ב"ה אייער פרייזן שטארק געפאלן אין אמעריקע
ווער עס האט נאר אריינגעטרעטן אין א גראסערי במשך די לעצטע חדשים האט עס געמוזט באמערקן, אלע פורים וויצן זענען געגאנגען אויף די חשבון פון די אייער "קענסט מיר אפשר צוקראכן א צענער" איז געווען איינע פון די וויצן "יא, געב מיר א דאזן אייער און איך לאז עס אראפ אויף דער ערד, און האסט א צוקראכטע צענער". אסאך האבן טאקע געמאכט געשמאקע דזשאוקס אויפן די חשבון פון די הינער, אבער ביי אנדערע איז עס נישט געווען אזוי "איי איי", "וואס וועט זיין מיט פסח?" האט דער נוזשענדע פליג אונז געדזשומעט אין קאפ, "וואס וועט מען עסן פסח אויב א דאזן אייער וועט קאסטן צען דאלער?", דער ראש ישיבה שליט"א האט אבער געהאלטן אין איין דערמאנען - ווען עס איז אויסגעקומען צו רעדן פון אייער אז עס איז נישטא וואס צו זארגן, דער אייבערשטער האט געהאלפן ביז יעצט, ער וועט ווייטער העלפן, און וויאזוי עס וועט זיין וועט ער בלייבן פירן די וועלט, און דער זעלבער באשעפער וואס איז זן ומפרנס מקרני ראמים עד ביצי כינים, וועט אונז אויך שפייזן, ביז פסח, אין פסח, נאך פסח, צי פרייזן פון אייער וועט זיין איין דאלער, צען דאלער אדער סיי וועלכע אנדערע פרייז. די אלע נבואות זאגער און נייעס ברענגער האבן פארשפרייט שמועות אז די פרייזן פון אייער וועט נאך ארויפגיין כאטש ביז פופצן דאלער א דאזן, און פאר דריי פיר חדשים וועט עס נישט פאלן, און דערפאר - איז זייער וויכטיג צו זיין באזארגט - האבן זיי אויסגעפירט מיט פאטאס. די אלע וואס זענען נעבעך פארקויפט פאר די נייעס זענען נעבעך שטארק אויסגעשפילט געווארן ווען דער אויבערשטער האט געהאלפן אז יעצט עטליכע וואכן פאר פסח האט זיך די פרייז פון אייער פלוצליג גענומען פאלן גאר גאר שטארק, אין די צייט וואס אידן קויפן איין ריזיגע טרעילארס מיט אייער, זענען די פרייזן שוין געפאלן ביז אונטער דריי דאלער א דאזן. אבער זארגט אייך נישט - אוי, כ'מיין צו זאגן - זארגט אייך יא... - די צייטונגען האבן יעצט פרישע שווארצע נבואות'ער וואס קומט. עס איז נישט כדאי זיי אראפ צו ברענגען, ווייל די יצר הרע פון ערווארטן ביטערע צייטן איז אזוי שטארק, אז מען קען נאך חלילה פארכאפט ווערן פון די אלע זארגערייען. יעצט קומט דער הייליגער יום טוב פסח, דארפן מיר געדענקען אז מה דאך אויף אייער האט דער אייבערשטער געהאלפן און עס איז געווארן אסאך ביליגער, און מען עס שוין איינקויפן פאר אסאך ביליגער, כל שכן אויף די הייליגע מצות - מיכלא דמהימנותא - א מאכל פון אמונה, דארפן מיר געדענקען אז עס איז ווערד יעדע דאלער וואס מען געבט אויס דערויף. דער ראש ישיבה שליט"א זאגט אלעמאל, אז מען זאל נישט מאכן קיין אנגעצויגנקייט אין שטוב "מצות זענען אזוי טייער! יעדע ביס קאסט א דאלער! עס נישט אזוי סאך!", נאר מען זאל לאזן די שטוב עסן פון די הייליגע מצה וואס געבט אריין אמונה אין אונז און אין די קינדער, אזוי אויך איז עס א "מיכלא דאסותא", א מעדיצין, א נאטורליכע וויטאמין, וואס היילט אויס. מוהרא"ש זי"ע פלעגט זאגן אז דאס וואס עס זענען דא מענטשן וואס באקלאגן זיך אויף די מאגן נאך פסח, אז די מצות זענען אזוי שווער אויפן מאגן, דאס איז א סימן אז דער מעדיצין ווירקט. ווען א מענטש גייט דורך טריעטמענטס רח"ל אויף א שווערע מחלה, קען עס האבן זייט ווירקונגען. דעם פסח וועלן מיר זיין זייער פרייליך מיט די מצות, מיט די ד' כוסות, מיט די מרור, מיר וועלן זיין פרייליך אז מיר האבן א ווייב, מיר האבן קינדער, און מיר דארפן זיי קויפן קליידער און עסן, און אנשטאט זינגען דעם ביטערן ניגון "יום טוב קאסט" וועלן מיר זינגען דעם פרייליכן ניגון "א מחי' יום טוב, א מחיה מצות, א מחיה קינדער, א מחיה פסח", און דאס וועט זיין די בעסטע חינוך פאר די קינדער, זיי זאלן ליב האבן דעם אויבערשטן, ליב האבן תורה ומצות, און וואקסן געזונטע קינדער ברוחניות ובגשמיות.
