תוכן השאלה
לכבוד דער ראש ישיבה שליט"א,
איך בין זייער פארציטערט. איך האב געהאט א חלום אז פון איין סעקונדע אויף די אנדערע זענען רוב פון מיינע ציינער ארויסגעפאלן, איך האב נישט געקענט רעדן געהעריג צוליב די ארויסגעפאלענע ציין, און איך בין געווען פון דעם זייער פארשעמט און אויפגערעגט. אין חלום בין איך געלאפן אין שפיטאל מיט א זעקל מיט די ארויסגעפאלענע ציינער, אבער זיי האבן מיר גארנישט געהאלפן.
איך האב בכלל נישט געטראכט בייטאג פון אזא סארט זאך, וואס קען דאס מיינען?
יישר כח
תשובה מאת הראש ישיבה שליט"א:
בעזרת ה' יתברך
ה' פרשת שמות, כ' טבת, שנת תשפ"ב לפרט קטן
מרת ... תחי'
איך האב ערהאלטן אייער פראגע.
איר דארפט נישט מורא האבן פון דער חלום, אזא מעשה האט פאסירט ביים רבי'ן. א איד איז געקומען צום רבי'ן, ער האט זיך גע'חלומ'ט אזא חלום וואס איר האט גע'חלומ'ט, אלע ציינער זענען אים ארויסגעפאלן; ער האט געזאגט פאר'ן רבי'ן אז ער האט מורא, ווייל ציינער איז מרמז אויף חכמה, יעצט ווייזט מען אים פון הימל אז ער גייט פארלירן זיינע חכמות. האט אים דער רבי געזאגט (חיי מוהר"ן, סימן תנז): "אַדְּרַבָּה הַשְּׁטוּת שֶׁלְּךָ יִתְבַּטֵּל", דיינע שטותים זענען דיר אוועקגעפאלן, פון יעצט וועסטו מער נישט האבן די נארישע זאכן.
אזוי אויך וועט זיין ביי אייך, פון יעצט וועט איר מער נישט האבן די אלע נארישע מחשבות.
שטארקט אייך מיט אמונה; ווען א מענטש נעמט אריין אין זיך די אמונה, ער גלייבט און ווייסט אז 'דער אייבערשטער איז דא, אלעס איז דער אייבערשטער, נאר ער מאכט אלעס, נאר ער טוט אלעס; קיינער קען מיר נישט העלפן און קיינער קען מיר נישט שטערן און שלעכטס טון' – דאס איז די בעסטע מעדעצין, דאס איז די שטערקסטע טערעפי, די ריינסטע זאך.
מוהרא"ש זאגט, היינט איז א וועלט פון פסיכילאגן, יעדע מינוט קומען ארויס נייע מעטאדן, נייע מהלכים ווי אזוי צו העלפן מענטשן מיט גייסטישע פראבלעמען; די בעסטע פסיכילאגיע איז אמונה, אמונה איז א רפואה פאר אלצדינג; ווי נאר דער מענטש חזר'ט: "אין עוד מלבדו", "מלא כל הארץ כבודו" – פאלט אוועק אלע דמיונות, אלע פחדים און אלע מחשבות רעות.
וואויל איז דעם מענטש וואס חזר'ט אמונה, און חזר'ט מיט אנדערע אמונה; עס וועט אים גארנישט פעלן, ער וועט שפירן די טעם פון גן עדן בזה העולם.
