט איינוואוינער, דערפאר גרייטן זיך אין די טעג די איינוואוינער פונעם פרישן געגענט אינעם שטעטל אויף מאַרקס גאס צום עפענונג פונעם נייעם בית המדרש היכל הקודש, וואס וועט ווערן גערופן "בית המדרש מקור השמחה". ביז דערווייל האט מען געדאווענט אויף צייטווייליג אין שטוב פון האברך מו"ה מנחם שטיינבערג הי"ו, וואס האט אוועק געגעבן זיין דירה מ'זאל עס קענען נוצן אויף דערווייל פארן בית המדרש, און אין די קומענדיגע וואכן וועט מען מיטן אייבערשטנ'ס הילף זיך אריינצוען דאווענען אינעם נייעם בית המדרש וואס ווערט געבויעט אונטערן דירה פון האברך מו"ה רפאל פורסט הי"ו. מו"ה רפאל הי"ו האט זיך מתנדב געווען אוועקצוגעבן א חלק פון זיין דירה, און מ'האט שוין אנגעהויבן עס איבערצובויען מיט אלע געברויכן פאר א בית המדרש. אלע מתפללים און לייגן צו א פלייצע צום הצלחה פונעם אויפבוי פונעם בית ה'. די אחדות און הארץ וואס אנשי שלומינו ווייזן ארויס איינע צום צווייטן, איז די סיבה פארוואס עס איז אזוי געשמאק אריינצוקומען און דאווענען און לערנען אינעם בית המדרש. פון ווי עס וועט ארויסגיין פילע שעות פון תורה ותפלה והתבודדות, שיחות התחזקות, און גמילת חסדים.
פון קרית ברסלב קומט אריין די גוטע נייעס, אז איינע פון די חשוב'ע תושבים מו"ה מנחם שטיינבערג הי"ו איז אויסגעקליבן געווארן דורך די טאון באאמטע צו ווערן א חלק פון זייער "פלענינג באורד". מען זעט די סייעתא דשמיא אויף טריט און שריט; עס זענען קוים דורך צוויי יאר זינט אנשי שלומינו האבן זיך אנגעהויבן ארויסציען קיין ליבערטי, וואו מען האט אויפגעשטעלט א שטעטל אויפן רבינ'ס נאמען. זומער שנת תשע"ט זענען ארויסגעקומען די ערשטע צען משפחות, מען האט גלייך געעפנט א חדר און א סקול פאר די קינדער ווי מען איז מחנך די קינדער מיט אמונה און יראת שמים אויפ'ן וועג פון רבי'ן, און זינט דאן קומען כסדר צו פרישע משפחות צום שטעטל, און קינדער צו די מוסדות קע"ה. אלע וואונדערן זיך, "וואס איז דער סוד פונעם ברסלב'ער שטעטל? ווי אזוי בליט עס אזוי שיין? יעדע וואך ציען זיך ארויס נאך משפחות, עס האלט שוין ביי קרוב צו הונדערט משפחות כן ירבו; וואס איז זייער סוד? וואס איז פשט אז אינגעלייט פון שטעטל זיצן שוין ביי מיטינגען פון די רעגירונג?", דער ענטפער איז "תפילה"! אין דעם שטעטל גייט אלעס נאר דורך תפילה; נישטא קיין שטיינדל אין שטעטל וואס זאל נישט ליגן אונטער דעם תפילה. חשוב'ע ליינער, גלייבט נישט וואס מיר שרייבן, גייט אליינס אריבער אין שטעטל, און כאפט א שמועס מיט די איינוואוינער, וועט איר זיך איבערצייגן אז וואס איר ליינט איז אמת, איר וועט שטיין מיט אן אפענעם מויל ווען איר וועט הערן די וואונדערליכע "מעשיות פון תפילה" פון פשוט'ע אינגעלייט; אינגעלייט וואס ארבעטן ביטער שווער צו ברענגען פרנסה - האבן די השגה וואס צדיקים האבן משיג געווען נאך שווערע עבודות. דאס איז דער כח פון הייליגן רבי'ן וואס לאזט זיך אראפ צו אונז גאר פשוטע מענטשן און ברענגט אונז צו די הויכע זאכן. דער נייער פלעניג באורד מיטגליד מו"ה מנחם שטיינבערג הי"ו איז א תלמיד פון ראש ישיבה, ער האט זיך מוסר נפש געווען ביי די דרייצן יאר צו קומען לערנען אין ישיבה תפארת התורה, זיינע עלטערן - אזוי ווי אלע עלטערן וואס הערן לשון הרע אויפן ישיבה - האבן נישט געוואלט