תוכן השאלה
לכבוד דער ראש ישיבה שליט"א,
איך האב א זאך וואס שטערט מיך שוין לאנג, מיט בערך א יאר צוריק ווען איך בין געווען אין קעמפ האט מען אראפגעברענגט א גראפאלאג און מען האט געבעטן יעדן איינעם אראפצושרייבן א תורה און עס איבערגעבן פאר אים. עס איז געווען ממש שטוינענד ווי ער האט צוגעטראפן יעדן איינעם זיינע נאטורן, משוגעת'ן, משפחה, און אזוי ווייטער. ביי מיר האט ער אבער געזאגט אז ווייל איך שרייב אזוי אז סוף שורה איז נידריגער ווי די אנהויב, מיינט דאס אז מיין לעבן וועט גיין בארג אראפ.
עס גייט כמעט נישט דורך א טאג וואס איך זאל זיך נישט דערמאנען פון דעם, און עס שטערט מיר זייער שטארק. איך ווייס וואס דער ראש ישיבה זאגט וועגן גראפאלאגיע אז עס איז סתם דמיונות, איך קען דאס אבער נישט ארויסקלאפן פון קאפ.
וואס קען איך טון דערצו?
יישר כח
תשובה מאת הראש ישיבה שליט"א:
בעזרת ה' יתברך
יום ב' פרשת במדבר, כ"ט אייר, מ"ד לעומר, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
מוהרא"ש זכותו יגן עלינו זאגט, די חכמה פון ליינען יענעמ'ס שריפט - איז איין גרויסע דמיון; עס איז א וועג ווי אזוי צו קענען ארבעטן אויף מענטשן, פארנארן מענטשן וכו'.
דאס וואס מען זעט ווי זיי טרעפן צו, זיי זאגן פונקט וואס דער מענטש טוט און טראכט וכו' וכו'; ווער נישט איבערגענומען פון דעם, עס איז נישט קיין קונץ צוצוטרעפן וואס גייט אריבער אויפ'ן מענטש, ווייל וואס מען זאל נאר זאגן אויף א מענטש - וועט מען צוטרעפן. מענטשן גייען אריבער אזויפיל אין לעבן, מען קען אין איין מענטש אלעס צוטרעפן.
מוהרא"ש זאגט (אשר בנחל, מכתב ה' תיט): "ומה שקולעים אל השערה בדיוק מה שקורה אצל הזולת", דאס וואס מען זעט אז זיי טרעפן צו אויפ'ן האר וואס עס פאסירט ביי יענעם, זאגט מוהרא"ש: "היום זה קל מאוד", עס איז זייער גרינג צוצוטרעפן; הער א לשון פון מוהרא"ש: "כי מה שרק לא יגידו", וואס מען זאל נאר נישט זאגן אויף דעם מענטש: "מסכן האיש עבר על זה וכו' וכו'", - איז נעבעך אריבער אויף אים.
איך בעט דיר זייער קלאפ זיך נישט אראפ, זיכער נישט מיט די צעדרייטע זאך פון ליינען א שריפט; קוק חידושי תורה פון אלע צדיקים, ביי רוב פון זיי וועסטו זען אז די שורות גייען אראפ; מאך זיך נישט נאריש, עס איז אויסגעזויגן פון די פינגער, עס האט נישט קיין שום מקור, נישט פון די תורה און נישט פון קדושה; ענדערש לייג אריין דיין קאפ אין די הייליגע אמונה, חזר אמונה - וועסטו ווערן אויטאמאטיש אויפגעהויבן; אמונה הייבט אויף דעם מענטש, אמונה ברענגט א זיכערקייט אינעם מענטש; ווי מער מען חזר'ט אמונה - אלץ מער ווערט מען זיכער ביי זיך, ביז מען דארף שוין נישט קיינעם נאר דעם אייבערשטן.
מוהרא"ש דערציילט אונז, ער פלעגט גיין שפאצירן אין פעלד; אנהויב האט ער מורא געהאט פון דאס און פון יענץ, האט ער זיך אנגעהויבן אונטערזינגען ווערטער פון לקוטי מוהר"ן (חלק א', סימן סד): "ממלא כל עלמין וסובב כל עלמין, אין שום מציאות בלעדיך יתברך כלל, ובכל תנועה ותנועה - שם אלופו של עולם"; ער האט דאס געזינגען און געזינגען, ער האט דאס געזינגען א גאנץ לעבן, יעצט זינגט ער דאס אין גן עדן און דאס וועט משיח זינגען; דאס זאלסטו זיך זינגען טאג און נאכט: "אלעס איז דער אייבערשטער, דער אייבערשטער איז אלעס, נישטא גארנישט אויסער אים" - וועסטו ווערן שטארק מיט זיך און דו וועסט קענען מחזק זיין אנדערע.
דער אייבערשטער זאל העלפן זאלסט האבן הצלחה אין אלע ענינים.