תוכן השאלה
לכבוד דער ראש ישיבה שליט"א,
איך האב זיך נאך קיינמאל נישט געעפנט באמת מיין הארץ צו דערציילן מיינע פריוואטע זאכן פאר'ן ראש ישיבה שליט"א, און איך וויל עס זאל טאקע בלייבן אזוי, אבער צומאל האט מען נישט קיין ברירה.
איך האב ברוך ה' א גוטע פילטער אויף מיין סמארטפאון, אבער דער יצר הרע קען נאכאלץ זיך שטארקן אויף מיר צומאל, און איך וועל זוכן וועגן ווי אזוי אויסצומיידן דעם פילטער און טרעפן א וועג צו קענען קוקן זאכן וואס מען טאר נישט. צומאל וועל איך קויפן אן אלטע סמארטפאון אן קיין פילטער און עס נוצן פאר עטליכע טעג און נאכדעם עס אוועקווארפן, אדער וועל איך זוכן אנדערע פלעצער וואו עס איז דא אפענע אינטערנעט, אדער אנדערע אופנים צו קענען זען שלעכטע זאכן אויפ'ן טעלעפאן טראץ דעם פילטער, אדער קען איך פשוט זיצן אין מיין קאר און כאפן בילדער פון פרויען, און ביים סוף טאג עס אויסמעקן.
עס איז נישט אז איך שטיי אויף אינדערפרי מיט א פלאן צו זיין נישט ערליך חס ושלום, איך וויל זיין גוט און וואויל, און דערפאר האב איך טאקע א מהודר'דיגע פילטער אויף מיין סמארטפאון, און אפילו די וואטסעפפ וואס איך דארף האבן פאר מיין פרנסה איז טאקע נאר פאר דעם, איך בין נישט אויף קיין שום גרופס, איך שרייב זיך נישט מיט קיינעם, איך האב נישט קיין סטאטוס, איך נוץ עס נאר וואס עס פעלט באמת אויס פאר די ארבעט; נאר דער יצר הרע ארבעט אויף מיר, און עס פאסירט פון זיך אליין במשך דעם טאג, אין לויף פון די ארבעט, איך ווער נכשל דא און דארט, איך זע דא און דארט זאכן וואס מען טאר נישט, און אזוי ציעט איינס די אנדערע, און איך קום למעשה אן צו זען שלעכטע זאכן וואס דער אייבערשטער לאזט נישט.
איך האב אנגעהויבן טראכטן צו מיר, אז דער גאנצער סמארטפאון דארף איך דאך האבן נאר פאר די ארבעט, איך נוץ עס טאקע אסאך פאר מיין פרנסה, אבער למעשה זע איך אז איך מוטשע זיך אזוי מיט פרנסה, קיין געלט האב איך נישט, איך שלעפ ממש א טאג נאך א טאג, איך שפיר ווי מיין ביזעס איז ממש פארשטאפט, עפעס דארף דא פאסירן אז איך זאל זען א דורכברוך אין מיין פרנסה, און דערווייל בין איך נישט מצליח; און דעריבער האב איך אנגעהויבן קלערן אויב איך דארף בכלל האבן דעם טעלעפאן, און נאך מער, אפשר איז גאר דער טעלעפאן וואס האלט צוריק מיין פרנסה? און אויב דער טעלעפאן ברענגט מיר צו עבירות, אפשר איז עס ממש ווי חילול שבת רחמנא ליצלן, יעדע רגע וואס איך האלט ביי זיך דעם טעלעפאן?