ער זאל דארט לערנען, מען האט אים זייער געפייניגט אויף פארשידענע אופנים, ווען זיי האבן איינגעזען אז גארנישט העלפט נישט, דער בחור מנחם איז שטארק ווי א לייב, ער וויל לערנען נאר אין ברסלב - האבן זיי אים אריינגעלייגט אין תפיסה ער זאל נישט קענען קומען אין ישיבה, ביז די שטאט האט זיך אריינגעמישט, מיט די הילף פון עסקנים און מיט די הילף פון א גרויסע לאיער האט מען אים אריינגעלייגט אין ישיבה. געווענליך איז מען געוואוינט אז די אלע שושקעס, די וויכטיג מאכערס וואס שטופן זיך אריין ביי די הויכע פענסטערס - זענען אינגעלייט וואס לערנען נישט און דאווענען קוים, זיי טראכטן אז אזוי וועלן זיי טרעפן סיפוק פאר זייער הונגעריגע נשמה, די בארד און פיאות ווערט נעבעך קערצער און ווייניגער. א.א.וו. אין ברסלב איז עס אנדערש, דייקא די פלייסיגע אינגעלייט וואס פארפעלן נישט זייערע שיעורים כסדרן, זיי לערנען בהתמדה רבה, - די אינגעלייט וואס האבן שיינע פיאות מיט א פולע בארד - זענען די עסקנים און טוערס. אונזער מו"ה מנחם הי"ו האט נישט לאנג צוריק זוכה געווען צו מסיים זיין די ניין און ניינציגסטע מאל ששה סדרי משנה. דער אייבישטער זאל העלפן אז מו"ה מנחם הי"ו זאל מצליח זיין אין דעם נייעם אמט, און קענען העלפן אידישע קינדער א גאנץ לעבן בכלל, ובפרט זאל ער קענען שטיין צו הילף פאר'ן ברסלבער שטעטל, עס זאל זיך קענען בויען אן א שטער, און ער זאל נושא חן זיין בעיני אלקים ואדם. 🎦 מוהרא"ש ביים שבע ברכות אין ישיבה פאר מנחם נ"י, מוצש"ק תרומה תשע"ג
נאך א רינגל אין די קייט פון פעולות אראפצושטעלן אלע געברויכן וואס א אידישע קהלה דארף האבן, האט דער ראש ישיבה געבעטן מען זאל אויפשטעלן א "בית החיים" אין שטעטל, יעדע מענטש דארף איין טאג פארלאזן די וועלט, איז דאס פון די גאר וויכטיגע זאכן. די הנהלה האט אראפגערופן הרה"ח ר' חיים שלמה וויינשטאק הי"ו, א גרויסע מומחה אין צוגרייטן בתי חיים, און איז פון די לאנגיעריגע אקטיווע מיטגלידער אינעם סאטמארן חברא קדישא שוין איבער פופציג יאר לאורך ימים, און האט שוין געהאלפן אסאך קהילות קדושות מיט אהערשטעלן בתי חיים אין פארשידענע געגענטער. אויך האט ער געהאט די זכיה אנטייל צו נעמען אין די פעולות פון מקדש זיין דעם בית החיים אין קרית יואל, נאכן פטירה פונעם הייליגן סאטמארער רבי זי"ע. ר' חיים שלמה איז אראפגעקומען אין שטעטל, און איבערגעגאנגען מיט די הנהלה פילע שטחים וואס מען קען אפשר נוצן. ער האט באטראכט פון אלע ריכטונגען וועלכעס איז מער פאסיג פאר א בית החיים, ער האט גענומען סעמפלס פון די ערד, און דורכגעטון וואו עס איז פראקטישער, בעסער פינאנציעל, און גרינגער לעגאל אויפצושטעלן א בית החיים. אויך האט מען דורכגעשמועסט מיט ר' חיים שלמה נ"י פילע הוראות וואס עס איז נוגע ווען מען מאכט א נייע בית החיים, און האט פארשפראכן צו שטיין צו הילף פארן ראש ישיבה מיט אלעס וואס עס וועט נאר אויספעלן. צום סוף איז געבליבן צוויי שטחים וואס זענען פאסיג פאר א בית החיים, פון וועלכע דער ראש ישיבה האט אויסגעקליבן דעם גרויסן שטח אויף רעדקליף ראוד ביים אריינגאנג פון שטעטל. אין די יעצטיגע טעג ארבעט מען אויס די לעגאלע חלקים, אזוי אויך זיצט מיט אינדשענירן, אויסצוארבעטן וויאזוי אהערצושטעלן דעם בית החיים אויפן בעסטן אופן בעזרת השם יתברך.
