שאלה אין קורצן ענין
#1 - זאל איך מאכן אן אפעראציע צו פארלירן וואג?
רפואה, איבערוואג

תוכן השאלה‎

לכבוד דער ראש ישיבה שליט"א,


איך לייד פון הויך צוקער און הויך קאלעסטעראל, און דאס קומט פון זיין שטארק איבערוואג. אין די פארגאנגענהייט האב איך שוין פרובירט אויף אסאך וועגן צו פארלירן וואג, כ'האב אויך געצאלט אסאך געלט אויף דעם, אבער ס'האט זיך גארנישט געהאלטן.


די דאקטוירים האלטן אז מ'זאל מיר מאכן אן אפעראציע צו פארקלענערן דעם מאגן, א "סליוו", און איך טראכט אז דאס וועט מיר יא העלפן.


איך וויל וויסן וואס דער ראש ישיבה שליט"א האלט וועגן דעם.


יישר כח

תשובה מאת הראש ישיבה שליט"א:‎

בעזרת ה' יתברך


יום ג' פרשת חקת, ה' תמוז, שנת תשפ"א לפרט קטן


לכבוד ... נרו יאיר


איך האב ערהאלטן דיין בריוו.


ווען מען פלעגט פרעגן מוהרא"ש אויב מען זאל מאכן די סליוו פלעגט מוהרא"ש נישט צורעדן צו דעם, מוהרא"ש האט געהאלטן אז ווילאנג מען קען אויסמיידן דעם מעסער - זאל מען דאס אויסמיידן און זיכער נישט גיין לכתחילה זיך שניידן. מוהרא"ש זאגט אז מיט א שטארקע ווילן קען מען אפפאלן פונט אן זיך שניידן, מיט א שטארקע רצון קען מען דאס באווייזן.


אבער אז די דאקטורים זאגן אז עס איז א סכנה צו בלייבן אזוי, בפרט אז דו ליידסט פון הויך צוקער, וואס דאס איז זייער א גרויסע סכנה, און זיי זאגן דו זאלסט זיך סליוון - זאלסטו גיין צו גאר א גרויסער דאקטער, און דער אייבערשטער זאל דיך היטן דו זאלסט זיין געזונט און שטארק.


בעט דעם אייבערשטן; תפילה איז זייער שטארק, מיט תפילה קען מען אלעס טוישן.


דער אייבערשטער זאל העלפן זאלסט האבן הצלחה אין אלע ענינים.