אויב וויל איך אויפגעבן דעם טעלעפאן, דארף איך אנשטאט דעם קויפן א קאמפיוטער וואס זאל ליגן נאר ביי די ארבעט, אזוי וועל איך נישט האבן קיין צוטריט דערצו כסדר, נאר ווען עס פעלט טאקע אויס פאר די ארבעט, און אויב א קאסטומער דארף זיך פארבינדען מיט מיר וועט ער מיר מוזן רופן געהעריג אויפ'ן טעלעפאן. דאס וועט מיר אבער קאסטן אסאך געלט, סיי דער קאמפיוטער און סיי אז איך וועל דארפן קויפן א באזונדערע כלי צו קענען זען "וועיז" אויף די וועגן, און איך האב באמת נישט פון וואו צו נעמען דאס געלט, נאר דורך בארגן דאס געלט, און אן קיין שום פלאן ווי אזוי איך וועל עס קענען באצאלן.
אדער אפשר זאל איך יא בלייבן מיט מיין סמארטפאון און פארמאכן נאך חלקים דערפון, אבער דאן וועט עס מיר שוין נישט צופיל העלפן פאר די ארבעט, און דער אמת איז אז עס נישט מעגליך צו פארמאכן דעם טעלעפאן אויף א וועג אז עס זאל נישט בלייבן מער קיין שום פלאץ פאר נסיונות.
איך מאך אסאך התבודדות אויף די אלע זאכן וואס איך האב געשריבן, אבער איך וויל זייער שטארק אז דער ראש ישיבה שליט"א זאל מיר זאגן וואס צו טון, איך וועל זיך זייער פרייען אז דער ראש ישיבה שליט"א וועט מיר ענטפערן, איך בין זייער צעבראכן, איך בין אובד עצות.
יישר כח
תשובה מאת הראש ישיבה שליט"א:
יום א' פרשת נח, א' דראש חודש מרחשון, שנת תשפ"ז לפרט קטן
וואס זאל איך דיר זאגן, אז מען קוקט עבירות רחמנא לצלן פארלירט מען די פרנסה, און דאס איז די צרה פון אונזער דור, מען קען אין אפאר סעקונדעס אלעס פארלירן; אז מען האט א טעלעפאן און מען קוקט עבירות רחמנא לצלן - פארלירט מען אלעס; די פרנסה, די אמונה, די געזונט, און וויפיל די רבנים בעטן זיך מען זאל נישט האבן קיין טעלעפאן וואס מען קען זען עבירות - האלט מען זיך קלוגער, מען נארט זיך אליינס.
דער הייליגער רבי זאגט (ליקוטי מוהר"ן חלק א, סימן כט), אז פרנסה קומט נאר ווען מען איז מתקן אות ברית קודש, ווייל דער זוהר הקדוש זאגט (פנחס, רמד:): "מַאן דִּמְזַלְזֵל בְּפִרוּרִין דְּנַהֲמָא", ווער עס ווארפט אראפ ברעקלעך פון ברויט, "עֲנִיּוּתָא רָדִיף אֲבַּתְרֵיהּ", וועט אים נאכלויפן ארעמקייט, "כָּל שֶׁכֵּן", איז דאך זיכער, "מַאן דִּמְזַלְזֵל בְּפִירוּרִין דְּמוֹחָא", דער וואס ווארפסט אראפ די ברעקלעך פון מח, ער איז מוציא זרע לבטלה רחמנא לצלן - איז זיכער אז עס וועט אים נאכלויפן ארעמקייט.