אין קרית ברסלב ליבערטי איז דעם פארלאפענעם מוצאי שבת בשלח-שירה פארגעקומען א העכסט עלעגאנטע און רייכע מלוה מלכה לטובת דעם נייעם בית המדרש עצתו אמונה ומקוה טהרה-מקוה מלכה, די דריטע רינגעלע אין קייט פון בתי מדרשים אינעם שטעטל קרית ברסלב. גאר אסאך האט צוגעגעבן די ווארימע בריוו וואס דער ראש ישיבה שליט"א האט געשריבן אינמיטן די וואך לטובת די קאמפיין. מוצאי שבת קודש ארייינקומענדיג אין בית המדרש אויף האשקי האט אפגעווארט גאר א רייכע סעודת מלוה מלכה, מכל טוב וטוב, צוגעשטעלט דורכ'ן חשוב'ער גבאי און מנהל בית התבשיל מו"ה שלמה יאקאבאוויטש הי"ו, אלע משתתפים זענען ווארעם אויפגענומען און באגריסט געווארן דורך די חשוב'ע עסקנים. העסקן מו"ה ארי פיש הי"ו האט געעפנט דעם מעמד מיט טרעפליכע ווערטער, ארויסברענגענדיג די געוואלדיגע זכות און זכי' צו שטיצן אזא מקום קדוש, וואס האט אנגעווארימט דעם ציבור זיך צו עפענען די טאשן זיך צו משתתף זיין מיט סכומים הגונים לטובת דעם בית המדרש און מקוה. דערנאך האט אויפגעטרעטן דער גבאי פונעם בית המדרש עצתו אמונה הר"ר יואל שניצלער שליט"א, וועלכער האט זייער שיין ארויסגעברענגט אז ווען עס קומט צו שטיצן א מקום תורה ותפלה זענען די חשבונות נישט פראפארציאנאל, נאר די זכותים מערן זיך אומצאליג, און דאס טוט באשטיין פאר'ן מענטש צו מצליח זיין בבני, חיי ומזוני רוויחי און סייעתא דשמיא. דער חשוב'ער דיין פון קרית ברסלב ליבערטי שליט"א האט זיך מטריח געווען און באשיינט דעם מעמד, און האט אויפגעטרעטן מיט פאסיגע ווערטער, דער דיין שליט"א האט ארויסגעברענגט די חשיבות פון זיך צוזאמקומען בשבת אחים צו א סעודת מלוה דמלכה, דערנאך האט דער דיין שליט"א ארויסגעברענגט די חשיבות פון געבן צדקה פאר צוועקן וואס זענען נישט אזוי דראמאטיש, נאר פשוט מ'וויל געבן צדקה צו שטיצן א מקום תורה וכדומה. דער דיין האט צוגעענדיגט מיט'ן פסוק וואס מ'האט געליינט דעם שב"ק "ויהי ידיו אמונה", די הענט זאלן שטיצן דעם בית המדרש "עצתו אמונה". דערנאך האט מען געזונגען זמירות לכבוד סעודת מלוה דמלכה באגלייט בשירה וזמרה דורכ'ן בעל מנגן ר' שמעון לאקס הי"ו. אן איבערראשנדיגע מאמענט פאר אלע משתתפים איז געווען ווען מו"ה אהרן וועבערמאן הי"ו, פון די חשוב'ע עסקנים פאר די מוסדות הקדושים און אן עסקן לכל דבר שבקדושה אין קהילת היכל הקודש, האט אריינשפאצירט אין זאל, און איז ספעציעל געקומען צו פארן קיין קרית ברסלב צו באשיינען דעם מעמד; ר' אהרן האט ווי שטענדיג מיט זיינע הארציגע דברים היוצאים מן הלב אנגעווארעמט די הערצער אנטייל צו נעמען אינעם "מיין שול" קאמפיין, ר' אהרן האט אין געציילטע ווערטער ארויסגעברענגט ווי ווייט דער ראש ישיבה געבט זיך אוועק פאר אונז, און ווי מיר דארפן אנטקעגן קומען צו העלפן דעם ראש ישיבה למעלה מיכולתינו. דערנאך האט אויפגעטרעטן מיט ווארעמע ווערטער מו"ה יואל ראזענבערג הי"ו חבר הנהלת הקרי', וועלכער האט ארויסגעברענגט די גרויסע סייעתא דשמיא וואס באגלייט די שטעטל מיום הווסדה ביז יעצט, און אז דורך העלפן בויען דעם בית המדרש און נאך קען מען זיך רוקן צו די ווייטערדיגע פראיעקטן וואס זענען דא אויפ'ן טיש. צום שלוס האט אויפגעטרעטן דער יושב ראש פונעם קאמפיין מו"ה דוד לאקס ה"ו ארויסברענגענדיג די תועלת פון האבן א בית המדרש אין מקוה יעדער אין יעדע געגנט, און אז דורכ'ן געבן דא וויפיל מ'קען העלפט מען זיך אליינס גאר אסאך. נאכן בענטשן איז זיך די ציבור צוגאנגען, שפירנדיג פרייליך מיט'ן נעמען א חלק אינעם קאמפיין אין דאס אויפבוי פונעם הערליכן בית המדרש עצתו אמונה. נעמט אייך חלק אין דאס אויפבויען דעם בית המדרש-מקוה טהרה, ווענדט אייך צו מו"ה דוד לאקס הי"ו 347-799-3361, אדער צו הר"ר יעקב משה אינדארסקי שליט"א 845-662-3207. ויהי ידיו אמונה! 💳 זיך צו משתתף זיין פאר ביהמ"ד/מקוה דורך "טשערידי" 📰 היינט דינסטאג נאכט, יארצייט פון מוהרא"ש 🛒 שיינע קאלעקשאן פון שיינע ספרים און נאך זאכן צום יארצייט פון מוהרא"ש 📸 היסטארישע בילדער פון מוהרא"ש ביי פארשידענע זמנים 🎦 היסטארישע ווידיאס פון מוהרא"ש ביי פארשידענע זמנים ▶️ פילע שיעורים פון מוהרא"ש ביי פארשידענע געלגענהייטן 🎞️ מוזיק ווידיא: צוואת מוהרא"ש 🛒 שובבי"ם - ספרים סידיס און קונטרסים
