תוכן השאלה
לכבוד דער ראש ישיבה שליט"א,
מיר מוזן זיך זייער באדאנקען אויף די חיזוק און הדרכה פונעם ראש ישיבה שליט"א, ווען נישט די שיעורים און בריוו וואלטן מיר שוין לאנג געווען איינגעזינקען אין חובות, ברוך ה' אז מיר שטעלן זיך צוריק אויף די פיס, מיר זענען מורא'דיג דאנקבאר פאר'ן ראש ישיבה שליט"א אויף אלעס, יישר כח פאר אונז געבן א גן עדן אויף די וועלט.
איך האב געוואלט פרעגן, מיר האבן געהאט א זעקל טייג פון חלה נעמען וואס איז געווארן פארשימלט און געברענגט אסאך פליגן, האבן מיר עס ארויסגעלייגט אינדרויסן. איך האב כסדר דערמאנט מיין מאן עס צו פארברענען אבער ער האט נישט געהאט קיין צייט, ביז איין טאג האבן מיר געזען אז עס איז מער נישטא.
איך בין זייער דערשראקן פון דעם, ווייל איך האב געהערט אז מען קען באקומען א גרויסע שטראף אויב מען געבט נישט אכטונג אויף די חלה טייג עס צו פארברענען ווי מען דארף. וואס קענען מיר טון דאס צו פאררעכטן און תשובה טון אויף דעם?
יישר כח
תשובה מאת הראש ישיבה שליט"א:
בעזרת ה' יתברך - יום ג' פרשת משפטים, שובבי"ם, כ"ז שבט, שנת תשפ"ד לפרט קטן
מרת ... תחי'
איך האב ערהאלטן אייער בריוו.
עס איז זייער א גרויסע זאך צו באקן חלות לכבוד שבת. מוהרא"ש זאגט, פרויען דארפן וויסן דאס גרויסקייט פון פועל'ן ישועות ביים מקיים זיין די מצוה פון אפשיידן חלה, מען איז זוכה צו ערליכע דורות, קינדער און אייניקלעך מיט אמונה. אזוי ווי דער הייליגער רבי זאגט (ספר המדות אות אמונה חלק ב, סימן יד): "אִשָּׁה הַזְּהִירָה בְּחַלָּה, בָּנֶיהָ בַּעֲלֵי אֱמוּנָה", א פרוי וואס געבט אכטונג צו טון די מצוה פון אפשיידן חלה - וועלן אירע קינדער האבן אמונה, אזוי ווי חכמינו זכרונם לברכה זאגן (ויקרא רבה טו, ו): "אָמַר רַבִּי יוֹחָנָן, לָמָּה נִסְמְכָה פָּרָשַׁת חַלָּה לְפָרָשַׁת עֲבוֹדָה זָרָה", פארוואס שטייט אין די תורה געשריבן די מצוה פון חלה נעבן די פרשה פון עבודה זרה? "לוֹמַר לָךְ", אונז צו לערנען, "שֶׁכָּל הַמְקַיֵם מִצְוַת חַלָּה כְּאִלּוּ בִּטֵּל עֲבוֹדָה זָרָה", אז ווער עס איז מקיים די מצוה פון חלה - ווערט גערעכנט אזוי ווי ער נעמט אוועק עבודה זרה פון די וועלט.
מוהרא"ש זאגט בשם רבי נתן, באקן חלות אין שטוב ברענגט אריין א ליבשאפט אין שטוב, און איינמאל עס איז דא א ליבשאפט אין שטוב - איז שוין אלעס דא; ביים אפשיידן חלה קען מען זיך גוט אויסבעטן אויף שלום בית, אויף אמת'ע ליבשאפט און אויף ערליכע דורות; קוקט נאך אין ספר לקוטי הלכות (חלה הלכה ב', אות ב') ווי ער זאגט אז אפשיידן חלה איז סוד אהבה דקדושה, עיין שם.
פרויען דארפן אויסנוצן די פאר מינוט ביים אפשיידן חלה; גלייך נאכן מאכן די ברכה, ווען מען האלט די שטיקל טייג אין האנט, נאכן זאגן: "יְהִי רָצוֹן מִלְּפָנֶיךָ, ה' אֱלֹקֵינוּ וֵאלֹקֵי אֲבוֹתֵינוּ, שֶׁיִּבָּנֶה בֵּית הַמִּקְדָּשׁ בִּמְהֵרָה בְּיָמֵינוּ, וְתֵן חֶלְקֵנוּ בְּתוֹרָתֶךָ, וְשָׁם נַעֲבָדְךָ בְּיִרְאָה כִּימֵי עוֹלָם וּכְשָׁנִים קַדְמוֹנִיּוֹת" - זאל זי בעטן אויף אלעס וואס ליגט אויפן הארץ; אויב האט זי נישט קיין קינדער, אדער עס איז נישטא קיין שלום בית, אדער עס איז נישטא קיין פרנסה אדער געזונט - זאל זי בעטן ביי די טייג, און זי וועט זיכער געהאלפן ווערן, בזכות די גרויסע מצוה פון אפשיידן חלה וואס איז זייער טייער און חשוב ביים אייבערשטן.
דאס וואס האט פאסירט - איז געווען א אונס, און אונס רחמנא פטריה; פאר א תשובה זאלט איר זיך מקבל זיין מער אכטונג צו געבן וואו מען לייגט די שטיקל טייג, די בעסטע זאך איז, נאכן אפשיידן חלה זאל מען לייגן די שטיקל טייג אין א ספעציעלע זעקל און לייגן אין פריזער, עס זאל נישט ברענגען קיין פליגן, און ווען עס זאמלט זיך אן אפאר שטיקלעך זאל מען דאס גלייך פארברענען; מען דארף זייער אכטונג געבן נישט מזלזל זיין אין דעם.
דער אייבערשטער זאל העלפן איר זאלט האבן הצלחה אין אלע ענינים.
