בעזרת ה' יתברך

יום ב' פרשת ואתחנן, י' מנחם-אב, שנת תשפ"ה לפרט קטן

... נרו יאיר

איך האב ערהאלטן דיין בריוו.

דער רבי דערציילט אין די מעשה פון די פליג און די שפין (ספורי מעשיות, מעשה ז), אז דער קעניג האט געקוקט אינעם ספר האט ער געזען ווי עס קריכט א שפין אויף די שארף פון די בלעטער און אויפן ספר איז געווען א פליג און מן הסתם ווי קריכט א שפין? צום פליג, און מוהרא"ש געבט צו פארשטיין די מעשה אין ספר נהרי הפרסמון; דער שפין דאס איז מרמז אויף עמלק, אזוי ווי חכמינו זכרונם לברכה זאגן (מדרש משלי ל, יג) אויפן פסוק (משלי ל, כח): "'שְׂמָמִית בְּיָדַיִם תְּתַפֵּשׂ וְהִיא בְּהֵיכְלֵי מֶלֶךְ', זֶה עַמָלֵק", די פארשאלטענע פאלק וואס קריכט צום פליג, ער וויל פארכאפן די פליג, דאס זענען די אידישע קינדער וואס האבן נישט קיין כח צו זיין שטארק, צו זיי גייט עמלק און וויל זיי פארכאפן מיט די שפינען וועבאכטס, אזוי ווי דער רבי זאגט (שיחות הר"ן, סימן רלב), איינער האט געוואלט אייננעמען א פעסטונג און ווען ער איז אנגעקומען צום טויער האט ער געזען א שפינען וועבאכטס, וועט זיך א שטארקער צוריק קערן פון אריינגיין אין אייננעמען די פעסטונג? זיכער נישט, אבער א שוואכער וועט זיך צוריק קערן און אוועק גיין, זעט מען אז דער שפין איז די טומאה און וויל אראפ ווארפן נשמות ישראל.

דער הייליגער מנחת אליעזר זכותו יגן עלינו ברענגט (דברי תורה מהדורא ט', אות צט) אז דער שפין האט זיבן פיס אנטקעגן די זיבן פעלקער וואס איז אנטקעגן די זיבן קליפות, און דערפאר שטייט פון הייליגן אריז"ל (סידור רבי שבתי כוונת ערב שבת, דבור המתחיל יתקן הבית), מען זאל אויסרייניגן יעדן ערב שבת די שטוב פון אלע שפינען וועבאכטס, און אזוי האבן די צדיקים זיך געפירט, זיי האבן זיך אליין מטריח געווען אויסצורייניגן די שטוב פון די שפינען וועבאכטס, ווייל די קליפה איז אנטקעגן שבת וואס איז ז' מידות דקדושה, מלכות, ארץ הקודש, און דער שפין איז אנטקעגן שבת קודש.

נאך אן אינטערעסאנטע זאך ברענגט ער (דארט), אז אפילו נאכדעם וואס מען הרג'עט די שפין - שאקלען זיך די פיס; דאס איז א זאך וואס מען זעט נישט ביי אנדערע באשעפענישן, דאס איז די כח פון די טומאה פון די קליפות. און מען דערציילט אז דער הייליגער מונקאטשער רב פלעגט זיך אליין אויפשטעלן אויף א בענקל און פארברענט די שפינען וועבאכטס ווייל זיי האבן פארברענט דעם בית המקדש, עיין שם (עיין דרכי חיים ושלום, אות תתרפ).

דער אייבערשטער זאל העלפן זאלסט האבן הצלחה אין אלע ענינים.