נאך א לענגערע צייט וואס דער שיינער בית המדרש "אשר בנחל" אין שטעטל קרית ברסלב אויף די דענמאן גאס איז געווען פארמאכט צוליב דעם וואס מען האט עס איבערגעבויעט לעצטענס, קומט יעצט אריין די פריידיגע בשורה אז עס איז שוין ברוך השם צוריק געעפענט געווארן. מען האט געמאכט אסאך וויכטיגע תיקונים אין בית המדרש כדי עס זאל זיין ראוי צו נוצן אין די קאלטע ווינטער חדשים, צווישן זיין האט מען איבערגעמאכט די אינסולעישאן, אז די הייצונג זאל זיך האלטן אינעווייניג, אויך האט מען צוגעלייגט הייצונג עס זאל קענען אנווארעמען אזא גרויסע פלאץ, און פארמאכט א טיר וואס האט אריינגעלאזט די קעלט פון גאס. די זעלבע זאך האט מען געטון אין די מקוה, ווי מען האט אינסולירט, איבערגעמאכט די הייצונג, און נאך. זינט דער דיין שליט"א האט זיך ארויסגעצויגן קיין קרית ברסלב מיט א חודש צוריק, האט זיך דער דיין קובע געווען זיין פלאץ צו דאווענען אין בית המדרש "אשר בנחל", ווי דער דיין שליט"א לערנט פאר זייער געשמאק אלע שיעורים, אריינגערעכנט דער שיעור אין א דף גמרא, א שיעור אין פעולת הצדיק שב"ק אינדערפרי פארן דאווענען, סיפורי מעשיות שב"ק נאכן דאווענען, אזוי אויך דברי תורה ביי שלש סעודות. די פילע מתפללים זענען זיך מחיה מיטן שול, ווי מען נעמט אויף יעדעם בסבר בפנים יפות, און מ'דאווענען און מ'לערנט אינאיינעם, און מ'חזרט איבער די שיינע דיבורים וואס מיר הערן כסדר פון ראש ישיבה וואס געט אונז איבער די שיינע עצות פון הייליגן רבין אזוי ווי מוהרא"ש האט עס איבערגעגעבן. דער ראש ישיבה שליט"א האט לעצטענס געשריבן אין א בריוו פארן געטרייען גבאי פון ביהמ"ד מו"ה מאטי היימליך הי"ו, ווי דער ראש ישיבה בעט "מ'זאל אויפנעמען יעדעם אזוי שיין אין בית המדרש אז זאל שפירן אין בית מדרש אשר בנחל אזוי ווי ווען מ'לערנט אשר בנחל". אין א שמועס וואס "ברסלב סענטער" האט געהאט מיטן גבאי'ן ר' מאטי, האט ער אונז געבעטן איבערצוגעבן א ישר כח פאר אלע מתפפלים פון בית המדרש, "יעדער העלפט און טוט וואס ער קען צו העלפן דעם בית המדרש אויף אלע מיני וועגן, ווי עס וואלט געווען זייער אייגן הויז". דער סדר פון די תפילות אין בית המדרש איז: מנחה ערב שב"ק - האלבע שעה נאכן זמן, 9:00 אינדערפרי - שיעור אין "פעולות הצדיק" דורכן דיין, 9:30 ברכות, מנחה ושל"ש 15 מינוט נאכן זמן עש"ק. * אין אנדערע נייעס אין שטעטל איז איינגעקויפט געווארן דער לעבנסוויכטיגער "דיפיברילעיטאר" מאשין פארן בית המדרש אויפן "האשקי" גאס וואס איז אפן לתורה ולתפלה יעדע שבת יו"ט און א גאנצע וואך. דער דיפיברילעיטאר מאשין איז וויכטיג ביי עמוירדזשענסי פעלער, ווען א מענטש ל"ע פאלט צוזאם און מען דארף מאכן סי-פּי-אַר, יעדע מינוט קען דאן מאכן א חילוק פון לעבן און טויט רח"ל, דאן קען דער מאשין זיין מיטן אייבערשטנ'ס הילף א לעבנ'ס רעטער, מ'זאל נישט דארפן צוקומען דערצו. דער מאשין איז נתנדב געווארן דורך איינער פון די חשובע מתפללים הרוצה בעילום שמו. דער מאשין איז זייער וויכטיג צו האבן אין יעדע פאבליק פלאץ בפרט אין שטעטל ווי דער ציבור ווערט קיין עין הרע גרעסער מיט יעדן טאג, עס דאווענען אין ביהמ"ד יעדן טאג א גרויסער ציבור, ווי אויך געפונט זיך דארט דער כולל א גאנצן טאג.