נעם די עצה פון הייליגן רבי'ן, גיי אין א שטילע פלאץ וואו קיינער איז נישט דארט, און גיס זיך אויס דיין הארץ צום אייבערשטן, דערצייל אים אלעס וואס עס גייט אריבער אויף דיר, דערצייל אים ווי שווער עס איז דיר, ווי דו טרעפסט אלץ וועגן ווי אזוי צו קוקן עבירות אפילו מיט די בעסטע פילטער, בעט דעם אייבערשטן:
"רבונו של עולם האב רחמנות אויף מיר, איך וויל זיין אן ערליכער איד, איך האלט אין איין אראפאלן אין קוקן שלעכטס, איך טרעף אלץ פרישע וועגן ווי אזוי צו קוקן עבירות, הייליגער באשעפער, העלף מיר איך זאל מיך קענען היטן מיינע אויגן, געב מיר ריינע אויגן, איך וויל נישט קוקן עבירות. וואס זאל איך טון אז איך האלט אין איין צוריק פאלן, איך ווער פארברענט פון די עבירה, די תאוה פלאקערט אין מיר, איך שפיר ווי איך האב נישט קיין בחירה, איך פארליר מיינע כוחות, אבער הייליגער באשעפער באמת וויל איך אזוי שטארק זיין אן ערליכער איד, איך וויל נישט קוקן קיין שלעכטס, רבונו של עולם, האב אויף מיר רחמנות, געב מיר כח, העלף מיר איך זאל גלייבן אין דיר, איך זאל שפירן אז דו האסט מיך ליב, איך זאל געדענקען אז דו ביסט מיט מיר, און דו זעסט אלעס וואס איך טו, געב מיר א קלארע לויטערע אמונה איך זאל נישט פארגעסן פון דיר, אזוי וועל איך מער קיינמאל נישט קוקן שלעכטס, ווייל איך וועל זיך שעמען פון דיר.
אזוי זאלסטו טון טאג נאך טאג, בעט און בעט און לאז נישט נאך, ביז דער אייבערשטער וועט רחמנות האבן אויף דיר, דו וועסט ארויסגיין פון די שלעכטס.
דער עיקר זאלסטו זיך שטארקן, זאלסט נישט אפלאזן דיין ווילן און דיין עבודת השם, מען דארף זיך זייער שטארקן ווייל אמאל ווארפט מען אראפ א מענטש וכו', אזוי ווי דער רבי זאגט (לקוטי מוהר"ן חלק ב, סימן מח): "כִּי צָרִיךְ עַקְשָׁנוּת גָּדוֹל מְאֹד מְאֹד לִהְיוֹת חָזָק וְאַמִּיץ לֶאֱחֹז עַצְמוֹ לַעֲמֹד עַל עָמְדוֹ אַף אִם מַפִּילִין אוֹתוֹ, חַס וְשָׁלוֹם, בְּכָל פַּעַם", מען דארף זיין זייער שטארק ביי זיך נישט צו ווערן געפאלן ווען מען זעט אז דער יצר הרע ווארפט אראפ חס ושלום, "כִּי לִפְעָמִים יֵשׁ שֶׁמַּפִּילִין אֶחָד מֵעֲבוֹדַת הַשֵּׁם, כַּיָּדוּעַ, אַף עַל פִּי כֵן עָלָיו לַעֲשׂוֹת אֶת שֶׁלּוֹ, לַעֲשׂוֹת מַה שֶׁיּוּכַל בַּעֲבוֹדַת הַשֵּׁם וְאַל יָנִיחַ עַצְמוֹ לִפֹּל לְגַמְרֵי, חַס וְשָׁלוֹם", ווייל אפילו מען שפירט ווי מען האלט אין איין אראפפאלן נאכאמאל און נאכאמאל - טאר מען נישט טראכטן פון אפלאזן וכו', נאר מען דארף ווייטער דינען דעם אייבערשטן מיט וואס מען קען נאר, "כִּי כָל אֵלּוּ הַנְּפִילוֹת וְהַיְרִידוֹת וְהַבִּלְבּוּלִים וְכַיּוֹצֵא בָּזֶה", ווייל דאס וואס מען פאלט אראפ, "צְרִיכִים בְּהֶכְרֵחַ לַעֲבֹר בָּהֶם קֹדֶם שֶׁנִּכְנָסִין בְּשַׁעֲרֵי הַקְּדֻשָּׁה", דאס גייט אריבער אויף יעדן איינעם פאר מען איז זוכה אריין צו קומען צו די קדושה.
דער אייבערשטער זאל העלפן זאלסט האבן הצלחה אין אלע ענינים.
א גוטן חודש.