תוכן השאלה
לכבוד דער ראש ישיבה שליט"א,
איך האב געזען אז מוהרא"ש שרייבט אז מען זיך זייער היטן די מחשבות וואס מען טראכט, ספעציעל א חתן ווען ער שטייט אונטער די חופה.
ליידער בין איך אסאך נכשל געווארן אין קוקן שרעקליכע זאכן וואס מען טאר נישט קוקן, און איך האב מורא אז פונקט אין די געהויבענע צייט אונטער די חופה, ווען איך דארף זיך נאך מער היטן וואס איך טראכט, וועלן זיך דוקא דעמאלט מתגבר זיין אויף מיר שלעכטע מחשבות; וואס קען איך טון דערצו?
יישר כח
תשובה מאת הראש ישיבה שליט"א:
יום ד' פרשת במדבר, ראש חודש סיון, מ"ה לעומר, שנת תשפ"ה לפרט קטן
מיין טייערער ליבער ... נרו יאיר
איך האב ערהאלטן דיין בריוו.
ערשטנס זאלסטו וויסן אז די יום החופה איז זייער א הייליגע טאג, מען איז זוכה צו מחילת עוונות. מוהרא"ש זאגט נאך פונעם הייליגן צדיק דער ראפשיצער רב זכותו יגן עלינו (קונטרס יום הנישואין, סימן א), יום החופה איז אזא הייליגע טאג, חתן כלה וואלטן געקענט אויסבעטן גרויסע זאכן פאר זיך און פאר אלעמען, נאר א שאד מען האט דאס געגעבן פאר קליינע קינדער.
איך בעט דיר זייער זאלסט נישט זיין פארנומען מיט דיין עבר טאג און נאכט, איין מאל א טאג זאלסטו זיך באשטימען א צייט וואס דו טוסט תשובה, און א גאנצן טאג זאלסטו נאר זיין פרייליך; זיכער יעצט ווען דו גייסט חתונה האבן, דו גייסט מאכן רוען די שכינה - זאלסטו נאר זיין פרייליך. אזוי ווי דער הייליגער רבי האט אמאל נאכגעזאגט פאר א חתן דאס וואס חכמינו זכרונם לברכה זאגן (כתובות יז.): "כֵּיצַד מְרַקְּדִין לִפְנֵי הַכַּלָּה", דער רבי האט אים דאס מסביר געווען: "כֵּיצַד 'מְרַקְּדִין וּמְדַלְּגִין' עַל מַה שֶּׁהָיָה לִפְנֵי הַכַּלָּה, הַיְנוּ לִפְנֵי הַחֲתֻנָּה", מרקדים איז טייטשט טאנצן און שפרינגען; מען דארף איבערשפרינגען וואס איז געווען פאר די חתונה; דאס הייסט, אז א חתן דארף פארגעסן זיין גאנצע עבר און אנהויבן פונדאסניי (חיי מוהר"ן, סימן תקפו).
אונטער די חופה זאלסטו בעטן פאר ערליכע געזונטע הייליגע דורות און פאר אידישע קינדער. אז מען איז פארנומען צו דאנקען און בעטן - איז נישטא קיין צייט פאר נישט גוטע מחשבות. דער רבי זאגט (לקוטי מוהר"ן חלק א', סימן רלג): "הַכְּלָל שֶׁאִי אֶפְשָׁר בְּשׁוּם אֹפֶן בָּעוֹלָם שֶׁיִּהְיוּ שְׁנֵי מַחֲשָׁבוֹת בְּיַחַד בְּפַעַם אֶחָד", עס איז נישט שייך מען זאל טראכטן צוויי מחשבות אויף איין מאל, "עַל כֵּן בְּקַל יְכוֹלִין לְגָרֵשׁ מַחֲשָׁבוֹת רָעוֹת רַק בְּשֵׁב וְאַל תַּעֲשֶׂה, דְּהַיְנוּ שֶׁלֹּא לַחֲשֹׁב אוֹתוֹ הַמַּחֲשָׁבָה, רַק לַחֲשֹׁב אֵיזֶה מַחֲשָׁבָה אַחֶרֶת בְּתוֹרָה אוֹ עֲבוֹדָה, אוֹ אֲפִלּוּ מַשָּׂא וּמַתָּן, כִּי אִי אֶפְשָׁר שֶׁיִּהְיוּ שְׁנֵי מַחֲשָׁבוֹת בְּיַחַד בְּשׁוּם אֹפֶן", ממילא איז זייער גרינג נישט צו טראכטן קיין שלעכטע מחשבות דורכדעם וואס מען נעמט אריין אין זיך א גוטע מחשבה, מען טראכט פון תורה, תפילה אדער אפילו פון ביזנעס, אזוי גייט פון זיך אליין אוועק די שלעכטע מחשבה.
דער אייבערשטער זאל העלפן זאלסט האבן הצלחה אין אלע ענינים.
א גוטן חודש.