דער גאנצער שטעטל קרית ברסלב ליבערטי אנשים נשים וטף און נאך פילע פון אנשי שלומינו פון נאנט און ווייט זענען זיך צוזאם געקומען אינעם גרויסן זאל פונעם ניי פריש איבערגעבויעטן בנין התלמוד תורה אין קרית ברסלב ליבערטי, דעם מוצאי שבת קודש חנוכה, צו א גרויסע סעודת הודאה להודות ולהלל צום אייבערשטן, ווי מוהרא"ש שרייבט אין אשר בנחל אז מ'זאל זיך צוזאם קומען ליל ה' דחנוכה צו דאנקען דעם אייבערשטן אויף די גרויסע חסד און נס אז מיר קריגן נישט אויפן רבין און נאך מער אז מיר זענען זיך מחיה מיט די עצות און זיסע לעבן - צוליב דעם זענען געקומען א גרויסע צאל אנשי שלומינו און האבן אפגעגעבן א שבח והודאה צום באשעפער אויף די שכל אין לעבן און הדרכה וואס מיר באקומען פון ראש ישיבה שליט"א וואס ציעט ווייטער דעם גאלדענעם קייט די תורה וואס ער האט געלערנט פון מוהרא"ש, וואס האט אונז געלערנט דעם וועג פון הייליגן רבין. "ווי שיין איז דער אויבן אן, מיט די חשובע מלמדים ומרביצי תורה" האט דער ראש ישיבה געזאגט, "דער שענסטער אויבן אן זענען אונזערע מלמדים!". די סעודה איז פארגעקומען ווי געזאגט אינעם בנין וואס מען האט אפגעקויפט פאר די תלמוד תורה. דער בנין איז געבויעט געווארן פאר איבער הונדערט יאר צוריק מיט מסירת נפש דורך אידן וואס זענען דאן געקומען פון אייראפע, זיי האבן געבויעט א ריזיגן ביהמ"ד שטארק און שיין, אבער איין טעות האבן זיי געמאכט, זיי האבן נאכגעלאזט די חינוך הבנים והבנות, די קינדער האט מען געלאזט גיין שארן די שניי און צוזאם נעמען די בלעטער... די שיינקייט פון היכל הקודש, איז אז מ'גיבט זיך אפ מיט די קינדער. צום ביישפיל, איין אינגערמאן פארציילט, אז גייענדיג איין טאג אויפן גאס דא אין שטעטל צוזאמען מיט זיין קליין אינגעלע, זענען אים אנטקעגן געלאפן א גאנצע מחנה הינער, רופט זיך אן דער קליינער "טאטי, איך האב נישט מורא, מיין רבי האט מיר אויסגעלערענט אז 'השם לי', דער אייבערשטער איז מיט מיר, 'ולא אירא', איך האב נישט מורא פון קיינעם, קיינער קען מיר גארנישט טון!" אויף דעם איז מען געקומען דאנקען דעם באשעפער עד הנה עזרונו רחמיך. מען האט זיך געוואשן צו א שיינע סעודה, מען האט געזונגען זמירות, און געהערט עטליכע שיינע דרשות. הר"ר אברהם הערש וועבערמאן שליט"א איז געווען דער יושב ראש, מען האט געהערט א שיינע דרשה פון הר"ר אהרן וועבערמאן שליט"א וואס האט גערעדט דער דבר המוסדות, און ארויסגעברענגט וואס איז אונזער ציל. אוזער ציל איז אריינצוברענגען אמונה נישט נאר אין אונז, נאר געדענקען אז עס זענען דא נאך אידן אויף דער וועלט, און יעדער קען העלפן צו פארשפרייטן אמונה פאר נאך אידן. דערנאך האט מען געהערט שיינע ווערטער פונעם אדמיניסטראטאר מו"ה רפאל פארסט הי"ו, וואס האט ארויסגעברענגט אז מיר דאנקען השי"ת אז מיר האבן געטראפן דעם פך שמן חתום בחותמו של כהן גדול, וואס מיט דעם צינדן מיר אן די 8 ליכט, די אכט מוסדות, די חדרים, מיידל סקולס, ישיבות, כוללים אין וויליאמסבורג, קרית יואל און קרית ברסלב. דערנאך האט הר"ר יואל מנחם גרשון שניטצלער שליט"א באדאנקט פאר אלע וואס האבן געהאלפן דרוקן די הייליגע בריוו "עצתו אמונה". דערנאך האט מען געהערט שיינע דיבורים פונעם ראש ישיבה שליט"א, וואס האט גערעדט איבער חינוך הבנים והבנות, און אז אן דעם איז גארנישט דא, איבער די חשיבות פון די מלמדים פון היכל הקודש, וואס זענען נישט קיין פשוטע מלמדים, זייערע הענט זענען געבינדן, מוהרא"ש לאזט נישט שלאגן, שרייען, און ארויסווארפן, זיי מוזן ארבעטן זייער שווער, מיט אלע סארטן קינדער. "די מלמדים זענען די טייערסטע וואס היכל הקודש פארמאגט". ומנותר קנקנים נעשה נס לשושנים 📸 דער ציבור ביים מלוה מלכה
