תוכן השאלה
לכבוד דער ראש ישיבה שליט"א,
איך האלט זיך אינמיטן לערנען א פאך, און איינער פון די לערערס איז א דייטשער גוי, ער רעדט און קוקט אויס ווי א ריכטיגער דייטש, מיט בלאנדע האר און בלויע אויגן; עס איז מיר אבער זייער שווער נישט צו גיין צו אים ווייל ער לערנט אויס א חלק פון די לימודים, איך ווייס אבער אז צדיקים האבן מקפיד געווען נישט צו קויפן זאכן וואס איז געמאכט געווארן אין דייטשלאנד, און געוויסע צדיקים האבן געזאגט אז זיי זענען די ריכטיגע עמלקים; דארף איך דוקא זיך שטעלן אויף דעם אז איך וויל נישט גיין צו אים?
יישר כח
תשובה מאת הראש ישיבה שליט"א:
מוצאי שבת קודש פרשת בהר-בחוקותי, כ"ז אייר, מ"ב לעומר, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
מוהרא"ש זאגט, עס איז א חיוב אויף אלע תלמוד תורה'ס און מיידל סקולס צו לערנען מיט די קינדער וואס די דייטשע רוצחים האבן געטון מיט כלל ישראל. ווי זיי האבן אויסגע'רצח'ט מיט אלע מיתות משונות אידישע קינדער, מיט סקילה, שריפה, הרג, חנק. איבער זעקס מיליאן אידן האבן די רוצחים פארטיליגט, מען דארף דאס לערנען מיט די קינדער, זיי זאלן וויסן און געדענקען: "זָכוֹר אֵת אֲשֶׁר עָשָׂה לְךָ עֲמָלֵק" (דברים כה, יז), וואס די פעלקער האבן געטון מיט די אידישע פאלק.
מוהרא"ש זאגט מען זאל נישט אהין פארן און מען זאל זיך אויך נישט דארט אפשטעלן, אפילו נאר אויף טוישן פליגער, און אויך אז מען זאל נישט קויפן קיין דייטשע פראדוקטן און נישט האבן מיט זיי.
בנוגע אויב דו זאלסט לערנען וכו'; צדיקים זאגן אז די דייטשע זענען די עכטע עמלקים, און צדיקים האבן נישט געוואלט זיך טרעפן מיט זיי, נישט צו קוקן אויף די פנים פון עמלק.
דער אייבערשטער זאל העלפן זאלסט האבן הצלחה אין אלע ענינים.