פארגאנגענעם מיטוואך וישלח האט מען געהאט די זכיה צו האבן דעם ראש ישיבה אין שטעטל פאר א קורצע אבער גאר שיינע באזוך. דער ראש ישיבה איז אנגעקומען אינדערפרי צו די טעגליכע מנין שחרית זיבן אזייגער, נאכן דאווענען איז פארגעקומען דעם ברית רך הנולד ביי מו"ה אברהם הערש וועבערמאן הי"ו, עס איז געווען גאר שיין צו זען ווי די אינגעלייט נוצן אויס די הייליגע מינוטן ביים ברית און זענען זיך מתבודד מיטן אייבערשטן און בעטן זיך אויס זייערע בקשות פון אליהו הנביא וואס קומט צו יעדע ברית. דער ראש ישיבה שליט"א איז מכובד געווארן מיט סנדקאות און דערנאך געזאגט די ברכות און געגעבן א קריאת השם; ויקרא שמו בישראל "חיים". דערנאך האט מען זיך געוואשן צום סעודת ברית אין בית המדרש, ביי די סעודה האט דער ראש ישיבה גאר שיין ארומגערעדט וועגן די שיינקייט פון אידישע קינדער וואס מאכן א ברית מילה מיט גרויס שמחה, און דערנאך ארויסגעברענגט ווי וויכטיג עס איז פאר עלטערן אריינצוברענגען א פרייליכקייט אין שטוב, אזוי וועלן זיך די קינדער האלטן ביי אידישקייט און נישט וועלן אוועקלויפן חס ושלום. נאכן ברית איז דער ראש ישיבה געגאנגען באזוכן דעם בנין בית הדפוס וואס געפונט זיך הארט אונטערן בית המדרש, דער ראש ישיבה האט זיך אומגעקוקט אויף די ארבעט, דורכגעגאנגען געוויסע פרטים וואס מען קען בעסער און שענער מאכן פארן בית הדפוס. דערנאך האט דער ראש ישיבה אפגעשטאט א באזוך אינעם נייעם געשעפט אין שטעטל "באמבאלינא", וואו מען קען איינקויפן קליידונג און שטאפיר פאר נייע געבוירענע קינדער פאר גאר צוגענליכענע פרייזן, דער ראש ישיבה האט געקלאפט א מזוזה, און דערנאך איינגעקויפט אפאר זאכן. דער בעל הבית פונעם געשעפט האט געוואלט געבן פאר אומזיסט, אבער דער ראש ישיבה האט געזאגט ער וויל באצאלן די פולע פרייז. נאכדעם איז דער ראש ישיבה געגאנגען באזוכן די נייע הייזער וואס ווערן יעצט געבויעט. דער ראש ישיבה האט געזאגט אז ער האט זייער הנאה אז די הייזער ווערן געבויעט מער טיפער אריין אינעם פראפערטי, נישט אזוי נאנט צו די ראוד אזוי איז עס מער איידעלער און באשיידן. אויך האט דער ראש ישיבה אפגעשטאט א באזוך אין די אפיסעס פון "פעסט בוילד" בוי פירמע וואס בויען די נייע הייזער אין שטעטל. דער ראש ישיבה איז דורך געגאנגען אלע נייע לאטס וואו מען פלאנט בקרוב צו בויען, און מען האט געוויזן פאר'ן ראש ישיבה אלע פרטים פון יעדע לאט, וואס און ווי גרויס מען קען דארט בויען, אזוי אויך איז מען דורך געגאנגען די פרטים פונעם שטח הבית החיים, און וואו עס האלטן די פערמיטס פארן בית החיים און ווי לאנג עס וועט נאך נעמען ביז דאס וועט זיין באשטעטיגט. ביים סוף האט דער ראש ישיבה אפגעשטאט א באזוך ביים נייעם מצה בעקעריי, וואס ווערט געבויעט מיט א גרויסע שנעלקייט און מען קען זען ווי די ארבעט רוקט זיך פאראויס יעדן טאג, עס איז שוין אנגעקומען געוויסע גרויסע חלקים פונעם מעכטיגן אויוון, וואס איז ספעציעל באשטעלט געווארן פאר'ן מצה בעקעריי דקהלתינו הקדושה. דער ראש ישיבה איז אדורך אלע וויכטיגע פרטים בנוגע די מצה בעקעריי, און געזאגט פונקטליך וויאזוי יעדע פרט דארף ווערן געמאכט כדת וכהלכה, בפרט אז מען רעדט דא פון א מצה בעקעריי וואו מען גייט באקן מצות פארן הייליגן יום טוב פסח, וואס דעמאלטס מוז דאס ווערן געמאכט מיט אלע חומרות והידורים, מער ווי א גאנץ יאר. מען האפט מיטן אייבערשטן'ס הילף צו קענען עפענען דעם מצה בעקעריי גענוג צייטליך, כדי עס זאל זיין גענוג מצה פאר אלע משפחות אנשי שלומינו וואס ווילן האבן מצה פון אונזער מצה בעקעריי, וואס וועט ווערן געבאקן מיט אלע חומרות והידורים, און וועט טראגן דעם הכשר פונעם דיין פון קרית ברסלב שליט"א. הרחיבו מקום אהלך
ווי שוין באריכטעט אין די פארגאנגענהייט, איז איינגעשטעלט געווארן בערך א יאר צוריק א "שאטל" באס סערוויס פארן באנוץ פון די איינוואוינער און באזוכער אינעם שטעטל "קרית ברסלב" ליבערטי. דאס איז געווען ווען מיט די פילע פרישע צוגעקומענע ציבור וואס זענען געקומען וואוינען אין שטעטל איז די געגנט ווי דער עולם וואוינט געווארן זייער אויסגעשפרייט און ווייט, און דער ראש ישיבה האט דאן באשלאסן אז עס איז וויכטיג צו האבן צוגעשטעלט א גרינגע און ביליגע טראנספארטאציע סיסטעם, סיי אויף אנצוקומען פון איין זייט שטעטל צו די אנדערע, און סיי אויף ארויסצופארן פון שטעטל איינצוקויפן אין די לאקאלע געשעפטן. די שאטל איז געווען טאקע געווען אין באניץ ביז לעצטענס, בפרט אין די זוממער חדשים איז עס גאר גוט געווארן אויסגענוצט, סיי דורך די איינוואוינער וואס וואוינען אין שטעטל א גאנץ יאר, און אויך פאר די משפחות וואס קומען ארויס אין די זוממער חדשים וויילן אין שטעטל, פון וואס אלע האבן זייער הנאה געהאט. די לעצטע צייט האט זיך אבער געמאכט געוויסע קאמפליקאציעס מיטן שאטל, וואס האט צוגעברענגט אז מען זאל עס נישט קענען נוצן, וואס דאס האט שווער געמאכט צו קענען אנקומען פון איין פלאץ צום אנדערן. דער ראש ישיבה שליט"א האט זייער געוואלט אז די שאטל זאל צוריק אריין גיין אין דינסט ווי אמשנעלסטן, און ברוך השם אז דער שאטל איז שוין פארראכטן געווארן, צו יעדעמ'ס צופרידנהייט. אזוי אויך האט מען נויטיג דארפט אויפנעמען א דריייווער פארן שאטל, און שכח אייבערשטער מען האט געטראפן א גאר א גוטע און איבערגעגעבענע דרייווער. יעצט קען מען שוין מעלדן די גינסטיגע נייעס, אז ברוך השם דער שאטל איז שוין צוריק אויפן ראוד און באדינט ווייטער דעם ציבור, נאך בעסער און שענער פון וואס עס איז געווען ביז יעצט.
אין שטעטל קרית ברסלב ליבערטי אויפן טווין ברידזש ראוד, געפונט זיך דער פערטער בית המדרש פון שטעטל "בית המדרש עצתו אמונה". אין דעם ביהמ"ד דאווענען מדי שבת בשבתו א שיינער ציבור פון עטליכע מנינים אידן, ווי מען ווארימט זיך אן מיט די דיבורים פון הייליגן רבין און זיינע הייליגע עצות. א גאר געשמאקע אטמאספער פון אחדות געפונט זיך אין דעם בית המדרש, אלע מתפללים שפירן זיך ווי א חלק פון בית המדרש, און יעדער פריידט זיך צו ארויסצוהעלפן און נעמען א חלק אין די הצלחה פונעם בית המדרש. דער ביהמ"ד ווערט געפירט דורכן באליבטן גבאי הר"ר יואל מנחם גרשון שניטצלער שליט"א, וועלכע לערנט פאר יעדן שב"ק דער שיעור אין סיפורי מעשיות און שלש סעודות, ווי ער איז מהנה דעם ציבור מיט די דיבורים געשעפט פונעם קוואל פונעם הייליגן רבין און זיינע תלמידים. דער מגיד שיעור הר"ר יעקב משה אינדארסקי שליט"א, לערנט פאר אין ביהמ"ד יעדן שב"ק און מוצש"ק א שיעור אין א דף גמרא בטוב טעם ודעת, און טאקע פאריגן שב"ק האט מען געפראוועט דעם סיום אויף מסכת ראש השנה, מיט די באטייליגונג פון די בחורים די תלמידים פון ישיבה קטנה וועלכע לערנען ביים מגיד שיעור הר"ר יעקב משה שליט"א. דער ביהמ"ד האט דער ראש ישיבה פארארדענט צו עפענען צוליב די פילע אידן וואס וואוינען אינעם געגענט, וועלכער איז זייער ווייט צו גיין צו סיי וועלכע אנדערע בית המדרש. בפרט ביינאכט ווען עס איז שטאָק פינסטער, אדער אין די גאר קאלטע ווינטער נעכט אין די הויכע שנייען. כאטש ביז יעצט איז מען זיך באגאנגען מיט א צייטווייליגע מקוה, האט דער ראש ישיבה שליט"א באשלאסן צו בויען אין דעם ביהמ"ד געהעריגע מקוה פאר שבת קודש. נאכן ארבעטן אויף די מקוה שוין עטליכע חדשים, איז מען שוין יעצט כמעט פארטיג. מען האט געמאכט א פראכטפולע באקוועמע מקוה, וואס וועט מיטן אייבערשטנ'ס הילף באנייען אויף דעם קומענדיגן יום טוב חנוכה הבע"ט. היינט, מאנטאג וישלח איז שוין ב"ה אנגעקומען די שיינע פראקטישע מקוה בענק, וואס איז נארוואס פארטיג געווארן. דא איז דאס פלאץ זיך צו באדאנקען פון די חשובע עוסקים במלאכת הקודש, וואס האבן אריינגעלייגט גאר אסאך כחות טאג און נאכט פאר די הצלחה פון דעם נייעם מקוה, מו"ה יואל ראזענבערג הי"ו, הר"ר יעקב משה אינדארסקי שליט"א, און מו"ה אברהם דוד לאקס הי"ו. דער אייבישטער זאל זיי באצאלן מיט אלעם גוטן. מה מקוה מטהר את הטמאים
ביי אונז האלט מען נאך אינמיטן חודש חשון, און קוים וואס מיר טראכטן אז אין איבער א חודש קומט חנוכה. ביי אונז קומט נאך א לאנגע ווינטער ביזן יום טוב פסח הבעל"ט... ביים ראש ישיבה שליט"א איז שוין אבער באלד פסח. צוליב דעם וואס די קהילה איז זיך ברוך השם אזוי שיין צואוואקסן, האט דער ראש ישיבה שליט"א באשלאסן אז עס איז צייט אריינצושפרינגען אין א נייעם פרישן קאסטבארן פראיעקט פון בויען און אהערשטעלן א נייעם און מהודר'דיגע ברסלב'ע מצה בעקערי אינעם שטעטל קרית ברסלב ליבערטי, וואס וועט מיטן אייבערשטנס הילף צושטעלן געשמאקע פיינע מצות לכבוד יום טוב פסח פארן געברויך פונעם גאנצן ציבור אנשי שלומינו. אין די צייט האט מען שוין אנגעהויבן אנגרייטן די פלאץ פארן מצה בעקעריי, מען גייט בעז"ה בויען א גרויסן ציגלנעם אויוון, אין וואס מען וועט נאך מיטן אייבערשטנ'ס הילף אנהייבן צו באקן מצות נאך פאר היי יאר פסח הבעל"ט. דער בעקעריי וועט בעז"ה האבן די שטרענגע השגחה פונם דיין שליט"א, וואס וועט זיכער מאכן אז די מצות זענען געבאקן מיט די העכסטע מאס כשרות שטאפלען, מיט אלע חומרות והידורים וואס עס פעלט זיך אויס. 🎞️ דער ראש ישיבה באקט מצות - ניסן תשע"ט
פארגאנגענעם מיטוואך לך לך איז דער ראש ישיבה שליט"א געקומען אויף א באזוך זיך אומצוקוקן און שעפן נחת פונעם הערליכן שטעטל. דער ראש ישיבה שליט"א האט געדאווענט שחרית מיט'ן ערשטן מנין אין בית המדרש אויף האשקי, און גלייך דערנאך איז דער ראש ישיבה אריבער אין חדר, און האט אפגעווארט די קינדער בשעת זיי זענען אראפגעקומען פון די באסעס. דער ראש ישיבה שליט"א איז אריין אין כיתה ד' צום חשובן מלמד הר"ר הערשל שניטצלער שליט"א, בשעת דער מלמד איז געזיצן און געלערנט מיט די קינדער. דער ראש ישיבה שליט"א האט דארט אנגערופן עטליכע עלטערן, און זיי געזאגטווי וואויל זייערע קינדער זענען און ווי שיין דרך ארץ'דיג זיי פירן זיך אויף. דער ראש ישיבה האט דערנאך איבערגעשמועסט איבערגעגאנגען מיטן מלמד וויאזוי זיך צו פירן בפרטיות מיט יעדן קינד אין קלאס. דערנאך איז דער ראש ישיבה שליט"א אריין אין נורסערי צום מלמד הר"ר יעקב יאקאבאוויטש שליט"א, ווי דער ראש ישיבה האט געטיילט פאר אלע קינדערלעך א טשאקאלאד, און געטאנצן מיט זיי מיטן ניגון "א מחיה חדר...", "א מחיה רבי יאקאבאוויטש...", און אזוי ווייטער. נאכדעם איז דער ראש ישיבה שליט"א אריבער צו בית פיגא סקול און געגעבן א שיעור פאר די תלמידות און גערעדט איבער די וויכטיגקייט פון אידישע קינדער זיך צו פירן מיט דרך ארץ, און אז ביים הייליגן רבי'ן איז געווען א יסוד 'דרך ארץ' און מיר דארפן זיך פירן אינעם רבינ'ס וועג. דער ראש ישיבה האט געזאגט פאר די מיידלעך, "איך האב געברענגט פאר ענק די בעסטע טיטשער'ס, האט שכל און הערט אויס וואס זיי זאגן. די שכל וועט עטץ מיטנעמען נאך די חתונה!". דערנאך איז דער ראש ישיבה שליט"א איבערגעגאנגען מיט די לערערינס וויאזוי זיך צו באגיין מיט יעדע תלמידה באזונדער, און אראפגעשטעלט וואס די יסודות זענען פון בית פיגא סקול. אויך האט זיך דער ראש ישיבה אומגעקוקט אויף די ארבעט אינעם בנין וואס ווערט יעצט געמאכט, ווי מען לייגט צו פרישע קלאסן פאר די געברויך פונעם תלמוד תורה. דער באזוך האט גאר שטארק אויפגעפרישט די איינגעשטעלטע, די תלמידים ותלמידות, וואס האבן באקומען פרישע חיות ווייטער אנצוגיין, און זיך מחדש זיין מיט די עצות והדרכות וואס דער ראש ישיבה לערנט מיט אונז.